IJAI 9 - Bibəl ta Sar̄

¹ Gír de gə̄ ń njə̄rān̄ i ndɔ̄ɔ́ ní, a̰a̰n̄ loo kə́ unjə̄ kow kə́ bo ngá̰ý. Ngé gə̄ ń ndin̄ kem ɓē kə́ loo kə́ tū tə́ i kə́ risə til ní, loo unjə̄ kow tām̄ yādə́ tə́.

² Kɔ́ɔ̄ɓē, ḭ̄ ī-rāā ādə̄ nin̄ ndin̄ majə ngá̰ý, ḭ̄ ī-rāā adə̄ rɔ̄nel̄ yādə́ i ngá̰ý kum kə̄ kété kété. Nin̄ rāān̄ rɔ̄nel̄ ta kumií tə́ tītə̄ rɔ̄nel̄ kə́ ndɔ̄ sāā kōō tə́ beē, tītə̄ kɔŕ rɔ̄nel̄ kə́ loo kēgə̄ naā yá̰a̰ kənge yā madə̄ ba̰ā̰ gə̄ kə́ rɔ̄ɔ̄ tetədə́ tə́ beē.

³ A̰á̰ā̰, ḭ̄ ɔ̄r̄ gír deē yāí gə̄ kɔ̄ɔ́ tū ko̰o̰ ɓē kə́ ɔȳdə́ tə́. Kāgə̄ ń adə̄ kār̄ bɔ̄gə̄də́ gə̄ do ní, ndéý ń əndanə̄ńdə́ ní, ḭ̄ ī-tétə̄ kɔ̄ɔ́, tītə̄ ń ī-rāań ndɔ̄ ń ī-tetəń Madian gə̄ rɔ̄ɔ̄ tə́ ní.

⁴ Sākə̄rā nja madə̄ ba̰ā̰ gə̄ malang ń rāā adə̄ dɔ nang ndew ní, kūbə̄ malang mósə́ i tū tə́ ní, hor o̰o̰.

⁵ Ojən̄ ngōn̄ tām̄ yājí tə́, adə̄n̄jí ngōn̄ kə́ dəngam. Ni-ənge ndū ko̰o̰ ɓē yā mban̄g. Əndān̄ rīn na i: Nge kadə̄ kɔjə̄ kə́ hálən majə ngá̰ý ō, to kɔr kum ō, Nə́ɓā kə́ tɔ́gən to ō, Bɔbə̄ kə́ njɔ́ḿ gə̄ tə́ ō, Ngār kem sɔl̄ lɔm ō.

⁶ Ni a teē kem ko̰o̰ ɓē yān kə̄ gogə́ ō, a rāā kadə̄ lɔm kə́ dan gān̄g aĺ to ngándáńg ō. Ni a ndi dɔ kōr̄ kāgə̄ mbang yā Dabid tə́ ō, a ɔr no de gə̄ kə́ kem ɓē ko̰o̰ yān tə́ ō. Ni a əndā ɓē ko̰o̰ yān ní ō, a mbūsə̄ gírən kadə̄ ra gan̄g ō, i kə ta kūl̄ rāā kadə̄ de gə̄ ɓōlə́n̄ gidə yá̰á̰ kə́ súmūú ō, yá̰a̰ rāā kə́ gōtə́ ō, a əla gír i ngɔr ń toō tə́ ō, i kə́ njɔ́ḿ gə̄ tə́ ō. Yá̰á̰ ń Kɔ́ɔ̄ɓē kə́ bo kə́ tɔ́gən i ngá̰ý a rāā tām̄ tár yān kə́ təngā piling tə́ ní n noō.

Kɔ́ɔ̄ɓē ɓir̄ njīn adə̄ əla ɓōĺ kem de gə̄ tə́

⁷ Kɔ́ɔ̄ɓē ɔr̄ najə̄ rɔ̄ɔń kə de gə̄ yā Jakob. A̰á̰ā̰, najə̄ ní əsō dɔ ɓē ko̰o̰ kə́ Israel tə́.

⁸ De gə̄ malang gerə̄n̄, Epəraim gə̄ malang ō, de kə́ Samari gə̄ malang ō, gerə̄n̄. Kété ní, kɔjə rɔ̄ rosə kem de gə̄ ngeé ń toō adə̄ nin̄ ədan̄ na:

⁹ Ndogə̄ bəríkə gə̄ ń tə́sōn̄ nang tə́ ní, j-a jə-tél yā kəndādə́ gogə́ kə mbal̄ kə́ tɔ́sə̄ kadə gēé. Sáā kāgə̄ kə́ karī gə̄ ń rāānəń kújə a tə́sō kɔ̄ɔ́ ní, j-a jə-mbél̄ gíŕdə́ kə sáā kāgə̄ sédər gēé.

