IJAI 64 - Bibəl ta Sar̄

¹ Ā ī-to tītə̄ hor kə́ o̰o̰ túpə́ kámbə gə̄ beé, aláa tītə̄ hor kə́ rāā adə̄ man̄ nēgə́ beē. Beé ɓáa madə̄ ba̰ā̰í gə̄ a gerīn̄. Gír de gə̄ a ndewn̄ noí tə́

² dan ń ī-rāā yá̰á̰ kə́ to ɓōĺ gə̄ kə́ deē əndā kemən dɔ tə́ aĺ ní. A̰á̰ā̰, nə́ngētə́ ī-risə i mbée anī, mbal̄ bo gə̄ a ndewn̄ noí tə́.

³ Nə́ɓā kə́ rang kə́ rāā yá̰a̰ tītə̄ ń toō tām̄ yā ngé gə̄ ń ənīn̄ kemdə́ adə̄nən̄ tə́ ní gətóo, i ḭ̄ ngó̰y. Á̰a̰, de kə́ oō najə̄n nja kógə̄ḿ gətóo, de kə́ oō nja kógə̄ḿ gətóo.

⁴ Ngé gə̄ ń rāān̄ yá̰á̰ kə́ gōtə́ kə rɔ̄nelēé ní, ngé gə̄ ń əga kemdə́ dɔí tə́ kadə̄ unən̄ róbə yāí ní, ḭ̄ ī-tə́nī tadə́. Ḭ̄ ī-rāā wōn̄g najə̄ yá̰a̰ rāājí kə́ gōtə́ aĺ gə̄ tə́. Ba ré j-un róbə́ kə́ kété jóo gə̄ anī j-a j-ajə.

⁵ Jḭḭ malang jə-to tītə̄ de kə́ yḛr gə̄ ō, yá̰a̰ rāājí kə́ majə tɔȳ madə̄ gə̄ i yá̰á̰ kə́ to yḛr kum tītə̄ kūbə̄ kə́ mósə tákə̄ beé ō. Yá̰a̰ rāājí kə́ gōtə́ aĺ gə̄ rāān̄jí adə̄ jə-to tītə̄ mbī kámbə́ kə́ nél un aw̄ń kɔ̄ɔ́ beē.

⁶ Deē ɓāríī to̰ alé, deē ndól̄ dɔ ɓīī tə́ yā tə́ya̰ gōí tə́ to̰ alé. Tām̄ ī-ndigə ka̰a̰jí to̰ aĺ ō, ə́yá̰jí kem jī yá̰a̰ rāājí kə́ gōtə́ aĺ gə̄ tə́ ō.

⁷ Tá Kɔ́ɔ̄ɓē, ḭ̄ i bɔbə̄jí. Jḭḭ i nánjə, ba ḭ̄ i kɔdə̄ jóo. Jḭḭ malang ní ī-rāājí kə jīí.

⁸ Kɔ́ɔ̄ɓē, ī-lōō kadə̄ wōn̄g rāāī ngá̰ý. Yá̰a̰ rāājí kə́ gōtə́ aĺ gə̄ ní, ādə̄ əga kemií dɔ tə́ kə́ njɔ́ḿ gə̄ tə́ alé. Jə-rāāī ɓɔ́ ba á̰a̰ā̰, jḭḭ malang i gír deē yāí gə̄.

⁹ Ɓē yāí kə́ táĺ gə̄ ní de gə̄ i kemeé to̰ alé, Jerusalem tél i dəla loo, Siyo̰ i kɔkərɔ kə́ ra dɔ naā tə́ bing kə́ əya̰n̄ kɔ̄ɔ́.

¹⁰ Kújə́ kə́ táĺ ō, kə́ majə ngá̰ý ō ń kaají gə̄ a ənīn̄ pā tɔ̄ȳ yāí kemeé ní, hor o̰o̰ kɔ̄ɔ́. Yá̰a̰ malang ń kété jə-gḛy ní, i kə́ tétə̄ nang tə́ adə̄ ra dɔ naā tə́ bing.

¹¹ Kɔ́ɔ̄ɓē, yá̰á̰ kə́ to kum kaȳ aĺ gə̄ ń toō usiī alé a? Ásə ndi taí mbóo ō, rējə̄jí kə rɔ̄sɔl̄ kə́ deē asə tə́gā tan gírí aĺ ō a?