JA̰A̰ 21 - Bibəl ta Sar̄

Jeju teē hɔy kə̄ rɔ̄ ngé ndóō yá̰á̰ kə́ sīrí gə̄ tə́

¹ Gō yá̰a̰ gə̄ ń noō tə́ anī, Jeju teē hɔy ɓáý to̰ kə̄ rɔ̄ ngé ndóō yá̰a̰ gə̄ tə́, kadə bā bo kə́ Tiberiadə tə́. Ni teē hɔy kə̄ rɔ̄də́ tə́ i beé.

² Simo̰ Piyer ō, Toma ń a ɓāŕnən̄ na i ndəngā ní ō, Natanayel kə́ Kana gō nang kə́ Galile tə́ ō, ngán Jebede gə̄ ō, ngé ndóō yá̰á̰ kə́rēý gə̄ jōó ō, ndin̄ naā tə́ loo kógə̄ḿ.

³ Anī Simo̰ Piyer ədadə́ na: M-āw̄ kānjāá. Anī nin̄-ədanən̄ na: J-a j-aw̄ seí ō. Adə̄ nin̄-teē aw̄ alə̄n̄ toó, banī ndɔ̄ɔ́ ndɔ̄ ngeé ń noō tə́ ní, nin̄-əhɔn̄ yá̰á̰ kógə̄ḿ aĺ bátə́.

⁴ Loo tīī anī Jeju ra ta bā tə́, banī ngé ndóō yá̰a̰ yān gə̄ gerə̄n̄ kadə̄ i ni alé.

⁵ Jeju ədadə́ na: Balsáa gə̄, ə́hɔī kānjə̄ sḛ́ý a? Nin̄-tél ədanən̄ na kānjə̄ gətóo.

⁶ Ni ədadə́ na kə ənīn̄ réng kə̄ dām̄ kə́ ko̰ó̰ tə́ ɓáa na a əngen̄. Loo ń noō tə́ nin̄-ənīn̄, banī asən̄ ndɔ́r̄ alé, tɔdɔ̄ kānjə̄ i ngá̰ý kemeé.

⁷ Anī nge ndóō yá̰á̰ ń Jeju tárən ngá̰ý ní əda Piyer na: I Kɔ́ɔ̄ɓē. Dan ń Simo̰ oō na i Kɔ́ɔ̄ɓē anī, əla kūbə̄ rɔ̄n tə́, tām̄ rɔ̄n i karī, ba ḭḭ bal əsō kum bā bo tə́.

⁸ Gotə ngé ndóō yá̰a̰ gə̄ tél reēn̄ kə toó. Nin̄-ndɔ́rə̄n̄ réńg ń kānjə̄ rosə kem ní, tɔdɔ̄ ta gógə i sa̰y alé, asə métər ɓú kógə̄ḿ.

⁹ Dan ń nin̄-jə̄ngān̄ nang tə́ ba teēn̄ kə̄ ndágá anī, a̰ā̰n̄ hor miī, ba kānjə̄ ō, mápa ō, to dɔ tə́.

¹⁰ Jeju ədadə́ na: Ī-reēī kə kānjə̄ gə̄ ń ə́hɔī ngɔr ɓáý ní.

¹¹ Adə̄ Simo̰ Piyer tél al̄ gogə́ kem toó, ba ndɔ́r̄ réng ń kānjə̄ rosə kem ní aw̄ń ndágá. Kānjə̄ kə́ bo bo gə̄ i ɓú kə kutə mí kə kalən kə́ mətá rosən̄ réńg ní. Kānjə̄ i ngá̰ý ɓá tā, ba réńg gān̄g alé.

¹² Jeju ədadə́ na: Ī-reē ə́saī yá̰a̰. Dan ngé ndóō yá̰a̰ gə̄ tə́ ní, deē kógə̄ḿ kə́ nāā dəjen na ḭ̄ i náā wa ní gətóo, tɔdɔ̄ nin̄-gerə̄n̄ kadə̄ i Kɔ́ɔ̄ɓē.

¹³ Loo ń noō tə́ Jeju reē un mápa adə̄də́, ni-rāā tītə̄ ń noō kə kānjāá ō.

¹⁴ Jeju əla gír teē hɔy kə̄ rɔ̄ ngé ndóō yá̰a̰ gə̄ tə́ i ndɔ̄ ń ni ndóləń dan de kə́ koy gə̄ tə́ ní, nge ń toō i nja kə́ nge ko̰ mətá.

