IJAI 58 - Bibəl ta Sar̄

Ndi ɓō kə́ nel̄ Nə́ɓā

¹ Kɔ́ɔ̄ɓē əda na: Ī-teē ngaāí ngá̰ý ə́gań kɔŕ! Ī-lōō kəhɔ rɔ̄í! Ī-rāā ndūí ādə̄ ɓār̄ tītə̄ bərúnjə beé! Ɔ́jə́ gír deē yāḿ gə̄ yá̰a̰ rāādə́ kə́ gōtə́ aĺ gə̄, ɔ́jə kojə yā Jakob gə̄ majaĺ yādə́ gə̄.

² Kə dɔ ndɔ̄ gə̄ nin̄ a reēn̄ i koō najə̄ kə́ taḿ tə́ tə́, nin̄ ndigən̄ ger̄ yá̰á̰ ń m̄-ndi m-ā m̄-ngóō ta rɔ̄də́ tə́ ní. Nin̄ ton̄ tītə̄ nápar de gə̄ kə́ ngé ɓōĺ gidə yá̰a̰ rāā kə́ gōtə́ beē ō, tītə̄ gír de gə̄ kə́ əya̰n̄ yá̰á̰ kə́ súmūú yā Nə́ɓā yādə́ kɔ̄ɔ́ aĺ beé ō. Nin̄ dəjemə̄n̄ kadə̄ m̄-gān̄g sarya kə́ gōtə́ kə m-ādə̄də́, nin̄ ndigən̄ kadə̄ mā i ngɔr rɔ̄də́ tə́.

³ Tá nin̄ ədamə̄n̄ na: Ré á̰a̰n aĺ anī ī-*ndi ɓō tām̄ yā Nə́ɓā tə́ i najə̄ rí tə́? Ré j-ə̄ndā ma̰ȳn á̰a̰n ī-gerə̄n aĺ anī, jə-téliī kə rɔ̄jí kə̄ nang tə́ adə̄ jə-dúūī i tām̄ rí tə́? Anī m̄-tūr̄ m-ə́da na: Ndɔ̄ ń sḭḭ̄ ī-*ndiīń ɓō tə́ ní, sḭḭ̄ á̰a̰ī gō kəla yāsí gə̄ ō, ī-rāāī ngé kəla yāsí gə̄ majaĺ ō.

⁴ Dan ń sḭḭ̄ ī-*ndiī ɓō tām̄ yā Nə́ɓā tə́ anī, ī-kɔ̄lī naā ō, ī-ɓirī jīsí ī-tə́ndāīneé madə̄sí gə̄ ō. I kə ta kūl̄ ndi ɓō kə́ tītə̄ ń noō n ā ī-rāāiń kadə̄ oōn̄ ndūsí dɔɔ́ nú ní alé.

⁵ Ndi ɓō kə́ nelə̄m̄ to i tītə̄ ń noō a? Tél kə rɔ̄sí kə̄ nang tə́ kadə̄ sḭḭ̄ i de kə́ dūú gə̄ ní, Kəla dɔ kə̄ nang tə́ tītə̄ tītə̄ mu tə̄ɓā beé, kəla kūbə̄ kəhɔ ndoō rɔ̄ tə́, kəto kum bumbə́rú tə́, i yá̰á̰ ń noō n ā ī-ɓāríin̄ na i ndi ɓō ní a? I yá̰á̰ ń noō n ā ī-ɓāríin̄ na i ndɔ̄ kə́ nelə̄m̄ mā ní a?

⁶ Ndi ɓō kə́ nelə̄m̄ n toó: I tútə de gə̄ kə́ do̰ō̰n̄də́ kə súĺ kə ta róbə́ kə́ gōtə́ aĺ kəya̰də́ dɔɔ́, i kun njúgə́ kə́ ɔȳdə́ dɔdə́ tə́ kɔ̄ɔ́, i taā ngé gə̄ ń a rējə̄n̄də́ ní kəya̰də́ dɔɔ́, yā kadə̄ gō ngāləń ngá̰ý aĺ ɓáa, i rāā kadə̄ yá̰a̰ malang ń a rāādə́ ɓəlo tə́ ní gətóo kɔ̄ɔ́.

⁷ I kadə̄ ī-kēgə̄ mápa yāí ādə̄ deē ń ɓō rāān ní, i kadə̄ ngé ndoō gə̄ ń kújə yādə́ gətóó ní loo kadə̄ tonə̄ń, i kadə̄ ngé gə̄ ń kūbə̄ yādə́ gətóó ní kūbə̄ kadə̄ əlan̄ rɔ̄də́ tə́, i kadə̄ ī-tūr̄ gidií kɔ̄ɔ́ ta de kə́ ngōkó̰ó̰í tə́ alé.

