IJAI 5 - Bibəl ta Sar̄

Ndɔr̄ kāgə̄ nduú yā Kɔ́ɔ̄ɓē

¹ Ə́yam̄ ādə̄ m-ún rī madə́ḿ m-ə̄niń pā kógə̄ḿ. Pā ní ɔr̄ i najə̄ yā madə́ḿ ō, najə̄ yā ndɔr̄ kāgə̄ nduú yān ō. Madə́ḿ aw̄ kə ndɔr̄ kāgə̄ nduú kógə̄ḿ dɔ ngōn̄ mbal̄ kógə̄ḿ kə́ nang kə́ tū tə́ teē yá̰á̰ ngá̰ý tə́.

² Ni ndɔr̄ dɔ nang ní ō, ró̰ȳ kɔkərɔ gə̄ kə́ tū tə́ kɔ̄ɔ́ ō, ba əhɔ kāgə̄ nduú kə́ majə gə̄ kem ndɔr̄ yān ní tə́. Ni-rāā kújə ngɔm̄ kə́ ngāl̄ kə̄ dɔɔ́ yā ngɔ̄məń ndɔr̄ ní ō, ndēr̄ loo kə́ yā mbə́rē kan̄ nduú tū tə́ ō. Ni-əndā kemən dɔ kənge kan̄ nduú kə́ majə tə́ kem ndɔr̄ kāgə̄ nduú yān ní tə́, banī kanə̄n ń ni-ənge ní, i kə́ masə̄.

³ Loo ń noō tə́ madə́ḿ ní əda na: Sḭḭ̄ de gə̄ ń ī-ndiī kem ɓē kə́ Jerusalem tə́ ní, sḭḭ̄ de kə́ Juda gə̄, i sḭḭ̄ n ā ī-gāngī sarya kə́ dɔ dáńjí tə́ kə ndɔr̄ kāgə̄ nduú yāḿ ní.

⁴ Yá̰a̰ malang kə́ tām̄ yā ndɔr̄ kāgə̄ nduú tə́ ní m̄-rāā. Yá̰á̰ kə́ dɔ nge ń noō tə́ ɓáý kə́ kadə̄ m̄-rāā tām̄ yān tə́ gətóo. m̄-ndi m-ā m̄-ngóō i ta kan̄ nduú kə́ majə, banī ndɔr̄ kāgə̄ nduú yāḿ teē i kə kan̄ nduú kə́ masə̄ n adə̄m̄ ní. Ní, i tām̄ yā rí tə́?

⁵ I beé ní, m̄-ndigə kədasí yá̰á̰ ń m̄-sāā rāā kə ndɔr̄ kāgə̄ nduú yāḿ ní: M-ā m-ɔ̄r̄ ndogə̄ kə́ gidə tə́ kɔ̄ɔ́, kadə̄ dā̰ gə̄ əsan̄ mbī kāgə̄ nduú gə̄ kə́ kemeé ō, m-ā m̄-ɓéngə̄lē ndogə̄ mbal̄ kə́ gidə tə́ kɔ̄ɔ́, kadə̄ ngé mān̄ róbə gə̄ njə̄rān̄ dɔ nán̄g kə́ tū tə́ tə́ kadə̄ tɔ̄ɔ̄ kɔ̄ɔ́ ō.

⁶ M-ā m̄-rāān dɔ nang kə́ kem bembeé tə́. Deē a gán̄g ta jī kāgə̄ kə́ kemeé gə̄ aĺ ō, deē a ró̰ȳ mu kə́ kemeé aĺ ō. Túpə kōn̄ gə̄ a əɓan̄ kem ndɔr̄ kāgə̄ nduú yāḿ tə́ ō, m-ā m-ɔ̄gə̄ kil̄ man̄ gə̄ kəya̰ man̄ kadə̄ edə dɔ tə́ ō.

