IJAI 57 - Bibəl ta Sar̄

¹ Ngé gə̄ ń oōn̄ ta Nə́ɓā ní, tɔ̄lə̄n̄də́ kɔ̄ɔ́ ō, deē kógə̄ḿ kə́ usən dɔ tə́ gətóo ō. A̰á̰ā̰, ngé gə̄ ń oōn̄ ta Nə́ɓā ní gətóon̄ kɔ̄ɔ́, sɔɔ̄ń kem ndul yā de kə́ majaĺ gə̄.

² Banī kem sɔl̄ lɔm a tél yā to gogə́, adə̄ ngé gə̄ ń unən̄ róbə́ kə́ súmūú ní, a asən̄ to jəke yā ɓīiń.

Kɔ̄lə̄n̄ kə ngé rāā ɓesə̄ gēé

³ Sḭḭ̄ ngán dəyá̰ kə́ nge rāā kəga, ī-reēī kə̄ ngɔr. Sḭḭ̄ i ɓūtə̄ de kə́ ngé rāā rāȳ gə̄ ngóy ō, ɓūtə̄ de kə́ ngé rāā ájə́ba gə̄ ngóy ō.

⁴ Ā ī-mbóōī i kə náā? Ī-tə́laī ndo̰sí lim lim i gíŕ náā tə́? A̰á̰ā̰, sḭḭ̄ i ngáń kə́ dum̄ naā gə̄, sḭḭ̄ i ɓūtə̄ de kə́ ngé sor̄ gə̄.

⁵ Ngur asəsí nák kadə̄ kāgə̄ kə́ yā ɓōĺ gidə gə̄ tə́, gír kāgə̄ gə̄ malang kə́ mbīdə́ əga ku tə́. Sḭḭ̄ ī-tɔ̄lī ngán gə̄ ba ī-tunīdə́ kadə ngán man̄ gə̄ tə́, bəlo mbal̄ gə̄ tə́.

⁶ Israel, ngán mbal̄ kə́ gidə ndə́lē gə̄ kə́ kum ngōn̄ man̄ tə́ i tām̄ yāí tə́, i núsə́ yá̰á̰ kə́ tām̄ yāí tə́ n noó. Kasə nduú ń ī-tə́te nang tə́ ní, i nin̄ n ī-tun̄ ādə̄də́ ní. I nīn n ī-ndējə̄də́ kadə̄ karī gə̄ ní. Kɔ́ɔ̄ɓē dəje najə̄ əda na: Majə kadə̄ m̄-ndigə yá̰á̰ ń noō a?

⁷ Ḭ̄ ī-rāā loo kəto kə́ tām̄ yāí tə́ dɔ loo malang kə́ kḭḭ kə̄ dɔɔ́ tə́. Ḭ̄ ā āw̄ ā ī-ndējə̄ yá̰á̰ kə́ tun̄ gə̄ i loo ń noō tə́.

⁸ Ḭ̄ ī-do̰ō̰ kəga yāí gidə kāgə̄ ta róbə́ kújə́ tə́. Ḭ̄ ī-ɓɔ̄ɔ̄ rɔ̄í kadə̄ m-á̰a̰ī aĺ ō, ɔ̄r̄ kūbə̄ kə́ rɔ̄í tə́ kɔ̄ɔ́ ō, ba āl̄ dɔ tə̄rá yāí kə́ bo ngá̰ý tə́. Ḭ̄ ōōī naā kə kābāí gēé, i koō naā kə́ kadə̄ rāā majə seí ḭ̄ḭ́, nelī to sedə́ ō, ka̰a̰ yá̰á̰ ní ō.

⁹ Ḭ̄ āw̄ rɔ̄ mban̄g kə́ bo tə́ kə yibīí ō, kə ítirií ō, ḭ̄ ə́la de gə̄ adə̄ aw̄n̄ bátə́ ugə̄n̄ sa̰y ngá̰ý, nin̄ i sa̰y kə loo ń toō. Ḭ̄ ī-risə nang tə́, āw̄ bátə́ ūgə̄ loo ń de kə́ koy kɔ̄ɔ́ gə̄ ndin̄ tū tə́ ní tə́.

¹⁰ Ḭ̄ ī-ngatə́rā ngá̰ý, banī ngatə́rā yāí ní rāā adə̄ kɔr rāāī. Banī ḭ̄ ə́da najə̄ ń toō alé: I yá̰á̰ kə́ kanjə̄ kumən! Ḭ̄ ī-téĺ ə́ngé tɔ́gə gogə́ rang, loo ń noō tə́ kɔr ń rāāī ní ḭ̄ ī-tetən rɔ̄ɔ̄.

¹¹ I náā n ī-ɓōlə́n ngá̰ý á ī-sorə̄ń ní? á dɔí ndígə̄naləḿ ní? m̄-ndi taḿ mbóo dan i jóó ngá̰ý. I tām̄ najə̄ ń toō tə́ n ī-ɓōĺ ndílə́ḿ to̰ aĺ ní.

