IJAI 45 - Bibəl ta Sar̄

Sirus i deē ń Nə́ɓā əndān kə rī rāā yá̰a̰ yānneé ní

¹ Kɔ́ɔ̄ɓē əda Sirus ń i deē ń ni gə̄rān ní na: Mā m-ə́hɔ ta jīí yā kəlań dɔ nápar de gə̄ gíŕ tɔ́gə yāí tə́. m̄-ndigə taā tɔ́gə ko̰o̰ ɓē kɔ̄ɔ́ jī mban̄g gə̄ tə́ ō, ta róbə gə̄ kə́ yā kudəń kə̄ kem ɓē gə̄ tə́ ń i kə́ ra kə kutūú ní, m̄-ndigə teēdə́ kadə̄ ran̄ wōyōó noí tə́ ō.

² Mə̄kɔ́ m-ā m̄-njə̄rā kété noí tə́, yá̰a̰ gə̄ ń dēsə́n̄ rɔ̄də́ noí tə́ ɔgīn̄ mān̄ ní, m-ā m̄-ró̰ȳdə́ kɔ̄ɔ́, ta róbə gə̄ ń rāān̄də́ kə gində̄ nə̄ngá kasaá ní, m-ā m̄-nujəń kɔ̄ɔ́, gində̄ gə̄ ń rákə̄nəń ta róbə gə̄ ní, m-ā m̄-tétə̄ kɔ̄ɔ́.

³ Yá̰á̰ kə́ gātə̄də́ i ngá̰ý gə̄ kə́ ton̄ loo mundə̄ tə́ gə̄ ō, yá̰a̰ kənge kə́ ngá̰ý gə̄ kə́ ton̄ loo ɓɔ̄ɔ̄ tə́ gə̄ ō ní, m-ā m-ādī. Loo ń noō tə́ ā ī-ger̄ kadə̄ Kɔ́ɔ̄ɓē i mā. Sirus, mā Nə́ɓā yā Israel m̄-ɓāríī kə rīí.

⁴ I tām̄ Jakob nge kəla yāḿ tə́, a̰á̰ā̰, i najə̄ yā Israel ń m̄-gə̄rān ní tə́ n m̄-ɓāríiń kə rīí ní. m̄-rɔyī i dan ń ḭ̄ ī-gerə̄m̄ aĺ ɓáý ní.

⁵ Kɔ́ɔ̄ɓē i mā ō, Kɔ́ɔ̄ɓē kə́ rang gətóo ō. Nə́ɓā kə́ rang gətóo, i mā ngóy n i Nə́ɓā ní. Ḭ̄ ī-gerə̄m̄ alé, banī m-ādī tɔ́gə kadə̄ ī-rāań yá̰a̰.

⁶ I beé ní, əla gíŕ gír ɓē tə́ bátə́ no ɓē tə́ ní, de gə̄ malang a gerə̄n̄ kadə̄ kanjə̄ḿ mā anī, yá̰á̰ kógə̄ḿ gətóo. Kɔ́ɔ̄ɓē i mā, Kɔ́ɔ̄ɓē kə́ rang gətóo.

⁷ Mā m̄-rāā loo kə́ unjə̄ kow ō, m̄-rāā loo kə́ ndɔ̄ɔ́ ō, m̄-rāā ndi majə ō, m̄-rāā yá̰á̰ kə́ to kum kaȳ aĺ ō. A̰á̰ā̰, i mā Kɔ́ɔ̄ɓē n m̄-rāā yá̰a̰ gə̄ ń noō malang ní.

⁸ Dɔ rā̰, ə́yá̰ yá̰a̰ rāā yāí kə́ gōtə́ ādə̄ tə́sō tītə̄ tal beé. Ādə̄ kil̄ man̄ gə̄ rāān̄ adə̄ yá̰a̰ rāā yāí kə́ gōtə́ edə kə́ man̄ tə́! Ādə̄ dɔ nang teē tan adə̄ kajə hútə̄ ō, ādə̄ yá̰á̰ kə́ gōtə́ əɓa ō! Mā Kɔ́ɔ̄ɓē, m̄-rāā yá̰a̰ gə̄ ń noō malang.

Nánjə̄ ō, kɔdə̄ jóo ō

⁹ Deē ń kɔ̄l̄ kə nge rāāneé ní, yá̰á̰ kə́ to kum kaȳ aĺ ngá̰ý a teē dɔn tə́. Deē ndul to i tītə̄ jóó nánjə beē dan jóo madə̄ gə̄ tə́. Nánjə a əda nge mbə̄sān na ké ā ī-rāā i rí wa a? A ədan na jóo yāí teē yá̰a̰ alé a?

