IJAI 39 - Bibəl ta Sar̄

Ejekias əhɔ nge kɔsə kum gotə ɓē kə́ Babilon gə̄ kə̄ rɔ̄n tə́

¹ Dan ngeé ń noō tə́, mban̄g kə́ Babilon, adə̄ i Merodak Baladan kə́ ngōn̄ Baladan, oō kadə̄ mo̰y na rāā Ejekias ba na rɔ̄n na ngáā kɔ̄ɔ́. Anī ni ndang makətūbə̄ əlań de gə̄ kadə̄n tə́, əladə́ kə kadə̄ karīí kadə̄n tə́ ō.

² Ejekias rāā rɔ̄nel̄ tām̄ kugə̄ ń de gə̄ ní reē ugə̄n̄ tə́ ní. Ni-aw̄ sedə́ adə̄ a̰a̰n̄ kem kújə, loo ń ni a ngɔ̄m̄ yá̰á̰ kə́ gātə̄də́ i ngá̰ý gə̄ tū tə́ ní tə́. Yá̰a̰ gə̄ ní i gində̄ arjā̰a̰ ō, lɔ́r ō, ítər gə̄ ō, yibə̄ kə́ rāā ítər tū tə́ ō. Ni ɔjədə́ loo malang ń ni a ngɔ̄m̄ yá̰a̰ rɔ̄ɔ̄ yān gə̄ tū tə́ ní ō, ɔjədə́ yá̰a̰ malang kə́ kə́ kem loo ngɔ̄m̄ yá̰a̰ yān gə̄ tə́ ō. Ni mundə̄də́ yá̰á̰ kógə̄ḿ kə́ kem kújə yān tə́ aĺ ō, kem ɓē ko̰o̰ yān tə́ malang ní, ni mundə̄də́ yá̰á̰ kógə̄ḿ aĺ ō.

³ Gō tə́ anī, Ijai nge koō ta reē ənge mban̄g Ejekias ba dəjen najə̄ ədan na: De gə̄ ní ədaīn̄ na i rí? Nin̄ ḭḭn̄ i rá? Anī Ejekias tél ədan na: Ḭḭn̄ i sa̰y ngá̰ý n reēn̄ ka̰a̰ḿ tə́ ní, ḭḭn̄ i Babilon.

⁴ Ijai ɔr̄ najə̄ ɓáý əda na: Yá̰á̰ kə́ kem kújə ngol yāí tə́ ń nin̄ a̰a̰n̄ ní i rí? Ejekias ədan na: Nin̄ a̰a̰n̄ yá̰a̰ malang. Yá̰a̰ yāḿ gə̄ kə́ gātə̄də́ i ngá̰ý gə̄ ní, m-ɔ́jə́də́ malang, m̄-mundə̄də́ yá̰á̰ kógə̄ḿ alé.

⁵ Anī Ijai əda Ejekias na: Ōō najə̄ ń Kɔ́ɔ̄ɓē kə́ bo kə́ tɔ́gən i ngá̰ý əda ní:

⁶ Ndɔ̄ kógə̄ḿ anī, yá̰a̰ malang kə́ kem kújə ngol yāí tə́, yá̰a̰ malang ń gə̄ ń mban̄g kə́ kété gə̄ kánə̄n̄ kemeé ní, a ɔyn̄ yá̰a̰ gə̄ ń noō malang yā kaw̄ń Babilon. A̰á̰ā̰, Kɔ́ɔ̄ɓē əda na yá̰á̰ kógə̄ḿ kə́ a na̰y laā a gətóo.

⁷ De gə̄ ń ḭ̄ ójə́də́ ní, a ɔyn̄ ngá̰ý gə̄ dandə́ tə́ yā kaw̄ sedə́ nú. A rāān̄də́ áji mbang gə̄ tə́, adə̄ nin̄ a rāān̄ kəla kem kújə ngol yā mban̄g kə́ Babilon tə́.

⁸ Ejekias tél əda Ijai na: Najə̄ yā Kɔ́ɔ̄ɓē ń ədam̄ toó i yá̰á̰ kə́ majə. Tām̄ ni gír̄ kadə̄ dan ndiḿ mā kə kumḿ tə́ ní, j-a jə-ndi kə lɔmɔɔ́ ō, yá̰á̰ kógə̄ḿ a rāājí aĺ ō.