¹⁰ Loo ń noō tə́ Kɔ́ɔ̄ɓē sə̄lā madə̄ ba̰ā̰ Israel gə̄ ń i Asiri gə̄ yā Resin ní dɔ Israel gə̄ tə́ ō, əla go̰ kem ngé rɔ̄ɔ̄də́ gə̄ tə́ ō.

¹¹ Aram gə̄ i dām̄ kə́ gír ɓē tə́ ō, Pilistin gə̄ i dām̄ kə́ no ɓē tə́ ō. Nin̄ əsan̄ ɓē ko̰o̰ kə́ Israel tə́ nel̄ tadə́. Nge ń noō gə̄gē rāā adə̄ wōn̄g yā Kɔ́ɔ̄ɓē tetə alé, jīn kə́ ɓir̄ i kə́ kəla kə̄ dɔɔ́ ɓáý.

¹² Kɔ́ɔ̄ɓē ənda gír deē yān gə̄, banī Israel gə̄ télən̄ kə̄ rɔ̄n tə́ alé, nin̄ tūrə̄n̄ rɔ̄də́ kə̄ rɔ̄ Kɔ́ɔ̄ɓē kə́ bo kə́ tɔ́gən i ngá̰ý tə́ alé.

¹³ Loo ń noō tə́, kem ndɔ̄ kógə̄ḿ beē tə́ ní, Kɔ́ɔ̄ɓē gān̄g dɔ ō kə̄lá ō kɔ̄ɔ́ dɔ nang kə́ Israel tə́. Ni-gān̄g ta jī kāgə̄ túmbur kɔ̄ɔ́ ō, gān̄g mu tə̄ɓā kɔ̄ɔ́ ō.

¹⁴ Kum kɔɔ̄ gə̄ ō, de kə́ bo gə̄ ō ní, nin̄ i dɔ gə̄. Ngé koō ta gə̄ kə ngé ndóō de gə̄ yá̰á̰ kə́ rɔ̄kum aĺ gə̄ ní, nin̄ i kə̄lá gə̄.

¹⁵ Ngé kɔr no de gə̄ gólə̄n̄ gír de gə̄ ń toō, adə̄ ngé gə̄ ń nin̄ ɔrən̄ nodə́ ní unən̄ róbə́ kə́ majaĺ.

¹⁶ I tām̄ najə̄ ń toō tə́ ń Kɔ́ɔ̄ɓē rāā gan̄g ngá̰ý kə balsáa yādə́ gēé ní, kumən o̰o̰n kə ngán hal yādə́ gēé aĺ ō, kə dəyá̰ kə́ ngaa koy yādə́ gēé aĺ ō. Tām̄ nin̄ malang i de kə́ majaĺ gə̄ kə́ ngé rāā yá̰á̰ kə́ majaĺ ō, yá̰a̰ malang ń nin̄ ədan̄ ní i yá̰á̰ kə́ majaĺ ngá̰ý gə̄ ō. Nge ń noō gə̄gē rāā adə̄ wōn̄g yā Kɔ́ɔ̄ɓē tetə alé, jīn kə́ ɓir̄ i kə́ kəla kə̄ dɔɔ́ ɓáý.

¹⁷ A̰á̰ā̰, kem ndul i yá̰á̰ kə́ o̰o̰ loo tītə̄ hor kə́ o̰o̰ kōn̄ kə́ tayā tayā gə̄ beé. Hor ní əhɔ túpə kámbə gə̄ kə́ kem ku kāgə̄ gə̄ tə́ ō, rāā adə̄ sa hor kə́ ra kə ngālāá ɓururu ḭḭ ta kaw̄ dɔ rā̰ tə́ ō.

¹⁸ Hor o̰o̰ ɓē sɔɔ̄ ń wōn̄g yā Kɔ́ɔ̄ɓē kə́ bo kə́ tɔ́gən i ngá̰ý. To tītə̄ kə́ hor a o̰o̰ i gír de gə̄ beé. De kə́ kumən o̰o̰n tām̄ yā ngōkó̰o̰n tə́ gətóo.

¹⁹ De gə̄ rə́yā̰n̄ dāmə̄n kə́ ko̰ó̰, banī ɓō rāādə́ ɓáý. Nin̄ do̰ō̰n̄ dāmə̄n kə́ geleé, banī ndānə̄n̄ alé. Náā nəkɔ́ ɓáa ənī madə̄ ɓēn i rɔ̄ɔ̄.

²⁰ Gír ɓē yā Manase ənī gír ɓē yā Epəraim rɔ̄ɔ̄ ō, gír ɓē yā Epəraim ənī gír ɓē yā Manase rɔ̄ɔ̄ ō, nin̄ jōó mbak rɔ̄ɔ̄n̄ gír ɓē yā yā Juda ō. Nge ń noō gə̄gē rāā adə̄ wōn̄g yā Kɔ́ɔ̄ɓē tetə alé, jīn kə́ ɓir̄ i kə́ kəla kə̄ dɔɔ́ ɓáý.