⁷ Ndɔr̄ kāgə̄ nduú yā Kɔ́ɔ̄ɓē kə́ bo kə́ tɔ́gən i ngá̰ý i ngán Israel gə̄. A̰á̰ā̰, ndɔr̄ kāgə̄ ń nelə̄n ngá̰ý ní i de kə́ Juda gə̄. Yá̰á̰ ń Kɔ́ɔ̄ɓē sāā rɔ̄n tə́ ní, i kadə̄ ni ɓōĺ gidə yá̰á̰ kə́ súmūú. Banī yá̰a̰ rāā kə́ gōtə́ aĺ to i kə̄ loo gə̄ tə́ malang. Yá̰á̰ ń ni sāā rɔ̄n tə́ ní, i yá̰a̰ rāā kə́ gōtə́. Banī kɔŕ yā de gə̄ kə́ de kə́ nge rɔ̄ɔ̄ dɔdə́ tə́ gətóo gə̄ ɓār̄ kə̄ loo gə̄ tə́ malang.

Ngé rāā Kɔ́ɔ̄ɓē kadə̄ wōn̄g rāān gə̄

⁸ I yá̰á̰ kə́ to kum kaȳ aĺ kə́ ba̰ý beē tām̄ yā ngé rāā kújə gə̄ kə̄ dɔ naā tə́ tə́, tām̄ yā ngé kɔy ndɔr̄ gə̄ kə̄ dɔ naā tə́ tə́! Ta tɔ̄l̄ ta anī, nin̄ taān̄ loo malang ō, kem ɓē ɓáa i nīń ngóy ō.

⁹ Najə̄ ń Kɔ́ɔ̄ɓē kə́ bo kə́ tɔ́gən i ngá̰ý əda adə̄ m-ōō ní n toó: m̄-túbə̄ kə rɔ̄ḿ, a nujən̄ kújə gə̄ ń noō malang kɔ̄kə́. Kújə́ kə́ bo kə́ majə gə̄ ń noō, deē a ndi kemeé alé.

¹⁰ Ndɔr̄ kāgə̄ nduú kə́ kəlā mehḛ́ a teē lítər kasə nduú kutə mí alé. De kə́ ənda kōō gémē kə́ kɔȳn i kəlōo ɓú a ənge i njáŕ gémē kə́ kɔȳn i kəlōo kutə kógə̄ḿ beē ngóy.

¹¹ I yá̰á̰ kə́ to kum kaȳ aĺ kə́ ba̰ý beē, tām̄ yā ngé kḭḭ dɔɔ́ ta gír loo tə́ ɓatə ka̰ȳ ngɔ̄də̄ gō kasə kə́ ngan̄g gə̄ tə́ ō, kasə nduú rāādə́ adə̄ dan ndɔ̄ tɔyɔ́ gə̄gē anī, nin̄ a dáȳn̄ i mbéé ɓáý ō ní!

¹² Nin̄ əsan̄ yá̰a̰ ō, a̰ȳn̄ yá̰a̰ ō, adə̄ mān̄ dɔ majən. Dānə̄n̄ gō yá̰a̰ gə̄ ní i kə kənde kə́ laa kə́ kugə ō, i kə kənde kə́ karī kə́ kugə ō, i kə kɔdɔɔ́ ō, i kə nalaá ō. Banī yá̰á̰ ń Kɔ́ɔ̄ɓē rāā ní, nin̄ a̰a̰n̄ alé. Nin̄ a̰a̰n̄ kəla rāān alé.

¹³ I tām̄ najə̄ ń toō tə́ ń Kɔ́ɔ̄ɓē əda najə̄ ń toō ní: A ɔyn̄ gír deē yāḿ gə̄ yā kaw̄ sedə́ dɔ ɓē kə́ rang tə́, tɔdɔ̄ nin̄ ndigən̄ ger̄ yá̰á̰ kógə̄ḿ alé. De kə́ bo gə̄ a oyn̄ yo ɓō ō, kósə de gə̄ a oyn̄ yo kəndā man̄ ō.

¹⁴ I tām̄ najə̄ ń toō tə́ n loo kə́ ɓádá a teē tan kadə̄ laa ngá̰ý ní, tan kə́ bo ngá̰ý ní, ni a teē. De kə́ bo gə̄ ō, kósə de gə̄ ō, a risən̄ kemeé ndɔ̄ naā tə́, dan ń nin̄ a rāān̄ rɔ̄nel̄ kə́ kōōdə́ ɓār̄ gijə gijə ní tə́.

¹⁵ I gáŕ kadə̄ deē ndul gə̄ malang rugən̄ nang tə́ ō, i gáŕ kadə̄ nin̄ rāān̄ rɔ̄də́ de kə́ dūú gə̄ tə́ ō, i gáŕ kadə̄ ngé kɔjə rɔ̄də́ gə̄ əgan̄ kumdə́ nang tə́ ō.

