JA̰A̰ 11 - Bibəl ta Sar̄

Lajar oy

¹ Deē kógə̄ḿ i mo̰y, rīn na i Lajar kə́ Betani, ɓē yā Mari nin̄ kə ngōkó̰o̰n Martə tə́.

² Mari i dəyá̰ ń ur yibə̄ ítər gidə nja Kɔ́ɔ̄ɓē tə́, ba ɔl̄ kə nənga dɔneé ní.

³ Ngákó̰o̰n kə́ dəyá̰ gə̄ ní əla ədan̄ Jeju na: Kɔ́ɔ̄ɓē, deē ń ī-tárən ní i mo̰y.

⁴ Dan ń Jeju oō najə̄ ń noō ní anī, əda na: Moy ń noō i kə́ yā koyń alé. I kə́ yā kɔsəń gɔn Nə́ɓā ō, i kə́ kadə̄ Ngōn̄ Nə́ɓā əngeń kɔsə gɔn tū tə́ ō.

⁵ Jeju tár Martə ō, ngōkó̰o̰n kə́ dəyá̰ ō, Lajar ō.

⁶ Ba loo ń ni-oō kadə̄ Lajar i moy anī, tél ndi ndɔ̄ jōó ɓáý loo ń ni i tū tə́ ní tə́.

⁷ Gō tə́ anī, əda ngé ndóō yá̰a̰ yān gə̄ na: J-awī Jude.

⁸ Ngé ndóō yá̰a̰ yān gə̄ tél ədanən̄ na: Ngoljí, Jipə gə̄ sāān̄ tə́nī tɔ̄lī kə kūbə̄rū mbalá toō kum i sa̰y aĺ anī ī-sāā tél kaw̄ gogə́ ɓáý a?

⁹ Jeju tél ədadə́ na: Ndɔ̄ kógə̄ḿ i kum mbang kutə gidə i jōó aĺ a? Ré deē njə̄rā kadaá anī, bə̄dē a əgan alé, tɔdɔ̄ ni-a̰a̰ loo kə́ unjə̄ kow kə́ dɔ nang ń toō tə́.

¹⁰ Ba ré deē njə̄rā dan ndɔ̄ɔ́ anī, bə̄dē a əgan, tɔdɔ̄ loo kə́ unjə̄ kow i kemən tə́ alé.

¹¹ Dan ń ni-ɔr̄ najə̄ gə̄ ń noō oy anī, əda ɓáý to̰ na: Madə̄jí Lajar ɓīī kɔ̄ɔ́, ba m-ā m-āw̄ yā ndólə̄n.

¹² Anī ngé ndóō yá̰a̰ yān gə̄ tél ədanən̄ na: Kɔ́ɔ̄ɓē, ré a ɓīī i mbée anī rɔ̄n a ngáā.

¹³ Jeju ɔr̄ i najə̄ kə́ dɔ koy Lajar tə́, banī nin̄-ɔjənə̄ń na ɔr̄ na i najə̄ yā ɓīī kə́ karī.

¹⁴ Tā anī Jeju ədadə́ wáńg na: Lajar oy kɔ̄ɔ́.

¹⁵ Rɔ̄ḿ nelə̄m̄ tām̄ yāsí tə́ tɔdɔ̄ mā i nú alé, yā kadə̄ ī-taāiń kemḿ. Ba j-awī rɔ̄n tə́.

¹⁶ Anī Toma ń a ɓāŕnən̄ na i ndəngā ní, əda ngé ndóō yá̰a̰ madə̄n gə̄ na: J-awī ba j-oyī seneé.

Jeju i nge ndól̄ de kə́ koy gə̄

¹⁷ Dan ń Jeju ugə̄ Betani anī, dubə̄n̄ Lajar ndɔ̄ sɔ́ kɔ̄ɔ́.

¹⁸ Betani i ngɔr kə̄ Jerusalem, ngāl̄ róbə́ ní asə kilometər mətá,

¹⁹ adə̄ Jipə gə̄ ngá̰ý reēn̄ rɔ̄ Martə nin̄ kə Mari tə́ yā sɔl̄ kemdə́ tām̄ yā ngōkó̰ó̰də́ tə́.

²⁰ Dan ń Martə oō kadə̄ na Jeju ugə̄ anī, aw̄ tə́nī tan tə́, ba Mari tá ndi kújú ɓēé.

²¹ Martə əda Jeju na: Kɔ́ɔ̄ɓē, nə́ngētə́ gēé ḭ̄ i laā anī ngōkó̰ó̰ḿ a oy alé.

²² Ba kə́ ngɔr ń toō tə́ gə̄gē ní, m̄-ger̄ kadə̄ yá̰a̰ malang ń ā ī-dəje Nə́ɓā ní, ni a adī.

