JA̰A̰ 20 - Bibəl ta Sar̄

Bəlo ń dubə̄n̄ Jeju tū tə́ ní kem i karī

¹ Kə ndɔ̄ dəmásə ta gír loo tə́, dan ń loo ndul ɓáý anī, Mari kə́ Magədala aw̄ ta bəlo yo tə́. Ni-a̰a̰ kadə̄ mbal̄ i kə́ kun kɔ̄ɔ́ ta bəlo tə́.

² Ni a̰ȳ ngɔ̄də̄ aw̄ gō Simo̰ Piyer nin̄ kə nge ndóō yá̰á̰ kə́ rang ń Jeju tárən ní tə́, ədadə́ na ɔrə̄n̄ nīń Kɔ́ɔ̄ɓē bəloó kɔ̄ɔ́ ba na n-ger̄ loo ń ənīnən̄ tū tə́ ní alé.

³ Piyer nin̄ kə nge ndóō yá̰á̰ kə́ rang ní a aw̄n̄ kə̄ ta bəlo yo tə́.

⁴ Nin̄ jōó mbak a̰ȳn̄ ngɔ̄də̄, ba nge ndóō yá̰á̰ kə́ rang ní ngɔ̄də̄ tɔȳ Piyer, adə̄ ɔtə̄ kété ta bəlo tə́.

⁵ Ni-rodə̄, go̰ō̰ kem bəlo anī, a̰a̰ kūbə̄ ń ɓír̄nəń nin̄ ní to nang tə́, banī ni udə kem bəlo yo tə́ alé.

⁶ Simo̰ Piyer reē ɔtə̄ gō gogə́, ba mān̄ udə bəloó. Ni-a̰a̰ kəlā kūbə̄ gə̄ ń ɓír̄nəń nīń ní to nang tə́ ō,

⁷ a̰a̰ ta kūbə̄ ń ɓír̄nəń dɔ Jeju ní ō, ba ta kūbə̄ ní tá to i naā tə́ kə kəlā kūbə̄ gə̄ ń tṵ́ṵ̄nəń nīń ní alé, banī ɓír̄ ənīn̄ tayā loo kə́ rang tə́.

⁸ Loo ń noō tə́ nge ndóō yá̰á̰ kə́ rang ń ugə̄ ta bəlo tə́ kété ní udə kemeé ō. Ni a̰ā̰, anī taā kem.

⁹ Tɔdɔ̄ najə̄ ń ndangən̄ na i kadə̄ Jeju a ḭḭ kɔ̄ɔ́ dan de kə́ koy gə̄ tə́ ní, ngé ndóō yá̰a̰ gə̄ gerə̄n̄ kum aĺ ɓáý.

¹⁰ Gō tə́ anī, ngé ndóō yá̰á̰ kə́ jōó gə̄ ní tél aw̄n̄ gogə́ ɓēé.

Jeju teē hɔy kə̄ rɔ̄ Mari kə́ Magədala tə́

¹¹ Mari ra ta bəlo tə́ ndágá a nōō. Ni əga kumən kə̄ kem bəloó a a̰a̰ń loo kə nōō gēé.

¹² Anī a̰a̰ de kə́ dɔ rā̰ tə́ gə̄ jōó, kə́ o̰ō̰n̄ kūbə̄ kə́ ndaa gə̄, ndin̄ loo ń ənīn̄ nīń Jeju tū tə́ ní tə́, kógə̄ḿ i dɔ tə́, ba kə́rēý i nja tə́.

¹³ Nin̄-dəjen̄ najə̄ ədan̄ na: Dəyá̰, ā ī-nōō i rí? Ni-tél ədadə́ na: I tɔdɔ̄ unən̄ Kɔ́ɔ̄ɓē yāḿ kɔ̄ɔ́, ba m̄-ger̄ loo ń ənīnən̄ tū tə́ ní alé.

¹⁴ Dan ń ni a əda najə̄ ń noō ní tūr̄ rɔ̄n, anī a̰a̰ Jeju ra kə njan kə́ dɔɔ́, banī ger̄ kadə̄ i Jeju alé.

¹⁵ Jeju dəjen najə̄ ədan na: Dəyá̰, ā ī-nōō i rí? Ā ī-sāā i náā? Mari ɔjəń na i nge ndɔr̄ loo ní, adə̄ ədan na: Kɔ́ɔ̄ɓē, ré i ḭ̄ n únən anī, ɔ́jəm̄ loo ń ə̄nīn tū tə́ ní ādə̄ m-āw̄ m-únən.

¹⁶ Jeju ədan na: Mari! Anī Mari tūr̄ rɔ̄n, ba ədan kə ta Hebəro na: Rabuni, kumən na i ngoləḿ.

¹⁷ Jeju ədan na: Ɔ́dəm̄ alé, tɔdɔ̄ m-āw̄ rɔ̄ Bɔbə́ḿ tə́ aĺ ɓáý. Ba āw̄ ə́dá ngákó̰ó̰ḿ gə̄ na m-āw̄ kə̄ rɔ̄ Bɔbə́ḿ ń i Bɔbə̄sí ō, kə̄ rɔ̄ Nə́ɓā yāḿ ń i Nə́ɓā yāsí ō ní tə́.

