JA̰A̰ 10 - Bibəl ta Sar̄

Kūjə́ najə̄ yā ngé kul̄ batə̄ gə̄

¹ Ādə̄ m-ə́dásí najə̄ kə́ bo ngá̰ý, nge ń udə kə ta róbə gɔng batə̄ gēé alé, ba al̄ i dɔ gɔng tə́ n jə̄ngā kemeé ní, i nge ɓogə ō, nge gān̄g róbə ō.

² Ba deē ń udə kem gɔng batə̄ gə̄ tə́ i kə ta róbə́ kə́ yā kudəń kem gɔngɔɔ́ ní, ní i nge kul̄ batə̄ gə̄.

³ Nge ngɔ̄m̄ ta gɔng a teē ta yā kadə̄n ō, batə̄ gə̄ a oōn̄ ndūn ō. Ni a ɓāŕ batə̄ yān gə̄ kə rīdə́ gēé, ba aw̄ sedə́ ndágá.

⁴ Ni a rāā kadə̄ batə̄ yān gə̄ malang teēn̄ ndágá pá tá a njə̄rā kété nodə́ tə́ ō, batə̄ yān gə̄ a unən̄ gōn ō, tɔdɔ̄ nin̄-gerə̄n̄ ndūn.

⁵ A unən̄ gō de kə́ rang alé, a a̰ȳn̄ kɔ̄ɔ́, tām̄ gerə̄n̄ ndū de kə́ rang alé.

⁶ Jeju ədadə́ kūjə́ najə̄ ní, banī nin̄-gerə̄n̄ yá̰á̰ ń ni-ɔr̄ najə̄ dɔ tə́ ní alé.

Jeju i nge kul̄ kə́ majə

⁷ Jeju ədadə́ ɓáý to̰ na: Ādə̄ m-ə́dásí najə̄ kə́ bo ngá̰ý, mā i ta gɔng batə̄ gə̄.

⁸ De gə̄ ń reēn̄ kété noḿ tə́ malang ní, nin̄ i ngé ɓogə gə̄ ō, ngé gān̄g róbə gə̄ ō, adə̄ batə̄ gə̄ oōn̄ najə̄ yādə́ alé.

⁹ Mā i ta gɔng. Ré deē udə kem gɔngɔɔ́ kə ta kūlə̄ḿ anī, a ajə. Ni a udə ō, a teē ō, a ənge yá̰a̰ kəsa ō.

¹⁰ Nge ɓogə reē i ɓogoó ō, tɔ̄lɔ̄ɔ́ ō, nujəń ō ngóy. Mā m̄-reē i yā kadə̄ de gə̄ ndin̄ kə kumuú, ba kadə̄ ndi kə kumuú ní i ngá̰ý al̄ naā.

¹¹ Mā i nge kul̄ kə́ majə. Nge kul̄ kə́ majə adə̄ rɔ̄n yo tām̄ yā batə̄ yān gə̄ tə́.

¹² Ba nge kəla ń a ngɔ̄m̄ batə̄ gə̄ i gír naraá ní, i nge kul̄ kə́ rɔ̄kum aĺ ō, ni i kɔ́ɔ̄ batə̄ gə̄ aĺ ō. Ni-a̰a̰ soó loo reē tə́ anī, əya̰ batə̄ gə̄ kɔ̄ɔ́ ba a̰ȳ. Adə̄ soó əhɔdə́ ō, tə̄ndā tḭ̄ḭ̄də́ kɔ̄ɔ́ ō.

¹³ Nge kəla a̰ȳ, i tɔdɔ̄ ni-rāā kəla i gír naraá ō, usən dɔ batə̄ gə̄ tə́ aĺ ō.

¹⁴ Mā i nge kul̄ kə́ majə, adə̄ m̄-ger̄ batə̄ yāḿ gə̄ ō, nin̄-ger̄mə̄n̄ ō,

¹⁵ tītə̄ ń Bɔbə́ḿ ger̄məń ō, mā m̄-gerə̄ń Bɔbə́ḿ ō ní. Adə̄ m-óy tām̄ yā batə̄ yāḿ gə̄ tə́.