²³ Jeju ədan na: Ngōkó̰ó̰í a ndól̄ dan de kə́ koy gə̄ tə́.

²⁴ Martə ədan na: m̄-ger̄ kadə̄ ni a ndól̄ ndɔ̄ ń de kə́ koy gə̄ a ndólə̄n̄neé ta ngóy ndɔ̄ gə̄ tə́ ní.

²⁵ Jeju ədan na: Mā i nge ndól̄ de kə́ koy gə̄ ō, nge rāā kadə̄ deē ndi kə kumneé ō. Deē ń taā kemḿ ní, ká ré oy gə̄gē anī, a ndi kə kumneé.

²⁶ Deē ń ndi kə kumneé ba taā kemḿ ní, a oy aĺ bátə́. Ī-taā kem najə̄ ń noō a?

²⁷ Martə tél ədan na: A̰ýyē, Kɔ́ɔ̄ɓē, m̄-taā kem kadə̄ ḭ̄ i Kərist ō, Ngōn̄ Nə́ɓā ń kadə̄ reē dɔ nang tə́ ní ō.

Jeju nōō

²⁸ Gō najə̄ ń toō tə́ anī, ni-aw̄ ɓāŕ ngōkó̰o̰n Mari jəke ba ədan na: Ngoljí ugə̄ kɔ̄ɔ́, ba əda na kə āw̄ kə ə́ngen.

²⁹ Dan ń Mari oō najə̄ ń noō anī, ḭḭ dɔɔ́ gandang ba a aw̄ kə̄ rɔ̄ Jeju tə́.

³⁰ Tɔdɔ̄ Jeju ugə̄ kem ɓēé aĺ ɓáý, banī ni i loo ń Martə əngen tū tə́ ní tə́ ɓáý.

³¹ Loo ń Jipə gə̄ ń ndin̄ kə Mari kújú yā sɔl̄ kemən ní a̰ā̰n̄ Mari ḭḭ dɔɔ́ gandang ba teē anī, aw̄n̄ gōn tə́. Tɔdɔ̄ nin̄-gírə̄n̄ kadə̄ a aw̄ i kə̄ ta bəlo yo tə́ yā nōō.

³² Dan ń Mari ugə̄ loo ń Jeju i tū tə́ ní ba a̰a̰n anī, əsō kə̄ njan tə́ ba ədan na: Kɔ́ɔ̄ɓē, nə́ngētə́ gēé ḭ̄ i laā anī, ngōkó̰ó̰ḿ a oy alé.

³³ Dan ń Jeju a̰a̰ Mari a nōō ō, Jipə gə̄ ń reēn̄ seneé ní a nōōn̄ ō anī, kumən o̰o̰n ngá̰ý ō, kemən nujə kɔ̄ɔ́ ō.

³⁴ Banī ni dəjedə́ na ké ənīnən̄ i rá wa. Anī nin̄-tél ədanən̄ na: Kɔ́ɔ̄ɓē, ī-reē á̰a̰ā̰.

³⁵ Jeju nōō.

³⁶ Anī Jipə gə̄ ədan̄ na: Á̰a̰ī táŕ ń ni-tárən ní!

³⁷ Banī de kə́rēý gə̄ dɔ dáńdə́ tə́ ədan̄ na: Ni ń rāā adə̄ kum məndō a̰a̰ loo ní, asə rāā kadə̄ Lajar oy aĺ ō aĺ á?

Lajar ń oy ní ndól̄

³⁸ Anī rɔ̄ Jeju nelə̄n aĺ ɓáý to̰, banī ni-aw̄ ta bəlo yo tə́. I bəlo mbal̄ kə́ kutə̄ ta kə mbalá.

³⁹ Jeju əda na: Úniī mbal̄ kɔ̄ɔ́. Anī Martə, ngōkó̰o̰ nge yo ədan na: Kɔ́ɔ̄ɓē, nīnə́n otə kɔ̄ɔ́, tɔdɔ̄ ndɔ̄ kə́ nge ko̰ sɔ́ i ɓōólaā.

⁴⁰ Jeju tél ədan na: Ré ī-taā kem anī, ā á̰a̰ kɔsə gɔn yā Nə́ɓā ní m-ə́daī aĺ a?

⁴¹ Loo ń noō tə́ unən̄ mbal̄ kɔ̄ɔ́. Anī Jeju ənī kumən kə̄ dɔɔ́, ba əda na: Bɔbə́ḿ, m̄-ndadə̄ m-ādī, tɔdɔ̄ ḭ̄ ōō ndūḿ.

⁴² m̄-ger̄ kadə̄ ḭ̄ ōō najə̄ yāḿ ngándáńg, banī m-ɔ̄r̄ najə̄ i tām̄ yā kósə de gə̄ ń ra gīrə̄n̄ gidəḿ tə́ toō, yā kadə̄ nin̄-taān̄ kem kadə̄ i ḭ̄ n ə́lam̄ ní.

