IJAI 59 - Bibəl ta Sar̄

Yá̰á̰ kə́ ɔgə̄ deē mān̄ kə́ to dɔ dáńsí tə́ kə Nə́ɓāá

¹ Kɔ́ɔ̄ɓē ní tɔ́gə jīn gətóó ngá̰ý al̄ naā á ni asə kajəsí aĺ alé, nge ń noō ní to i kə̄ dɔ ndágá kadə̄ i rɔ̄kum. Mbīn mbóó ngá̰ý á asə koō najə̄ yāsí aĺ alé.

² Banī i yá̰a̰ rāāsí kə́ gōtə́ aĺ gə̄ n dēsə́n̄ yá̰a̰ dɔ dáńsí tə́ kə Nə́ɓā yāsí ɔgə̄n̄neésí mān̄ ní. Ré ni tūr̄ gidən tasí tə́ yā ka̰a̰ńsí to̰ aĺ ō, yā koōń najə̄ yāsí to̰ aĺ ō anī, i tām̄ majaĺ yāsí gə̄ tə́.

³ Jīsí i mósə, yá̰a̰ rāāsí kə́ gōtə́ aĺ gə̄ rāān̄ adə̄ jīsí i kə́ yḛr. Tasí əda najə̄ kə́ sor̄ gə̄, ndāŕ tasí gə̄ əya̰n̄ najə̄ kə́ kɔr̄ kə kem nduluú gə̄ adə̄ teēn̄ tasí tə́.

⁴ Loo sekə́ ń ā ī-sekíī deē loo sarya tə́ ní i gōtə́ alé. Sḭḭ̄ ī-rɔ̄ɔ̄ī dɔ deē tə́ i kə gō najə̄ kə́ rɔ̄kum alé. Sḭḭ̄ ə̄ndāī tɔ́gə́sí i dɔ yá̰á̰ kə́ kemən ra wōȳ tə́. Sḭḭ̄ ə́daī yá̰á̰ kə́ rɔ̄kum aĺ gə̄. Sḭḭ̄ ə̄tōī yá̰á̰ kə́ majaĺ kemsí tə́ ō, ójiī i yá̰á̰ kə́ to kum kaȳ aĺ ō.

^5-6 Yá̰a̰ rāāsí gə̄ ton̄ i tītə̄ kaa lī kakə́m beé: Ré deē əsa anī kɔ́ɔ̄ oy. Dan ń deē tɔ̄ɔ̄ kaa ní anī, lī kakə́m teē kemeé. Kūbə̄ kəjōsí gə̄ ton̄ i tītə̄ dəndō yā súū beé. Deē asə kur̄ kūbə̄ tə́ aĺ ō, asə kənī dɔn tə́ aĺ ō. Deē a undə́ a rāań i yá̰á̰ kə́ to kum kaȳ aĺ ngóy. I yá̰a̰ rāā kə́ kə dɔ́nɔ́ ngóy n jīsí a rāā ní.

⁷ Njasí gə̄ a a̰ȳn̄ ngɔ̄də̄ a aw̄n̄ i kə̄ rāā yá̰á̰ kə́ majaĺ tə́, de gə̄ kə́ najə̄ gətóo dɔdə́ tə́ ní, sḭḭ̄ ī-tewleī loo tɔ̄l̄də́ tə́. Sḭḭ̄ ī-gírī i rāā yá̰á̰ kə́ majaĺ ngóy. Loo malang ń sḭḭ̄ ī-teēī tū tə́ ní, i yá̰a̰ rāā kə́ kə dɔ́nɔ́ n a to tū tə́ ō, i yá̰á̰ kə́ nujən a to tū tə́ ō.

⁸ Sḭḭ̄ ī-gerī róbə kem sɔl̄ alé, loo ń sḭḭ̄ ī-njə̄rāī tū tə́ ní, deē a ənge yá̰á̰ kə́ súmūú tū tə́ alé. Sḭḭ̄ ī-rāāī róbə yāsí gə̄ ādə̄ rugən̄ ō, deē ń un róbə yāsí ní a ənge kem sɔl̄ aĺ bátə́ ō.

