JA̰A̰ 13 - Bibəl ta Sar̄

Jeju tə́go nja ngé ndóō yá̰a̰ yān gə̄

¹ Kété no nāā Pákə tə́ ní, Jeju ger̄ kadə̄ kum mbang yān asə. I mbang ń kadə̄ əya̰ń de kə́ dɔ nang tə́ gə̄ ba aw̄ń rɔ̄ Bɔbə̄n tə́ ní. Ni ń tár deē yān gə̄ kə́ dɔ nang tə́ kə dɔ ndɔ̄ gə̄ ní, táŕdə́ mbóńg ta tɔ̄l̄ tə́.

² Jeju nin̄ kə ngé ndóō yá̰a̰ yān gēé ndi a əsan̄ yá̰á̰ kə́ loo tíbí. Diabəl əndā kem Judas Iskariot ngōn̄ Simo̰ tə́ kɔ̄ɔ́ ɓá kadə̄ əla Jeju jī de gə̄ tə́.

³ Jeju ger̄ kadə̄ Bɔbə̄n adə̄n yá̰a̰ malang ō, kadə̄ ni-ḭḭ i rɔ̄ Nə́ɓā tə́ ō, a tél i yā kaw̄ rɔ̄ Nə́ɓā tə́ ō.

⁴ Ni-ḭḭ dɔɔ́ ta kəsa tə́, ɔr̄ kūbə̄ yān kə́ dɔ madə̄ tə́ kɔ̄ɔ́, ba un kūbə̄ kɔl̄ rɔ̄ kógə̄ḿ do̰ō̰ń ɓōdə̄n.

⁵ Gō tə́ anī, ni-ɓōkə́ man̄ kem kārāá ba əla gíŕ tə́go nja ngé ndóō yá̰a̰ yān gə̄ ō, ɔl̄ kə kūbə̄ kɔl̄ rɔ̄ ń do̰ō̰ń ɓōdə̄n ní ō.

⁶ Dan ń ni-ugə̄ dɔ Simo̰ Piyer tə́ anī, Piyer ədan na: Ḭ̄ Kɔ́ɔ̄ɓē kə ī-tə́go njaḿ a?

⁷ Jeju tél ədan na: Kə́ ngɔŕ ń toō tə́ ní yá̰á̰ ń m̄-rāā toó ī-ger̄ alé, banī ndɔ̄ń tə́ anī ā ī-ger̄ kum.

⁸ Piyer ədan na: Kadə̄ ḭ̄ kə ī-tə́go njaḿ mā a, m-ɔ́də aĺ i kə́ bátə́ gə̄ tə́! Jeju tél ədan na: Ré m̄-tə́go njaí aĺ anī, ā ə́ngé yá̰a̰ yāḿ alé.

⁹ Simo̰ Piyer ədan na: Kɔ́ɔ̄ɓē, ré i beé anī, ā ī-tə́go i njaḿ ngóy alé, ā ī-tə́go jīḿ ō, dɔḿ ō.

¹⁰ Anī Jeju ədan na: Deē ń ndogə̄ man̄ kɔ̄ɔ́ ní, a tə́go rɔ̄n to̰ alé, tām̄ rɔ̄n malang i kə́ unjə̄ njáý njáý kɔ̄ɔ́. Sḭḭ̄ ūnjī ɓá tā, ba i sḭḭ̄ malang alé.

¹¹ Tɔdɔ̄ ni ger̄ deē ń a əlan jī de gə̄ tə́ ní, i tām̄ najə̄ ń noō tə́ n ni-əda na nin̄-unjə̄n̄ malang aĺ ní.

¹² Dan ń ni-tə́go njadə́ oy anī, un kūbə̄ yān əla rɔ̄n tə́ gogə́ ō, tél aw̄ ndi ta kəsa tə́ ō, ba ədadə́ na: Ī-gerī kum yá̰á̰ ń m̄-rāā sesí toō a?

