JA̰A̰ 6 - Bibəl ta Sar̄

Jeju adə̄ de gə̄ dūbú mí yá̰a̰ kəsa

¹ Gō yá̰a̰ gə̄ ń toō tə́ anī, Jeju aw̄ gidə bā bo kə́ Galile tə́ ń rīn kə́ rang na i Tiberiadə ní.

² Kósə de gə̄ ngá̰ý unən̄ gōn, tɔdɔ̄ nin̄-a̰ā̰n̄ yá̰á̰ kə́ yáā gə̄ ń ni-rāā kə ngé mo̰y gēé ní.

³ Jeju al̄ dɔ mbal̄ tə́, ba ndi tū tə́ noō kə ngé ndóō yá̰a̰ yān gēé.

⁴ Pákə ń i nāā yā Jipə gə̄ ní dɔ i ngɔr.

⁵ Jeju ɔr̄ dɔn dɔɔ́, a̰a̰ kósə de kə́ ngá̰ý gə̄ ń a reēn̄ kə̄ rɔ̄n tə́ ní anī, əda Pilipə na: J-a jə-mangiī mápa i rá n j-a j-adī de gə̄ ń toō kadə̄ əsan̄ ní?

⁶ Ni-əda najə̄ ní i yā nāānəń, tām̄ ni-ger̄ yá̰á̰ ń nəkɔ́ a rāā yā rāā ní.

⁷ Pilipə tél ədan na: Mápá kə́ kum gúrsə dūbú kutə gə̄gē a tɔ́sə̄ dɔdə́ yā kadə̄ de gə̄ kógə̄ḿ kógə̄ḿ əngen̄neé bə̄dē mápa kə dɔdə́ gēé alé.

⁸ Nge ndóō yá̰a̰ yān kógə̄ḿ, adə̄ i Andəre kə́ ngōkó̰o̰ Simo̰ Piyer, ədan na:

⁹ Ngōn̄ kógə̄ḿ ndi laā kə mápá mí ō, kə ngán kānjə̄ gə̄ jōó ō, ba nge ń noō i rí tām̄ yā de kə́ ngá̰ý gə̄ ń toō tə́.

¹⁰ Jeju əda na: Ədaīdə́ ādə̄ ndin̄ nang tə́. Mu kə́ mbōl̄ i ngá̰ý loo ngeé ń noō tə́. Adə̄ de gə̄ ní ndin̄ nang tə́, dəngam gə̄ asən̄ dūbú mí.

¹¹ Jeju taā mápá kə́ mí gə̄, ndadə̄ Nə́ɓā dɔ tə́, ba nə̄ɓō de gə̄ ń ndin̄ nang tə́ ní, ni-adə̄də́ kānjə̄ ō. Adə̄də́ ngá̰ý tītə̄ ń kemdə́ nin̄ kɔ́ gə̄ gḛy ní.

¹² Dan ń nin̄-ndānə̄n̄ anī, ni-əda ngé ndóō yá̰a̰ yān gə̄ na kə kánə̄n̄ gotə mápa ń na̰y ní ba kadə̄ ta kógə̄ḿ kə tḭ̄ḭ̄ alé.

¹³ Tā anī nin̄-kánə̄n̄, adə̄ mápá kə́ mí gə̄ ń de gə̄ əsan̄ ní, ɔyn̄ gotə ń na̰yn̄ ní rosə dōbə̄ kutə gidə i jōó.

¹⁴ Loo ń de gə̄ a̰ā̰n̄ yá̰á̰ kə́ yáā ń Jeju rāā ní anī, ədan̄ na: Nge koō ta ń kadə̄ reē dɔ nang tə́ ní i deē ń toō rɔ̄kum.

¹⁵ Dan ń Jeju ger̄ kadə̄ a reēn̄ yā kəhɔ kəndān mban̄g anī, tél ɔr̄ rɔ̄n aw̄ dɔ mbal̄ tə́ gogə́ kə kérneé.

