IJAI 62 - Bibəl ta Sar̄

Rāān̄ Jerusalem adə̄ téĺ kə́ kijə

¹ Jerusalem, m-ā m̄-ndi taḿ mbóo alé, i tām̄ táŕ kə́ m̄-táriī tə́. Siyo̰, m-ā m̄-ndi kanjə̄ rāā yá̰a̰ alé, i tām̄ táŕ kə́ m̄-táriī tə́. m̄-ngóō kadə̄ gān̄g kə́ gāngə̄n̄ dɔí ɔjə rɔ̄n kə̄ ndágá tītə̄ loo kə́ dəloí kə́ unjə̄ beé ō, kadə̄ kajə kə́ ajiīn̄ unjə̄ tītə̄ lámbá kə́ əndān̄ hor tū tə́ beē ō.

² Loo ń noō tə́ nápar de gə̄ malang a a̰a̰n̄ kadə̄ Kɔ́ɔ̄ɓē ajiī ō, mban̄g gə̄ malang a a̰a̰n̄ kɔsə kə́ ɔsən̄ gɔnií ō. Loo ń noō tə́ ā ə́nge rī kə́ kijə ń Kɔ́ɔ̄ɓē a gə̄rā ní.

³ Ā ī-to tītə̄ jākā mbang kə́ majə ngá̰ý kem jī Kɔ́ɔ̄ɓē tə́, tītə̄ ta kūbə̄ kənda dɔ yā mban̄g kem jī Nə́ɓā yāí tə́.

⁴ A ɓāríīn̄ na i dəyá̰ kə́ əya̰nən̄ kɔ̄ɔ́ to̰ alé, a ədan̄ na ɓē yāí na i dəla loo kə́ rɔ̄nelāĺ i tū tə́ to̰ alé. Banī a ɓāríīn̄ na i dəyá̰ kə́ taā dəngam majə ō. A̰á̰ā̰, a nel̄ Kɔ́ɔ̄ɓē seí rɔ̄kum ō, dɔ nang yāí a ənge dəngam yā taā ō.

⁵ Tītə̄ ń balsáa taāń ngōmandə ní, nge tél rāāī gogə́ rang a tél ngaaí i tītə̄ ń noō ō. Tītə̄ ń dəyá̰ kijə i yá̰a̰ rɔ̄nel̄ yā ngaan ní, ā ī-téĺ yá̰a̰ rɔ̄nel̄ yā Nə́ɓā yāí.

⁶ Jerusalem, m̄-tə́ndā ngé ngɔ̄m̄ loo gə̄ dɔ ndogə̄ mbal̄ yāí gə̄ tə́. Kadaá gē ndɔ̄ɔ́ gē ní, i gáŕ kadə̄ nin̄ a ndin̄ tadə́ mbóo alé. Sḭḭ̄ ngé ngɔ̄m̄ loo gə̄ ń ī-raī kə Kɔ́ɔ̄ɓēé kadə̄ əga kemən dɔ Jerusalem tə́ ní, ī-lōōī kɔr̄ koō.

⁷ Ī-lōōī kəya̰n kadə̄ taā koō kété kanjə̄ kadə̄ tél rāā ɓē kə́ Jerusalem gogə́ rang, kanjə̄ kadə̄ Jerusalem téĺ yá̰a̰ tɔ̄ȳ kə́ dɔ nang tə́ malang.

⁸ Kɔ́ɔ̄ɓē ənī ndūn ń toō kə ngagá ngá̰ý, əda na: Tītə̄ ń tɔ́gə́ḿ i ngá̰ý noó, m-ā m-ə́ya̰ madə̄ ba̰ā̰í gə̄ kadə̄ ulə̄n̄ rɔ̄də́ kə kōō gémē yāí to̰ alé. Tə̄rā gə̄ a a̰ȳn̄ kasə nduú yāí ń ɔ́r tāmən tə́ ní to̰ alé.

⁹ Banī ngé gə̄ ń ɔyn̄ kōō gémē ní, nin̄ kɔ́ gə̄ a əsan̄ ō, a ənīnəń pā tɔ̄ȳ Kɔ́ɔ̄ɓē ō. Ngé gə̄ ń a əjan̄ kan̄ nduú ní, nin̄ kɔ́ gə̄ a a̰ȳn̄ kasən ndágə loo gə̄ kə́ gīr̄ gidə kújə yā Kɔ́ɔ̄ɓē kə́ gidə loo yāḿ kə́ táĺ tə́.

¹⁰ De kə́ Jerusalem gə̄, ī-teēī, ī-teēī láẃ kɔ̄ɔ́ kem ɓēé! Ī-njariī róbə ādī gír deē yāḿ gə̄. Ī-rāāī róbə ādī majə, ī-ró̰yī mbal̄ gə̄ kɔ̄ɔ́, údiī yá̰á̰ kógə̄ḿ dɔɔ́ yā taāń gír de gə̄.

¹¹ Kɔ́ɔ̄ɓē rāā adə̄ de gə̄ oōn̄ ndūn bátə́ ta ngóy dɔ nang tə́. I beé ní, ə́daī ɓē kə́ Siyo̰ na: Nge kajií a reē noó. Ngé gə̄ ń ni-əngedə́ ní, ni-tél reē sedə́. Yá̰á̰ ń ni-ənge gír kəla yān tə́ ní ni-tél reēń.

¹² A ɓārə́n̄də́ na i gír de kə́ táĺ gə̄, na i ngé gə̄ ń Kɔ́ɔ̄ɓē gān̄g dɔdə́ ní. Ba ḭ̄ Jerusalem, a ɓāríīn̄ na i ɓē kə́ əya̰n̄ kɔ̄ɔ́ to̰ alé, banī a ɓāríīn̄ na i ɓē kə́ de gə̄ gḛyn̄.