Gír de gə̄ yā Nə́ɓā gerə̄n̄ yá̰a̰ rāādə́ kə́ gōtə́ aĺ gə̄

⁹ I tām̄ najə̄ ń toō tə́ n Nə́ɓā rāā yá̰a̰ tām̄ yājí tə́ aĺ ō, gān̄g sarya kə́ gōtə́ adə̄jí aĺ ō ní. J-əndāī kemjí dɔ loo kə́ unjə̄ kow tə́, banī jḭḭ̄ i kum loo kə́ ndul tə́. J-a jə-ngóōī i kə́ kadə̄ loo tīī dɔjí tə́, banī jə-njə̄rāī i ndɔ̄ɔ́.

¹⁰ Jə-njə̄rāī kə gō kadə ndogə̄ mbalá kum kə̄ kété tītə̄ ngé kum tɔ̄ɔ̄ gə̄ beé. Jə-sāāī róbə yājí tītə̄ de gə̄ kə́ kumdə́ a̰a̰ loo unjə̄ ngá̰ý aĺ beē. Jə-də́bāī dan kadaá tītə̄ kə́ loo tíbə kɔ̄ɔ́ beē. Rɔ̄jí ngan̄g májə́ májə́, banī jə-toī tītə̄ de kə́ koy kɔ̄ɔ́ gə̄.

¹¹ Jḭḭ̄ malang j-ɔjiī wōn̄g yājí kə̄ ndágá kə nuú tītə̄ dā̰ kə́ bembeé gə̄ beé. Jə-nōōī tītə̄ dér dum gə̄ beé kanjə̄ dəba. J-əndāī kemjí dɔ Nə́ɓā tə́ kadə̄ rāā yá̰á̰ kógə̄ḿ, banī yá̰á̰ kógə̄ḿ kə́ rāā yá̰a̰ gətóo. Jə-ndi j-a jə-ngóōī kadə̄ ajəjí banī ni ra sa̰y rɔ̄jí tə́.

¹² A̰á̰ā̰, Kɔ́ɔ̄ɓē, jə-mbātə́ taí ngándáńg. Majaĺ yājí gə̄ sekə́n̄jí. Jə-gír̄ dɔ kəsō wōn̄g yājí gə̄ tə́ kanjə̄ dəba, yá̰a̰ rāājí kə́ gōtə́ aĺ gə̄ ní jə-ger̄ majə.

¹³ Kɔ́ɔ̄ɓē, jə-mbātə́ taí, jə-tél gōí tə́ kɔ̄ɔ́, Nə́ɓā yājí, j-a̰yī j-aw̄ sa̰y. J-a j-ɔr̄ i najə̄ rējə̄ madə̄jí gə̄ ngóy ō, i najə̄ kəsō wōn̄g ngóy ō. Sor̄ i ngá̰ý kemjí tə́ ō, i ngá̰ý dɔjí tə́ ō.

¹⁴ I tām̄ najə̄ ń toō tə́ n ɓōĺ gidə yá̰á̰ kə́ súmūú tél kə̄ gogə́ ní, yá̰a̰ rāā kə́ gōtə́ i sa̰y rɔ̄jí tə́. Na̰y i ngɔr kadə̄ kɔr̄ najə̄ kə́ rɔ̄kum teē əsō ndágə loo kə́ súkūú tə́, ɓōĺ gidə yá̰a̰ rāā kə́ gōtə́ aw̄ ndágə loo kə́ súkūú tə́ to̰ alé.

