IJAI 47 - Bibəl ta Sar̄

Babilon tél kə̄ nang tə́

¹ Najə̄ ń Kɔ́ɔ̄ɓē əda ní n toó: Ḭ̄ ɓē kə́ Babilon, ī-risə kɔ̄ɔ́ dɔ kōr̄ kāgə̄ mbang yāí tə́, ba ī-ndi kum bumbə́rú tə́. A̰á̰ā̰, ɓē yā Babilon gə̄, ī-ndi dɔ nang tə́. Ngɔlaā ní a ɓāríīn̄ na i Babilon kə́ ger̄ gō yá̰á̰ láẃ ngá̰ý to̰ aĺ i kə́ bátə́ gə̄ tə́.

² Ɔ́y mbal̄ kusə yá̰a̰ gə̄, úsəń kōō ī-rāā ndujə̄ tə́ ə̄ndā dɔ jīí. Kūbə̄ ń ī-seĺ ta kumií tə́ ní ɔ̄r̄ kɔ̄ɔ́, ī-sa̰ā̰ kūbə̄ rópə yāí kə̄ dɔɔ́, ba ī-teē man̄ kə kāsə̄ njaí kə́ kūbə̄ utə̄ gidə alé.

³ De gə̄ a a̰ā̰n̄ rɔ̄ karī yāí, a a̰a̰n̄ yá̰á̰ ń rāāī adə̄ rɔ̄í sɔlī ní. M-ā m̄-dal ba̰ā̰ rɔ̄ḿ ō, de kə́ yā kɔgə̄m̄ a gətóo ō.

⁴ Rī nge kɔr̄jí ɓəloó na i Kɔ́ɔ̄ɓē kə́ bo kə́ tɔ́gən i ngá̰ý, kə́ táĺ yā Israel.

⁵ Ɓē yā Babilon gə̄, ī-ndi nang tə́ kə taí kə́ mbóó, ī-ɓɔ̄ɔ̄ rɔ̄í kum loo kə́ ndɔ̄ɔ́ tə́. Tām̄ a ɓāríīn̄ na i mban̄g kə́ dəyá̰ yā ɓē ko̰o̰ gə̄ to̰ aĺ i kə́ bátə́ gə̄ tə́.

⁶ Kété ní, wōn̄g rāām̄ kə gír deē yāḿ gēé. Adə̄ ngé gə̄ ń kété nin̄ i deē yāḿ gə̄ ní, m̄-kídə̄də́, m-ə́ládə́ kem jīí tə́. Kumií o̰o̰ī sedə́ alé, ḭ̄ ī-rāā adə̄ ko̰o̰ ɓē yāí ɔȳ de kə́ tɔgə gə̄ tītə̄ njúkə beé.

⁷ Ḭ̄ ə́da na ā ī-ndi kə kumií ngándáńg, na ā ī-ndi mban̄g kə́ dəyá̰ kə́ njɔ́ḿ gə̄ tə́. Ḭ̄ ī-gír̄ yá̰a̰ dɔ yá̰a̰ gə̄ ń toō tə́ alé, ḭ̄ ī-gír̄ dɔ ndɔ̄ kə́ bírí tə́ alé.

⁸ Ngɔlaā ní, ḭ̄ ń ī-gḛy rɔ̄nel̄ ngá̰ý ní, ōō yá̰á̰ ń toō: Ḭ̄ ī-ndi nang tə́ jəke ī-gírəń najə̄ ń toō ə́da na: m̄-majə m̄-tɔȳ gotə de gə̄ malang, de kə́ tītə̄ḿ gətóo. M-ā m̄-tél dəyá̰ kə́ ngaa koy aĺ i kə́ bátə́ gə̄ tə́ ō, m-ā m̄-tḭ̄ḭ̄ ta ngánə́ḿ gə̄ aĺ ō!