Jeju njə̄rā dɔ bā bo tə́

¹⁶ Dan ń loo tíbə anī, ngé ndóō yá̰a̰ yān gə̄ aw̄n̄ ta bā bo tə́.

¹⁷ Nin̄-alə̄n̄ kem toó, yā teē bā kə̄ dām̄ kə́ Kapernaum tə́. Loo ndul kɔ̄ɔ́, banī Jeju ugə̄ rɔ̄də́ tə́ aĺ ɓáý.

¹⁸ Nél əla ngá̰ý, adə̄ bəngál man̄ bā ḭḭ pukətu pukətu.

¹⁹ Nin̄-nēlə̄n̄ to asə kum mbang kógə̄ḿ, pá tá a̰ā̰n̄ Jeju a njə̄rā dɔ bā bo tə́ a reē kə̄ kadə to tə́, adə̄ ɓōĺ rāādə́.

²⁰ Banī Jeju ədadə́ na: I mā ba ī-ɓōlíī alé.

²¹ Beé tā anī nin̄-ndigən̄ kunən kem toó, banī kə̄ ta jī tə́ noō to ɔtə̄ kum kā̰ā̰ tə́, loo ń nin̄ a aw̄n̄ kə̄ tū tə́ ní tə́.

Kósə de gə̄ sāān̄ Jeju

²² Teē kə ndɔ̄ kə́ noō anī, kósə de gə̄ ń dəban̄ gidə bā bo tə́ ní, a̰ā̰n̄ kadə̄ to i kógə̄ḿ beē ngóy ba kə́ rang gətóo ō, kadə̄ Jeju al̄ kem to ní tə́ kə ngé ndóō yá̰a̰ yān gēé alé, ba i nin̄ kɔ́ gə̄ n aw̄n̄ kə kéŕdə́ ní ō.

²³ Banī to kə́ rang gə̄ ḭḭn̄ ɓē kə́ Tiberiadə tə́, reē ugə̄n̄ kadə loo ń Kɔ́ɔ̄ɓē ndadə̄ Nə́ɓā dɔ mápá tə́ tū tə́ ba adə̄də́ kadə̄ əsan̄ ní.

²⁴ Loo ń kósə de gə̄ a̰ā̰n̄ kadə̄ Jeju nin̄ kə ngé ndóō yá̰a̰ yān gēé gətóon̄ anī, nin̄-alə̄n̄ kem to gə̄ tə́, ba aw̄n̄ Kapernaum sāā Jeju tə́.

Jeju i mápá kə́ nge rāā kadə̄ deē ndi kə kumneé

²⁵ Loo ń nin̄-əngenən̄ gidə bā bo tə́ anī, ədanən̄ na: Ngoljí, ūgə̄ laā i rə́ngáý tə́?

²⁶ Jeju tél ədadə́ na: Ādə̄ m-ə́dásí najə̄ kə́ bo ngá̰ý, ā ī-sāāmī i tām̄ ka̰a̰ ń á̰a̰ī yá̰á̰ kə́ yáā ní alé, banī i tām̄ mápá ń ə́sa ī-ndānī ní tə́.

²⁷ Ī-lōōī rāā kəla tām̄ yā yá̰a̰ kəsa kə́ a nujə kɔ̄ɔ́ tə́, banī ī-rāāī kəla tām̄ yā yá̰a̰ kəsa kə́ a to tām̄ yā ndi kə kumuú kə́ ngándáńg tə́. Yá̰a̰ kəsa nge ń noō ní Ngōn̄ Deē a adə̄sí, tɔdɔ̄ i ni n Bɔbə̄n Nə́ɓā ɔjə kə̄ ndágá kadə̄ n-əla seneé rɔ̄kum ní.

²⁸ Nin̄-ədan̄ na: I rí n kə jə-rāā tá kə jə-rāań kəla yā Nə́ɓā ní?

²⁹ Jeju tél ədadə́ na: Kəla yā Nə́ɓā i kadə̄ ī-taāī kem nge ń Nə́ɓā əlan ní.

