IJAI 54 - Bibəl ta Sar̄

Əya̰n̄ Jerusalem kɔ̄ɔ́ to̰ alé

¹ Jerusalem, ḭ̄ ń kété ə́nge ngōn̄ aĺ ní, ī-rāā rɔ̄nel̄! Ḭ̄ ń kété ī-ger̄ rɔ̄tōr̄ yā kojə ngōn̄ aĺ ní, úr kɔĺ rɔ̄nel̄ ō, ādə̄ rɔ̄í nelī ō. Kɔ́ɔ̄ɓē ədaī na: Ḭ̄ dəyá̰ ń əya̰īn̄ kɔ̄ɔ́ ní, ngɔlaā ngání gə̄ i ngá̰ý tɔȳ yā dəyá̰ ń ngaan i noó ní.

² Ī-teē kem kújə tandā yāí kə̄ gogə́ ādə̄ kemən bo, kūbə̄ kə́ laa tɔȳ madə̄ gə̄ ní, ī-ndɔ́r̄ gō kəlādə́ gə̄, yā kadə̄ ī-ndi gíŕdə́ tə́, ī-lōō tə́da kutə nar yāí ń udə ní. Ī-rɔ́tə̄ kəlā gə̄ ta madə̄ gə̄ tə́ ō, kāgə̄ kə́ tadə́ atə dām̄ kógə̄ḿ gə̄ ń ī-túdə̄də́ nang tə́ ní, ə́nda gōdə́ ādə̄ ran̄ ngan̄g ō.

³ Tɔdɔ̄ ā ī-taā loo geleé gē ko̰ó̰ gē, ɓē gə̄ ń kadií tə́ ní, ngání gə̄ a taān̄. Ɓē gə̄ ń nin̄ əya̰n̄ kɔ̄ɔ́ ní, nin̄ a télən̄ yā ndi tū tə́ gogə́.

⁴ Ī-lōō ɓōĺ na rɔ̄í a sɔlī ngá̰ý to̰ alé. Ī-lōō kadə̄ kemií nujə na a tájīn̄ to̰ alé. Dɔí a ndígə̄nal rɔ̄í ń sɔlī dan ń ī-na̰y ngōn̄ ɓáý tə́ ní. Ndū gə̄ ń tájīn̄ dan ń ḭ̄ i dəyá̰ kə́ ngaa koy ní, dɔí a ndígə̄nal kɔ̄ɔ́.

⁵ I tām̄ najə̄ ń toō tə́: Ngaaí ń ā ə́ngé ní, i nge rāāī, i nge ń rīn na i Kɔ́ɔ̄ɓē kə́ bo kə́ tɔ́gən i ngá̰ý ní. Nge taā kəya̰ī dɔɔ́ i Nə́ɓā kə́ táĺ yā Israel, i nge ń a ɓāŕnən̄ na i Nə́ɓā yā dɔ nang kə taá malang ní.

⁶ Tɔ́gí ur̄ wak tītə̄ dəyá̰ kə́ əya̰nən̄ kɔ̄ɔ́ beē. Banī Kɔ́ɔ̄ɓē tél ɓāríī gogə́. A̰á̰ā̰, Nə́ɓā yāí əda na: Dəyá̰ ń deē gə̄rā dan balsáan tə́ ní, deē asə mbātə́n rɔ̄kum a?

⁷ M-ə́ya̰ī kɔ̄ɔ́ i kum mbang kə́ sḛ́ý beē tə́. Banī m̄-ndigə tél taāī gogə́ i kə kemḿ kə́ gḛy táriī ngá̰ý.

⁸ Wōn̄g rāām̄ seí ngá̰ý, adə̄ m̄-mbātə́ ka̰a̰ī kum mbang kə́ sḛý beē tə́. Banī m-ɔ́jiī kemḿ kə́ gḛyiī kə táŕ kə́ ta tɔ̄l̄ tan gətóo. I mā Kɔ́ɔ̄ɓē, mā ń i nge taā kəya̰ī dɔɔ́ ní n m-ə́daī najə̄ ń noō ní.