¹⁵ A̰á̰ā̰, kɔr̄ najə̄ kə́ rɔ̄kum gətóo kɔ̄ɔ́ ō, deē ń ndigə ɓōĺ gidə yá̰a̰ rāā kə́ gōtə́ anī, a nārə̄n̄ yá̰a̰ yān malang kɔ̄ɔ́ ō. Kɔ́ɔ̄ɓē a̰a̰ yá̰a̰ gə̄ ń noō malang. Ni-a̰a̰ kadə̄ gətóo yā yá̰á̰ kə́ súmūú i yá̰á̰ kə́ majaĺ.

Kɔ́ɔ̄ɓē udə dan yá̰á̰ tə́ yā tūr̄ yá̰a̰

¹⁶ Yá̰á̰ ń rāā yá̰á̰ ní ni-a̰a̰ kadə̄ deē kógə̄ḿ kə́ mbātə́ gətóo, kadə̄ de kə́ ḭḭ rāā yá̰á̰ kógə̄ḿ gətóó bátə́ ní ɔr kumən. Loo ń noō tə́ nəkɔ́ kə dɔneé gḛy rāā yá̰á̰ kógə̄ḿ ō, yá̰á̰ ń adə̄n tɔ́gə́ ní i yá̰a̰ rāā kə́ gōtə́ yān ō.

¹⁷ Yá̰a̰ rāā kə́ gōtə́ i kūbə̄ rɔ̄ɔ̄ ń ni-əla rɔ̄n tə́ ní, kajə deē i jākā ń ni-əla dɔn tə́ ní. Rāā ba̰ā̰ i kūbə̄ ń ni utə̄ń gidə rɔ̄n ní. Təngā ta rɔ̄ɔ̄ tə́ i kūbə̄ ń ɓírə̄n ní.

¹⁸ Yá̰á̰ ń de gə̄ asən̄ kənge ní, ni a téləń yā kadə̄də́. Wōn̄g yān i tām̄ yā ngé rɔ̄ɔ̄ seneé gə̄ tə́, ndéy i tām̄ yā madə̄ ba̰ā̰n gə̄ tə́, ɓē kə́ sa̰y gə̄ gə̄gē i tām̄ yādə́ tə́.

¹⁹ Loo ń noō tə́, ḭḭ gír ɓē tə́ bátə́ no ɓē tə́ ní, de gə̄ malang a ɓōlə́n̄ gidə rī Kɔ́ɔ̄ɓē, nin̄ malang a ɓōlə́n̄ gidə kɔsə gɔn yān. A̰á̰ā̰, Kɔ́ɔ̄ɓē a rēē tītə̄ man̄ dɔ mbal̄ kə́ kum wól loo tə́ kə́ man̄ kə́ edə kə néĺ kə́ əla kə ngangá ngá̰ý mbəre gōn beé.

²⁰ Nge gān̄g dɔ de gə̄ kógə̄ḿ a reē Siyo̰ tām̄ yā ngé gə̄ ń tūrə̄n̄ gidədə́ kɔ̄ɔ́ ta yá̰á̰ kə́ gōtə́ aĺ yādə́ gə̄ tə́ dan ngán Jakob gə̄ tə́ ní. Najə̄ ń Kɔ́ɔ̄ɓē əda ní n noó.

²¹ Kɔ́ɔ̄ɓē əda najə̄ kə́ rang dɔ tə́ ɓáý: Ba mā ɓáa, ndūḿ ń m-ə̄nī m-ādə̄ ngé gə̄ ń noō ní n toó: Ndílə́ḿ i dɔsí tə́ ō, m-ə̄ndā najə̄ yāḿ tasí tə́ ō. Nin̄ i tām̄ yāsí tə́ ō, tām̄ yā ngáńsí gə̄ tə́ ō, i tām̄ yā ngán kaasí gə̄ tə́ ō, ngɔlaā ō njɔ́ḿ kə̄ no tə́ ō. M-ā m̄-tél yā taādə́ jīsí tə́ kɔ̄ɔ́ aĺ i kə́ bátə́ gə̄ tə́. I mā Kɔ́ɔ̄ɓē n m-ə́da na najə̄ ń noō i rɔ̄kum ní.