IJAI 40 - Bibəl ta Sar̄

Jipə gə̄ ń ndin̄ Babilon ní, sɔlə̄n̄ kemdə́ ( 40—45 ) Sɔlə̄n̄ kem Israel

¹ Ī-téliī kə kəndā kem dɔ tə́ ādī gír deē yāḿ gə̄ gogə́. A̰á̰ā̰, ī-tél ādīin̄ kəndā kem dɔ tə́ gogə́. Nə́ɓā yāsí əda i beé.

² Ī-téliī kə kəhɔ rɔ̄ tɔgɔɔ́ ādī Jerusalem gogə́. Úniī ndūsí kə̄ dɔɔ́ ə́dain̄neé na: Gír kəla kə́ kəndā gúu dɔí tə́ kadə̄ ī-rāań gān̄g kɔ̄ɔ́. Kɔ́ɔ̄ɓē rāā adə̄ ə̄gā kə̄rā majaĺ yāí gə̄ malang kɔ̄ɔ́.

³ De kógə̄ḿ ənī mbēr̄ əda na: Ī-njariī róbə kem dəla loo tə́ tām̄ yā Kɔ́ɔ̄ɓē tə́. Ī-rāāī róbə́ kə́ majə tām̄ yā Nə́ɓā yājí tə́ kem loo kə́ tutə ń toō tə́.

⁴ Ī-ɓōkíī nán̄g ādī rosə kum wól loo gə̄ ō, ī-tə́gāī dɔ mbal̄ bo gə̄ kə ngán mbal̄ gə̄ ādə̄ tə́lən̄ kə̄ nang tə́ ō, ī-rāāī loo kə́ to kə naraá gə̄ ādə̄ télən̄ ndágə mbō gə̄ ō, ī-rāāī loo kə́ kḭḭ kə̄ dɔɔ́ gə̄ ādə̄ télən̄ wól loo gə̄ ō.

⁵ Loo ń noō tə́ kɔsə gɔn yā Kɔ́ɔ̄ɓē a teē kə̄ ndágá ō, de kə́ dɔ nang tə́ gə̄ malang a a̰a̰n̄ ō. Yá̰á̰ ń Kɔ́ɔ̄ɓē əda kadə̄ yā rāā ní n noó.

⁶ De kógə̄ḿ ədam̄ na kə m-ə̄nī mbēr̄! Anī m̄-dəjen m-ə́da na ké kə m-ə̄nī i mbēr̄ rí wa. Ni-tél ədam̄ na: I najə̄ ń toō: Deē ndul gə̄ ton̄ i tītə̄ mu beé, nin̄ ngangə̄n̄ tɔyn̄ hútə̄ yá̰a̰ kə́ bembeé gə̄ alé.

⁷ Dan ń koō kə́ ta Kɔ́ɔ̄ɓē tə́ mān̄ dɔdə́ tə́ anī, mu tutə ō, hútə̄ yá̰a̰ ur̄ ō. A̰á̰ā̰, deē ndul gə̄ ngangə̄n̄ aĺ tītə̄ mu beé.

⁸ Mu tutə ō, hútə̄ yá̰a̰ ur̄ ō, banī najə̄ yā Nə́ɓā yājí to gotoó ngándáńg.

Najə̄ kə́ majə kə́ yā kənī mbēr̄ tə́

⁹ Jerusalem, āl̄ dɔ mbal̄ kə́ ngāl̄ ngá̰ý kum kə̄ dɔɔ́ tə́. Ɓē kə́ Siyo̰, ə́ga kɔŕ kə tɔ́gí gēé malang. Ḭ̄ nge reē kə najə̄ kə́ majaá, ún ndūí kə̄ dɔɔ́, ī-lōō ɓōĺ. Ə́da ɓē gə̄ kə́ Juda tə́ na: Nə́ɓā yāsí n toó!

¹⁰ Kɔ́ɔ̄ɓē Nə́ɓā n toó. Ni-reē i kə tɔ́gɔ́. Ngan̄g yān asə kadə̄ o̰o̰ń ɓē. Ni-reē kə yá̰á̰ ń ni-ənge ní, yá̰á̰ ń əndānəń njan tām̄ kəla ń ni-rāā tə́ ní, ni reēń.

