IJAI 43 - Bibəl ta Sar̄

¹ Israel ní, ngɔlaā ní Kɔ́ɔ̄ɓē ədaī yá̰á̰ ń toō, ni ń əndāī ō, rāāī ō ní: Ī-lōō ɓōĺ, m̄-gān̄g dɔí. m̄-ɓāríī kə rīí, ḭ̄ i yāḿ mā.

² Dan ń ā ī-teē man̄ kə́ ɗúú ngá̰ý anī, mā i naā tə́ seí. Dan ń ā ī-teē bā gə̄ anī, man̄ a əhɔī alé. Dan ń ā ī-njə̄rā kum hor tə́ anī, hor a o̰o̰ī alé, ta ndo̰ hor gə̄ a ɔdən̄ rɔ̄í alé.

³ Tām̄ mā Kɔ́ɔ̄ɓē, mā i Nə́ɓā yāí. Mā Nə́ɓā kə́ táĺ yā Israel, mā i nge kajií. Yá̰á̰ ń m-ā m-ādə̄ yā gāngəń dɔí ní, i ɓē kə́ Etiopi ō, i ɓē kə́ Seba ō.

⁴ A̰á̰ā̰, kemḿ i dɔí tə́ ngan̄g ngá̰ý, gātīí i ngá̰ý ō, m̄-táriī ō. I tām̄ najə̄ ń toō tə́ n m-ādə̄ gír de gə̄ kum gotií ní, m-ādə̄ deē ndul gə̄ m̄-mbéləń gírí ní.

⁵ Ī-lōō ɓōĺ, mā i naā tə́ seí. M-ā m̄-rāā ngání kə́ dūn̄ tə́ gə̄ kadə̄ tél reēn̄ gogə́, m-ā m-ɔ́ýdə́ no ɓē tə́ yā kɔsə dɔdə́ naā tə́.

⁶ M-ə́dá mbɔ́r ɓē kə́ ko̰ó̰ na ī-tél ādə̄m̄ sedə́ ō, m-ə́dá mbɔ́r ɓē kə́ geleé na ī-lōō kəhɔdə́ gotoó ō. Ngánə́ḿ kə́ dəngam gə̄ ń ndin̄ ɓē kə́ sa̰y gə̄ ń toō tə́ ní, ī-tél ī-reēī sedə́ ādə̄mī ō, ngánə́ḿ kə́ dəyá̰ gə̄ ń ndin̄ ta ngóy dɔ nang tə́ ní, ī-tél ī-reēī sedə́ ādə̄mī ō.

⁷ De gə̄ malang ń rīḿ i dɔdə́ tə́ ní, de gə̄ malang ń m-ə̄ndādə́, m-ə̄ɓādə́, m̄-rāādə́ kadə̄ ɔsən̄ gɔnəḿ ní, ī-tél ī-reēī sedə́.

De gə̄ kə́ kum tə́ yāḿ gə̄ i sḭḭ̄

⁸ Ādə̄ gír de gə̄ ń toō reē ran̄! Kumdə́ to noó, banī nin̄ a̰a̰n̄ loo alé, mbīdə́ to noó, banī nin̄ oōn̄ loo alé.

⁹ Ādə̄ de kə́ kem ɓēé gə̄ kánə̄n̄ naā, ādə̄ nápar de gə̄ malang ɔsən̄ dɔdə́ naā tə́! Yá̰á̰ ń a rāā yá̰a̰ toó ní, i náā kə́ dandə́ tə́ n asə kəda kété no tə́ ní? I náā n asə kədají yá̰á̰ ń rāā yá̰a̰ kɔ̄ɔ́ ɓá ní? Ādə̄ nin̄ reēn̄ kə de gə̄ kə́ kum tə́ yādə́ gēé yā kɔjəń kadə̄ najə̄ i yādə́! Ādə̄ de kə́ kum tə́ yādə́ gə̄ ní oōn̄ najə̄ kɔr̄də́ ba ədan̄ na: I najə̄ kə́ rɔ̄kum!

