IJAI 63 - Bibəl ta Sar̄

Nge kəja kan̄ nduú kə́ ni to ɓōĺ ngá̰ý

¹ Deē ń ḭḭ dɔ nang kə́ Edom tə́, kem ɓē bo kə́ Bosra tə́ reē toó i náā? Man̄ yá̰á̰ kə́ kərē tákə̄ kūbə̄ yān gə̄. Ni o̰ō̰ i kūbə̄ kə́ majə ngá̰ý gə̄. Ni-njə̄rā kə̄ kété ba ənda kadən, ni-əndā kemən dɔ tɔ́gən tə́ mámák. Kɔ́ɔ̄ɓē əda na: I mā. Sarya gāngə̄ḿ i gōtə́, m-ásə kajəsí.

² Man̄ yá̰á̰ kə́ kərē tákə̄ kūbə̄ yāí, kūbə̄ yāí gə̄ ton̄ tītə̄ kūbə̄ yā nge mbə́rē kan̄ nduú kə́ ra loo mbə́rē kan̄ nduú tə́ beē. Ní i tām̄ rí tə́?

³ A̰á̰ā̰, i mə̄kɔ́ kə kérə́ḿ n m̄-mbə́rē kan̄ nduú loo mbə́rē kan̄ nduú tə́ ní. De kə́ dan gír de gə̄ tə́ kə́ seḿ gətóo. Loo ń noō tə́ wōn̄g rāām̄ ngá̰ý, adə̄ m̄-mbə́rēdə́, m̄-tə̄ɓādə́ kə wōn̄g kə́ ngá̰ý. Mósə́də́ kə́rā kə̄ tū kūbə̄ yāḿ gə̄ tə́ adə̄ kūbə̄ yāḿ gə̄ malang i kə́ m̄-rāā adə̄ mósə́də́ tákə̄.

⁴ Kemḿ tə́ ní m̄-ndigə i dal ba̰ā̰ḿ. Kum mbang gān̄g dɔ gír deē yāḿ gə̄ asə.

⁵ m̄-sāā deē kə kumḿ, banī m-á̰a̰ de kə́ yā rāā seḿ alé! Ɔr kumḿ ngá̰ý. De kə́ nge kɔsə kílə́ḿ gətóo! Loo ń noō tə́ mə̄kɔ́ m̄-gḛy rāā yá̰á̰ kógə̄ḿ, ba i wōn̄g yāḿ n adə̄m̄ tɔ́gə kadə̄ m̄-rāań ní.

⁶ Dan ń wōn̄g rāām̄ ngá̰ý ní m̄-rējə̄ gír de gə̄. m̄-rāā adə̄ wōn̄g yāḿ rāādə́ kə́ kasə tə́ ō, m̄-ɓōkə́ mósə́də́ nang tə́ ō.

Ənīn̄ gotə kem majə yā Kɔ́ɔ̄ɓē

⁷ m̄-ndigə ter̄ kem de gə̄ dɔ rāā majə gə̄ yā Kɔ́ɔ̄ɓē tə́, dɔ kum kənī pā tɔ̄ȳ yān tə́: Yá̰a̰ malang ń Kɔ́ɔ̄ɓē rāā tām̄ yājí tə́ ní, kem majə yān kə́ ngá̰ý kə́ tām̄ yā gír de gə̄ yā Israel tə́, yá̰a̰ malang ń ni-rāā kə ta kūl̄ táŕ ní ō, rāā majə yān gə̄ ń gír i ngá̰ý ní ō.

⁸ Ni-ɔr̄ najə̄ yā de gə̄ yā Israel, əda na: Nin̄ i gír deē yāḿ gə̄, i ngánə́ḿ gə̄, nin̄ a gól̄mə̄n̄ aĺ ō, kété ni i nge kajədə́.

⁹ Tū tápə̄ yādə́ gə̄ tə́ malang ní, i nge kəla kógə̄ḿ, aláa i de kə́ dɔ rā̰ tə́ kógə̄ḿ n ajədə́ ní alé, banī i Kɔ́ɔ̄ɓē nəkɔ́. Ni-gān̄g dɔdə́ sɔɔ̄ń tár yān ō, ka̰a̰ kum tō ndoō yān ō. Ni ətōdə́ ō, ɔsə kíĺdə́ ō, dan najə̄ yādə́ kə́ jóo gə̄ tə́.

¹⁰ Banī nin̄ mbātə́n̄ najə̄, rāān̄ Ndílən kə́ táĺ adə̄ rɔ̄n nelə̄n aĺ. Adə̄ Kɔ́ɔ̄ɓē tél i madə̄ ba̰ā̰də́ kógə̄ḿ ō, ni udə kə̄ loo rɔ̄ɔ̄də́ tə́ ō.