¹¹ Ni ngɔ̄m̄ ɓūtə̄ yá̰a̰ kul̄ yān gə̄ tītə̄ nge ngɔ̄m̄ yá̰a̰ kul̄ gə̄ beé. Ni wél̄ jīn anī ɓūtə̄ yá̰a̰ kul̄ yān gə̄ kánə̄n̄ naā. Ni ətō ngán batə̄ gə̄ kem jīn tə́. Kó̰o̰ batə̄ gə̄ ń ngáńdə́ a ilən̄ mba ní, ni-njə̄rā sedə́ jəke jəke ɔrəńdə́ ta róbə.

Kɔ́ɔ̄ dɔ rā̰ ō dɔ nang ō i de kə́ bo ō, i de kə́ nge kum kedə̄ ō

¹² I náā n ɔdə man̄ bā bo kem jīn tə́ mbɔ̄jə́nń man̄ bā bo ní? I náā n jā̰ā̰ ta ngán jīn gə̄ mbɔ̄jə́nń bo dɔ rā̰ ní? I náā n ɔy bumbə́ru dɔ nang kem kārāá mbɔ̄jə́nń bumbə́ru dɔ nang ní? I náā n mbɔ̄jə́ kɔȳ mbal̄ bo gə̄ ō, ngán mbal̄ gə̄ ō kə mbal̄ mbɔ̄jə́ kɔȳ yá̰á̰ ō ní?

¹³ I náā n ger̄ kum najə̄ kɔr̄ ndíĺ Kɔ́ɔ̄ɓē ní? Yá̰á̰ ń Nə́ɓā núm̄ rāā ní, adə̄ i náā kadə̄ rāā?

¹⁴ I náā n Nə́ɓā aw̄ koō yān tə́ yā kadə̄ ni teē kum Nə́ɓā dɔ yá̰á̰ tə́ ní? Yā kadə̄ Nə́ɓā ndóoń loo gān̄g sarya majə ní? Yā kəngeń yá̰á̰ ndóō kə́ ɔjə dɔ kum kedə̄ ní? Yā gerə̄ń yá̰á̰ kə́ majə kadə̄ deē ger̄ kum ni?

¹⁵ Nápar de gə̄ ton̄ i tītə̄ ngōn̄ man̄ kə́ əsō ɗḛy gír gəmbé tə́ beē, ton̄ i tītə̄ kum nán̄g ngárə̄ḿnjēý kógə̄ḿ kə́ to dɔ yá̰a̰ mbɔ̄jə́ kɔȳ yá̰á̰ tə́ beé. Gír de kə́ sa̰y gə̄ hɔɔ́lɔ̄n̄ tītə̄ bumbə́ru beé.

¹⁶ Dā̰ kə́ Liban tə́ gə̄ malang gə̄gē asən̄ kadə̄ deē adə̄ń Kɔ́ɔ̄ɓē yá̰a̰ tun̄ kə́ majə tām̄ yān tə́ alé. Kāgə̄ gə̄ malang kə́ Liban tə́ gə̄gē asən̄ kadə̄ deē rāań hor dɔ loo tun̄ yá̰á̰ tə́ alé.

¹⁷ Nápar de gə̄ malang ní nin̄ i yá̰á̰ kógə̄ḿ ta kum Kɔ́ɔ̄ɓē tə́ alé, ni tə́dádə́ alé, nin̄ i néĺ ngóy.

Nə́ɓā kə́ deē a ɔjə seneé kə yá̰á̰ kógə̄ḿ alé

¹⁸ Nə́ɓā ní deē a ɔjə seneé i náā? Ni to i tītə̄ rí?

¹⁹ To i tītə̄ yá̰á̰ kə́ tɔ́sə̄ kum gotə yá̰á̰ kə́rēý a? Kɔdə̄ kógə̄ḿ rāān adə̄ to tītə̄ yá̰á̰ kə́rēý, kɔdə̄ kə́ rang rāā lɔ́r gidən tə́ ba tə́la məde gində̄ arjā̰a̰ gə̄ rɔ̄n tə́.

²⁰ Deē ń ndoō ngá̰ý adə̄ ni asə kadə̄ yá̰a̰ ndējə̄ kə́ beé aĺ ní, ni gə̄rā i kāgə̄ kə́ a ur ruú alé. Gō tə́ anī ni sāā kɔdə̄ kə́ majə kə́ asə tɔ́sə̄ yá̰á̰ kógə̄ḿ kə́ ra dɔɔ́.

²¹ Sḭḭ̄ ī-gerī nge ń noō aĺ a? Adə̄ sḭḭ̄ ōōī nge ń noō aĺ a? Ta kəla gíŕ tə́ ní ədan̄sí yá̰a̰ gə̄ ń noō aĺ a? Sḭḭ̄ ī-gerī deē ń əndā gír gisə dɔ nang ní aĺ a?

