IJAI 50 - Bibəl ta Sar̄

Nə́ɓā nin̄ kə gír deē yān gēé a mbātə́n̄ naā alé

¹ Yá̰á̰ ń Kɔ́ɔ̄ɓē əda ní n toó: Sḭḭ̄ ə́daī na mā na m̄-tə̄ɓā kó̰ó̰sí Jerusalem kɔ̄ɔ́ rɔ̄kum. Ní, ɔ́jəmī makətūbə̄ ń m̄-ndang m̄-tə̄ɓānəń kɔ̄ɔ́ ní! Ə́daī na mā na m-ígə sesí kadə̄ āwī ɓəloó, na i yā kəgāń kə̄rā gə̄ kə́ dɔḿ tə́ rɔ̄kum. Ní, ə́damī dɔ deē ń m-ígə sesí jīn tə́ ní! Ré igən̄ sesí anī, i najə̄ yá̰a̰ rāāsí kə́ gōtə́ aĺ gə̄ tə́. Ré tə̄ɓān̄ kó̰ó̰sí anī, i najə̄ majaĺ yāsí gə̄ tə́.

² Dan ń m̄-reē ní, m-ə́nge deē kógə̄ḿ alé. Ní i tām̄ rí tə́? Dan ń m̄-ɓāŕ yá̰á̰ ní, deē daləm̄ alé. Ní, i tām̄ rí tə́? Mā m-ásə kɔr̄sí ɓəloó aĺ a? Tɔ́gə́ḿ kə́ kadə̄ m-ájəńsí gətóo a? Tá kə ta kūl̄ najə̄ kə́ m̄-ndángəń loo ngóy, m̄-rāā adə̄ bā bo tutə kɔ̄ɔ́ ō, m̄-rāā adə̄ bā gə̄ télən̄ dəla loo ō. Adə̄ dan ń man̄ gətóó ní, kəndā man̄ tɔ̄l̄ kānjə̄ gə̄ ō, nin̄ ndumən̄ ō.

³ Tá ɓáý to̰ ní, m-ūtə̄ gidə dɔ rā̰ kə loo kə́ nduluú ō, m-ə́la kūbə̄ kəhɔ ndoō rɔ̄n tə́ ō.

Nge kəla yā Kɔ́ɔ̄ɓē (Najə̄ kə́ kɔr̄ kə gōsōó kə́ nge ko̰ mətá)

⁴ Kɔ́ɔ̄ɓē Nə́ɓā ndóōm̄ yá̰á̰ ń sɔɔ̄ kadə̄ m-ə́da yā kəlań go̰ kem deē ń tɔ́gən gətóo kɔ̄ɔ́ tə́ ní. Ni ndólə̄m̄ dɔ ɓīī tə́ dəloí kə dɔ ndɔ̄ gə̄, yā kadə̄ m-ōō loo tītə̄ ngōn̄ nge ndoō kə́ majə beé.

⁵ Kɔ́ɔ̄ɓē Nə́ɓā teē ta mbīḿ, adə̄ m̄-dum̄ naā aĺ ō, m̄-tél kə̄ gogə́ aĺ ō.

⁶ m̄-tūr̄ gidəḿ m-ādə̄ ngé kəndaḿ gə̄, m̄-tūr̄ mbɔ́rə́ḿ m-ādə̄ ngé ró̰ȳ mbāýḿ gə̄. M-ūtə̄ gidə kumḿ kɔ̄ɔ́ najə̄ yā ngé tájə̄ḿ gə̄ tə́ aĺ ō, najə̄ yā ngé tībə̄ hōr̄ rɔ̄ḿ tə́ gə̄ tə́ aĺ ō.

⁷ Kɔ́ɔ̄ɓē Nə́ɓā reē dḭḭ̄m̄, i tām̄ najə̄ ń toō tə́ n ndū yādə́ ɔdə rɔ̄ḿ aĺ ní. m̄-rāā ta kumḿ adə̄ ngan̄g tītə̄ mbal̄ beé. m̄-ger̄ kadə̄ rɔ̄ɔ̄ a tetəm̄ alé.

⁸ Kɔ́ɔ̄ɓē i rɔ̄ḿ tə́ ngɔr, ni a adə̄m̄ najə̄. De kógə̄ḿ ndigə rāā sarya seḿ a? J-awī naā tə́ malang loo sarya tə́! De kógə̄ḿ ndigə sekə́ḿ a? Ādə̄ ni-njə̄rā kə̄ rɔ̄ḿ tə́!

⁹ A̰á̰ā̰ Kɔ́ɔ̄ɓē Nə́ɓā reē dḭḭ̄m̄. Ní, i náā n asə gān̄g sarya dɔḿ tə́? Madə̄ ba̰ā̰ḿ gə̄ a əsōn̄ ngísə malang tītə̄ kūbə̄ kə́ yō̰ gə̄ əsan̄ beé.

Ōōī najə̄ yā nge kəla yā Kɔ́ɔ̄ɓē

¹⁰ I náā kə́ dansí tə́ n ɓōĺ ndíĺ Kɔ́ɔ̄ɓē ní? Deē ń noō ní majə kadə̄ oō najə̄ yā nge kəla yān. I náā n njə̄rā dan ndɔ̄ɔ́ ba a̰a̰ loo kógə̄ḿ kə́ unjə̄ kow aĺ bátə́ ní? Majə kadə̄ deē ń noō ənī kemən mámák adə̄ Kɔ́ɔ̄ɓē ō, ra dɔ Nə́ɓā yān tə́ ō.

¹¹ Banī sḭḭ̄ malang ń ī-rāāī hor adə̄ o̰o̰ ní, sḭḭ̄ ń ī-túdī gərā kə́ hor i ta tə́ gə̄ ī-gīrīneé gidəsí ní, údiī kum ta ndo̰ hor yāsí tə́, dan gərā gə̄ ń ī-tə́ndāī hor tadə́ tə́ ní. I Kɔ́ɔ̄ɓē n i nge rāā kadə̄ ā óyiī dan yá̰á̰ kə́ tōr̄ ngá̰ý tə́ ní.