IJAI 8 - Bibəl ta Sar̄

Kaw̄ láẃ nār̄ yá̰á̰, kɔy yá̰a̰ kənge dɔ gúú tə́

¹ Kɔ́ɔ̄ɓē ədam̄ na: Ún bar ndang yá̰á̰ kə́ bo, ba ī-ndang ādə̄ kumən to kadə̄ deē tə́da, ī-ndang na: Kaw̄ láẃ nār̄ yá̰a̰, kɔy yá̰a̰ kənge dɔ gúú tə́.

² Bar ń m̄-ndang yá̰a̰ dɔ tə́ ní, m-ɔ́jə de kə́ kum tə́ gə̄ kə́ asən̄ kadə̄ deē taā kemdə́ gə̄ jōó. De gə̄ ní i Uria nge tun̄ yá̰a̰ nin̄ kə Jakari kə́ ngōn̄ Yeberekiya.

³ Gō tə́ anī m-āw̄ m̄-ɓīī kə nge koō ta kə́ dəyá̰ ń i nə̄yá̰ḿ ní. Ni ndān̄ ngōn̄, ba ojə ngōn̄ kə́ dəngam. Anī Kɔ́ɔ̄ɓē ədam̄ na: Ə̄ndā rīn na i kaw̄ láẃ nār̄ yá̰a̰, kɔy yá̰a̰ kənge dɔ gúú tə́.

⁴ Tām̄ kété pá tá kadə̄ ngōnīí ger̄ kəda na: Babá aláa mamá ní, a aw̄n̄ kə yá̰a̰ kənge gə̄ kə́ gātə̄də́ i ngá̰ý gə̄ kə́ Damas ō, yá̰a̰ kənge gə̄ kə́ kɔy Samari ō, yā kadə̄ mban̄g kə́ Asiri.

Asiri gə̄ taān̄ loo

⁵ Kɔ́ɔ̄ɓē ədam̄ ɓáý to̰ na:

⁶ Juda gə̄ kídə̄n̄ man̄ bəlo kə́ ndēr̄ kə ngālāá kə́ Siloe ń a nūgə́ jəke ní ō, tɔ́gə́də́ ur̄ wak kɔ̄ɔ́ no Resin tə́ ō, no ngán Remalia tə́ ō.

⁷ I beé ɓá ní, man̄ bā Opəratə ń i man̄ kə́ ngá̰ý ō, i man̄ kə́ a nūgə́ kə ngangá ngá̰ý ō ní, m-ā m̄-reēń dɔdə́ tə́. Kumən na i mban̄g kə́ Asiri ń tɔ́gən i ngá̰ý ní. Bā Opəratə a ḭḭ ngá̰ý ō, a taā loo ō.

⁸ A aw̄ yā kugə̄ ɓē ko̰o̰ kə́ Juda tə́. A teē kem kārə̄n tə́ kə̄ ndágá ō, a taā ɓē ko̰o̰ kə́ Juda ō, a əhɔn míndən tə́ ō. A taā loo ta kaw̄ sa̰y, a taā ɓē yāí ḭ̄ Emanuel malang.

Yá̰á̰ kə́ ndāńg karī gə̄ ń gír de gə̄ sāān̄ rāā ní

⁹ Sḭḭ̄ gír de gə̄, ī-ndewiī ō, ādī ɓōĺ tɔ̄l̄sí kɔ̄ɔ́ ō! Sḭḭ̄ ɓē gə̄ ń ī-ndiī ta ngóy dɔ nang tə́ ní, ī-nēlī mbīsí majə! Ásiī kəndā dɔ rɔ̄sí danaá majə tām̄ yā rɔ̄ɔ̄ tə́, banī ɓōĺ to a ngóōsí noō. A̰á̰ā̰, ásiī kəndā dɔ rɔ̄sí danaá majə tām̄ yā rɔ̄ɔ̄ tə́, ba ɓōĺ to a ngóōsí noō!

¹⁰ Ī-númī yá̰á̰ kə́ yā rāā gə̄ tā a nujənə̄ń kɔ̄ɔ́. Ī-tɔ́tī naā dɔ loo rāān yāsí gə̄ tə́ tā a to alé. Ɔ̄rī najə̄ kə́ sɔɔ̄ dɔ yá̰á̰ kə́ yā rāā ba najə̄ kɔr̄sí ní a udə gírí alé. Tɔdɔ̄ Nə́ɓā i naā tə́ sejí.

Mbal̄ kə́ a əga deē

¹¹ Kɔ́ɔ̄ɓē əhɔm̄, ba ə́dam̄ na kə m̄-lōō ndájə̄ hál Juda gə̄. Ni ədam̄ na:

¹² Ī-lōōī kɔr̄ najə̄ kə́ dɔ koō naā loo mundə̄ tə́, kə dɔ kɔr̄ ń de gə̄ ń noō a ɔr̄nəń najə̄ kə́ dɔ koō naā loo mundə̄ tə́ ní. Ī-lōōī ɓōĺ yá̰á̰ ń rāādə́ nin̄ adə̄ ɓōĺ rāādə́ ní. Ī-lōōī ɓōĺdə́.

