IJAI 44 - Bibəl ta Sar̄

¹ Ba ngɔlaā ní, gír de gə̄ yā Jakob, nge kəla yāḿ Israel, ḭ̄ ń m̄-gə̄rāī ní, ōō.

² Mā, Kɔ́ɔ̄ɓē ń m̄-rāāī ní, m-ə̄ɓāī pá tá kadə̄ ojiīn̄ ɓáý ní, m̄-reē dḭḭ̄ī tə́. Yá̰á̰ ń m-ə́dá ní n toó: Gír de gə̄ yā Jakob, ḭ̄ Yesurun, nge kəla yāḿ ń m̄-gə̄rāī ní, ī-lōō ɓōĺ.

³ Tām̄ mā m̄-rāā kadə̄ man̄ a nūgə́ dɔ nang kə́ kəndā man̄ a rāān tə́ ō, m-ā m̄-rāā kadə̄ ngán man̄ gə̄ a nūgə́n̄ dɔ nang kə́ tutə tə́ ō. M-ā m̄-ɓōkə́ ndílə́ḿ dɔ ngání gə̄ tə́ ō, m-ā m̄-tɔ́r̄ taḿ dɔ ngán kaaí gə̄ tə́ ō.

⁴ Nin̄ a əɓan̄ ō, a tɔgən̄ tītə̄ mu kə́ mbōl̄ kə́ ra kem bembeé beē ō, tītə̄ kāgə̄ gə̄ kə́ ran̄ kadə man̄ tə́ beē ō.

⁵ Nge kə́rēý a əda na: Mā i deē yā Kɔ́ɔ̄ɓē, nge kə́ rang a əda na: Mā i de kə́ kem kojə yā Jakob tə́. Nge kə́ rang ɓáý to̰ a ndang gidə jīn tə́ na: Mā i yá̰a̰ yā Kɔ́ɔ̄ɓē, ō ni a əndā rī Israel dɔn tə́ ō.

Tɔ́sə̄n̄ gātə̄ nə́ɓā kə́ rɔ̄kum aĺ gə̄

⁶ Yá̰á̰ ń Kɔ́ɔ̄ɓē ō, mban̄g ō, nge gān̄g dɔ Israel ō, Kɔ́ɔ̄ɓē kə́ bo kə́ tɔ́gən i ngá̰ý, əda ní n toó: Mā i ta kəla gíŕ yá̰a̰ malang tə́ ō, ta tɔ̄l̄ ta yá̰a̰ malang tə́ ō. Nə́ɓā kə́ rang gətóo, i mā ngóy n i Nə́ɓā ní.

⁷ I náā ń asə seḿ? Deē ń asə seḿ ní ādə̄ kɔ́ɔ̄ əga mbēr̄ dɔ tə́, ādə̄ kɔ́ɔ̄ əda ō, ɔjəm̄ adə̄ m̄-ger̄ kum ō! Ādə̄ ni-əda yá̰a̰ gə̄ ń rāān̄ yá̰a̰ dan ń m̄-rāań gír de gə̄ kə́ ta kəga dɔ ní ō, yá̰á̰ ń a rāā yā rāā yá̰á̰ ní, ādə̄ ni-əda kété ō.

⁸ Sḭḭ̄ gír deē yāḿ gə̄, ī-lōōī ɓōĺ, ī-lōōī ndew. M-ə́dásí najə̄ yá̰á̰ ń noō kété, m̄-rāā ādə̄ sḭḭ̄ ī-gerī yá̰á̰ ní. Sḭḭ̄ i de kə́ kum tə́ yāḿ gə̄. Nə́ɓā rang i noó kanjə̄ kadə̄ i mā a? A̰ á̰, mā i mbal̄ yāsí kə́ ngan̄g, m̄-ger̄ nge kə́ rang alé.