¹³ Sḭḭ̄ ī-ɓāŕmī na i ngol nge ndóō de gə̄ yá̰a̰ ō, Kɔ́ɔ̄ɓē ō. Ba nge ń ə́daī noó majə, tɔdɔ̄ mā i nge ń noō.

¹⁴ Ré mā ń i Kɔ́ɔ̄ɓē ō, ngol nge ndóō de gə̄ yá̰a̰ ō ní, m̄-tə́go njasí anī, majə kadə̄ sḭḭ̄ ī-tə́goī nja naā ō.

¹⁵ Tɔdɔ̄ m-ɔ́jə́sí i yá̰á̰ kə́ yā kadə̄ ī-ndájī, kadə̄ ī-rāāī tītə̄ ń m̄-rāā sesí ní.

¹⁶ Ādə̄ m-ə́dásí najə̄ kə́ bo ngá̰ý, nge kəla bo tɔȳ kɔ́ɔ̄n aĺ ō, ngōmbang kəla bo tɔȳ deē ń əlan ní aĺ ō.

¹⁷ Kə́ ngɔr ń toō tə́ ní ī-gerī yá̰á̰ ní kɔ̄ɔ́, ba ré ī-rāāī beé anī, rɔ̄sí a nel̄sí.

¹⁸ M-ɔ̄r̄ i najə̄ yāsí sḭḭ̄ malang alé, m̄-ger̄ ngé gə̄ ń m̄-gə̄rādə́ ní. Banī i gáŕ kadə̄ najə̄ ń toō ń ndangən̄ kem makətūbə̄ tə́ ní udə gírí: Deē ń əsa yá̰a̰ seḿ ní, ɔr̄ gándən əɓamə̄ń.

¹⁹ M-ə́dásí ngɔr ń toō tə́ pá tá kadə̄ yá̰á̰ ní ugə̄ ɓáý, yā kadə̄ loo ń ugə̄ anī, ī-taāī kem kadə̄ Mā i Mā ń m̄-ndi noó ní.

²⁰ Ādə̄ m-ə́dásí najə̄ kə́ bo ngá̰ý, deē ń əhɔ deē ń m-ə́lan ní kə̄ rɔ̄n tə́ ní, əhɔm̄ i mā nəkɔ́ kə̄ rɔ̄n anī. Ba deē ń əhɔm̄ kə̄ rɔ̄n tə́ ní, əhɔ i nge ń əlam̄ ní kə̄ rɔ̄n tə́.

Jeju əda na Judas a əlan jī de gə̄ tə́

²¹ Dan ń Jeju ɔr̄ najə̄ gə̄ ń noō anī, ndílən ndi kə gōó alé. Ba ni-əda wáńg na: Ādə̄ m-ə́dásí najə̄ kə́ bo ngá̰ý, deē kógə̄ḿ dansí tə́ a əlam̄ jī de gə̄ tə́.

²² Ba ngé ndóō yá̰a̰ yān gə̄ mbel a̰ā̰n̄ ta kum naā, tām̄ nin̄-gerə̄n̄ deē ń ni-ɔr̄ najə̄ yān ní alé.

²³ Nge ndóō yá̰a̰ yān kógə̄ḿ adə̄ i nge ń Jeju tárən ní, ndi kadə Jeju tə́ ngɔr.

²⁴ Anī Simo̰ Piyer mbel a̰a̰n kə gír kumneé kadə̄ dəje Jeju ké ɔr̄ i najə̄ yā náā wa.

²⁵ Nge ndóō yá̰a̰ ní nōr̄ kə̄ rɔ̄ Jeju tə́, ba ədan na: Kɔ́ɔ̄ɓē, i náā?

²⁶ Jeju tél əda na: I deē ń m-ā m-ə́lá gájə́ mápa kum tá̰á̰ tə́ yā kadə̄n ní. Loo ń noō tə́ ni-əla gájə́ mápa kum tá̰á̰ tə́, ba adə̄ Judas ngōn̄ Simo̰ Iskariot.