¹⁰ Deē ń a əda bɔbə̄n na: I ngōn̄ kə́ ba̰ý n ójən toó! aláa a əda kó̰o̰n na: I rí kə́ beé n ójən toó ní, yá̰á̰ kə́ to kum kaȳ aĺ kə́ ngá̰ý a teē dɔn tə́.

¹¹ Yá̰á̰ ń Kɔ́ɔ̄ɓē, Nə́ɓā kə́ táĺ yā Israel, nge rāā gír deē yān gə̄, əda ní n toó: Sḭḭ̄ ī-dəjemī najə̄ kə́ dɔ ngánə́ḿ gə̄ tə́. Sḭḭ̄ ī-ndigiī kədam̄ yá̰á̰ kə́ kadə̄ m̄-rāā gə̄ najə̄ yā yá̰á̰ ń mā m̄-rāā tə́ ní. Ní, nge ń noō i najə̄ yāḿ mā!

¹² I mā n m̄-rāā dɔ nang ō, de gə̄ ń ndin̄ tū tə́ ní ō. I mā n m̄-tḛḛ̄ kem dɔ rā̰ ō, i mā n i nge kəda ɓūtə̄ tə́yō̰ kə́ ngá̰ý gə̄ yá̰á̰ kə́ kadə̄ rāān̄ ō ní.

¹³ I mā n m̄-rāā kadə̄ dəngam ń noō ɔr̄ dɔɔ́ yā reē ní, i kə ta kūl̄ kun ndū kə́ gōtə́ ō, yá̰a̰ gə̄ ń dēsə́n̄ rɔ̄də́ non tə́ ɔgə̄nən̄ mān̄ ní, m-ā m̄-ró̰ȳdə́ kɔ̄ɔ́ ō. Jerusalem ń i ɓē yāḿ ní, i ni n i nge tél rāān gogə́ ní. De gə̄ yāḿ gə̄ ń ɔyn̄də́ aw̄n̄ sedə́ dɔ ɓē kə́ rang tə́ dɔ gúú tə́ ní, ni a rāā kadə̄ nin̄ tél reēn̄ gogə́. Nin̄ a əgān̄ yá̰á̰ kógə̄ḿ aĺ ō, a adə̄n̄ yá̰á̰ kógə̄ḿ aĺ ō. Yá̰á̰ ń Kɔ́ɔ̄ɓē kə́ bo kə́ tɔ́gən i ngá̰ý əda ní n noó.

Israel, Nə́ɓā i ɓēé looí

¹⁴ Yá̰á̰ ń Kɔ́ɔ̄ɓē əda ní n toó: Israel, kan̄ kəla yā de gə̄ kə́ Ejiptə ō, nar yā de gə̄ kə́ Etiopi kə́ ngé rāā gātə̄ gə̄ ō, de kə́ Seba gə̄ ń nin̄ i de kə́ ngāl̄ ngá̰ý gə̄ ní ō, yá̰a̰ gə̄ ń noō malang ní, a aw̄n̄ looí ō, nin̄ i yá̰a̰ yāí gə̄ ō. Gír de gə̄ ń noō a unən̄ gōí, tṵ́ṵ̄n̄də́ i kə súĺ gēé. Nin̄ a ɔsən̄ kejədə́ nang tə́ noí tə́ ō, nin̄ a ədan̄ kə tɔ́gɔ́ noí tə́ na: Nə́ɓā i looí ngóy, nə́ɓā kə́ rang gətóo.

¹⁵ Nə́ɓā yā Israel, ḭ̄ ń i nge kajə deē ní, ḭ̄ i Nə́ɓā kə́ to loo ɓɔ̄ɔ̄ tə́ rɔ̄kum.

¹⁶ Ngé tɔ́sə̄ yá̰a̰ rāā nə́ɓā kə́ rɔ̄kum aĺ gə̄ tə́ ní, rɔ̄də́ sɔl̄də́ ngá̰ý ō, ndū asədə́ nák ō. Nin̄ malang ní de gə̄ tájə̄n̄də́ sululu adə̄ ɔtə aw̄n̄ i kə ndū gēé dɔdə́ tə́.

¹⁷ Banī Kɔ́ɔ̄ɓē ajə gír de gə̄ yā Israel, ni ajədə́ i kə́ njɔ́ḿ gə̄ tə́. A nujən̄də́ to̰ aĺ ō, a əlan̄ rɔ̄sɔl̄ dɔdə́ tə́ to̰ aĺ ō.

