IJAI 4 - Bibəl ta Sar̄

¹ Ndɔ̄ ngeé ń noō tə́ ní, dəyá̰ gə̄ sīrí a ngaān̄ dɔ dəngam kə́ kógə̄ḿ beē tə́ ba a ədan̄ na: Jḭḭ kɔ́ gə̄ j-a jə-sāā yá̰a̰ kəsají ō, kūbə̄ ko̰ō̰jí ō. Yāí i yā kadə̄ ún rɔ̄sɔl̄ dɔjí tə́ kɔ̄ɔ́ ngóy kə ta kūl̄ ndigə kə́ ī-ndigə kadə̄ jḭḭ i nə̄yá̰í gə̄!

De kə́ Jerusalem gə̄ teēn̄ ta yo tə́

² Ndɔ̄ kógə̄ḿ tə́ Kɔ́ɔ̄ɓē a rāā kadə̄ yá̰á̰ kógə̄ḿ kə́ majə ngá̰ý ō, kə́ to kɔsə gɔn ngá̰ý ō, əɓa kem ɓēé. De kə́ Israel tə́ gə̄ ń a teēn̄ ta yo tə́ ní, a əndan̄ kadədə́ ō, de gə̄ a rɔȳn̄də́ ō, najə̄ yá̰á̰ ń a teē kem ɓēé tə́ ní.

³ Loo ń noō tə́ ngé gə̄ ń a ndin̄ Jerusalem ní, ngé gə̄ ń a ndin̄ kə kumdə́ ɓáý kem ɓē kə́ Siyo̰ tə́ ní, a ɓārə́n̄də́ na i ngé kə́ ɔrə̄n̄ kam̄də́ tām̄ yā Kɔ́ɔ̄ɓē tə́ gə̄. Kem ɓē kə́ Jerusalem tə́ ɓáa i de gə̄ malang ń Kɔ́ɔ̄ɓē ndang rīdə́ kem makətūbə̄ yān tə́ kadə̄ əngen̄ ndi kə kumuú ní.

⁴ Kɔ́ɔ̄ɓē a rāā kadə̄ néĺ yá̰á̰ kə́ gōtə́ ō, néĺ kə́ a tə́go deē kadə̄ unjə̄ ō əla. Dan ń ni a tə́gó yá̰á̰ kə́ yḛr gə̄ kə́ rɔ̄ dəyá̰ kə́ Jerusalem tə́ gə̄ tītə̄ ń noō anī, dan ń ni a tə́gó mósə́ ń ɓē kə́ Siyo̰ ɓōkə́ nang tə́ ɓēé looneé ní,

⁵ anī, ni a rāā kadə̄ kil̄ man̄ kógə̄ḿ teē kadaá dɔ mbal̄ Siyo̰ tə́ kə taá malang ō, dɔ de gə̄ malang ń a kánə̄n̄ naā dɔ tə́ ní tə́ ō, ba ndɔ̄ɔ́ anī ni a rāā kadə̄ sa ō, ta ndo̰ hor kə́ ndə́lē gə̄ ō, teēn̄ dɔ mbal̄ Siyo̰ tə́ kə taá malang ō, dɔ de gə̄ malang ń kánə̄n̄ naā dɔ tə́ ní tə́ ō. Kɔsə gɔn yā Kɔ́ɔ̄ɓē a utə̄ dɔ yá̰a̰ malang tītə̄ kújə tandā kə́ bo ngá̰ý beē,

⁶ tītə̄ dɔ kújə́ kə́ rāā kə mbī kāgə̄ gēé kadə̄ rāā ndíl kadaá dan ń mbang a ɔsə tə́ ní. Ni a rāā rɔ̄n i yá̰á̰ kə́ yā ndi gírí tə́ ō, loo ɓɔ̄ɔ̄ rɔ̄ tə́ ō, tām̄ yā nél man̄ kə́ əla kə ngangá ngá̰ý tə́ ō, tām̄ yā man̄ kə́ a edə tə́ ō.