IJAI 49 - Bibəl ta Sar̄

Nge kəla yā Kɔ́ɔ̄ɓē (Najə̄ kə́ kɔr̄ kə gōsōó kə́ nge ko̰ jōó)

¹ Sḭḭ̄ gír de gə̄ ń ī-ndiī sa̰y ní, ōōī najə̄ yāḿ! Sḭḭ̄ ń ī-ndiī sa̰y ní, ī-nēlī mbīsí! Dan ń Kɔ́ɔ̄ɓē ɓārə́m̄ ní, ojəmə̄n̄ aĺ ɓáý. Mā i kem kó̰ó̰ḿ ɓáý n ni ədań rīḿ ní.

² Ni-rāā adə̄ najə̄ yāḿ i kaskar kə́ a əja yá̰a̰ gān̄g. Ni ɓɔ̄ɔ̄m̄ ndíl jīn tə́. Ni-rāā adə̄ mā i kum gərā kə́ usən̄ kum majə, ni əlam̄ kem ngong gərā yān gə̄ tə́.

³ Ni ədam̄ na: Israel, ḭ̄ i nge kəla yāḿ. M-ā m-ɔ́jə kɔsə gɔn yāḿ i kə ta kūlīí.

⁴ Mā m̄-gír̄ m-ə́da na: M-á̰á̰ tápə̄ i ndāńg karī, m-ɔ́r i kanjə̄ kumən, teēm̄ yá̰á̰ tə́ alé. Ɓá tā ba Kɔ́ɔ̄ɓē a gān̄g sarya yāḿ kə gōó, ni ngɔ̄m̄ yá̰a̰ kəndā nja yāḿ.

⁵ Ba ngɔlaā ní, Kɔ́ɔ̄ɓē ɔr̄ najə̄. Ni rāām̄ kété pá tá kadə̄ ojəmə̄n̄ ɓáý, yā kadə̄ mā i nge kəla yān. Ni ndigə kadə̄ m̄-tél kə ngán Jakob gēé kə̄ rɔ̄n tə́, kadə̄ m-ósə dɔ gír de gə̄ yā Israel gə̄ kə̄ naā tə́. Kɔ́ɔ̄ɓē əhɔ gōḿ ō, Nə́ɓā yāḿ i tɔ́gə́ḿ ō.

⁶ Ni ədam̄ na: Ḭ̄ ī-rāā kəla yāḿ, i yā kunəń gír ɓē gə̄ yā Israel dɔɔ́ ō, i yā tél reēń kə ngé gə̄ ń teēn̄ ta yo tə́ ní dan gír de gə̄ yā Jakob tə́ ō. Ba nge ń noō asə aĺ ɓáý. M-ā m̄-rāāī loo kə́ unjə̄ kow yā gotə nápar de gə̄ tə́, yā kadə̄ kajə kə́ mā m-ájə deē aw̄ bátə́ ugə̄ ta ngóy dɔ nang tə́.

De gə̄ ń ɔyn̄də́ aw̄n̄ sedə́ dɔ ɓē kə́ rang tə́ dɔ gúú tə́ ní, tél reēn̄

⁷ Kɔ́ɔ̄ɓē, nge kɔr̄ Israel ɓəloó, Nə́ɓā yān kə́ táĺ, ɔr̄ najə̄. Ḭ̄ ń de gə̄ kídīn̄ ō, nel̄ de gə̄ malang seí aĺ ngá̰ý ō, ḭ̄ ń i ɓəlo yā mban̄g gə̄ kə́ ko̰o̰ ɓē yādə́ majə aĺ ní, yá̰á̰ ń ni ədaī ní n toó: Dan ń mban̄g gə̄ a a̰a̰īn̄ anī, a ḭḭn̄ kɔ̄ɔ́ dɔ kōr̄ kāgə̄ mbang yādə́ gə̄ tə́. Dan ń ngār gə̄ a a̰a̰īn̄ kə̄ sa̰y anī, nin̄ a ɔsən̄ kejədə́ nang tə́ noí tə́. Yá̰á̰ ń noō a rāā yá̰a̰ i najə̄ yā Kɔ́ɔ̄ɓē ń i de kə́ nge ra dɔ ndūn tə́ ní tə́, i najə̄ yā Nə́ɓā kə́ táĺ yā Israel kə́ gə̄rāī tə́ tə́.

⁸ Kɔ́ɔ̄ɓē əda na: Kum mbang kə́ majə tə́ ní, m̄-tūrī najə̄ tə́. Dan ń ndɔ̄ kajə deē ugə̄ ní, m̄-reē m̄-rāā seí. I mā n i nge rāāī ní. m̄-rāā adə̄ madə̄ naā ń m-ə́hɔ kə gír de gēé ní, reē udə gírí i kə ta kūlīí. M-ā m-ún ɓē kə́ Israel dɔɔ́. Dɔ nang ń toō ń ngɔlaā nujən̄neé kɔ̄ɔ́ ní, m-ā m̄-tél yā gān̄g kadə̄ de gə̄ gogə́ ɓáý to̰.