Jeju nin̄ kə Piyer

¹⁵ Dan ń nin̄-əsan̄ yá̰a̰ oy anī, Jeju dəje Simo̰ Piyer na: Simo̰ ngōn̄ Ja̰a̰, ī-tárəm̄ tɔȳ madí gə̄ ń toō a? Anī Simo̰ Piyer tél ədan na: A̰á̰ā̰ Kɔ́ɔ̄ɓē, ī-ger̄ kadə̄ nelə̄m̄ seí. Anī Jeju ədan na: Ūl̄ ngán batə̄ yāḿ gə̄.

¹⁶ Ni ədan nja kə́ nge ko̰ jōó na: Simo̰ ngōn̄ Ja̰a̰, ī-tárəm̄ tɔȳ madí gə̄ ń toō a? Ni-tél ədan na: A̰á̰ā̰, Kɔ́ɔ̄ɓē ī-ger̄ kadə̄ nelə̄m̄ seí. Anī Jeju ədan na: Ūl̄ batə̄ yāḿ gə̄.

¹⁷ Ədan nja kə́ nge ko̰ mətá na: Simo̰ ngōn̄ Ja̰a̰, ī-tárəm̄ a? Rɔ̄ Piyer nelə̄n alé, tām̄ dəje ń Jeju dəjen nja kə́ nge ko̰ mətá na ké tárən wa ní. Ba ni-tél ədan na: Kɔ́ɔ̄ɓē, ī-ger̄ yá̰a̰ malang, ī-ger̄ kadə̄ nelə̄m̄ seí. Anī Jeju ədan na: Ūl̄ batə̄ yāḿ gə̄.

¹⁸ Ādə̄ m-ə́daī najə̄ kə́ bo ngá̰ý, dan ń ī-na̰y balsáá ɓáý ní, i īkɔ́ n ə́hɔ ɓōdīí kə ndāŕ ō, āw̄ loo ń kemií ndigə ní tə́ ō. Banī loo ń ā ī-tɔgə ɓə́ga anī, ā ī-sə́ra jīí, ba i de kə́ rang n a əhɔ ɓōdīí kə ndāŕ ō, a aw̄ seí loo ń kemií ndigə aĺ tə́ ní ō.

¹⁹ Ni-əda najə̄ ń noō i yā kɔjəń loo koy ń Piyer a oy yā kɔsəń gɔn Nə́ɓā ní. Gō tə́ anī Jeju ədan na: Ún gōḿ.

Jeju nin̄ kə nge ndóō yá̰á̰ ń ni tárən ní

²⁰ Dan ń Piyer mbel anī, a̰ā̰ kadə̄ nge ndóō yá̰á̰ ń Jeju ń tárən ní a un gōdə́. I nge ń nōr̄ kə̄ dɔ Jeju tə́ loo kəsa yá̰á̰ kə́ loo tíbí tə́ á dəjen na ké i náā n a əlan jī de gə̄ tə́ wa ní.

²¹ Dan ń Piyer a̰a̰n anī, dəje Jeju na: Kɔ́ɔ̄ɓē, ba ni ní, i rí n a rāān?

²² Jeju tél ədan na: Ré m̄-ndigə kadə̄ ni-ndi kə kumneé bátə́ kadə̄ m̄-tél m̄-reē m-ūgəń anī usiī i rí? Ḭ̄ ún gōḿ.

²³ Əla gír i dɔ najə̄ ń noō tə́ n de gə̄ ədan̄ naā kə̄ kété dɔ dáń ngákó̰o̰ naā gə̄ tə́ na nge ndóō yá̰á̰ ń noō na a oy alé. Kə́ rɔ̄kum tə́ tā anī najə̄ ń Jeju əda Piyer ní n noó alé, ədan na a oy aĺ alé, ba na: Ré m̄-gḛy kadə̄ ni-ndi kə kumneé bátə́ kadə̄ m̄-tél m̄-reēń anī usiī i rí?

²⁴ I nge ndóō yá̰a̰ nəkɔ́ ń noō n ɔr̄ najə̄ kə́ kum tə́ yā yá̰a̰ gə̄ ń toō, ba ndang makətūbūú ní, ba jə-ger̄ kadə̄ najə̄ kə́ kum tə́ yān i kə́ rɔ̄kum.

Kán̄ ta najə̄

²⁵ Jeju rāā yá̰á̰ kə́ rang gə̄ i ngá̰ý ɓáý to̰. Ré ndangən̄ yá̰a̰ gə̄ ń toō kógə̄ḿ kógə̄ḿ malang makətūbūú anī, m̄-gír̄ kadə̄ loo kə́ dɔ nang tə́ gə̄ malang asən̄ kadə̄ əndān̄ makətūbə̄ gə̄ ń toō tū tə́ alé.