⁸ Loo ń noō tə́ loo kə́ unjə̄ kow yāí a teē tītə̄ ta gír loo kə́ atə wororo beé ō, do yāí a idə̄ láẃ ō. Yá̰a̰ rāāí kə́ gōtə́ a njə̄rā kété noí tə́ ō, kɔsə gɔn yā Kɔ́ɔ̄ɓē a njə̄rā gogə́ gōí tə́ ō.

⁹ Dan ń ā ī-ɓāŕ yá̰a̰ anī, Kɔ́ɔ̄ɓē a ndigiī. Dan ń ā ə́ga kɔŕ anī, ni a əda na: Mā i laā! Yá̰á̰ kə́ a rējə̄ madí gə̄ ō, yá̰a̰ rāā kə́ a əla ɓōĺ kem deē tə́ ō, najə̄ kə́ adə̄ deē do ō ní, ré ī-rāādə́ adə̄ gətóon̄ kɔ̄ɔ́ kem ɓē yāí tə́ anī,

¹⁰ loo yāí kə́ unjə̄ kow a to dan ndɔ̄ɔ́ ō, loo yāí kə́ risə til a to tītə̄ loo kə́ unjə̄ kow kadaá beē ō. A to tītə̄ ń noō loo ń ā ī-kēgə̄ yá̰a̰ kəsa yāí ādə̄ nge ɓō rāā ní, loo ń ā ādə̄ ngé gə̄ ń ndin̄ dan ndoō kə́ ngá̰ý tə́ yá̰a̰ kəsa ní.

¹¹ Kɔ́ɔ̄ɓē a tél nge kɔjiī róbə́ ngándáńg. Dəla loo tə́ gə̄gē ni a adī yá̰a̰ kəsa ō, a adī tɔ́gə gogə́ rang ō. Ā ī-to tītə̄ ndɔr̄ kə́ rāān̄ man̄ dɔ tə́ adə̄ man̄ asən beé, tītə̄ man̄ kə́ əɓa nang tə́ kə́ a nūgə́ ngándáńg beē.

¹² Ndogə̄ mbal̄ kə́ jóo gə̄ ń nujən̄neé kɔ̄ɔ́ ní, ā ī-tél yā kundə́ dɔɔ́ gogə́, nja kújə́ kə́ kəya̰ kɔ̄ɔ́ jóo gə̄ ní, ā ī-tél yā rāā kújə dɔ tə́. A ɓāríīn̄ na i gír de gə̄ kə́ ngé kutə̄ kum loo kə́ njar gə̄ ō, kə́ tél rāā róbə kɔsə kə́ kem ɓēé gə̄ ō.

Ndɔ̄ Sabat kə́ nel̄ Nə́ɓā

¹³ Tītə̄ ń toō: Ī-mbātə́ rāā kəla ndɔ̄ sabat tə́, ndɔ̄ ń noō ń i ndɔ̄ kə́ kɔr̄ kam̄ tām̄ yān tə́ ní, ə̄ndā kumií gíŕ yá̰a̰ yāí gə̄ tə́ ndɔ̄ ń noō tə́ alé. Ī-ɓāŕ ndɔ̄ sabat na i ndɔ̄ rɔ̄nel̄. Ī-ɓāŕ ndɔ̄ yā Kɔ́ɔ̄ɓē na i ndɔ̄ kə́ yā ɓōĺ gidə ō, ī-ɓōĺ gidə ndɔ̄ ní kə mbātə́ rāā kəlaá ō, kə mbātə́ kəndā kumií gíŕ yá̰a̰ gə̄ tə́ ō, kə mbātə́ kɔr̄ najə̄ kə́ dan gān̄g aĺ ō.

¹⁴ Loo ń noō tə́ ā ə́nge rɔ̄nel̄ yāí i kemḿ mā tə́. M-ā m̄-rāā kadə̄ ā ī-mān̄ tītə̄ nge tetə rɔ̄ɔ̄ beé dɔ mbal̄ bo gə̄ kə́ kem ɓēé tə́. Dɔ nang ń kaaí Jakob ənge kə́ yá̰a̰ halan tə́ ní, m-ā m̄-rāā kadə̄ ā ə́ngé yá̰a̰ tū tə́. Yá̰á̰ ń Kɔ́ɔ̄ɓē ənī ndūn yā rāā ní n noó.