¹² Banī yá̰á̰ ń i gātīí ní, m-ā m-ə́da wáńg kə̄ ndágá. Yá̰á̰ ń ī-rāā ní, ā ə́ngé yá̰á̰ kógə̄ḿ gírí alé. Nge ń noō a rāā majə seí alé.

¹³ Dan ń ā ī-ɓāŕ yá̰a̰ kadə̄ ajiīn̄ tə́ anī, ādə̄ nə́ɓā yāí kə́ rɔ̄kum aĺ gə̄, kə́ majən̄ aĺ ngá̰ý gə̄ malang ní ajiīn̄! Nél a ɔydə́ malang yā kaw̄ sedə́ kɔ̄ɔ́, koō kógə̄ḿ a ndɔ́tə̄ sedə́ kɔ̄ɔ́. Ba ngé gə̄ ń nge ngɔ̄m̄də́ i mā ní, a əngen̄ ɓē tītə̄ yá̰a̰ haladə́ beē ō, nin̄ a əngen̄ mbal̄ bo yāḿ kə́ táĺ ō.

Gír de gə̄ yā Nə́ɓā əngen̄ rɔ̄ ngan̄g

¹⁴ Kɔ́ɔ̄ɓē əda na: Ī-rāāī róbə ādə̄ tél majə gogə́, ī-njariī róbə́ láẃ, yá̰a̰ gə̄ kə́ dɔ róbə yā gír deē yāḿ gə̄ tə́ kə́ a ɔgə̄ deē mān̄ gə̄ ní, ī-ró̰yīdə́ kɔ̄ɔ́.

¹⁵ Yá̰á̰ ń Nə́ɓā kə́ táĺ əda ní n toó, ni ń i dɔ yá̰a̰ gə̄ tə́ malang ō, aw̄ kə kújə́ kə́ yā ndi tū tə́ kə́ to ngándáńg ō ní: Mā i Nə́ɓā kə́ táĺ, m̄-ndi dɔɔ́ nuū. Banī mā i naā tə́ kə de gə̄ ń de gə̄ a rējə̄n̄də́ ō, dan wurdə́ i dan wur nge ndoō ō ní. Ngé gə̄ ń dan wurdə́ i dan wur nge ndoō ní, m̄-ndigə tél kə ndi kə kumuú kadə̄də́ gogə́, ngé gə̄ ń de gə̄ rējə̄n̄də́ ní, m̄-ndigə tél kə ndi kə kumuú kadə̄də́ gogə́.

¹⁶ Tām̄ m̄-ndigə kɔ̄l̄ ngándáńg aĺ ō, m̄-ndigə kadə̄ wōn̄g rāām̄ kə́ njɔ́ḿ gə̄ tə́ aĺ ō. Ré i beé aĺ anī, ngé gə̄ ń m̄-rāādə́ ní, a tḭ̄ḭ̄n̄ ta koō ń deē a ndiń kə kumneé ní kɔ̄ɔ́.

¹⁷ Israel rāā yá̰a̰ adə̄ najə̄ i dɔn tə́, kə ta kūl̄ gḛy yá̰a̰ malang sɔɔ̄ń ngurən. Nge ń noō rāā adə̄ wōn̄g rāām̄ ō, dan ń wōn̄g rāām̄ ní, m-ə́ndan ō. Kété ní m̄-ndigə ka̰a̰n to̰ alé. Tá ni dum̄ naā ngá̰ý, adə̄ ni na̰y kə̄ loo kun róbə yān nəkɔ́ tə́.

¹⁸ Hálən ń rāā ní, m-á̰a̰ā̰ majə ngá̰ý, banī m-ā m̄-rāān kadə̄ a ngáā. M-ā m-ɔ́jən ta róbə, m-ā m-ə́la go̰ kemən tə́. ngé gə̄ ń yo i dɔdə́ tə́ adə̄ nin̄ əhɔn̄ ndoō ní,

¹⁹ m-ā m-ə̄ndā pā tɔ̄ȳ tadə́ tə́. Kɔ́ɔ̄ɓē əda na: Deē ń ndi sa̰y ní, kem sɔl̄ lɔm i tām̄ yān tə́ ō, deē ń ndi ngɔr ní, kem sɔl̄ lɔm i tām̄ yān tə́ ō! A̰á̰ā̰, m-ā m̄-rāā gír deē yāḿ gə̄ kadə̄ rɔ̄də́ ngáā.

²⁰ Banī de kə́ majaĺ gə̄ ton̄ i tītə̄ bā bo kə́ a lén̄g, kə́ asə to jəke aĺ beē, bəngálən gə̄ rāān̄ bɔr kə́ gírí nang tə́ adə̄ ḭḭ kum kə̄ dɔɔ́ kə̄ dɔɔ́ ō,

²¹ Nə́ɓā yāḿ əda na: De kə́ majaĺ gə̄ ní, kem sɔl̄ lɔm kə́ tām̄ yādə́ tə́ gətóo.