¹⁶ Kɔ́ɔ̄ɓē kə́ bo kə́ tɔ́gən i ngá̰ý a ɔjə kadə̄ ni i de kə́ bo i kə ta kūl̄ kəndā ngəra yá̰á̰ kə́ súmūú. Nə́ɓā kə́ táĺ a ɔjə háĺ kə́ táĺ yān i kə ta kūl̄ rāā tá kadə̄ de gə̄ ɓōlə́n̄ gidə yá̰a̰ rāā kə́ gōtə́.

¹⁷ Batə̄ gə̄ a əsan̄ mu kem ɓē kə́ nujə kɔ̄ɔ́ tə́ i tītə̄ kə́ ran̄ i loo ko̰o̰ yādə́ tə́ beē ō, ngán bə̄yā̰ gə̄ ń ulə̄n̄də́ kadə̄ boon̄ ní, a əngen̄ yá̰á̰ kəsa yādə́ i noó ō.

¹⁸ I yá̰á̰ kə́ to kum kaȳ aĺ kə́ ba̰ý beē, tām̄ yā ngé gə̄ ń kəlā sor̄ do̰ō̰də́ tū yá̰a̰ rāādə́ kə́ gōtə́ aĺ tə́ ní! Nin̄ ndɔ́rə̄n̄ majaĺ yādə́ gōdə́ tə́ tītə̄ loo ndɔ́r̄ púsə beé.

¹⁹ Tá nin̄ ədan̄ na: Ādə̄ Kɔ́ɔ̄ɓē rāā yá̰á̰ láẃ, jə-sāā ka̰a̰n loo rāā yá̰á̰ tə́! Ādə̄ yá̰á̰ ń Nə́ɓā kə́ táĺ yā Israel ɔjə rāā ní téĺ yá̰á̰ kə́ rɔ̄kum láẃ, jə-sāā ger̄ yá̰á̰ ní!

²⁰ I yá̰á̰ kə́ to kum kaȳ aĺ kə́ ba̰ý beē tām̄ yā ngé gə̄ ń ədan̄ na: Yá̰á̰ kə́ majaĺ i yá̰á̰ kə́ majə, yá̰á̰ kə́ majə i yá̰á̰ kə́ majaĺ tə́ ní. Nin̄ tūrə̄n̄ loo kə́ ndɔ̄ɔ́ adə̄ tél loo kə́ unjə̄ kow ō, tūrə̄n̄ loo kə́ unjə̄ kow adə̄ tél loo kə́ ndɔ̄ɔ́ ō. Nin̄ rāān̄ yá̰á̰ kə́ atə̄ adə̄ téĺ yá̰á̰ kə́ nel̄ ō, rāān̄ yá̰á̰ kə́ nel̄ adə̄ téĺ yá̰á̰ kə́ atə̄ ō.

²¹ I yá̰á̰ kə́ to kum kaȳ aĺ kə́ ba̰ý beē, tām̄ yā de gə̄ ń noō ń a̰a̰n̄ rɔ̄də́ kadə̄ nin̄ i ngé kum kedə̄ gə̄ ō, nin̄ ɔjənə̄ń na kur̄ dɔdə́ na to ō ní!

²² I yá̰á̰ kə́ to kum kaȳ aĺ kə́ ba̰ý beē, tām̄ yā ngé gə̄ ń nin̄ i go̰ kasə gə̄ ō, gerə̄n̄ tə́la kasə kə́ ngan̄g gə̄ naā tə́ ngá̰ý ō ní!

²³ Deē ń najə̄ i dɔn tə́ ní, nin̄ əya̰nən̄ dɔɔ́ ba taān̄ kadə̄ karī gírí. Ba deē ń najə̄ gətóo dɔn tə́ ní, nin̄ mbātə́n̄ gān̄g sarya kə́ gōtə́ kadə̄n.

