IJAI 46 - Bibəl ta Sar̄

Nə́ɓā kə́ rɔ̄kum aĺ gə̄ kə́ Babilon ran̄ ta naā tə́ kə Nə́ɓā kə́ rɔ̄kum

¹ Nə́ɓā Bel rugə ngung, nə́ɓā Nebo teē əsō. Tə́ndān̄ yá̰a̰ gə̄ ń tɔ́sə̄n̄ kum gotədə́ ní dɔ man̄g kə́ bəra gə̄ tə́. Kété jóó ní a əhɔn̄də́ i kə̄ dɔɔ́ ngá̰ý loo rāā yá̰a̰ kūjə́ gə̄ tə́. Ngɔlaā ní, nin̄ i yá̰a̰ kətō kə́ ɔȳ gə̄ tām̄ yā dā̰ gə̄ ń tɔ́gə́də́ təgā kɔ̄ɔ́ tə́ ní.

² Nə́ɓā gə̄ rugən̄ ngung, nin̄ malang əsōn̄ nang tə́ ndɔ̄ naā tə́. Nin̄ asən̄ kajə yá̰a̰ gə̄ ń tɔ́sə̄n̄ kum gotədə́ ní alé, nin̄ kɔ́ gə̄ aw̄n̄ dɔ ɓē kə́ rang tə́ dɔ gúú tə́.

³ Israel gə̄, ōōī najə̄ yāḿ, sḭḭ̄ kojə yā Jakob ń ī-na̰yiī ní. M-ə́lá gír ka̰a̰ gōsí i dan ń ojən̄neésí ní tə́. M-ə́lá gír kətōsí i ndɔ̄ ń ī-reēīneé dɔ nang tə́ ní.

⁴ M-ā m̄-to i kum gotəḿ bátə́ ɓə́gásí tə́. M-ā m-ə̄tōsí bátə́ kadə̄ nənga dɔsí ndaań. I mā n m̄-rāāsí ní, i mā n m-ā m-ə̄tōsí ní. A̰á̰ā̰, m-ā m-á̰a̰ gōsí ō, m-ā m-ájə́sí ō.

⁵ Ɔ́jiī seḿ i náā? I náā n ī-gírī kadə̄ m̄-to tītə̄n ní? Ā ə̄ndāmī i kadə náā tə́ yā kɔjəń kadə̄ jə-teē naā seneé ní?

⁶ Ngé kə́rēý gə̄ teēn̄ kə lɔ́ŕ kə́ ngá̰ý kem ngong yādə́ tə́. Nin̄ mbɔ̄jə́n̄ kɔȳ gində̄ arjā̰a̰ kə yá̰a̰ mbɔ̄jə́ kɔȳ yá̰á̰. Nin̄ dəjen̄ kɔdə̄ nge nōō yá̰a̰ kadə̄ rāā nə́ɓā kógə̄ḿ kə adə̄də́. Gō tə́ anī, nin̄ ɔsən̄ nodə́ nang tə́ no nə́ɓā ní tə́ ō, rɔȳnən̄ ō.

⁷ Kutə̄ gō anī əndānən̄ dɔ bɔ̄gə̄də́ tə́, ətōnən̄ ō, aw̄ əndānən̄ loo kə́rēý tə́ ō. Nin̄ do̰ō̰n̄ yá̰á̰ kə́ tɔ́sə̄ ní adə̄ ra gotə kógə̄ḿ ō, ni yéȳ to̰ aĺ ō. Ré deē kógə̄ḿ əga kɔŕ kə̄ rɔ̄ nə́ɓā ní tə́ anī, ni dal alé. Ni ajə deē kógə̄ḿ dan wur kɔl tə́ alé.

⁸ Ādə̄ əga kemsí dɔ nge ń noō tə́ ba ī-téĺ ə́hɔī rɔ̄sí tɔgə gogə́! Sḭḭ̄ de kə́ ngé ra dɔ ndūsí tə́ aĺ gə̄, ī-gírī dɔ tə́!

Dɔ gān̄g dɔ i sa̰y alé

⁹ Ādə̄ əga kemsí dɔ kum mbang kə́ mān̄ kɔ̄ɔ́ tə́, dɔ yá̰a̰ gə̄ ń rāān̄ yá̰á̰ kété tə́ ní. I mā n i Nə́ɓā ní ō, Nə́ɓā kə́ rang gətóo ō. Nə́ɓā kə́ tītə̄ḿ mā gətóo.

¹⁰ Yá̰á̰ ń sɔɔ̄ kadə̄ rāā yá̰á̰ ní, m-ə́dá kété kɔ̄ɔ́ i ta kəla gíŕ tə́ nú. Yá̰á̰ kə́ kadə̄ rāā yá̰a̰ ba rāā yá̰a̰ aĺ ɓáý ní, mā m-ə́da najə̄n kɔ̄ɔ́ i kété jóó ngá̰ý. M-ə́da na: Yá̰á̰ ń m̄-núm̄ ní a reē yā kudə gíŕ kə́ rɔ̄ tə́. Yá̰a̰ malang ń m̄-ndigə ní, m-ā m̄-rāā.

¹¹ m̄-ɓāŕ deē kógə̄ḿ sa̰y ngá̰ý dām̄ kə́ gír ɓē tə́, deē ní ngan̄g tītə̄ kərō beé. Yá̰a̰ gə̄ ń m̄-núm̄ ní, i ni n a rāādə́ kadə̄ reē udən̄ gírí ní. Yá̰á̰ m-ə́dá ní, m̄-rāā yá̰á̰ ní. Yá̰á̰ ń m̄-núm̄ ní, m̄-rāā yá̰á̰ ní adə̄ udə gírí.

¹² Sḭḭ̄ ngé dɔ ngan̄g gə̄, sḭḭ̄ ń i sa̰y ngá̰ý, ī-ndetiī kadə yá̰á̰ kə́ gōtə́ ngɔr aĺ ní, ōōī najə̄ yāḿ!

¹³ m̄-rāā adə̄ yá̰a̰ rāā kə́ gōtə́ yāḿ a reē noó, ni i sa̰y to̰ alé. Dɔ teē ɓəloó i ngɔr. I mə̄kɔ́ n m-ā m-āwń kem ɓē kə́ Siyo̰ tə́ ní. A̰á̰ā̰, m-ādə̄ Israel yá̰á̰ kógə̄ḿ kə́ majə ngá̰ý.