⁹ M-ā m̄-rāā yá̰a̰ tītə̄ kə́ ɓāl̄ yā Noe tə́. Kété ní m-ə̄nī ndūḿ m-ə́da na man̄ kaw̄ kə́ bo ngá̰ý na a taā loo dɔ nang tə́ to̰ alé. Ɓōólaā m-ə̄nī ndūḿ tītə̄ ń noō ō, m-ə́da na m-ā m̄-rāā wōn̄g seí to̰ alé, m-ā m-ə́la ɓōĺ kemií tə́ to̰ alé.

¹⁰ Mbal̄ bo gə̄ asən̄ ndɔ́tə̄, ngán mbal̄ gə̄ asən̄ ndɔ́tə̄ kaw̄ ra loo kə́ rang tə́, banī táŕ ń m-āwń tām̄ yāí tə́ ní, a tūr̄ aĺ bátə́, madə̄ naā ń m-ə́hɔ seí yā rāań kadə̄ rɔ̄í nelī ní, a ndɔ́tə̄ loo aĺ bátə́. I mā Kɔ́ɔ̄ɓē n kemḿ gḛyiī á m-ə́daī najə̄ ń noō ní.

Jerusalem kə́ ndɔ̄ń tə́

¹¹ Jerusalem, rɔ̄í tō ndoō. Man̄ kə́ edə kə nélé əndaī ō, de kə́ tél adī kəndā kem dɔ tə́ gogə́ rang gətóo ō. Mā Kɔ́ɔ̄ɓē, m-ā m̄-tél yā rāāī gogə́ rang kə mbal̄ gə̄ kə́ ɓáĺdə́ to. A əndān̄ ngəraí i kə mbal̄ gə̄ kə́ gātə̄də́ i ngá̰ý ń i mbal̄ sapir gə̄ ní.

¹² A əndān̄ mbal̄ gə̄ kə́ gātə̄də́ i ngá̰ý kə́ kərē ta ndogə̄ mbal̄ yāí gə̄ tə́ dɔɔ́, a rāān̄ bápə gə̄ kə́ ta róbə yāí gə̄ tə́ i kə mbal̄ gə̄ kə́ unjə̄n̄ yáŕ yáŕ tītə̄ bətēl̄ beé. Ndogə̄ mbal̄ yāí gə̄ malang ń ā ī-rɔ̄ɔń dɔ rɔ̄í tə́ ní, a rāān̄də́ i kə mbal̄ gə̄ kə́ gātə̄də́ i ngá̰ý.

¹³ Ngání gə̄ malang ní, m-ā m̄-ndóōdə́ yá̰a̰ ō, nin̄ a ndin̄ dan majə tə́ ō.

¹⁴ Ā ə̄ndā tɔ́gí dɔ yá̰a̰ rāā kə́ gōtə́ tə́. Deē a rējī to̰ aĺ ō, ɓōĺ a rāāī to̰ aĺ ō. De kə́ yā rāāī kadə̄ ndílí a̰ȳ to̰ a gətóo ō, de kə́ yā kəla ɓōĺ kemií tə́ to̰ a gətóo ō.

¹⁵ Ré reē ənīnī rɔ̄ɔ̄ anī, nge ń noō gírən ndetəm̄ alé. Deē ń a ənī rɔ̄ɔ̄ ní, a əsō nang tə́ noí tə́.

¹⁶ A̰á̰ā̰, i mā n m̄-rāā kɔdə̄ ní, ni tóo yā̰l̄ hor kə́ ajə ying gə̄ kə ndúbə ō, ni-rāā yá̰a̰ rɔ̄ɔ̄ kə́ tayā tayā gə̄ ō. Deē ń asə nujə yá̰a̰ rɔ̄ɔ̄ gə̄ ń noō ní, i mā n m̄-rāān ō.

¹⁷ Yá̰a̰ rɔ̄ɔ̄ gə̄ ń rāān̄ yā kənīīneé rɔ̄ɔ̄ ní, nge kógə̄ḿ kə́ asə rāāī yá̰á̰ kə́ majaĺ gətóo. Ba ré deē kógə̄ḿ ndigə sekíī loo gān̄g sarya tə́ anī, ā ásə kɔjə kadə̄ najə̄ əhɔn. Núsə́ yá̰á̰ ń m̄-ngɔ̄m̄ tām̄ yā ngé kəla yāḿ gə̄ tə́ ní n noó, loo gān̄g ń m̄-gān̄g sarya yādə́ kə gōó ní n noó. Najə̄ ń Kɔ́ɔ̄ɓē əda ní n noó.