⁹ I beé ní, yá̰á̰ kə́ to kum kaȳ aĺ kə́ gír jōó gə̄ ń toō a teēn̄ dɔí tə́ i gidə kógə̄ḿ. Kem ndɔ̄ kə́ kógə̄ḿ beē tə́ ní, ā ī-tḭ̄ḭ̄ ta ngání gə̄ ō, ā ī-tél dəyá̰ kə́ ngaa koy ō. Yá̰a̰ malang ń ngé kəga gə̄ rāān̄ ní ō, yá̰a̰ malang ń ngé mbōlí gə̄ rāān̄ ō ní, a asən̄ kɔgə̄ yá̰á̰ ń noō rāā yá̰a̰ alé.

¹⁰ Yá̰a̰ rāāí kə́ majaĺ gə̄ ní ḭ̄ ə̄ndā kemií dɔ tə́, adə̄ ī-gír̄ najə̄ ə́da na: De kə́ a̰a̰m̄ gətóo. I kum kedə̄ yāí kə́ gōtə́ aĺ ō, i yá̰a̰ ger̄ yāí kə́ gōtə́ aĺ ō n gólīn̄ ní. Anī ḭ̄ ī-gír̄ najə̄ ə́da na: m̄-majə m̄-tɔȳ gotə de gə̄ malang, de kə́ tītə̄ḿ gətóo.

¹¹ Á̰a̰ā̰, yá̰á̰ kə́ to kum kaȳ aĺ kógə̄ḿ a teē dɔí tə́, ā ger̄ loo tūr̄ tan kɔ̄ɔ́ dɔí tə́ alé. Yá̰á̰ kə́ to kum kaȳ aĺ kógə̄ḿ a əsō dɔí tə́, ā ásə kəja rɔ̄í kɔ̄ɔ́ ta tə́ alé. Nél man̄ kə́ əla kə ngangá ngá̰ý kə́ ásə kəndā dɔ rɔ̄í danaá kété najə̄n tə́ alé, a əla gidə kógə̄ḿ kum kə̄ dɔí tə́.

¹² I beé ní, ngé kəga gə̄ malang ō, ngé mbōlí gə̄ ō ní, ī-na̰y kə̄ loo kaw̄ koō yādə́ tə́. Ə́lá gír kɔr̄ gōdə́ tə́ i jóó ngá̰ý, i dan ń ḭ̄ i balsáá ɓáý ní. Majanī a majə seí, majanī ā ī-ger̄ loo rāā madí gə̄ kadə̄ ɓōlə́n̄.

¹³ Kɔjə̄ gə̄ ń adīn̄ ngá̰ý ní, kɔr rāāī ta tə́ kɔ̄ɔ́! Ngé kəndā ma̰ȳ dɔ rā̰ ō, ngé tə́da najə̄ kə́ ndang kum tə́yō̰ gə̄ tə́ ō, ba nin̄ ədan̄ yá̰á̰ ń a rāā yā rāāī ní kə dɔ nāā gə̄ ní, ādə̄ reē ajiīn̄!

¹⁴ Nin̄ a ton̄ i tītə̄ mu beé, hor kógə̄ḿ a o̰o̰də́. Nin̄ a asən̄ kajə rɔ̄də́ ta ndo̰ hor gə̄ tə́ alé. Tá hor ní i hor kúĺ kə́ yā ndīrəń yá̰á̰ kújə garaá aĺ ō, i hor kógə̄ḿ kə́ dūú kə́ rāān̄ i kə kāgāá yā ndíbə̄ aĺ ō!

¹⁵ De gə̄ ń noō malang ní, ə́lá gír kɔr gōdə́ tə́ loo kaw̄ koō yādə́ tə́ i dan ń ḭ̄ i balsáá ɓáý ní. I beé ní, nin̄ i tām̄ yāí tə́ i najə̄ yá̰á̰ ń noō tə́! Ngɔlaā ní, nin̄ aw̄n̄ kə̄ loo gə̄ tə́ ō, deē kógə̄ḿ kə́ asə kajiī gətóo ō.