¹⁸ Adə̄ Mari kə́ Magədala aw̄ əda ngé ndóō yá̰a̰ gə̄ na n-a̰a̰ Kɔ́ɔ̄ɓē. Gō tə́ anī ənīdə́ gotə najə̄ gə̄ ń ɔr̄ seneé ní.

Jeju teē hɔy kə̄ rɔ̄ ngé ndóō yá̰a̰ yān gə̄ tə́

¹⁹ Loo sɔlí kə ndɔ̄ nəkɔ́ ń noō ń i ndɔ̄ kə́ ta kəga dɔ yā ndɔ̄ kə́ sīrí gə̄ ní, ngé ndóō yá̰a̰ gə̄ ndin̄ kújú. Nin̄-rákə̄n̄ ta kújə dɔdə́ tə́ adə̄ ngan̄g míŕ míŕ, tɔdɔ̄ nin̄-ɓōlə́n̄ i Jipə gə̄. Anī Jeju reē ra dandə́ tə́, ba ədadə́ na: Ādī kemsí sɔl̄ lɔm.

²⁰ Dan ń ni-ədadə́ najə̄ ń noō oy anī, ɔjədə́ jīn gə̄ ō, kadən ō. Dan ń ngé ndóō yá̰a̰ gə̄ a̰ā̰n̄ Kɔ́ɔ̄ɓē ní, rɔ̄də́ nel̄də́ ngá̰ý.

²¹ Jeju ədadə́ ɓáý to̰ na: Ādī kemsí sɔl̄ lɔm. Tītə̄ ń Bɔbə́ḿ əlam̄ ní, mā m-ə́lásí ō.

²² Gō najə̄ ń toō tə́ anī, ni əla tóo dɔdə́ tə́ ba ədadə́ na: Ī-taāī Ndíĺ kə́ Táĺ.

²³ Ngé gə̄ ń ā ī-māyī rɔ̄sí dɔ majaĺ yādə́ gə̄ tə́ ní, a əngen̄ mā̰ȳ rɔ̄. Ngé gə̄ ń ā ī-mbātíī mā̰ȳ rɔ̄sí dɔdə́ tə́ ní, a əngen̄ mā̰ȳ rɔ̄ alé.

Jeju nin̄ kə Toma

²⁴ Dan ń Jeju reē ní, Toma ń a ɓāŕnən̄ na i ndəngā á ni i nge kə́ kógə̄ḿ kə́ dan ngé kə́ kutə gidə i jōó gə̄ tə́ ní, ni i sedə́ alé.

²⁵ Anī ngé ndóō yá̰a̰ kə́rēý gə̄ ədanən̄ na n-a̰a̰n̄ Kɔ́ɔ̄ɓē. Banī ni ədadə́ na ré n-a̰a̰ tə́re do máyá̰ kə́ da jīn tə́ aĺ ō, ré n-əla ta ngōn̄ jīn gotə bəlo máyá̰ ní tə́ aĺ ō, ré n-əla jīn kadən tə́ aĺ ō anī, n-a n-taā kem alé.

²⁶ Ndɔ̄ sɔ́sɔ́ gō tə́ anī, ngé ndóō yá̰a̰ gə̄ ndin̄ kújú ɓáý to̰, banī Toma i sedə́. Nin̄ utə̄n̄ ta kújə kɔ̄ɔ́, banī Jeju reē ra dandə́ tə́ ədadə́ na: Ādī kemsí sɔl̄ lɔm.

²⁷ Gō tə́ anī ni-tél əda Toma na: Əla ta ngōn̄ jīí kə̄ laā ō, á̰a̰ jīḿ gə̄ ō. Ī-reē kə jīí kə̄ kété laā ə́la kadəḿ tə́. Ī-lōō gír taā kem aĺ tə́ ba ī-taā kem.

²⁸ Toma tél ədan na: Kɔ́ɔ̄ɓē yāḿ ō, Nə́ɓā yāḿ ō.

²⁹ Jeju ədan na: I tām̄ ka̰a̰ ń á̰a̰m̄ ní n ī-taāń kem ní a? Ngé gə̄ ń a̰a̰mə̄n̄ aĺ ba taān̄ kem ní, rɔ̄də́ nel̄də́.

Yá̰á̰ ń Ja̰a̰ ndang makətūbə̄ ń toō tāmən tə́ ní

³⁰ Jeju rāā yá̰á̰ kə́ rang gə̄ ngá̰ý kə́ to kɔr kum gə̄ ta kum ngé ndóō yá̰a̰ yān gə̄ tə́. Ndangən̄ yá̰a̰ gə̄ ní kem makətūbə̄ ń toō tə́ alé.

³¹ Banī ndangən̄ ngé gə̄ ń toō i yā kadə̄ ī-taāī kem kadə̄ Jeju i Kərist, ni i Ngōn̄ Nə́ɓā. Ba ré sḭḭ̄ ī-taāī kemən anī, ā ə́ngeī ndi kə kumuú kə ta kūl̄neé.