IJAI 38 - Bibəl ta Sar̄

Ejekias rāā mo̰y ō rɔ̄n ngáā ō

¹ Dan ngeé ń noō tə́ ní, mo̰y kógə̄ḿ kə́ a rāā deē anī a oy i mbée əhɔ Ejekias. Ijai nge koō ta kə́ ngōn̄ Amots reē go̰ō̰n tə́ ba əda najə̄ ń Kɔ́ɔ̄ɓē əndā tan tə́ ní na: Ī-kán̄ yá̰a̰ yāí gə̄ ī-tə́ndādə́ kə gōó. Tām̄ ā óy, gír ndi kə kumuú yāí gān̄g.

² Anī Ejekias tūr̄ rɔ̄n kə̄ kadə bɔr tə́ ba ndɔ̄ȳ Kɔ́ɔ̄ɓē əda na:

³ Kɔ́ɔ̄ɓē, m̄-rāāī ɓɔ́, ādə̄ əga kemií dɔ tə́ na m̄-rā dɔ ndūḿ tə́ ta kumií tə́ kə kem kə́ kanjə̄ kēgə̄. Yá̰á̰ ń ta kumií tə́ i yá̰á̰ kə́ majə ní m̄-rāā. Tá Ejekias nōō ngá̰ý ɓáý to̰.

⁴ Kɔ́ɔ̄ɓē əda Ijai na kə

⁵ aw̄ kə əda Ejekias najə̄ ń toō kə ədan na: Mā Kɔ́ɔ̄ɓē Nə́ɓā yā kaaí Dabid, m-ōō ndɔ̄ȳ yāí ō, m-á̰a̰ man̄ kumií ō. M-ā m-ə̄nī ndɔ̄í ta madə̄ tə́ kadə̄ asə ɓāl̄ kutə gidə i mí!

⁶ M-ā m̄-gān̄g dɔsí jī mban̄g kə́ Asiri tə́, ḭ̄ ō Jerusalem ō, m-ā m̄-ngɔ̄m̄ ɓē ń toō ō.

²¹ Gō tə́ anī Ijai əda na: Ī-reēī kə mbə́rá kótə̄ kə́ mbə̄sāá, ə̄ndāī ta do yā mban̄g tə́ ādə̄ idə̄.

²² Ejekias dəje najə̄ əda na: Yá̰á̰ ń ɔjə kadə̄ m-ā m̄-tél yā kaw̄ kem kújə yā Kɔ́ɔ̄ɓē tə́ ɓáý ní i rí?

⁷ Ijai tūr̄ ədan na: Kɔ́ɔ̄ɓē a ɔjiī kadə̄ na n ra dɔ ndūn tə́. Yá̰á̰ kə́ yā kɔjiīń kadə̄ na n ra dɔ ndūn tə́ ń a adī ní n toó:

⁸ Loo gə̄ kə́ yā tə́ndā nja dɔ tə́ kalə̄ń kə̄ dɔɔ́ yā Akaj ń i kum mbang tə́ ní, ndíl reē dɔ tə́. Ní, Kɔ́ɔ̄ɓē a tél kə ndíĺ ní kɔ̄ɔ́ kadə̄ loo tə́ndā nja gə̄ kə́ gír kutə a ton̄ i kanjə̄ ndíl dɔdə́ tə́. Anī mbang tél reē gogə́ dɔ loo tə́ndā nja kə́ kutə gə̄ ń ndíl reē dɔ tə́ ní tə́.

Ndɔ̄ȳ yā Ejekias kə́ gō ngáā kə́ rɔ̄n ngáā tə́

⁹ Najə̄ kə́ kɔr̄ kə gōsōó yā Ejekias, mban̄g kə́ Juda. Ni ndang najə̄ ní i gō mo̰y ń rāān tə́ ní, dan ń rɔ̄n ngáā kɔ̄ɔ́ ní.