Ngé tɔ́sə̄ yá̰a̰ rāā ɓesə̄ tə́ gə̄

⁹ Ngé tɔ́sə̄ yá̰a̰ rāā ɓesə̄ tə́ gə̄ ní, nin̄ i yá̰á̰ kógə̄ḿ aĺ ō, yá̰a̰ yādə́ kə́ majə gə̄ ní, deē a rāań yá̰á̰ kógə̄ḿ aĺ ō. Yá̰á̰ kə́ tɔ́sə̄ gə̄ ngeé ń toō i de kə́ kum tə́ yādə́ gə̄, banī i de kə́ kum tə́ gə̄ kə́ kumdə́ a̰a̰ yá̰á̰ kógə̄ḿ aĺ ō, nin̄ gerə̄n̄ yá̰á̰ kógə̄ḿ aĺ ō, nin̄ a əlan̄ i rɔ̄sɔl̄ kə́ ngá̰ý dɔdə́ tə́ ō.

¹⁰ Tɔ́sə̄ yá̰a̰ rāā nə́ɓā tə́, nōō gində̄ rāā ɓesə̄ kə́ deē a rāań yá̰á̰ kógə̄ḿ aĺ tə́, ní, i mbóó kə́ ba̰ý beē!

¹¹ De gə̄ malang ń əhɔn̄ gō yá̰á̰ kə́ tɔ́sə̄ adə̄ ngan̄g ní, əlan̄ i rɔ̄sɔl̄ kə́ ngá̰ý dɔ rɔ̄də́ nin̄ kɔ́ gə̄ tə́. Kɔdə̄ ngé tɔ́sə̄ yá̰a̰ gə̄ nin̄ i deē ndul gə̄ ngóy. Ādə̄ nin̄ ɔsən̄ dɔdə́ naā tə́, ādə̄ nin̄ malang reē ran̄! Ɓōĺ a rāādə́ ō, rɔ̄də́ a sɔl̄də́ ngá̰ý ō.

¹² Kɔdə̄ rāā ta waĺ kə́ ənī dɔ yā̰l̄ hor kə́ ajə ying tə́ adə̄ atə. Ni ənda waĺ ní kə mō̰ó̰ kə ta kūl̄ tɔ́gə jīneé. Ba dan ń ɓō rāān anī, tɔ́gən gətóo kɔ̄ɔ́. Ré ni a̰ȳ man̄ aĺ anī, kɔr rāān.

¹³ Kɔdə̄ nge tɔ́sə̄ yá̰a̰ mbɔ̄jə́ dugə̄jū kāgə̄ yān kə kəlāá. Ni-rāā nə́ɓā kə́ rɔ̄kum aĺ tū tə́ kə hō̰rō̰ kə́ ndaa. Ni tɔ́sə̄ kāgə̄ ní kə waĺ ō, usə gidə kə yá̰a̰ kusə gidə yá̰á̰ adə̄ ndə́lē ō. Kɔdə̄ nge tɔ́sə̄ yá̰a̰ a ndájə̄ i loo rāā deē kə́ majə ngá̰ý n a tɔ́səń deē yān ní. Ni a əndā deē ń ni tɔ́sə̄ ní i kem loo kógə̄ḿ kə́ yā ɓōĺ gidə tə́.

¹⁴ Ni tə́gā i kāgə̄ kógə̄ḿ kə́ majə ngá̰ý kə́ tītə̄ kāgə̄ sédər. Ni gə̄rā i kāgə̄ kógə̄ḿ kə́ ngan̄g kə́ tītə̄ kāgə̄ sén, aláa kāgə̄ kə́ rang kə́ bo. Ni əya̰də́ adə̄ tɔgən̄ kem ku loo tə́. Aláa ni-əhɔ kāgə̄ kə́ bo kə́ tītə̄ kāgə̄ Pḛ́ḛ ō, man̄ kə́ edə dɔ tə́ rāā adə̄ sitə ō.

¹⁵ A rāā hor i kə kāgāá. De gə̄ a unən̄ yā ndíbə̄, aláa yā ndīrəń yá̰a̰ kəsa. Aĺ ɓáa nin̄ rāān̄ nə́ɓā tə́ yā rɔȳn. Nin̄ tɔ́sə̄n̄ yá̰a̰ rāān̄ yá̰á̰ kógə̄ḿ tə́ ba ɔsən̄ nodə́ nang tə́ no yá̰á̰ ní tə́ rɔȳnəń yá̰á̰ ní.