²⁴ I tām̄ najə̄ ń toō tə́ n nin̄ a ton̄ tītə̄ mu kə́ hor o̰o̰ ní, aláa a ton̄ i tītə̄ mu kə́ tutə kə́ udə lim kɔ̄ɔ́ kum ta ndo̰ hor gə̄ tə́ ní. nin̄ a ndumən̄ i ngəradə́ tə́. Hútə̄də́ a ḭḭ nél tītə̄ bumbə́ru beé. Tɔdɔ̄ nin̄ kídə̄n̄ yá̰á̰ ndóō gə̄ yā Kɔ́ɔ̄ɓē kə́ bo kə́ tɔ́gən i ngá̰ý, nin̄ mbātə́n̄ najə̄ kɔr̄ Nə́ɓā kə́ táĺ yā Israel.

Kɔ́ɔ̄ɓē ɓir̄ jīn yā kəndań gír deē yān gə̄

²⁵ I tām̄ najə̄ ń toō tə́ n wōn̄g rāā Kɔ́ɔ̄ɓē ngá̰ý kə gír deē yān gēé ní. Ni ɓir̄ jīn ba un kə̄ dɔɔ́ əndańdə́. Mbal̄ bo gə̄ ndewn̄, nīń de gə̄ to kə̄ kum róbə kɔsə gə̄ tə́ tītə̄ loo gə̄ kə́ kánə̄n̄ yá̰á̰ kə́ yḛr gə̄ tū tə́ beē. Yá̰a̰ malang ń noō rāā yá̰á̰ ɓá tā, banī wōn̄g yā Kɔ́ɔ̄ɓē tetə alé. Ni əhɔ jīn kə́ ɓir̄ dɔɔ́.

²⁶ Kɔ́ɔ̄ɓē udə dərapóo rɔ̄ɔ̄ kógə̄ḿ dɔɔ́, yā kɔrə̄ń najə̄ kə nápar de gə̄ ń ndin̄ sa̰y ní. Nin̄ ń ndin̄ i ta ngóy dɔ nang tə́ ní, ni-ɓāŕdə́ kə ngélé. Anī gír de gə̄ ní nin̄ n toó, nin̄ reēn̄ láẃ ngá̰ý, njadə́ hɔɔ́lɔ̄.

²⁷ De kógə̄ḿ kə́ dɔ dáńdə́ tə́ kə́ kɔr rāān gətóo, de kə́ njə̄rā sétə́ gətóo ō, de kə́ tún̄ ɓīī aké ɓīī gətóo. Nge rɔ̄ɔ̄ kógə̄ḿ kə́ tútə ndāŕ kə́ ɓōdə̄n tə́ ɔr̄ kɔ̄ɔ́ gətóo, kógə̄ḿ kə́ tútə sākə̄rā kə́ njan tə́ kɔ̄ɔ́ gətóo.

²⁸ Kum gərā yādə́ gə̄ i kə́ tadə́ atə limbēȳ limbēȳ, ga̰ gərā yādə́ gə̄ i kə́ kɔr gō malang. Hḛ̄l̄ nja sə́nda yādə́ gə̄ i kə́ ngan̄g tītə̄ mbal̄ beé ō, nja púsə́ sə́nda yādə́ gə̄ rə̄ngō tītə̄ nél man̄ kə́ əla kə ngangá ngá̰ý beē ō.

²⁹ Ndū áskar gə̄ ɓār̄ tītə̄ ndū ɓɔl kə́ a nōō beé. Nin̄ do̰o̰n̄ rɔ̄ɔ̄ tītə̄ ngán ɓɔl gə̄ beé. Nin̄ əgan̄ kɔŕ tītə̄ dā̰ kə́ bembeé gə̄ kə́ əhɔn̄ dā̰ oy anī, un aw̄nəń beé. De kə́ asə taā dā̰ ní ta hēl̄ jīdə́ tə́ gətóo.

³⁰ Ɓá tā ba ndɔ̄ kógə̄ḿ anī, man̄ a ndán̄g gír de gə̄ ń toō, tītə̄ kōō bā bo kə́ ɓār̄ dan ń nél man̄ a əlań kə tɔ́gɔ́ tə́ ní beē. A a̰a̰n̄ ɓē, banī loo kə́ ndɔ̄ɔ́ ō, wur kɔl ō, a ɓír̄ gidə kɔ̄ɔ́. Kil̄ man̄ gə̄ kə́ ndulən̄ ndí ndí a utə̄n̄ dɔ loo kə́ unjə̄ kow kə́ kadaá kɔ̄ɔ́.