¹⁰ Najə̄ ń Kɔ́ɔ̄ɓē əda ní n toó: De kə́ kum tə́ yāḿ gə̄ i sḭḭ̄ gír deē yāḿ gə̄. Sḭḭ̄ i nge kəla ń mā m̄-gə̄rā ní. m̄-ndigə kadə̄ ə̄nī kemsí mámák ādə̄mī, kadə̄ á̰a̰ ī-gerī ō, kadə̄ ī-gerī kum ō, kadə̄ mā ní, mā i Nə́ɓā. Kété noḿ mā tə́ ní, nə́ɓā kógə̄ḿ gətóo ō, gotəḿ mā tə́ ní, nə́ɓā kógə̄ḿ a ndi aĺ ō.

¹¹ Kɔ́ɔ̄ɓē i mā ō, i mə̄kɔ́ kal kógə̄ḿ beē ngóy ō. Nge kajə de kə́ rang gətóo, i mā ngóy.

¹² I mā n i nge reē kə kajaá ní, nge kəda najə̄n kété no tə́ ō, nge rāā kadə̄ deē gerə̄n ō ní. I mā, ba i nə́ɓā kə́ mbā kə́ deē asə kənge ɓēé loosí alé. Najə̄ ń Kɔ́ɔ̄ɓē əda ɓáý to̰ ní n toó: Sḭḭ̄ ní, sḭḭ̄ i de kə́ kum tə́ yāḿ gə̄, ba mā ní, mā i Nə́ɓā.

¹³ A̰á̰ā̰, mā i ni ta kəla gíŕ tə́ nú ō, de kə́ asə taā deē jīḿ tə́ gətóo ō. Dan ń m̄-rāā yá̰á̰ kógə̄ḿ anī, de kə́ asə tūr̄ yá̰á̰ ní gətóo.

M-ə́la kə deē kógə̄ḿ tām̄ yāsí tə́

¹⁴ Yá̰á̰ ń Kɔ́ɔ̄ɓē, nge gān̄g dɔsí, Nə́ɓā kə́ táĺ yā Israel, əda ní n toó: M-ə́la kə deē kógə̄ḿ Babilon tām̄ yāsí tə́. Ta róbə gə̄ ń a ngɔ̄mə̄n̄ ɓē ní, m-ā m̄-rāādə́ kadə̄ tə́sōn̄. Loo ń noō tə́ kɔŕ rɔ̄nel̄ yā de kə́ Babilon gə̄ a tél i pā nōō yo.

¹⁵ Mā i Kɔ́ɔ̄ɓē ō, Nə́ɓā yāsí kə́ táĺ nge kəndā Israel, mban̄g yāsí.

Róbə́ kógə̄ḿ kə́ kijə kə́ kem dəla loo tə́

¹⁶ Kété ní, Kɔ́ɔ̄ɓē njar róbə́ kógə̄ḿ kum bā bo tə́, njar róbə́ kógə̄ḿ kum man̄ kə́ tɔ́gən i ngá̰ý tə́.

¹⁷ Ni-rāā adə̄ púsə rɔ̄ɔ̄ gə̄ ō, sə́nda gə̄ ō teēn̄, kósə́ ngé rɔ̄ɔ̄ gə̄ kə́ ɓūtə̄ de gə̄ yādə́ gə̄ kə́ ngé kənī rɔ̄ɔ̄ kə ngangá gə̄ teēn̄. Nin̄ əsōn̄ i yā kḭḭ dɔɔ́ to̰ alé. Nin̄ kɔ́ gə̄ oyn̄ muk. Nin̄ o̰o̰n̄ hor tītə̄ kəlā hor kə́ to kem lámbá tə́ beē.

¹⁸ Ngɔlaā ní Kɔ́ɔ̄ɓē əda na: Yá̰á̰ ń rāā yá̰a̰ kɔ̄ɔ́ ɓá ní, ī-gírī dɔ tə́ to̰ alé, ādī dɔsí ndígə̄nal yá̰á̰ kə́ mān̄ kɔ̄ɔ́.