¹⁶ Ni Nin̄ unən̄ núsə kāgə̄ ní yā rāań hor. Nin̄ tə́ngān̄ dā̰ dɔ hor tə́, əsan̄ dā̰ ní ō, ɓō rāādə́ to̰ aĺ ō. Aĺ ɓáa nin̄ ndíbə̄n̄ hor ba ədan̄ na: Kāgə̄ ń toō rāā adə̄ jə-ndíbə̄ hor majə ngá̰ý, ta ndo̰ hor ń toō nel̄ ngá̰ý!

¹⁷ Gotə kāgə̄ ń na̰y ní, nin̄ rāān̄ nə́ɓā kógə̄ḿ tə́, rāān̄ ɓesə̄ yādə́ tə́. Nin̄ ɔsən̄ nodə́ nang tə́ no ɓesə̄ ní tə́, nin̄ rɔȳnən̄ ō, ndɔ̄ȳn̄ tītə̄ ń toō beé ō ədan̄ na: Ḭ̄ i nə́ɓā yāḿ, ájəm̄!

¹⁸ De gə̄ ngeé ń toō nin̄ gerə̄n̄ yá̰á̰ kógə̄ḿ alé, nin̄ gerə̄n̄ kum yá̰á̰ kógə̄ḿ alé. Tām̄ kumdə́ ō, ndíĺdə́ ō, i kə́ utə̄ kɔ̄ɔ́, nin̄ asən̄ ka̰a̰ loo alé, asən̄ ger̄ kum yá̰a̰ alé.

¹⁹ De kə́ gíŕ yá̰a̰ gətóo. De kə́ kur̄ dɔn to asə tām̄, aláa kə́ aw̄ kə ter kemən tə́ yā kɔrə̄ń najə̄ kə rɔ̄n nəkɔ́ kəda na: m̄-róō núsə kāgə̄ ō, yá̰á̰ ń m-ə́sá ní m̄-tə́ngān i dɔ hor tə́ ō. Ní, gotə kāgə̄ ń na̰y ní m̄-tɔ́sə̄ kə m̄-rāā yá̰á̰ kógə̄ḿ kə́ majə ka̰ā̰ aĺ tə́ a? Kə m-ə́ga nōr̄ kə̄ no dugə̄jū kāgə̄ tə́ a ní, gətóo.

²⁰ A̰ á̰, yá̰á̰ ń i bū ngóý ní n de gə̄ ń toō əhɔn̄ gō ní. Ndíĺdə́ rāā yá̰a̰ gōtə́ aĺ ō, gír̄ najə̄ yādə́ i gōtə́ aĺ ō. Nə́ɓā yādə́ a ajədə́ alé. De kógə̄ḿ dandə́ tə́ kə́ yā kəda na: Yá̰á̰ ń m-āwń jīḿ tə́ toō i nə́ɓā kə́ rɔ̄kum alé adə̄ to i kə̄ ndágá ní gətóo.

Ḭ̄ i nge kəla yāḿ, ī-lōō kadə̄ dɔí ndígə̄nal nge ń noō

²¹ Israel, gír de gə̄ yā Jakob, ādə̄ əga kemií dɔ yá̰á̰ ń toō tə́: Ḭ̄ i nge kəla yāḿ. Mā m̄-rāāī i yā kadə̄ ī-rāā ādə̄m̄. Israel, dɔḿ ndígə̄nalií alé.

²² m̄-rāā adə̄ yá̰a̰ rāāí kə́ gōtə́ aĺ gə̄ gətóon̄ kɔ̄ɔ́ tītə̄ loo rāā kadə̄ kil̄ man̄ gətóo kɔ̄ɔ́ beē. m̄-rāā adə̄ majaĺ yāí gə̄ gətóon̄ kɔ̄ɔ́ tītə̄ kə́ tuútu kə́ dəloí beē. Ī-tél ī-reē kə̄ rɔ̄ḿ tə́, na mā i nge gān̄g dɔí.

