IJAI 41 - Bibəl ta Sar̄

Deē ń Kɔ́ɔ̄ɓē rāā adə̄ ni-əsō róbó a reē noó ní

¹ Kɔ́ɔ̄ɓē əda na: Sḭḭ̄ gír de gə̄ ń ī-ndiī sa̰y ní, ī-ndiī tasí mbóo ōōiń najə̄ yāḿ. Sḭḭ̄ de kə́ kem ɓēé gə̄ malang, ī-téĺ ə́hɔī rɔ̄sí tɔgə gogə́ rang. Ī-ndɔ́tī kə̄ kété ba ɔ̄rī najə̄! A̰á̰ā̰, j-awī naā tə́ malang loo sarya tə́.

² De kógə̄ḿ əsō róbó a reē noó, ni-ḭḭ i dām̄ kə́ gír ɓē tə́. Loo malang ń ni mān̄ tū tə́ ní tetə rɔ̄ɔ̄. Deē ń rāā adə̄ ni-əsō róbó a reē ní i náā? I náā n əla nápar de gə̄ kem jīn tə́ ní? I náā n əla dɔ mban̄g gə̄ gíŕ tɔ́gə yān tə́ ní? Kaskar yān rāā adə̄ nin̄ télən̄ bumbə́ru, kum gərā yān tə̄ɓādə́ tītə̄ néĺ kə́ un mu aw̄ń kɔ̄ɔ́ beē.

³ Deē ní ngɔ̄də̄də́, ni-aw̄ láẃ ngá̰ý kum kə̄ kété, ni sōl̄ yá̰á̰ kógə̄ḿ alé, kanjə̄ kadə̄ ni-əndā njan nang tə́.

⁴ Yá̰a̰ malang ń noō ní i náā n rāā? I nge ń ta kəla gíŕ tə́ ni i nge rāā kadə̄ yá̰a̰ gə̄ rāān̄ yá̰á̰ ní. I mā Kɔ́ɔ̄ɓē. Mā i nge kə́ kété ō, m-ā m̄-ndi Kɔ́ɔ̄ɓē bátə́ ta tɔ̄l̄ ta tə́ ō.

⁵ Yá̰á̰ ń rāā yá̰á̰ ní gír de gə̄ ń ndin̄ sa̰y ní a̰a̰n̄ ō, ɓōĺ rāādə́ ō. De gə̄ ń nin̄ ndin̄ i ta ngóy dɔ nang tə́ ní, nin̄ ndɔ́tə̄n̄ kə̄ kété i kə rɔ̄ ndeweé.

⁶ Nin̄ kógə̄ḿ kógə̄ḿ ní náā nəkɔ́ ɓáa rāā kə madə̄neé, ni kógə̄ḿ əda madə̄n na: Ə́hɔ rɔ̄í tɔgə!

⁷ Nge tɔ́sə̄ yá̰a̰ əla go̰ kem nge rāā kəla kə lɔ́rɔ́ tə́ ō, kə gində̄ arjā̰a̰á̰ tə́ ō. Nge kənda gində̄ kə mō̰ó̰ kadə̄ laa əla go̰ kem kɔdə̄ tə́. Ni-əda najə̄ kə́ dɔ kəla yān tə́ na: Majə. Gō tə́ anī tɔ̄lə̄n̄ ta yá̰á̰ kə́ tɔ́sə̄ kum gotə nə́ɓā kə́ rɔ̄kum aĺ kógə̄ḿ kə ta kūl̄ kəndan kə máyá̰ kadə̄ ra gotə kógə̄ḿ.

Ngɔlaā ní ī-lōō ɓōĺ

⁸ Banī ḭ̄ Israel, ḭ̄ nge kəla yāḿ, Jakob, ḭ̄ i gír de gə̄ kə́ m̄-gə̄rādə́, i madə́ḿ Abəraham n ojiī ní.

⁹ M-āw̄ sāāí tə́ bátə́ m-ūgə̄ ta ngóy dɔ nang tə́, ī-ndi i gō nang kə́ sa̰y tɔȳ gotə gō nang kə́ rang gə̄ tə́ n m̄-ɓāríī tū tə́ ní. M-ə́daī na nge kəla yāḿ i ḭ̄, m̄-gə̄rāī, ba m̄-tə́taī kə̄ gogə́ alé.

¹⁰ Ī-lōō ɓōĺ, na mā i naā tə́ seí. Ī-lōō ka̰a̰ loo kə́ gidií tə́ kə sōlōó. A̰á̰ā̰, Nə́ɓā yāí i mā. m̄-rāā adə̄ tɔ́gí to. m̄-reē dḭḭ̄ tə́ ō, m̄-ngɔ̄mī kə jīḿ kə́ kə tɔ́gɔ́ ō kə́ tetə rɔ̄ɔ̄ ō.