⁴³ Loo ń ni-əda beé oy anī, əga kɔŕ ngá̰ý əda na: Lajar, ī-teē ndágá!

⁴⁴ Anī nge yo teē, jīn gə̄ kə njan gə̄ i kə́ ɓír̄ kə ta kūbə̄ kə́ ngālāá ō, kumən i kə́ ɓír̄ kə ta kūbūú ō. Jeju əda de gə̄ na: Ī-tútin̄, ba ə́ya̰niī ādī aw̄.

De gə̄ oōn̄ naā dɔ Jeju tə́ yā tɔ̄lən

⁴⁵ Jipə gə̄ ń reēn̄ rɔ̄ Mari tə́ á a̰a̰n̄ yá̰á̰ ń Jeju rāā ní, ngá̰ý gə̄ dandə́ taān̄ kemən.

⁴⁶ Banī kə́rēý gə̄ dáńdə́ tə́ aw̄n̄ rɔ̄ Parijiyḛ gə̄ tə́ ba ənīn̄də́ gotə yá̰á̰ ń Jeju rāā ní.

⁴⁷ Loo ń noō tə́ ngol gə̄ kə́ dɔ ngé tun̄ yá̰a̰ gə̄ tə́ ō, Parijiyḛ gə̄ ō, ɔsən̄ dɔ ngé rāā sarya kə́ bo gə̄ naā tə́ ba ədan̄ na. J-a jə-rāāī i ba̰ý, tām̄ deē ní rāā yá̰á̰ kə́ yáā gə̄ ngá̰ý.

⁴⁸ Ré j-əya̰niī beé anī, de gə̄ malang a taān̄ kemən. Anī Rom gə̄ a reēn̄ yā nujə loo kə́ táĺ yājí ō, de gə̄ yājí ō.

⁴⁹ Deē kógə̄ḿ dandə́ tə́ rīn na i Kaipə, ni i ngol ngé tun̄ yá̰a̰ gə̄ ɓāl̄ ngeé ń noō tə́, ədadə́ na: Sḭḭ̄ ī-gerī yá̰a̰ kógə̄ḿ tū tə́ alé!

⁵⁰ Kə́ só tə́ yāsí i kadə̄ deē kógə̄ḿ oy tām̄ yā gotə de gə̄ tə́, ba kadə̄ de gə̄ malang nujəń aĺ ní, ī-gerī aĺ a?

⁵¹ Ni i ngol ngé tun̄ yá̰a̰ gə̄ kə́ ɓāl̄ ngeé ń noō tə́, adə̄ əda i najə̄ kə́ Nə́ɓā əndā tan tə́ tām̄ yā Jeju ń i gáŕ kadə̄ oy tām̄ yā Jipə gə̄ tə́ malang ní.

⁵² I tām̄ yā Jipə gə̄ tə́ ngóy alé, i tām̄ yā kánə̄ń nja ngáń Nə́ɓā gə̄ ń tḭ̄ḭ̄n̄ naā kə̄ loo gə̄ tə́ ní, kadə̄ télən̄ de kə́ kógə̄ḿ beē.

⁵³ Adə̄ əla gír ndɔ̄ ngeé ń noō tə́ ní, nin̄-gḛyn̄ tɔ̄lə̄n.

⁵⁴ I tām̄ ń toō tə́ n Jeju njə̄rā ta kum Jipə gə̄ tə́ to̰ alé, ba ɔr̄ rɔ̄n aw̄ gō nang kə́ kadə̄ dəla loo tə́, kem ɓē ń a ɓārə́n̄ na i Epəraim ní tə́, ba ndi tū tə́ noō kə ngé ndóō yá̰a̰ yān gēé ní.

⁵⁵ Dɔ nāā Pákə yā Jipə gə̄ i ngɔr. Adə̄ de kə́ gō nang yā Jipə gə̄ tə́ ngá̰ý aw̄n̄ Jerusalem kété no ndɔ̄ Pákə tə́ yā tə́go rɔ̄də́.

⁵⁶ Nin̄-sāān̄ Jeju. Dan ń nin̄-əngen̄ naā kem kújə yā Kɔ́ɔ̄ɓē tə́ anī, dəjen̄ naā na: Gír̄ yāsí i ba̰ý? Ni a reē rāā nāā Pákə tə́ aké a reē aĺ ḿ?

⁵⁷ Ngol gə̄ kə́ dɔ ngé tun̄ yá̰a̰ gə̄ tə́ ō, Parijiyḛ gə̄ ō, ədan̄ de gə̄ kadə̄ ré de kə́rēý ger̄ loo ń Jeju i tū tə́ ní anī, kə ɔjə gōn kadə̄ kə n-əhɔnən̄.