¹⁶ Batə̄ yāḿ kə́ rang gə̄ i noó ɓáý, ba nin̄ i kem gɔng ń toō tə́ alé, i gáŕ kadə̄ m̄-teē sedə́ ō. Nin̄ a oōn̄ ndūḿ, adə̄ a télən̄ ɓūtə̄ yá̰a̰ kul̄ kə́ kógə̄ḿ beē ō, nge kul̄də́ i kógə̄ḿ beē ō.

¹⁷ Bɔbə́ḿ tárəm̄ i tām̄ kadə̄ kə́ m-ādə̄ rɔ̄ḿ, i tɔdɔ̄ m-ādə̄ rɔ̄ḿ yā kadə̄ m̄-tél m̄-taā ɓáý.

¹⁸ Deē kógə̄ḿ kə́ asə tɔ̄lə̄m̄ gətóo, ba i mə̄kɔ́ n m-ə́ya̰ rɔ̄ḿ kə gō kem ndigə yāḿ kadə̄ tɔ̄lə̄n̄ ní. M-ásə kadə̄ rɔ̄ḿ ō, m-ásə́ tél taā gogə́ ō. Najə̄ ń toō i gō míndə́ Bɔbə́ḿ ń adə̄m̄ ní.

¹⁹ Míndə kasə naā aĺ to dɔ dán Jipə gə̄ tə́ ɓáý to̰ tām̄ yā najə̄ gə̄ ń toō tə́.

²⁰ De gə̄ ngá̰ý dɔ dáńdə́ tə́ ədan̄ na: Ndíĺ kə́ majaĺ i kemən tə́ ō, kɔ̄r̄ rāān ō, ba ōōī najə̄ yān i tām̄ rí tə́?

²¹ Ngé kə́rēý gə̄ ədan̄ na: De kə́ ndíĺ kə́ majaĺ i kemən tə́ a ɔr̄ najə̄ beé alé. Ndíĺ kə́ majaĺ asə teē kum ngé kum tɔ̄ɔ̄ gə̄ a?

Jipə gə̄ mbātə́n̄ Jeju

²² Dan ngeé ń noō tə́ ní loo i kūlīí ō, de gə̄ a rāān̄ i nāā kújə yā Kɔ́ɔ̄ɓē kə́ ɔrə̄n̄ kamə̄n tayā kem ɓē kə́ Jerusalem tə́ ō.

²³ Adə̄ Jeju a njə̄rā kem kújə yā Kɔ́ɔ̄ɓē tə́ gír dabə yā Salomo̰ kə́ rāā kə mbalá tə́.

²⁴ Anī Jipə gə̄ reē gīrə̄n̄ gidən ba ədanən̄ na: Ā ī-rāājí adə̄ kemjí a tɔ́sə̄jí beē i bátə́ ta kə́ rá? Ré ḭ̄ i Kərist anī ə́dájí wáńg.

²⁵ Jeju tél ədadə́ na: M-ə́dásí kɔ̄ɔ́ ɓá, banī sḭḭ̄ ī-taāī kemḿ alé. Kəla gə̄ ń m̄-rāā kə rī Bɔbə́ḿ ní ədan̄ najə̄ kə́ kum tə́ yāḿ.

²⁶ Banī sḭḭ̄ ī-taāī kemḿ alé, i tɔdɔ̄ sḭḭ̄ i dan batə̄ yāḿ gə̄ tə́ alé.

²⁷ Batə̄ yāḿ gə̄ oōn̄ ndūḿ, ba mā m̄-ger̄də́ ō, nin̄-unən̄ gōḿ ō.

²⁸ Mā m-ādə̄də́ ndi kə kumuú kə́ ngándáńg, adə̄ nin̄ a udən̄ kɔ̄ɔ́ aĺ bátə́. De kə́ yā taādə́ jīḿ tə́ a gətóo.