³⁰ Anī nin̄-tél ədan̄ na: Yá̰á̰ kə́ yáā ń ā ī-rāā yā kadə̄ j-a̰a̰ tá jə-taāń kemií ní i rí? Kəla rāāí i rí?

³¹ Kaají gə̄ əsan̄ mána kem dəla loo tə́ tītə̄ ń ndangən̄neé na ni-adə̄də́ mápá kə́ ḭḭ dɔ rā̰ tə́ adə̄ əsan̄ ní.

³² Ādə̄ m-ə́dásí najə̄ kə́ bo ngá̰ý, i Moijə n adə̄sí mápá kə́ ḭḭ dɔ rā̰ tə́ ní alé, banī i Bɔbə́ḿ n adə̄sí mápá kə́ ḭḭ dɔ rā̰ tə́ kə́ rɔ̄kum ní.

³³ Tɔdɔ̄ mápa yā Nə́ɓā i nge ń ḭḭ dɔ rā̰ tə́ reē dɔ nang tə́, ba rāā adə̄ de kə́ dɔ nang tə́ gə̄ ndin̄ kə kumdə́ ní.

³⁴ Nin̄-ədanən̄ na: Kɔ́ɔ̄ɓē, ādə̄jí mápa ngeé ń noō kə ndɔ̄ gə̄.

³⁵ Jeju tél ədadə́ na: I mā n i mápá kə́ nge rāā kadə̄ deē ndi kə kumneé ní. Nge ń reē rɔ̄ḿ tə́ anī, ɓō a rāān aĺ bátə́ ō, nge ń taā kemḿ anī, kəndā a rāān aĺ bátə́ ō.

³⁶ Banī m-ə́dásí na sḭḭ̄ á̰a̰mī ɓá tā ba ī-taāī kemḿ alé.

³⁷ De gə̄ malang ń Bɔbə́ḿ adə̄m̄ sedə́ ní, a reēn̄ rɔ̄ḿ tə́, ba deē ń reē rɔ̄ḿ tə́ ní, m-ā m̄-tə̄ɓān ndágá alé.

³⁸ Tɔdɔ̄ m-ḭ́ḭ dɔ rā̰ tə́ m̄-reē dɔ nang tə́ i yā rāā yá̰a̰ kə gō kem ndigə yāḿ alé, banī i yā rāā yá̰a̰ kə gō kem ndigə yā Nge ń əlam̄ ní.

³⁹ Kem ndigə yā Nge ń əlam̄ ní i kadə̄ m̄-tḭ̄ḭ̄ ta deē kógə̄ḿ dan ngé gə̄ ń ni-adə̄m̄ tə́ ní alé, ba i kadə̄ oyn̄ a m̄-ndól̄də́ ta ngóy ndɔ̄ gə̄ tə́.

⁴⁰ Tɔdɔ̄ kem ndigə yā Bɔbə́ḿ i kadə̄ náā nəkɔ́ ń a̰a̰ Ngōn̄ ba taā kemən anī, ndi kə kumneé ngándáńg ō, mā m-ā m-ndólə̄n ta ngóy ndɔ̄ gə̄ tə́ ō.

⁴¹ Loo ń noō tə́ Jipə gə̄ yṵ́rə̄n̄ najə̄ dɔ Jeju tə́, tām̄ kəda ń əda na ni na i mápá kə́ ḭḭ dɔ rā̰ tə́ reē dɔ nang tə́ ní.

⁴² Nin̄-ədan̄ na: Deē ń toō i Jeju ngōn̄ Jəjep aĺ a? Jə-gerī bɔbə̄n ō kó̰o̰n ō aĺ a? I ba̰ý á əda na n-ḭḭ na i dɔ rā̰ tə́ n n-reē dɔ nang tə́ ní?

⁴³ Jeju tél ədadə́ na: I lōōī yṵ́r̄ najə̄ dɔ dáńsí tə́.