¹¹ Loo ń noō tə́ əga kem gír deē yān gə̄ dɔ yá̰á̰ kə́ mān̄ kɔ̄ɔ́ tə́, dɔ ɓāl̄ gə̄ ń Moijə i sedə́ tə́ ní: Nge ń teē kə gír deē yān gēé kum bā bo tə́ ní, kə ɓūtə̄ yá̰a̰ kul̄ yān gēé naā tə́ kə ngé ngɔ̄m̄ yá̰á̰ kul̄ yān gēé ní, ni i rá? Nge ń əndā ndílən dɔ dáńdə́ tə́ ní ni i rá?

¹² Dan ń a njə̄rān̄ ní, i ni n əhɔ Moijə kə̄ dɔɔ́ kə jīn kə́ kə tɔ́gɔ́ ní. Ni njar man̄ nodə́ tə́, yā kutə̄ń gidə rɔ̄n kə kɔsə gɔnɔɔ́ kə́ njɔ́ḿ gə̄ tə́.

¹³ I ni n teē bā bo kə́ ɗúú ngá̰ý sedə́ tītə̄ sə́ndá kə́ ənda dəla loo gān̄g beé ní ō, nin̄ əsōn̄ aĺ ō.

¹⁴ Kété ní nin̄ ton̄ tītə̄ ɓūtə̄ yá̰a̰ kul̄ kógə̄ḿ kə́ risə kum wól loo tə́ beē. Ndíĺ Kɔ́ɔ̄ɓē ɔrdə́ ta róbə aw̄ sedə́ kum loo kɔr̄ koō kógə̄ḿ tə́. A̰á̰ā̰ Kɔ́ɔ̄ɓē, ḭ̄ ɔ́r no gír deē yāí gə̄ tītə̄ ń noō i yā kutə̄ń gidə rɔ̄í kə kɔsə gɔnɔɔ́!

Ndɔ̄ȳ kə́ kə rāā ɓɔ́

¹⁵ Kɔ́ɔ̄ɓē, ī-ndi dɔɔ́ dɔ rā̰ tə́ a̰a̰ń loo. Ī-ndi loo kə́ táĺ tə́ ō, kə́ majə ngá̰ý tə́ ō á̰a̰ń yá̰á̰ ń rāājí ní. Tár yāí ń a o̰ō̰ī kə́ hor tə́ tām̄ yājí tə́ ní n to rá? Tɔ́gí n to rá? J-a̰a̰ rāā kə́ ī-rāā tɔdɔ̄jí to̰ aĺ ō, kem majə yāí kə́ tām̄ yājí tə́ to̰ aĺ ō.

¹⁶ Tá ḭ̄ i bɔbə̄jí. Kaají Abəraham ger̄ najə̄ yājí kógə̄ḿ alé, Jakob ger̄jí alé. Ba ḭ̄ Kɔ́ɔ̄ɓē ḭ̄ i bɔbə̄jí, nge gān̄g dɔjí, nəkɔ́ ń jóo toó rīí n noó ngándáńg.

¹⁷ Kɔ́ɔ̄ɓē, i tām̄ rí tə́ á ādə̄ jə-ndúm̄, j-əya̰ róbə yāí kɔ̄ɔ́ ba j-aw̄ sa̰y ní? I tām̄ rí tə́ á ə́ya̰ ngarā̰ kemjí adə̄ utə̄ ta róbə yān kɔ̄ɔ́ ō, adə̄ mbātə́ ɓōĺ ndílí ō ní? Ī-tél ī-reē sɔɔ́ń táŕ kə́ ī-táŕjí, jḭḭ ń i ngé kəla yāí gə̄ ní, jḭḭ ń i gír deē yāí gə̄ ní!

¹⁸ Jḭḭ ń i gír deē yāí kə́ táĺ gə̄ ní, j-ənge dɔ nang yá̰a̰ ndəbā tə́ dan i ngá̰ý alé. Madə̄ ba̰ā̰jí gə̄ rāān̄ loo yāí kə́ táĺ adə̄ téĺ kə́ yḛr kɔ̄ɔ́.

¹⁹ Əla gír i jóó ngá̰ý n to tītə̄ kə́ ḭ̄ i mban̄g yājí to̰ aĺ ō, rīí i dɔjí tə́ to̰ aĺ ō ní. Aa! Ré ī-rə̄yā̰ dɔ rā̰ ba ī-risə nang tə́ anī! Mbal̄ bo gə̄ a ndewn̄ noí tə́.