¹¹ De gə̄ malang ń rāān̄ wōn̄g seí ní, rɔ̄də́ a sɔl̄də́ ngá̰ý ō, ndū a asədə́ nák ō. Ngé gə̄ ń kɔ̄lə̄n̄ seí ní, a nujən̄də́ kɔ̄ɔ́ ō, nin̄ a oyn̄ ō.

¹² Ngé rɔ̄ɔ̄í gə̄ ní, ā ī-sāādə́ banī ā ə́ngédə́ to̰ alé. De gə̄ ń toō ń rɔ̄ɔ̄īn̄ ní, a nujən̄də́ kɔ̄ɔ́ ō, nin̄ a hində̄n̄ lim kɔ̄ɔ́ ō.

¹³ Mā Kɔ́ɔ̄ɓē mā i Nə́ɓā yāí. M-ə́hɔ ta jī ko̰í. M-ə́daī na: Ī-lōō ɓōĺ, m̄-reē i yā dḭḭ̄.

¹⁴ Sḭḭ̄ gír deē yā Jakob gə̄, ī-lōōī ɓōĺ. Ngōn̄ kele kə́ dūú, ḭ̄, gotə de gə̄ yā Israel kə́ tɔ́gə́də́ gətóo gə̄. Najə̄ ń Kɔ́ɔ̄ɓē əda ní n toó: m̄-reē i yā dḭḭ̄. Nge taā kəya̰ī dɔɔ́ i mā, Nə́ɓā kə́ táĺ yā Israel.

¹⁵ M-ā m̄-rāāī yá̰a̰ rāā kəla kə́ kijə kə́ to kijə tə́, yá̰a̰ jɔ̄r̄yɔ̄ nán̄g ta kɔsə kə́ ta ngāngən i kə́ atə tə́. Ā ī-rējə̄ mbal̄ gə̄, ā ī-tūr̄də́ kadə̄ télən̄ bumbə́ru ō, ngán mbal̄ gə̄ ɓáa ā ī-rāādə́ i mu tə́ ō.

¹⁶ Ā ī-tə́nīdə́ kum kə̄ dɔɔ́ ō, nél a aw̄ sedə́ kɔ̄ɔ́ tītə̄ ń aw̄ń kə muú kɔ̄ɔ́ ní ō. Nél man̄ kə́ əla kə tɔ́gɔ́ a ɔydə́ yā kaw̄ sedə́ kə̄ loo gə̄ tə́. Banī ḭ̄ ā ə́ga kɔŕ rɔ̄nel̄ najə̄ yā Kɔ́ɔ̄ɓē tə́, ā ə́nda kadií najə̄ yā Nə́ɓā kə́ táĺ yā Israel tə́.

Tūrə̄n̄ dəla loo adə̄ tél loo kə́ man̄ i tū tə́

¹⁷ Ngé rɔ̄ tō ndoō gə̄ ō, ngé ndoō gə̄ ō, sāān̄ man̄ banī əngen̄ alé. Kəndā man̄ rāā ndo̰də́ adə̄ tutə. I beé ní, mā Kɔ́ɔ̄ɓē m-ā m̄-daldə́, mā Nə́ɓā yā Israel, m-ā m-ə́yá̰də́ kɔ̄ɔ́ alé.

¹⁸ M-ā m̄-rāā kadə̄ bā gə̄ nūgə́n̄ loo kə́ kḭḭ kə̄ dɔɔ́ gə̄ kə́ kāgə̄ gə̄ gətóon̄ tū tə́ tə́ ō, m-ā m̄-rāā kadə̄ man̄ kə́ əɓa nang tə́ gə̄ nūgə́n̄ kum wól gə̄ tə́ ō. M-ā m̄-tūr̄ dəla loo kadə̄ tél dang man̄ kə́ bo ō, m-ā m̄-tūr̄ loo kə́ mángá kadə̄ tél loo kə́ man̄ i tū tə́ ō.

¹⁹ M-ā m-ə̄ndā kāgə̄ kə́ tayā tayā gə̄ kem dəla loo tə́, kāgə̄ kə́ bo gə̄ ō kə́ dūú gə̄ ō. Gō nang ń man̄ gətóo tū tə́ ní, kāgə̄ gə̄ kə́ kə gō gíŕdə́ gēé tayā tayā ní, m-ā m̄-ɓoodə́ naā tə́ tū tə́.