²² Ni ndi i dɔ kōr̄ kāgə̄ mbang yān kə́ gīr̄ gidə dɔ nang tə́, tām̄ yān tə́ ɓáa deē ndul gə̄ ton̄ i tītə̄ gaẃ gə̄ beé ō. Ni ndɔ́r̄ gō dɔ rā̰ tītə̄ loo teē kem kūbə̄ beé. Ni tútə dɔ rā̰ gidə naā tə́ tītə̄ tandā kə́ yā rāā kújə́ tə́ beē yā ndi kemeé.

²³ Ni nujə ngār gə̄ kə́ dɔ nang ń toō tə́, ngé kɔr no de gə̄ kə́ dɔ nang ń toō tə́ gə̄ ní, ni-tél sedə́ kə̄ nang tə́ adə̄ nin̄ i yá̰á̰ kógə̄ḿ alé.

²⁴ Ɓārə́n̄ rīdə́ i ngɔr ɓáý, ndin̄ i ngɔr ɓáý, əlan̄ ngəradə́ aĺ ɓáý, anī Kɔ́ɔ̄ɓē tóódə́ kə koō kə́ tan tə́ kɔ̄ɔ́ ɓá. Anī nin̄ tutən̄ ō, nél man̄ kə́ əla kə tɔ́gɔ́ ɔydə́ tītə̄ mu beé aw̄ sedə́ kɔ̄ɔ́ ō.

²⁵ Nə́ɓā kə́ táĺ dəje najə̄, ni-əda na: Ā ɔ́jiī seḿ i náā? I náā n asə seḿ māá ní?

²⁶ Úniī kumsí kə̄ dɔɔ́ ba á̰a̰ī: I náā n rāā tə́yō̰ gə̄ ní? I náā n rāā adə̄ njə̄rān̄ kə gō naá majə tītə̄ áskar gə̄ beé ní? I nge ɓāŕdə́ malang kə rīdə́ gēé. Ngan̄g yān ō, tɔ́gə ko̰o̰ ɓē yān ō, i ngá̰ý, adə̄ tə́yō̰ kógə̄ḿ kə́ ɓāŕnən̄ banī ni i kə́ gətóó ní gətóo.

Tɔ́gə́ kə́ kijə kə́ tām̄ yā ngé gə̄ ń tɔ́gə́də́ gətóó tə́ ní

²⁷ Israel, gír de gə̄ yā Jakob, i tām̄ rí tə́ á ī-nōōī rɔ̄sí ə́daī na yá̰á̰ ń teē dɔjí tə́ ní Kɔ́ɔ̄ɓē na a̰ā̰ aĺ ní? Ə́daī na Kɔ́ɔ̄ɓē na rɔ̄ɔ̄ dɔ yá̰á̰ kə́ sɔɔ̄sí tə́ aĺ ní?

²⁸ Tá Kɔ́ɔ̄ɓē i Nə́ɓā, əla gír i jóó ngá̰ý ō, i mbóńg kə̄ non tə́ ō. Ədan̄ nge ń noō adə̄ sḭḭ̄ ōōī aĺ a? Ni-rāā dɔ nang malang kə taá. Tɔ́gən gətóo nja kógə̄ḿ alé, kɔr rāān nja kógə̄ḿ alé. De kə́ asə ger̄ rúu ter kə́ kemən tə́ gətóo.

²⁹ Deē ń tɔ́gən gətóó ní, ni-adə̄n tɔ́gə gogə́, deē ń tɔ́gən təgā kɔ̄ɔ́ ní, ni-adə̄n kəhɔ rɔ̄ tɔgə.

³⁰ Balsáa gə̄ télən̄ de kə́ tɔ́gə́də́ gətóo gə̄ ō, kɔr rāādə́ ō. Ngé kə́ nin̄ tɔyn̄ madə̄də́ gə̄ gə̄gē tə́sōn̄.

³¹ Banī ngé gə̄ ń əndān̄ kemdə́ dɔ Kɔ́ɔ̄ɓē tə́ ní əngen̄ tɔ́gə́ kə́ kijə. Nin̄ ḭḭn̄ bɔ̄gə̄ tītə̄ kə̄rō gə̄ beé, nin̄ a̰ȳn̄ ngɔ̄də̄ kanjə̄ kadə̄ kɔr rāādə́, nin̄ njə̄rān̄ kumdə́ kə̄ kété kanjə̄ kadə̄ tɔ́gə́də́ təgā.