IJAI 6 - Bibəl ta Sar̄

Ijai rāā kəla yā Kɔ́ɔ̄ɓē

¹ I ɓāl̄ ń mban̄g Ojias oy ń tə́ ní. Ndɔ̄ kógə̄ḿ tə́ anī, m-á̰á̰ yá̰á̰ kógə̄ḿ. Kɔ́ɔ̄ɓē ndi i dɔ kōr̄ kāgə̄ mbang kógə̄ḿ kə́ ngāl̄ ngá̰ý kum kə̄ dɔɔ́ tə́. Kūbə̄ kə́ rɔ̄n tə́ taā loo kə́ kem kújə yā Kɔ́ɔ̄ɓē tə́ malang.

² Serubḛ gə̄ kə́ nin̄ i hor gə̄ ran̄ dɔn tə́ dɔɔ́. Nin̄ kógə̄ḿ kógə̄ḿ ní bɔ̄gə̄də́ gə̄ i mehḛ́ mehḛ́: Kə́ jōó gə̄ a utə̄n̄nəń i ta kumdə́ ō, kə́ jōó gə̄ a utə̄n̄nəń i gidə rɔ̄də́ kə́ ta kaw̄ nang tə́ ō, kə́ jōó gə̄ i yā kḭḭń bɔ̄gə̄ ō.

³ Nin̄ unən̄ ndūdə́ kə̄ dɔɔ́ ngá̰ý ədanə̄ń naā na: Kɔ́ɔ̄ɓē kə́ bo kə́ tɔ́gən i ngá̰ý i kə́ táĺ, táĺ, táĺ! Kɔsə gɔn yān taā loo malang dɔ nang tə́!

⁴ Ndūdə́ rāā bápə gə̄ adə̄ ndewn̄ dɔ gində̄də́ ń a rə̄ngōn̄ gidə tə́ ní tə́ ō, sa taā loo kem kújə yā Kɔ́ɔ̄ɓē tə́ ō.

⁵ Anī m-ə́da na: Yá̰á̰ kə́ to kum kaȳ aĺ a teē dɔḿ tə́! Mā i kə́ taḿ tḭ̄ḭ̄ kɔ̄ɔ́! Mā i de kə́ taḿ i kə́ yḛr ō, m̄-ndi i dan de gə̄ kə́ tadə́ i kə́ yḛr tə́ ō, kumḿ a̰a̰ mban̄g ń i Kɔ́ɔ̄ɓē kə́ bo kə́ tɔ́gən i ngá̰ý ní ō!

⁶ Banī Serubḛ kə́ ndə́lē gə̄ ní, kógə̄ḿ ḭḭ bɔ̄gə̄ reē rɔ̄ḿ tə́. Ni əhɔ yā̰l̄ hor kógə̄ḿ kə́ təngā ngá̰ý jīn tə́. Un yā̰l̄ hor ní dɔ loo tun̄ yá̰á̰ tə́ i kə gində̄ kun hor kə́ ta laá.

⁷ Ni ɔdə taḿ kə yā̰l̄ hor ní ba ədam̄ na: Dan ń yā̰l̄ hor ń toō ɔdə taí ní, ɔrə̄n̄ yá̰a̰ rāāí kə́ gōtə́ aĺ kɔ̄ɔ́, mā̰ȳn̄ rɔ̄də́ dɔ majaĺ yāí tə́ kɔ̄ɔ́.

⁸ Loo ń noō tə́ m-ōō ndū Kɔ́ɔ̄ɓē loo dəje najə̄ tə́, əda na: M-ā m-ə́la i náā? Ngōmbang kəla yājí i náā? Anī m̄-dal najə̄ ní m-ə́da na: Mā n toó, ə́lam̄!

⁹ Anī Kɔ́ɔ̄ɓē ədam̄ na: Āw̄ ə́dá gír de gə̄ ń toō: Ā ōōī najə̄ majə, banī ā ī-gerī kum alé. Ā á̰a̰ī loo majə, banī ā á̰a̰ī yá̰á̰ kógə̄ḿ alé.

¹⁰ Ūtə̄ ta róbə kemdə́ kɔ̄ɔ́, ī-rāādə́ ādə̄ mbīdə́ oō loo aĺ ō, ādə̄ kumdə́ a̰a̰ loo aĺ ō. Ɔ̄gə̄ kumdə́ ka̰a̰ loo ō, ɔ̄gə̄ mbīdə́ koō loo ō, ɔ̄gə̄ kemdə́ ger̄ najə̄ ō, i beé tá a tūrə̄n̄ rɔ̄də́ kə̄ rɔ̄ḿ tə́ aĺ ō, a əngen̄ rɔ̄ ngáā aĺ ō.

¹¹ m̄-dəje najə̄, m-ə́da na: Kɔ́ɔ̄ɓē, i bátə́ rə́ngáý tə́? Anī ni tūr̄ əda na: I bátə́ kum mbang ń a nujənə̄ń ɓē bo gə̄ sák sák kɔ̄ɔ́ tə́ ní ō, de gə̄ a gətóonə̄ń kɔ̄ɔ́ kem ɓē bo gə̄ tə́ ní ō, de gə̄ a gətóonə̄ń kɔ̄ɔ́ kem kújə gə̄ tə́ ní ō, ndɔr̄ gə̄ a télnə̄ń dəla loo kə́ yá̰a̰ gətóo tū tə́ tə́ ní ō.

¹² A̰á̰ā̰, de gə̄ kə́ kem ɓē ń toō tə́ ní, Kɔ́ɔ̄ɓē a əla sedə́ sa̰y. A əya̰n̄ ndɔr̄ gə̄ ngá̰ý kɔ̄ɔ́.

¹³ Ré gángə̄n̄ de kə́ kem ɓēé gə̄ gír loo kutə anī, gírən kə́ kógə̄ḿ ń a na̰y ní, hor a o̰o̰ tītə̄ loo róō kāgə̄ kə́ tə́gā kɔ̄ɔ́ beē. I gír gisə kāgə̄ ní ngóy n a na̰y ní. Banī gír gisən ní i yá̰á̰ kə́ Nə́ɓā ɔjəń kadə̄ n a n-rāā yá̰á̰ kə́ kijə.