²⁹ Bɔbə́ḿ ń adə̄m̄ sedə́ ní i kə́ bo tɔȳ yá̰a̰ malang, ba de kə́ asə taā yá̰a̰ jī Bɔbə̄ Ngōn̄ tə́ gətóo.

³⁰ Mā ō Bɔbə̄ Ngōn̄ ō ní, jḭḭ i kógə̄ḿ beē.

³¹ Anī Jipə gə̄ ɔyn̄ kūbə̄rū mbal̄ gə̄ ɓáý to̰ yā tə́nīnneé.

³² Banī Jeju ədadə́ na: m̄-rāā kəla kə́ majə gə̄ i ngá̰ý ta kumsí tə́, kə ta kūl̄ tɔ́gə yā Bɔbə̄ Ngōnōó. Dan kəla gə̄ ngeé ń noō tə́ ní, i nge kə́ rá n ī-sāāī tə́nīm̄ kə mbalá yā tɔ̄lə̄m̄ najə̄n tə́ ní?

³³ Jipə gə̄ tél ədanən̄ na: J-a jə-tə́nāī kə mbalá yā tɔ̄lī i tām̄ kəla kə́ majə kógə̄ḿ tə́ alé, banī i tām̄ tájə̄ kə́ ī-tájə̄ Nə́ɓā tə́. Tɔdɔ̄ ḭ̄ ń i deē ndul ní, ī-rāā rɔ̄í Nə́ɓā tə́.

³⁴ Jeju tél ədadə́ na: Ndangən̄ kem makətūbə̄ ndū najə̄ yāsí tə́ na: Nə́ɓā əda na sḭḭ̄ na i nə́ɓā gə̄.

³⁵ Jə-ger̄ kadə̄ yá̰á̰ n makətūbə̄ yā Nə́ɓā əda ní, deē a ɔr̄ kɔ̄ɔ́ alé. De gə̄ ń Nə́ɓā ɔr̄ najə̄ sedə́ ní, ni-ɓāŕdə́ na i nə́ɓā gə̄.

³⁶ Ba mā ń Bɔbə́ḿ ɔrə̄m̄ tayā tām̄ yān tə́ ba əlam̄ dɔ nang tə́ ní, i ba̰ý n sḭḭ̄ ə́daī na m̄-tájə̄ Nə́ɓā kə najə̄ kɔrə̄ḿ tām̄ kəda kə́ m-ə́da na mā na i Ngōn̄ Nə́ɓā ní?

³⁷ Ré m̄-rāā kəla gə̄ yā Bɔbə́ḿ aĺ anī, ī-lōōī taā kemḿ.

³⁸ Ba ré m̄-rāādə́ anī, ká ré ī-taāiń kemḿ mā aĺ gə̄gē anī, ī-taāī kem kəla gə̄ ń m̄-rāādə́ ní, yā kadə̄ ī-gerīneé majə na Bɔbə́ḿ i kemḿ tə́ ō, mā i kem Bɔbə́ḿ tə́ ō.

³⁹ Loo ń noō tə́ nin̄-sāān̄ kəhɔn ɓáý to̰, ba ni teē jīdə́ tə́.

⁴⁰ Ni-tél aw̄ gidə bā Jurdḛ tə́ ɓáý to̰, loo ń Ja̰a̰ rāā de gə̄ batém tū tə́ kété ní, ba ndi noó.

⁴¹ De gə̄ ngá̰ý reēn̄ rɔ̄n tə́, ədan̄ na: Ja̰a̰ rāā yá̰á̰ kə́ yáā kógə̄ḿ alé, banī najə̄ malang ń ni-əda dɔ deē ń toō tə́ ní i najə̄ kə́ rɔ̄kum.

⁴² De gə̄ ngá̰ý taān̄ kemən loo ngeé ń noō tə́.