⁹ M-ə́da dəngáy gə̄, m-ə́dá ngé gə̄ ń ndin̄ kum til tə́ ní na: Ī-teēī, ī-reēī kum loo kə́ unjə̄ kow tə́! Nin̄ a əngen̄ yá̰a̰ kəsa kə gō kadə róbó, a asən̄ kəsa yá̰a̰ dɔ ngán mbal̄ gə̄ tə́ malang.

¹⁰ Ɓō a rāādə́ to̰ aĺ ō, kəndā man̄ a rāādə́ to̰ aĺ ō. Néĺ kə́ təngā kə́ dəla loo tə́ a rāādə́ kadə̄ a̰a̰n̄ tápə̄ to̰ aĺ ō, mbang a ɔsədə́ to̰ aĺ ō. Tām̄ m-ā m-ɔ́r nodə́ kə tárá, m-ā m-āw̄ sedə́ ta kəɓa man̄ gə̄ tə́.

¹¹ M-ā m̄-rāā kadə̄ mbal̄ gə̄ malang télən̄ róbə́ kə́ kundə́ tōr̄ aĺ gə̄. M-ā m̄-tél yā rāā róbə gə̄ gogə́ rang.

¹² Nin̄ n toó! Ḭḭn̄ i sa̰y n tél reēn̄ gogə́ ní: Ngé kə́rēý gə̄ ḭḭn̄ i dām̄ mbɔ́r ɓē kə́ ko̰ó̰ tə́, ngé kə́ rang gə̄ ḭḭn̄ i no ɓē tə́, ngé kə́ rang gə̄ ɓáý to̰ ḭḭn̄ i dām̄ mbɔ́r ɓē kə́ geleé tə́, ḭḭn̄ i Ejiptə.

¹³ Dɔ rā̰, ə́nda jīí! Ba ḭ̄ dɔ nang, ī-rāā rɔ̄nel̄! Mbal̄ bo gə̄, ə́gaī kɔŕ rɔ̄nel̄! Kɔ́ɔ̄ɓē tél adə̄ gír deē yān gə̄ kəndā kem dɔ tə́ gogə́, kumən o̰o̰n kə de gə̄ ń yá̰á̰ kə́ tōr̄ teē dɔdə́ tə́ ní.

Dɔḿ ndígə̄nalií alé

¹⁴ Kété ní Siyo̰ əda na: Kɔ́ɔ̄ɓē əya̰m̄ kɔ̄ɔ́, dɔ Kɔ́ɔ̄ɓē ndígə̄naləḿ kɔ̄ɔ́.

¹⁵ Banī Kɔ́ɔ̄ɓē tūr̄ əda na: Dɔ dəyá̰ ndígə̄nal ngōn̄ kásə̄ ni a adə̄n mba ní a? Asən tár ngōn̄ ń ni ətōn kemən tə́ ní a? Ká ré dɔn ndígəńnalən gə̄gē, dɔḿ mā a ndígə̄nalií ḭ̄ aĺ bátə́.

¹⁶ A̰á̰ā̰, m̄-ndang rīí da jīḿ tə́. m̄-gír̄ dɔ ndogə̄ mbal̄ yāí gə̄ ń ā ī-rɔ̄ɔń dɔ rɔ̄í tə́ ní kanjə̄ kəya̰ ta.

¹⁷ Jerusalem, ngé gə̄ ń a rāān̄ yā tél kəndāī gogə́ ní, nāgə́n̄ láẃ yā reē, ngé gə̄ ń nujiīn̄ sák sák kɔ̄ɔ́ ō, rējīī-n ō ní, a aw̄n̄ kɔ̄ɔ́.

¹⁸ Ɔ̄r̄ dɔí dɔɔ́ ba a̰a̰ loo ń to kə gō gidií ní: Ngání gə̄ malang ɔsən̄ dɔdə́ naā tə́, nin̄ reēn̄ kə̄ rɔ̄í tə́. Najə̄ ń Kɔ́ɔ̄ɓē əda ní n toó: Tītə̄ ń m̄-ndiń kə kumḿ rɔ̄kum noó, nin̄ a ton̄ i tītə̄ məde kɔ̄l̄ beé tām̄ yāí tə́, a ton̄ i tītə̄ ndāŕ kəhɔ ɓōdə̄ kə́ nge nong kə́ dəyá̰ əhɔń ɓōdə̄n beé.