²⁰ Loo ń noō tə́ de gə̄ malang a a̰a̰n̄ yá̰á̰ ń toō: I Kɔ́ɔ̄ɓē n rāā yá̰a̰ gə̄ ń noō adə̄ udə gírí ní, i Nə́ɓā kə́ táĺ yā Israel rāādə́ ní. De gə̄ malang a gerə̄n̄. Nin̄ malang a əndān̄ kumdə́ gírí ō, a gerə̄n̄ kum ō.

Əhɔn̄ nə́ɓā kə́ rɔ̄kum aĺ gə̄ dɔ háĺdə́ kə́ gōtə́ aĺ tə́

²¹ Kɔ́ɔ̄ɓē, mban̄g yā gír de gə̄ yā Jakob gə̄, əda na: Sḭḭ̄, nə́ɓā gə̄ yā gotə gír de kə́ rang gə̄, ī-reē ɔ́jiī yāsí, ī-teēī kə yá̰a̰ gə̄ kə́ ɔjən̄ kadə̄ najə̄ yāsí i rɔ̄kum.

²² Ī-ndɔ́tī kə̄ kété ba ə́daījí yá̰á̰ ń a rāā yā rāā yá̰á̰ ní! Yá̰á̰ ń rāā yá̰a̰ kɔ̄ɔ́ ɓá ní i rí? Ɔ́jiī yá̰á̰ ní, anī j-a jə-gír̄ yá̰a̰ dɔ tə́. Aĺ ɓáa ə́daījí najə̄ kə́ dɔ taa kə́ ndɔ̄ń tə́, anī yá̰á̰ ń a rāā yā reē ní, j-a jə-ger̄.

²³ A̰á̰ā̰, yá̰á̰ a rāā yá̰á̰ ní ə́daījí. Loo ń noō tə́ j-a jə-ger̄ kadə̄ sḭḭ̄ i nə́ɓā gə̄. Ī-rāāī yá̰á̰ kə́ majə, aláa yá̰á̰ kə́ to kum kaȳ aĺ, banī ī-rāāī yá̰á̰ kə́rēý. I beé n j-a j-a̰a̰ ō, j-a jə-ɓōĺ gidəsí ō ní!

²⁴ Banī sḭḭ̄ i yá̰á̰ kógə̄ḿ alé, yá̰á̰ ń sḭḭ̄ ī-rāāī ní i yá̰á̰ kə́ kumən gətóo. Deē ń ni gə̄rāsí kadə̄ sḭḭ̄ i nə́ɓā gə̄ ní, nel̄jí seneé aĺ ngá̰ý tītə̄ ń nelə̄ńjí sesí aĺ ngá̰ý ní beē.

²⁵ m̄-rāā adə̄ deē kógə̄ḿ ḭḭ dām̄ mbɔ́r ɓē kə́ ko̰ó̰ tə́ a reé noó. Loo ń mbang əɓa tū tə́ ní, m̄-ɓārə́n kə rīneé. Ni rējə̄ ngé kɔr no de gə̄ tītə̄ loo mbə̄sā bɔr beé, tītə̄ ń kɔdə̄ jóo a rējəń nánjə kə jīneé ní beē.

²⁶ I náā n əda yá̰á̰ ń noō kété ta kəla gíŕ tə́ yā rāań kadə̄ jə-ger̄ ní? I náā n tāājí kété jóo yā kadə̄ j-ədań na: I najə̄ kə́ rɔ̄kum ní? De kə́ əda yá̰á̰ kógə̄ḿ kété gətóo, de kə́ teē tan gətóo, najə̄ kógə̄ḿ kə́ teē tasí tə́ gə̄gē deē oō alé!

²⁷ De kə́ ta kəga dɔ ń əda yá̰á̰ ń noō kem ɓē kə́ Jerusalem tə́ ní, i mā Kɔ́ɔ̄ɓē. Tām̄ m-ə́la deē kógə̄ḿ Siyo̰, kadə̄ aw̄ əda najə̄ kə́ majə.

²⁸ M-á̰a̰ loo ngá̰ý, banī m-á̰a̰ deē kógə̄ḿ alé. Dan nə́ɓā gə̄ yā gotə gír de kə́ rang gə̄ tə́ ní, nə́ɓā kógə̄ḿ kə́ əda gír̄ yān kə́ dɔ tə́ gətóo! De kə́ yā kadə̄ deē aw̄ oō kə́ tan tə́ gətóo, de kə́ asə tūrə̄m̄ najə̄ tə́ gətóo!

²⁹ Nin̄ i yá̰á̰ kógə̄ḿ aĺ ō, nin̄ rāān̄ yá̰á̰ kógə̄ḿ aĺ ō. Yá̰á̰ kə́ tɔ́sə̄ yādə́ gə̄ i nél karī, i yá̰á̰ kə́ kem wōȳ!