IJAI 42 - Bibəl ta Sar̄

Nge kəla yā Kɔ́ɔ̄ɓē (Najə̄ kə́ kɔr̄ kə gōsōó kə́ ta kəga dɔ)

¹ Kɔ́ɔ̄ɓē əda na: Nge kəla yāḿ n toó, mā m-ə́hɔ ta jīn, i ni n m̄-gə̄rān kə rɔ̄nelēé ní. m̄-rāā adə̄ ndílə́ḿ reē dɔn tə́, yā kadə̄ ni rāań kadə̄ nápar de gə̄ gerə̄n̄ yá̰á̰ kə́ súmūú.

² Ni əga mbēr̄ alé, ni-ɔr̄ najə̄ kə tɔ́gɔ́ alé, deē oō ndūn kum róbə kɔsɔɔ́ alé.

³ Ni-tetə mu tə̄ɓā kə́ rugə alé. Ta ndo̰ hor kə́ tɔ́gən gətóó ń a o̰o̰ ɓáý ní, ni tɔ̄l̄ alé. Banī ni-rāā adə̄ de gə̄ gerə̄n̄ yá̰á̰ kə́ súmūú rɔ̄kum.

⁴ Tɔ́gən a ur̄ wak alé. Ni a əya̰ alé, mbóńg yā kadə̄ ni-əndā ngəra yá̰á̰ kə́ súmūú dɔ nang tə́ pá tá. Gír de gə̄ ń ndin̄ sa̰y ní gḛyn̄ kənge yá̰á̰ ndóō yān.

Loo kə́ unjə̄ kow kə́ tām̄ yā nápar de gə̄ tə́

⁵ Nə́ɓā, Kɔ́ɔ̄ɓē, rāā dɔ rā̰ ō, tútən kem naā tə́ ō. Ni teē kem dɔ nang kə kāgə̄ kə́ tū tə́ gə̄ malang. Gír de gə̄ ń ndin̄ tū tə́ ní, ni-rāā adə̄ ndin̄ kə kumdə́, ngé gə̄ ń ndin̄ kə kumdə́ tū tə́ ní, ni-adə̄də́ koō. Najə̄ ń ni-əda nge kəla yān ní n toó:

⁶ Mā Kɔ́ɔ̄ɓē, m̄-ɓāríī i tām̄ yá̰á̰ ń m̄-rā dɔ tə́ yā rāā ní i yá̰á̰ kə́ gōtə́. M-ə́hɔ ta jīí, deē ń rāāī ní i mā. Madə̄ naā yāḿ ń m-ə́hɔ kə gír de gēé ní, m̄-rāā ādə̄ reē udə gíŕ kə́ rɔ̄ tə́ i kemií ḭ̄ tə́, ḭ̄ i loo kə́ unjə̄ kow yā nápar de gə̄ kə́ dɔ nang tə́.

⁷ De gə̄ ń kumdə́ a̰a̰ loo aĺ ní ā ī-teē kumdə́, ā ī-teē kə dəngáy gēé kɔ̄ɔ́ kem kújə dəngáy yādə́ tə́, ngé gə̄ ń ndin̄ kum til tə́ a ngóōn̄ ní, ā ī-teē sedə́ kɔ̄ɔ́ kem kújə yādə́ tə́.

⁸ Mā i Kɔ́ɔ̄ɓē, rīḿ n noó. M-ā m-ún kɔsə gɔn yāḿ yā kadə̄ de kə́ rang alé. M-ā m-ə́ya̰ tɔ̄ȳ kə́ tām̄ yāḿ tə́ yā kadə̄ yá̰á̰ kə́ tɔ́sə̄ kum gotə nə́ɓā kə́ rɔ̄kum aĺ gə̄ alé.

⁹ Yá̰á̰ kə́ ta kəga dɔ gə̄ rāān̄ yá̰a̰ kɔ̄ɔ́ ɓá. Ngɔlaā ní m-ə́dásí najə̄ yā ngé kə́ kijə gə̄ ń a reēn̄ ní. M-ə́dásí najə̄n adə̄ ī-gerī kété pá tá kadə̄ rāān̄ yá̰á̰ ɓáý.