²⁷ Dan ń Judas taā gájə́ mápá ní anī, Sətan udə kemən tə́. Anī Jeju ədan na: Yá̰á̰ ń kadə̄ ī-rāā ní, ī-rāā láẃ.

²⁸ Dan de gə̄ ń əsan̄ yá̰a̰ seneé tə́ ní, deē kógə̄ḿ kə́ ger̄ kum najə̄ ń ni-əda ní gətóo.

²⁹ Dan ń Judas i nge ngɔ̄m̄ ngong nar ní, de kə́rēý gə̄ gírə̄n̄ kadə̄ Jeju ədan i najə̄ mang yá̰á̰ kə́ tām̄ yā nāā tə́, aláa na mērən i kadə̄ ngé ndoō gə̄ yá̰a̰.

³⁰ Adə̄ Judas taā gájə́ mápá ní, ba kə̄ ta jī tə́ noō ni-teē ndágá. Loo i ndɔ̄ kɔ̄ɔ́.

Ndū najə̄ kə́ kijə

³¹ Dan ń Judas teē ndágá kɔ̄ɔ́ anī, Jeju əda na: Ngɔlaā ń toō ɔsən̄ gɔn Ngōn̄ Deē ō, Ngōn̄ Deē ɔsə gɔn Nə́ɓā ō.

³² Nə́ɓā a ɔsə gɔn Ngōn̄ Deē kemən nəkɔ́ Nə́ɓā tə́, ba na̰y i ngɔr kadə̄ a ɔsə gɔnən.

³³ Ngánə́ḿ kə́ dūú gə̄, m-ā m̄-ndi sesí i sḛ́ý beē ngóy. Ā ī-sāāmī, ba tītə̄ ń m-ə́da Jipə gə̄ kété ní, m-ə́dásí ngɔlaā ń toō ō: Sḭḭ̄ ásiī kugə̄ loo ń m-ā m-āw̄ kə̄ tū tə́ ní alé.

³⁴ M-ādə̄sí gō míndə́ kə́ kijə: Ī-táriī naā. Tītə̄ ń m̄-tárəńsí ní, ī-táriī naā dɔ dáńsí tə́ ō.

³⁵ Ré ī-táriī naā anī, i loo ń noō tə́ n de gə̄ malang a gerə̄n̄ kadə̄ sḭḭ̄ i ngé ndóō yá̰a̰ yāḿ gə̄ ní.

Jeju əda Piyer na a nējə̄ əda na n-gerə̄n alé

³⁶ Simo̰ Piyer ədan na: Kɔ́ɔ̄ɓē, a āw̄ i kə̄ rá? Jeju tél ədan na: Loo ń m-ā m-āw̄ kə̄ tū tə́ ní, ngɔlaā ásə kun gōḿ yā kaw̄ tū tə́ alé, banī gō tə́ pá tá ā ún gōḿ ɓáý.

³⁷ Piyer ədan na: Kɔ́ɔ̄ɓē, i tām̄ rí tə́ á ə́da na m-ásə kun gōí ngɔlaā aĺ ní? M-ə̄ndā dɔ rɔ̄ḿ danaá kɔ̄ɔ́ ɓá yā kadə̄ m-óy tām̄ yāí tə́.

³⁸ Jeju tél ədan na: Kə́ rɔ̄kum tə́ ə̄ndā dɔ rɔ̄í danaá kɔ̄ɔ́ ɓá yā kadə̄ óy tām̄ yāḿ tə́ a? Ādə̄ m-ə́daī najə̄ kə́ bo ngá̰ý, kété pá tá kadə̄ kə́ra kə̄njá nōō ní, ā ī-nējə̄ nja mətá ə́da na ī-gerə̄m̄ alé.