¹⁹ Tām̄ m-ā m̄-rāā yá̰á̰ kógə̄ḿ kə́ kijə, yá̰á̰ ní a tɔgə i mbée kɔ̄ɔ́ ɓá. Sḭḭ̄ á̰a̰ī yá̰á̰ ní aĺ a? A̰á̰ā̰, m-ā m̄-njar róbə́ kógə̄ḿ kem dəla loo tə́. M-ā m̄-rāā kadə̄ bā gə̄ a nūgə́n̄ kem loo kə́ tutə kɔ̄ɔ́ tə́ ń toō.

²⁰ Dā̰ kə́ bembeé gə̄, tal̄ gə̄ kə burum gə̄ a rɔȳmə̄n̄, tɔdɔ̄ m̄-rāā adə̄ man̄ nūgə́ dəla loo tə́, bā gə̄ nūgə́n̄ loo kə́ tutə ń toō tə́. A̰á̰ā̰, gír de gə̄ ń m̄-gə̄rādə́ ní, m̄-ndigə kadə̄də́ man̄ kadə̄ a̰ȳn̄.

²¹ Gír de gə̄ ń toō ń m̄-rāādə́ tām̄ yāḿ tə́ ní, a ənīn̄ pā yā tɔ̄ȳməń.

Sarya yā Nə́ɓā nin̄ kə Israel

²² Kɔ́ɔ̄ɓē əda na: Israel, i mā n ī-ɓārə́m̄ ní alé. Banī ḭ̄, gír de gə̄ yā Jakob, kɔr asiī seḿ kɔ̄ɔ́.

²³ Tá ī-reē kə ngán batə̄ gə̄ ī-tɔ̄l̄ ādə̄m̄ alé, dan ń ā ī-ndējə̄də́ ní ḭ̄ ɔ́sə gɔnəḿ alé. m̄-rāāī ɓəlo tə́ kə ta kūl̄ ra seí ta ndējə̄m̄ yá̰a̰ alé. m̄-rāāī adə̄ kɔr rāāī kə ta kūl̄ dəjeī kajaja alé.

²⁴ Nar yāí udə loo mang kámbə kotə gə̄ tə́ tām̄ yāḿ tə́ alé, ī-rāā adə̄ m̄-ndān̄ kə ta kūl̄ kəsa yibə̄ dā̰ kə́ tɔ̄l̄ ba tun̄ gə̄ alé. Banī ī-rāā adə̄ mā i ɓəlo yāí kə ta kūl̄ yá̰a̰ rāāí kə́ gōtə́ aĺ gə̄. Ī-rāā adə̄ kɔr rāām̄ kə ta kūl̄ mān̄ kə́ ī-mān̄ dɔ ndūḿ gə̄ kə̄ nja naā tə́.

²⁵ Tá i mā, a̰á̰ā̰, i mā n i nge mā̰ȳ rɔ̄ḿ dɔ yá̰a̰ rāāí gə̄ kə́ gōtə́ aĺ tə́ ní, i tɔdɔ̄ i mə̄kɔ́ n m̄-ndigə ō, a əga kemḿ dɔ tə́ to̰ aĺ ō.

²⁶ Ī-tél ī-ter̄ kemḿ dɔ yá̰á̰ ń ī-gɔŕyɔ̄m̄ najə̄n tə́ ní, ba j-aw̄ mbak loo sarya tə́. Īkɔ́ ə̄nī gotə yá̰a̰ gə̄ ń rāān̄ yá̰á̰ ní ō, ɔ́jə kadə̄ najə̄ i yāí ō.

²⁷ Kaaí kə́ ta kəga dɔ n rāā majaĺ kɔ̄ɔ́ ɓá toō, ō tá ngé gə̄ ń ə̄ndā najə̄ tadə́ tə́ ní, əsōn̄ wōn̄g taḿ tə́ ō

²⁸ Loo ń noō tə́ m̄-mbə́rē ngār gə̄ kə́ kem loo kə́ táĺ tə́ m̄-tə́nīdə́ kɔ̄ɔ́, m-ə́yá̰ gír de gə̄ yā Jakob adə̄ nujən̄ sedə́ kɔ̄ɔ́, m-ə́yá̰ Israel jī madə̄ ba̰ā̰n gə̄ kə́ ngé tájə̄n tə́.