Kɔ́ɔ̄ɓē udə danaá yā tūr̄ yá̰a̰

¹⁰ Ə̄nī pā kə́ kijə ādī Kɔ́ɔ̄ɓē. Sḭḭ̄ ngé njə̄rā mbā dɔ bā bo tə́ gə̄ ō, sḭḭ̄ yá̰a̰ gə̄ ń ī-rosiī loo kum bā bo tə́ ní ō, sḭḭ̄ gír de gə̄ ń ī-ndiī sa̰y ní ō, ī-ndiī ta ngóy dɔ nang tə́ ə̄nīīneé pā tɔ̄ȳ Kɔ́ɔ̄ɓē.

¹¹ Ādə̄ deē oō kōō pā loo gə̄ ń de gə̄ ndin̄ tū tə́ dəla loo tə́ ní, loo gə̄ ń ngé njə̄rā dɔɔ́ kə́ Kedar gə̄ əhɔn̄ loo ndin̄ tū tə́ yā kḭḭ kə̄ kété ní tə́! Ādə̄ de gə̄ ń ndin̄ Ros ní ɔjən̄ rɔ̄nel̄ yādə́ kə̄ ndágá, ādə̄ ran̄ ta tél mbal̄ bo gə̄ tə́ dɔɔ́ əgan̄neé kɔŕ rɔ̄nel̄!

¹² Ādə̄ gír de gə̄ ń ndin̄ sa̰y ní ɔsən̄ gɔn Kɔ́ɔ̄ɓē, ādə̄ unən̄ ndūdə́ kə̄ dɔɔ́ ənīn̄neé pā tɔ̄ȳ Kɔ́ɔ̄ɓē!

¹³ Kɔ́ɔ̄ɓē njə̄rā kə̄ kété tītə̄ áskar kə́ nge wur kil beé, ni əhɔ rɔ̄n tɔgə tītə̄ de kə́ nge rɔ̄ɔ̄ beé. Ni ur kɔĺ rɔ̄ɔ̄ kə tɔ́gəneé, rɔ̄ɔ̄ madə̄ ba̰ā̰n gə̄ tītə̄ áskar kə́ nge wur kil beé.

Yá̰á̰ ń Kɔ́ɔ̄ɓē núm̄ rāā ní

¹⁴ Kɔ́ɔ̄ɓē əda na: M-ɔ̄r̄ najə̄ aĺ i jóo, m̄-ndi kanjə̄ kəda yá̰á̰ kógə̄ḿ. Ba ngɔlaā m-ā m-ə́ga kɔŕ. m̄-tó̰ō̰ ō, koōḿ gətóo ō, m̄-taā koō majaĺ ō, tītə̄ dəyá̰ kə́ a rāā loo kojə ngōn̄ beé.

¹⁵ M-ā m̄-nujə mbal̄ bo gə̄ kə ngán mbal̄ gə̄ kɔ̄ɔ́ ō, yá̰a̰ malang ń a əɓa tū tə́ ní, m-ā m̄-rāā kadə̄ a tutə kɔ̄ɔ́ ō. M-ā m̄-rāā kadə̄ bā gə̄ a télən̄ dɔ nang kə́ ngan̄g ō, m-ā m̄-rāā kadə̄ dang man̄ kə́ bo gə̄ iīn̄ kɔ̄ɔ́ ō.

¹⁶ M-ā m-ɔ́ŕ ngé kum tɔ̄ɔ̄ gə̄ ta róbə dɔ róbə́ kə́ deē ger̄ aĺ tə́, m-ā m̄-njə̄rā sedə́ dɔ róbə́ kə́ nin̄ gerə̄n̄ aĺ tə́. M-ā m̄-tūr̄ loo kə́ ndɔ̄ɔ́ kadə̄ tél loo kə́ unjə̄ kow kété nodə́ tə́, m-ā m̄-ró̰ȳ yá̰á̰ kə́ dēsə́ nodə́ tə́ ɔgə̄də́ kaw̄ kum kə̄ kété gə̄ kɔ̄ɔ́ gír njadə́ tə́. Yá̰á̰ ń m̄-sāā rāā ní n noó, yá̰á̰ ń noō ń m̄-núm̄ rāā ní, m-ā m̄-lōō gírí alé.