Kajə kə́ ədan̄ najə̄n kété adə̄ unjə̄

¹⁸ Kɔ́ɔ̄ɓē rāā dɔ rā̰. Ni i Nə́ɓā ń rāā dɔ nang ní. Ni əɓān ō, rāān adə̄ ngan̄g ō. Ni-rāān i yā kadə̄ to ndágə doy alé, əɓān i yā kadə̄ de gə̄ ndin̄ dɔ tə́. Yá̰á̰ ń ni-əda ní n toó: Kɔ́ɔ̄ɓē i mā, Kɔ́ɔ̄ɓē kə́ rang gətóo.

¹⁹ M-ɔ̄r̄ najə̄ i loo mundə̄ tə́ alé, i kem kɔgɔ̄ loo kógə̄ḿ kə́ dɔ nang tə́ kə́ risə til tə́ alé. M-ə́dá ngán kaa Jakob gə̄ najə̄ ń toō alé: Ī-sāāmī ɓōdə̄ loo tə́, loo kə́ yá̰a̰ gətóo tū tə́ tə́. Mā Kɔ́ɔ̄ɓē, m-ə́da i yá̰á̰ kə́ gōtə́, yá̰á̰ ń mā m-ə́da najə̄n ní i yá̰á̰ kə́ rɔ̄kum.

Gíŕ nápar de gə̄ a tūrə̄n̄ kumdə́ kə̄ rɔ̄ Nə́ɓā tə́

²⁰ Sḭḭ̄ ń ī-teēī ta yo tə́ á ī-ndiī dan nápar de gə̄ tə́ ní, ɔ́siī dɔsí naā tə́ ba ī-reēī! Ī-reēī kə̄ kété naā tə́ malang. Ngé kətō kāgə̄ yādə́ kə́ tɔ́sə̄ gə̄ ō, a ndɔ̄ȳn̄ nə́ɓā kə́ asə kajə deē aĺ ō ní, i de kə́ ger̄ yá̰a̰ aĺ gə̄.

²¹ Ɔ̄rī najə̄, ī-teēī kə yá̰a̰ gə̄ kə́ ɔjən̄ kadə̄ najə̄ yāsí i rɔ̄kum gə̄. Ī-tɔ́tī naā dɔ najə̄ tə́. Yá̰á̰ a rāā yá̰a̰ ngɔlaā toó, i náā n əda najə̄n kété adə̄ gerə̄n̄ ní? I náā n əda najə̄n kété jóó ní? I mā Kɔ́ɔ̄ɓē aĺ a? Nə́ɓā kə́ rang gətóo, i mā ngóy. Mā i Nə́ɓā kə́ nge rāā yá̰a̰ gōtə́, Nə́ɓā kə́ nge kajə deē. Nə́ɓā kə́ rang gətóo i mā ngóy.

²² Sḭḭ̄ ń ī-ndiī ta ngóy dɔ nang tə́ ní, ī-tūrī kumsí kə̄ rɔ̄ḿ tə́, anī ā ájiī. A̰á̰ā̰, mā i Nə́ɓā ō, nə́ɓā kə́ rang gətóo ō.

²³ Tītə̄ ń mā i Nə́ɓā kə́ rɔ̄kum noó, m̄-túbə̄ njaḿ, m-ɔ́jəń kadə̄ i rɔ̄kum, yá̰á̰ ń teē taḿ tə́ ní, i yá̰á̰ kə́ rɔ̄kum. Najə̄ kógə̄ḿ kə́ m-ā m̄-tūr̄ kem kār̄ kə́ rang tə́ aĺ n toó: Deē ndul gə̄ malang a ɔsən̄ kejədə́ nang tə́ noḿ mā tə́ ō, nin̄ a túbə̄n̄ yā kɔjəń kadə̄ i rɔ̄kum ō, a ədan̄ na:

²⁴ Deē a ənge yá̰a̰ rāā kə́ gōtə́ ō, tɔ́gə ō, i rɔ̄ Kɔ́ɔ̄ɓē tə́ ngóy. De gə̄ malang ń rɔ̄ɔ̄mə̄n̄ ní, a reēn̄ rɔ̄ḿ tə́ kə rɔ̄sɔl̄ kə́ ngá̰ý.

²⁵ De gə̄ malang ń Israel ojədə́ ní a əngen̄ yá̰a̰ rāā kə́ gōtə́ i kə ta kūlə̄ḿ mā ō, nin̄ a əndan̄ kadədə́ najə̄n tə́ ō.