²³ A̰á̰ā̰, Kɔ́ɔ̄ɓē rāā yá̰a̰. Adə̄ ḭ̄ dɔ rā̰, ə̄nī pā rɔ̄nel̄, ḭ̄ loo kə́ dɔ nang tə́ kə́ ɗúú ngá̰ý, ī-rāā ādə̄ ndūí ɓār̄. Sḭḭ̄ mbal̄ bo gə̄ ō, kāgə̄ gə̄ kə́ kem ku loo tə́ gə̄ ō, ə́gaī kɔŕ rɔ̄nel̄. Tām̄ Kɔ́ɔ̄ɓē gān̄g dɔ gír deē yān gə̄, ni ɔjə kɔsə gɔn yān kə̄ ndágá dɔ nang kə́ Israel tə́!

Nge rāā rāā dɔ rā̰ ō dɔ nang ō i kɔ́ɔ̄ yá̰a̰ gə̄ ń rāān̄ yá̰á̰ ní

²⁴ Israel, Kɔ́ɔ̄ɓē i nge gān̄g dɔí, ni rāāī kété pá tá kadə̄ ojiīn̄ ɓáý. Ni ədaī na: Mā i Kɔ́ɔ̄ɓē. Yá̰a̰ malang ń toō ní, i mā n i nge rāān. I mə̄kɔ́ kə kérə́ḿ n m̄-tūtə́ dɔ rā̰ gidə naā tə́ ní. m̄-tḛḛ̄ kem dɔ nang i kanjə̄ kadə̄ deē kógə̄ḿ ɔsə kílə́ḿ loon tə́.

²⁵ Ngɔlaā ní m-ɔ̄r̄ tɔ́gə najə̄ kɔr̄ kɔdə̄ sāā gə̄ kɔ̄ɔ́. m̄-rāā adə̄ ngé kəda yá̰á̰ kə́ a rāā yā reē ɓáý gə̄ a̰ȳn̄ kɔ̄r̄ kɔ̄ɔ́. M-ūtə̄ ta ngé kum kedə̄ gə̄ kɔ̄ɔ́ ō, m-ɔ́jə kə̄ ndágá kadə̄ yá̰á̰ ń nin̄ gerə̄n̄ ní i yá̰á̰ kə́ to mbóo ō.

²⁶ Banī najə̄ kɔr̄ ngé kəla yāḿ gə̄ ní, m̄-rāā adə̄ reē udə gírí ō, najə̄ ń ngé kaw̄ kəla yāḿ gə̄ ədan̄ kété ní, m̄-rāā adə̄ ojə yá̰á̰ kə́ majə ō. m̄-ɔ̄r̄ najə̄ kə́ dɔ Jerusalem tə́ m-ə́da na: De gə̄ a télən̄ yā ndi kemeé gogə́ ɓáý, ndogə̄ mbal̄ yān gə̄ ń nujən̄neé kɔ̄ɔ́ ní, a télən̄ yā kun dɔɔ́ gogə́. M-ɔ̄r̄ najə̄ kə́ dɔ ɓē gə̄ yā Juda tə́ m-ə́da na: A télən̄ yā rāā ɓē ní gogə́.

²⁷ Bā bo ń ɗúú ngá̰ý ní, m-ə́dan yá̰á̰ ń toō kadə̄ rāā, m-ə́da na: Ī-tél loo kə́ tutə. m̄-rāā adə̄ man̄ yāí iī kɔ̄ɔ́.

²⁸ M-ɔ̄r̄ najə̄ yā Sirus m-ə́da na: Ni i nge kɔr no gír deē yāḿ gə̄. Ni a rāā kadə̄ yá̰a̰ malang ń m̄-ndigə ní teē majə. Ni a adə̄ ndūn kadə̄ tél rāān̄ ɓē kə́ Jerusalem gogə́, kadə̄ tél rāān̄ kújə́ yā Kɔ́ɔ̄ɓē gogə́.