¹⁷ Ngé gə̄ ń ənīn̄ kemdə́ mámák adə̄n̄ ɓesə̄ gə̄ ní, ngé gə̄ ń ədan̄ yá̰a̰ yādə́ kə́ tɔ́sə̄ kum gotə yá̰a̰ gə̄ na: Nə́ɓā yājí gə̄ i sḭḭ̄ ní,

Gír de kə́ kumdə́ a̰a̰ loo aĺ ō, mbīdə́ oō loo aĺ ō

¹⁸ Sḭḭ̄ ń mbīsí oō loo aĺ ní, ōōī! Sḭḭ̄ ń kumsí a̰a̰ loo aĺ ní, á̰a̰ī loo ō, á̰a̰ī yá̰a̰ ō!

¹⁹ I náā n kumən tɔ̄ɔ̄ ní, i nge kəla yāḿ aĺ a? I náā n i mbíkī tītə̄ ngōmbang kəla yāḿ ń m-ā m-ə́lan ní? I náā n kumən tɔ̄ɔ̄ tītə̄ gír de gə̄ yā Kɔ́ɔ̄ɓē ní? I náā n i mbíkī tītə̄ nge kəla yā Kɔ́ɔ̄ɓē ní?

²⁰ Ḭ̄ gír de gə̄ yā Israel, ḭ̄ á̰á̰ yá̰a̰ gə̄ ngá̰ý, banī yá̰á̰ kógə̄ḿ kə́ ndi dɔí tə́ gətóo. Mbīí gə̄ i mbī kə́ majə gə̄, banī ḭ̄ ōō yá̰á̰ kógə̄ḿ alé.

²¹ Yá̰á̰ ń Kɔ́ɔ̄ɓē ra dɔ tə́ yā rāā ní i yá̰á̰ kə́ gōtə́, ni sāā kɔjə kadə̄ ndū najə̄ yān i ndū najə̄ kə́ bo ngá̰ý ō, majə ngá̰ý ō.

²² Ba ń toō ɓáa sḭḭ̄ i gír de gə̄ kə́ ɔyn̄ yá̰á̰ kənge yāsí kɔ̄ɔ́ dɔ gúú tə́. Ɓōkə́n̄sí malang kem bəlo kə́ bo gə̄ tə́ ba utə̄n̄ tasí, ī-ndiī i kem kújə dəngáy gə̄ tə́. Madə̄ ba̰ā̰ gə̄ əhɔn̄sí tītə̄ yá̰a̰ kənge kə́ kəhɔ ta rɔ̄ɔ̄ tə́ beē ō, de kə́ reē dḭḭ̄sí gətóo ō. Nin̄ aw̄n̄ sesí ō, de kə́ yā kəda na ādə̄mī sedə́ gətóo ō.

²³ I náā kə́ dansí tə́ n əndā kumən gíŕ yá̰á̰ ń noō tə́ ní? I náā a oō ní? I náā n a ger̄ kum ngɔlaā ní?

²⁴ I náā n əla Israel ń i gír de gə̄ yā Jakob ní jī ngé gə̄ ń taān̄ yá̰a̰ yān malang kɔ̄ɔ́ tə́ ní, jī ngé gə̄ ń ɔyn̄ yá̰a̰ yān dɔ gúú tə́ ní? I Kɔ́ɔ̄ɓē waḿ? Tām̄ jə-rāāī majaĺ seneé, gír deē yān gə̄ ndigən̄ kun róbə yān alé, ndigən̄ koō ndū najə̄ yān aĺ ō.

²⁵ I tām̄ najə̄ ń toō tə́ n Kɔ́ɔ̄ɓē bə̄gā wōn̄g yān kə́ ngá̰ý dɔdə́ tə́ ō, rāā adə̄ yá̰á̰ kə́ to ka̰ā̰ aĺ ngá̰ý gə̄ ń rɔ̄ɔ̄ a reēń ní, teē dɔdə́ tə́ ō ní. Wōn̄g yān ní əla hor kə̄ loo gə̄ tə́, banī Israel gə̄ gerə̄n̄ kum alé. Hor o̰o̰ Israel gə̄, banī nin̄ rāān̄ i yá̰a̰ ngōn̄ ndām̄ tə́.