¹⁹ Ī-ndi dan gájə bɔr gə̄ tə́, ɓē yāí gə̄ i kə́ nujənə̄ń sák sák kɔ̄ɔ́, dɔ nang yāí i dəla loo. Banī sḛ́ý laā anī, ni a dūú ngá̰ý tām̄ yā de kə́ kemeé gə̄ tə́ ō, ngé gə̄ ń kété nujiīn̄ sák sák ní, a aw̄n̄ sa̰y kɔɔ̄ rɔ̄í tə́ ō.

²⁰ Kété ní ī-ndi i tītə̄ dəyá̰ kə́ ngán kemən gə̄ gətóon̄ beé. Banī ndɔ̄ kógə̄ḿ tə́ anī, ngání gə̄ a ədaīn̄ na: Loo ń m̄-ndi tū tə́ ní dūú ngá̰ý. Ādə̄m̄ loo tə́ ādə̄ m̄-ndiń laā.

²¹ Ba ā ī-dəje rɔ̄í najə̄ ń toō, ā ə́da na: Ngán gə̄ ń toō malang ní i náā n adə̄m̄ sedə́? Kété ní, ngánə́ḿ gə̄ gətóon̄ ō, m-ásə kənge ngán gə̄ aĺ ō. Aw̄n̄ seḿ dɔ ɓē kə́ rang tə́ dɔ gúú tə́ ō, əya̰mə̄n̄ kɔ̄ɔ́ ō. Ba ngé gə̄ ń noō ní i náā n ətōdə́? Dan ń mā i kérə́ḿ ní, ngán gə̄ ń toō nin̄ i rá?

²² Yá̰á̰ Kɔ́ɔ̄ɓē Nə́ɓā əda ní n toó: M-ā m̄-kɔ̄r̄yɔ̄ gotə nápar de gə̄. M-ā m-údə dərapóo rɔ̄ɔ̄ dɔɔ́ tām̄ yādə́ tə́ kadə̄ nin̄ ger̄nəń. Nin̄ a télən̄ kə ngání kə́ dəngam gə̄ ō, kə ngání kə́ dəyá̰ gə̄ ō, yā reē sedə́ gogə́, a ətōn̄də́ i kə jīdə́.

²³ Mban̄g gə̄ a ətōn̄ ngání gə̄, ngáń kə́ dəyá̰ yā mban̄g gə̄ a adə̄n̄də́ yá̰a̰ kəsa. Nin̄ a ɔsən̄ kejədə́ nang tə́ noí tə́, a ɔsən̄ nodə́ nang tə́. Nin̄ a tō̰nə́n̄ bumbə́rú kə́ njaí tə́. Loo ń noō tə́ ā ī-ger̄ kadə̄ mā i Kɔ́ɔ̄ɓē ō, ngé gə̄ ń əndān̄ kemdə́ dɔḿ tə́ ní, rɔ̄də́ a sɔl̄də́ aĺ ō.

²⁴ Yá̰a̰ kənge gə̄ ń nge rɔ̄ɔ̄ taā jī madə̄ ba̰ā̰ tə́ ní, deē asə taā jīn tə́ a? Deē asə taā dəngáý kógə̄ḿ jī nge rāā de gə̄ yá̰á̰ kə́ tōr̄ tə́ dɔ gúú tə́ a?

²⁵ Najə̄ ń Kɔ́ɔ̄ɓē əda ní n toó: A̰á̰ā̰, m-ā m̄-taā dəngáy yā nge rɔ̄ɔ̄ jīn tə́, m-ā m̄-taā yá̰a̰ kənge gə̄ kə́ kəhɔ ta rɔ̄ɔ̄ tə́ yā nge rāā de gə̄ yá̰á̰ kə́ tōr̄ dɔ gúú tə́. Jerusalem, mə̄kɔ́ m-ā m̄-rɔ̄ɔ̄ ngé kənīí rɔ̄ɔ̄ gə̄ ō, mə̄kɔ́ m-ā m-ájə́ ngání gə̄ ō.

²⁶ Ngé gə̄ ń rējīīn̄ ní, m-ā m̄-rā sedə́ ta kəsa dā̰də́ nin̄ kɔ́ gə̄. Nin̄ a a̰ȳn̄ mósə́də́ nin̄ kɔ́ gə̄. Mósə́də́ ní a rāādə́ kə́ kasə tə́ tītə̄ ń kasə nduú kə́ kijə a rāań deē ní. Loo ń noō tə́ yá̰a̰ malang ń ndi kə kumneé ní a a̰a̰ yá̰á̰ ń toō yā ger̄: Mā Kɔ́ɔ̄ɓē, mā i nge kajií, mā i nge taā kəya̰ī dɔɔ́, mā, Nə́ɓā yā Jakob kə́ tɔ́gən to.