¹³ Á̰a̰ ī-gerī kadə̄ i Kɔ́ɔ̄ɓē kə́ bo kə́ tɔ́gən i ngá̰ý n i de kə́ táĺ ní. I ni n majə kadə̄ ī-ɓōlíī gidən ní. I ni n majə kadə̄ ī-ɓōlíin̄ ní.

¹⁴ Tām̄ yā ɓē ko̰o̰ kə́ jōó gə̄ yā Israel tə́ ní, ni i loo kə́ táĺ, ni i mbal̄ kə́ nge kəga deē, mbal̄ kə́ nge rāā deē kadə̄ əsō. Ndɔ̄ń tə́ ni i gūmbə̄ tām̄ yā de kə́ Jerusalem gə̄ tə́.

¹⁵ Ni a tə́gā nja de gə̄ ngá̰ý, kadə̄ a əsōn̄ ō, a tétə̄n̄ rárák kɔ̄ɔ́ ō. Gūmbə̄ a əhɔdə́ ō, a asən̄ teē kum tə́ aĺ ō.

Nge koō ta ndi tan mbóo ba ngóō

¹⁶ m̄-ngɔ̄m̄ najə̄ ní gíŕ yá̰á̰ kógə̄ḿ tə́, m-ə̄nī yá̰á̰ ndóō ní loo kógə̄ḿ kə́ yá̰a̰ a ɔdə rɔ̄ tū tə́ aĺ tə́. I ngé kun gō yá̰á̰ ndóō gə̄ ngóy n m-ɔ́jə́də́ ní.

¹⁷ m̄-ndi m̄-ngóō Kɔ́ɔ̄ɓē. Kə́ ngɔr ń toō tə́ ɓáa ni-əndā kumən gír kojə yā Jakob tə́ to̰ alé, banī m-ə̄ndā kemḿ dɔn tə́.

¹⁸ Mə̄kɔ́ ō, ngán gə̄ ń Kɔ́ɔ̄ɓē adə̄m̄ sedə́ ō ní, jə-rāā rɔ̄jí i yá̰á̰ kə́ yā kɔjəń yá̰á̰ tə́ dɔ nang kə́ Israel tə́. Kɔ́ɔ̄ɓē kə́ bo kə́ tɔ́gən i ngá̰ý ń ndi dɔ mbal̄ Siyo̰ tə́ ní, taā de gə̄ i kə ta kūl̄jí.

¹⁹ Ngé kə́rēý gə̄ ədan̄ na: Āw̄ ōōī najə̄ kə́ ta ngé ɓāŕ de kə́ koy gə̄ tə́, kɔdə̄ sāā gə̄ ń i ngé kəda yá̰á̰ kə́ a reē ɓáý gə̄ ní. Nin̄ i ngé tél kə ndūdə́ kə̄ nang tə́ ngá̰ý kɔrə̄ń najə̄ gə̄, deē asə ger̄ kum najə̄ kɔr̄də́ alé. I gōtə́ ngá̰ý kadə̄ gír de gə̄ aw̄ oōn̄ najə̄ kə́ ta nə́ɓā yādə́ gə̄ tə́, kadə̄ ɓārə́n̄ de kə́ koy kɔ̄ɔ́ gə̄ kadə̄ rāān̄ majə kə de gə̄ kə́ ndin̄ kə kumdə́. Ré deē ədasí tītə̄ ń noō anī,

²⁰ ī-tūr̄ ə́dain̄ na: Yá̰á̰ ń kadə̄ deē tél reē dɔ tə́ ní, i yá̰á̰ ndóō yā Kɔ́ɔ̄ɓē ō, i najə̄ yā Kɔ́ɔ̄ɓē ō. Deē ń a əda najə̄ ń noō aĺ ní, a a̰a̰ loo kə́ atə wororo kə́ ta gír loo tə́ alé.

Loo kə́ risə til nding

²¹ De gə̄ a əndan̄ dan ɓē yā gān̄g, kə yá̰á̰ kə́ tɔȳ tɔ́gə́də́ ō, kə ɓōó ō. Dan ń ɓō rāādə́ ní, ta tɔ̄l̄ ta anī a ndɔ̄lə́n̄ mban̄g yādə́ ō, Nə́ɓā yādə́ ō. Nin̄ a tūrə̄n̄ kumdə́ kə̄ dɔ rā̰ tə́,

²² ba gō tə́ anī a a̰a̰n̄ loo nang tə́. Yá̰á̰ ń nin̄ a əngen̄ ní i wur kɔl ō, i loo kə́ risə til ō, i sōl̄ kə́ to ɓōĺ ngá̰ý ō, i loo kə́ ndul ndí ndḭ́ ō ō, ngóy.

²³ Ngé gə̄ ń nin̄ i kum loo kə́ ndɔ̄ɔ́ ngeé ń toō tə́ ní, a asə teē kum tə́ alé. Kété ní, Kɔ́ɔ̄ɓē ənī rɔ̄sɔl̄ dɔ gō nang kə́ Jabulo̰ tə́ ō, Nepətali tə́ ō. Banī ndɔ̄ń tə́ anī, ni a rɔȳ róbə́ ń to kə gō kadə bā boó ní ō, gō nang ń deē ra bā Jurdḛ tə́ anī i kə̄ dām̄ kə́ gír ɓē tə́ ní ō, Galile ń i gō nang yā tə̄rā gə̄ ní ō.