⁴⁴ Deē kógə̄ḿ kə́ asə reē rɔ̄ḿ tə́ kanjə̄ kadə̄ i Bɔbə́ḿ ń əlam̄ ní n ndɔ́rə̄n kə̄ rɔ̄ḿ tə́ ní gətóo. Ba deē ń reē rɔ̄ḿ tə́ ní, oy a m-ā m̄-ndólə̄n ta ngóy ndɔ̄ gə̄ tə́.

⁴⁵ I kə́ ndang kem makətūbə̄ yā ngé koō ta gə̄ tə́ na: Nin̄ malang ní Nə́ɓā a ndóōdə́ yá̰a̰. Náā nəkɔ́ ń oō ta Bɔbə̄ Ngōn̄ ō, ndóō yá̰a̰ yān ō ní, a reē rɔ̄ḿ tə́.

⁴⁶ Deē kógə̄ḿ kə́ a̰a̰ Bɔbə̄ Ngōn̄ gətóo, banī i nge ń ḭḭ rɔ̄ Nə́ɓā tə́ ní tá ngóy, i ni ngóy n a̰a̰ Bɔbə̄ Ngōn̄ ní.

⁴⁷ Ādə̄ m-ə́dásí najə̄ kə́ bo ngá̰ý, nge ń taā kem ní, aw̄ kə ndi kə kumneé kə́ ngándáńg.

⁴⁸ Mā i mápá kə́ a rāā kadə̄ deē ndi kə kumneé.

⁴⁹ Kaasí gə̄ əsan̄ mána kem dəla loo tə́, ba nin̄-oyn̄ kɔ̄ɔ́.

⁵⁰ Ngé ń toō i mápá kə́ ḭḭ dɔ rā̰ tə́ reē dɔ nang tə́, yā kadə̄ nge ń əsa ní a oy alé.

⁵¹ Mā i mápá kə́ kə kumuú kə́ ḭḭ dɔ rā̰ tə́ reē dɔ nang tə́. Ré deē əsa mápá ń toō anī, a ndi kə kumneé ngándáńg. Ba mápá ń m-ā m-ādə̄ ní, i dā̰ rɔ̄ḿ. M-ādə̄ i yā kadə̄ de kə́ dɔ nang tə́ gə̄ ndin̄neé kə kumdə́.

⁵² Tām̄ najə̄ ń toō tə́ ní Jipə gə̄ nējə̄n̄ naā najə̄ ngá̰ý dɔ tə́ dɔ dáńdə́ tə́, ədan̄ na ké i ba̰ý tā á deē ń toō a adə̄də́ dā̰ rɔ̄n kadə̄ n-əsan̄ wa.

⁵³ Jeju ədadə́ na: Ādə̄ m-ə́dásí najə̄ kə́ bo ngá̰ý, ré ə́saī dā̰ Ngōn̄ Deē aĺ ō, ā̰yī mósən aĺ ō anī, ā āwī kə ndi kə kumuú kemsí tə́ alé.

⁵⁴ Nge ń əsa dā̰ḿ ō, a̰ȳ mósə́ḿ ō ní, aw̄ kə ndi kə kumuú kə́ ngándáńg, ba mā m-ā m̄-ndólə̄n ta ngóy ndɔ̄ gə̄ tə́.

⁵⁵ Tɔdɔ̄ dā̰ḿ i yá̰a̰ kəsa kə́ rɔ̄kum ō, mósə́ḿ i yá̰a̰ ka̰ȳ kə́ rɔ̄kum ō.

⁵⁶ Deē ń əsa dā̰ḿ ō, a̰ȳ mósə́ḿ ō ní, ni-ndi kemḿ tə́ ō, mā m̄-ndi kemən tə́ ō.

⁵⁷ Ba tītə̄ ń Bɔbə́ḿ ń əlam̄ ní ndi kə kumneé ō, mā m̄-ndi kə kumḿ i kə ta kūl̄ Bɔbə́ḿ ō ní, deē ń əsam̄ ní a ndi kə kumneé kə kūlə̄ḿ mā ō.

