IJAI 56 - Bibəl ta Sar̄

Kum mbang kajə deē a reē noó ( 56—66 ) A tə̄ɓān̄ deē to̰ alé

¹ Yá̰á̰ ń Kɔ́ɔ̄ɓē əda ní n toó: Ī-ɓōlíī gidə yá̰á̰ kə́ súmūú, ī-rāāī yá̰á̰ kə́ gōtə́. Gān̄g dɔ ń m̄-reēń ní, dɔ to ngɔr, ā ī-teēī dɔ tə́ kadə̄ m̄-ndigə kajəsí.

² Rɔ̄nel̄ i kə deē ń rāā yá̰á̰ m-ə́dá ní, i kə deē ń ra dɔ tə́ ngan̄g ní. Rɔ̄nel̄ i kə deē ń ɓōĺ gidə ndɔ̄ sabat ō, rā dɔ ndūn tə́ loon tə́ ō ní, deē ń gōn̄g yá̰a̰ rāā kə́ majaĺ ní.

³ Tə̄rā ń əhɔ gō Kɔ́ɔ̄ɓē ní, majə kadə̄ ni gír̄ yá̰a̰ tītə̄ ń toō alé: Kɔ́ɔ̄ɓē a tə̄ɓām̄ kɔ̄ɔ́ dan gír deē yān gə̄ tə́, nge ń noō to i kə̄ ndágá. Majə kadə̄ áji mbang əda rɔ̄n najə̄ ń toō alé: Mā i kāgə̄ kə́ tutə ngóy.

⁴ Tām̄ yá̰á̰ Kɔ́ɔ̄ɓē əda ni n toó: Áji mbang gə̄ ɓōlə́n̄ gidə ndɔ̄ sabat yāḿ gə̄. Yá̰á̰ ń nin̄ gə̄rān̄ ní i rāā yá̰á̰ kə́ nelə̄m̄ ō, əhɔn̄ gō madə̄ naā yāḿ ō.

⁵ I beé ní, m-ā m-údə mbal̄ kógə̄ḿ tām̄ yādə́ tə́ kem kújə yāḿ tə́, kem ndogə̄ mbal̄ yāḿ gə̄ tə́, yā ndang rīdə́ dɔ tə́. Nge ń noō i yá̰á̰ kə́ majə tɔȳ ngáńdə́ kə́ dəngam gə̄ ō, ngáńdə́ kə́ dəyá̰ gə̄ ō. Rī ń m-ā m-ə̄ndā dɔdə́ tə́ ní a to ngándáńg, deē a tɔ̄l̄ rī ní kɔ̄ɔ́ alé.

⁶ Tə̄rā gə̄ əhɔn̄ gō Kɔ́ɔ̄ɓē. Nin̄ rɔȳnən̄ ō, tárnən̄ ō, nin̄ i ngé kəla yān gə̄ ō. Ngé gə̄ ń noō ní, Kɔ́ɔ̄ɓē əda najə̄ yādə́ na: De gə̄ malang ń ɓōlə́n̄ gidə ndɔ̄ sabat ō, ran̄ dɔ ndūdə́ tə́ loon tə́ ō, əhɔn̄ gō madə̄ naā yāḿ ō ní,

⁷ m-ā m̄-rāā kadə̄ nin̄ a reēn̄ dɔ mbal̄ bo yāḿ kə́ táĺ tə́, m-ā m̄-rāā kadə̄ rɔ̄də́ a nel̄də́ ngá̰ý kem kújə ndɔ̄ȳ yāḿ tə́. M-ā m̄-ndigə yá̰á̰ kə́ tun̄ gə̄ ō, yá̰á̰ kə́ kadə̄ karī yādə́ gə̄ ō ń nin̄ ndējə̄mə̄n̄ dɔ loo tun̄ yá̰á̰ tə́ ní. A̰á̰ā̰, a ɓārə́n̄ kújə yāḿ na i kújə ndɔ̄ȳ kə́ tām̄ yā gír de gə̄ tə́ malang.

⁸ Kɔ́ɔ̄ɓē Nə́ɓā, ni ń ɔsə nja ngán Israel gə̄ kə́ aw̄n̄ sedə́ dɔ ɓē kə́ rang tə́ dɔ gúú tə́ kə̄ naā tə́ ní, əda kə̄ ndágá wáńg na: M-ɔ́sə njadə́ kə̄ naā tə́ kɔ̄ɔ́ ɓá ō, m-ā m-ɔ́sə nja kə́ rang gə̄ kə̄ naā tə́ ɓáý to̰ ō.

De kə́ dɔ kəla tə́ kə́ tɔ́gə́də́ asə aĺ gə̄

⁹ Sḭḭ̄ dā̰ kə́ bembeé gə̄ malang ō, sḭḭ̄ dā̰ kə́ kem ku loo gə̄ tə́ ō, ī-reēī ə́saī yá̰a̰!

¹⁰ Ngé ngɔ̄m̄ Israel gə̄ malang i məndō gə̄, nin̄ a̰a̰n̄ yá̰á̰ kógə̄ḿ gerə̄n̄ aĺ bátə́. Nin̄ malang i bísə́ kə́ gír kəlā ndo̰də́ gə̄ do̰ō̰ naā kɔ̄ɔ́ gə̄, ndōgə̄ gə̄gē nin̄ asən̄ ndōgə̄ alé. Nin̄ ton̄ nang tə́ ō, nī rāādə́ ō, ɓīī nel̄ tadə́ ō.

¹¹ Nin̄ i bísə gə̄ kə́ əsan̄ yá̰a̰ malang ō, yá̰a̰ kəsa asə tadə́ nja kógə̄ḿ aĺ ō. Tá nin̄ i ngé kul̄ gír deē yāḿ gə̄! Nin̄ gerə̄n̄ kum yá̰á̰ kógə̄ḿ alé. I yá̰á̰ ń nel̄də́ ní ngóy n nin̄ rāān̄ ní. Nin̄ kógə̄ḿ kógə̄ḿ ní, a sāān̄ i yá̰á̰ kə́ majə tām̄ yādə́ nin̄ kɔ́ gə̄ tə́ ngóy.

¹² Nin̄ ədan̄ na: Ī-reēī, j-aw̄ jə-sāāī kasə nduú. J-a j-a̰yī kasə kə́ ngan̄g gə̄. Bírí anī, a to i tītə̄ kə́ ɓōólaā ɓáý: Gotə kasə nduú na̰y i ngá̰ý.