⁵⁸ Mápá ń ḭḭ dɔ rā̰ tə́ reē dɔ nang tə́ ní n toó. Ni to i tītə̄ máná ń kaasí gə̄ əsan̄ ní alé. Nin̄-əsan̄ mána ba oyn̄ kɔ̄ɔ́. Nge ń əsa mápá ń toō ní, a ndi kə kumneé ngándáńg.

⁵⁹ Jeju əda najə̄ gə̄ ń toō i kem kújə́ kán̄ naā tə́, dan ń ni a ndóōń de gə̄ yá̰a̰ Kapernaum ní.

Najə̄ kə́ dɔ ndi kə kumuú kə́ ngándáńg tə́

⁶⁰ Loo ń ngé ndóō yá̰a̰ yān gə̄ oōn̄ najə̄ ń toō ní anī, ngá̰ý gə̄ dandə́ tə́ ədan̄ na najə̄ ń toō na ngan̄g ngá̰ý, ní ké i náā n asə koō wa.

⁶¹ Jeju ger̄ kemən tə́ kadə̄ ngé ndóō yá̰a̰ yān gə̄ yṵ́rə̄n̄ najə̄ dɔ najə̄ ń toō tə́ adə̄ ədadə́ na: Najə̄ ń toō əgasí bə̄dē tə́ a?

⁶² Ba ré á̰a̰ī Ngōn̄ Deē aw̄ ndi dɔɔ́ loo ndin kə́ kété tə́ ní ā ī-rāāī i ba̰ý?

⁶³ I Ndíl n i nge rāā kadə̄ deē ndi kə kumneé ní, ba dā̰ rɔ̄ rāā yá̰a̰ alé. Najə̄ gə̄ ń m-ə́dásí ní i Ndíl ō, i ndi kə kumuú ō.

⁶⁴ Banī ngé kə́rēý gə̄ dɔ dáńsí tə́ taān̄ kem alé. Jeju əda beé i tɔdɔ̄ ta kəla gíŕ tə́ ní, ni-ger̄ ngé gə̄ ń taān̄ kem aĺ ní ō, deē ń a əlan jī de gə̄ tə́ ní ō.

⁶⁵ Ni-əda na: I tām̄ najə̄ ń toō tə́ n m-ə́dásí na deē kógə̄ḿ kə́ asə reē rɔ̄ḿ tə́ kanjə̄ kadə̄ i Bɔbə́ḿ n adə̄n ta róbə́ ní gətóó ní.

⁶⁶ Dan ngeé ń noō tə́ ní, ngé ndóō yá̰a̰ yān gə̄ ngá̰ý ɔrə̄n̄ rɔ̄də́ rɔ̄n tə́ kɔ̄ɔ́, ba njə̄rān̄ seneé to̰ alé.

⁶⁷ Anī Jeju əda ngé kə́ kutə gidə i jōó gə̄ na: Ba sḭḭ̄, ī-gḛyiī kaw̄ aĺ a?

⁶⁸ Simo̰ Piyer tél ədan na: Kɔ́ɔ̄ɓē, j-aw̄ i kə̄ rɔ̄ náā tə́? Ḭ̄ āw̄ kə najə̄ gə̄ kə́ dɔ ndi kə kumuú kə́ ngándáńg tə́.

⁶⁹ Ba jḭḭ jə-taā kem ō, jə-ger̄ ō, kadə̄ ḭ̄ i nge kə́ táĺ yā Nə́ɓā.

⁷⁰ Jeju tél ədadə́ na: Sḭḭ̄ kə́ kutə gidə i jōó gə̄ ní, i mā n m̄-gə̄rāsí ní aĺ a? Ba deē kógə̄ḿ dansí tə́ i nge kəla yā diabəl.

⁷¹ Ni ɔr̄ i najə̄ yā Judas ngōn̄ Simo̰ Iskariot ń i nge kə́ kógə̄ḿ kə́ dan ngé kə́ kutə gidə i jōó gə̄ tə́ ní, tɔdɔ̄ i ni n a əlan jī de gə̄ tə́ ní.