¹⁰ Kété ní m-ɔ̄r̄ najə̄ kə rɔ̄ḿ m-ə́da na: I núsə ndɔ̄ḿ ngóy n m̄-rāā ō, i gáŕ kadə̄ m-āw̄ kɔ̄ɔ́ ō. Gotə ɓālə̄ḿ gə̄ ń na̰yn̄ ní m-ā m̄-tɔ̄l̄ tadə́ i ɓádá dan de kə́ koy gə̄ tə́.

¹¹ Tá m-ɔ̄r̄ najə̄ kə rɔ̄ḿ ɓáý to̰ m-ə́da na: M-ā m-á̰á̰ Kɔ́ɔ̄ɓē dɔ nang yā ngé ndi kə kumdə́ gēé tə́ to̰ alé. M-ā m-á̰a̰ deē ndul dan ngé ndi dɔ nang tə́ gə̄ tə́ to̰ alé.

¹² Taān̄ ndi kə kumuú yāḿ jīḿ tə́ dɔ gúú tə́, aw̄n̄neé sa̰y kɔ̄ɔ́ rɔ̄ḿ tə́, tītə̄ kújə tandā yā ngé ngɔ̄m̄ yá̰a̰ kul̄ gə̄ beé. M-ūgə̄ ta tɔ̄l̄ ta ndɔ̄ḿ tə́ tītə̄ nge kəjō kūbə̄ kə́ ɓír̄ kūbə̄ kəjōn gidə naā tə́ beē. Gángə̄n̄ kəlā gə̄ kɔ̄ɔ́. Kɔ́ɔ̄ɓē, kadaá bátə́ ndɔ̄ɔ́ ní, ā ī-gān̄g gír najə̄ yāḿ.

¹³ Kété tá kadə̄ loo tīī ní, mā i yá̰á̰ kógə̄ḿ to̰ alé. Kɔ́ɔ̄ɓē tétə̄ kə̄ngāḿ gə̄ malang kɔ̄ɔ́ tītə̄ ɓɔl beé. Kɔ́ɔ̄ɓē, kadaá bátə́ ndɔ̄ɔ́ ní, ā ī-gān̄g gír najə̄ yāḿ.

¹⁴ m̄-nōō tītə̄ yel̄ gabə kɔsə beé, nōō yāḿ to tītə̄ nōō dér gutə beé. Kɔr asə kumḿ nák loo ka̰a̰ loo tə́ kum kə̄ dɔ rā̰ tə́. Kɔ́ɔ̄ɓē, tɔ́gə́ḿ ur̄ wak kɔ̄ɔ́, ī-rāā yá̰á̰ kógə̄ḿ tām̄ yāḿ tə́!

¹⁵ Ba yá̰á̰ ń m-ásə kəda Kɔ́ɔ̄ɓē ní i rí? I ni n ɔr̄ najə̄ seḿ ní ō, i ni n rāā yá̰a̰ gə̄ ń noō malang ní ō. M-ásə ɓīī alé sɔɔ̄ń rɔ̄nel̄ aĺ yāḿ kə́ ngá̰ý.

¹⁶ Kɔ́ɔ̄ɓē, yá̰á̰ ń rāām̄ ní ī-ger̄ ō, ḭ̄ ī-rāām̄ adə̄ m̄-tél m̄-ndi kə kumḿ gogə́ ō. Ḭ̄ ī-tél ādə̄m̄ tɔ́gə gogə́, ī-ngɔ̄mə̄m̄ adə̄ m̄-ndi kə kumḿ.

¹⁷ Rɔ̄nel̄ aĺ yāḿ kə́ ngá̰ý tél i rɔ̄nel̄. A̰á̰ā̰, ḭ̄ ī-rāā adə̄ m̄-teē ta yo tə́ sɔɔ̄ń tár yāí. Majaĺ yāḿ gə̄ malang ní, ḭ̄ ī-ɓōkə́də́ gidií tə́ sa̰y kɔ̄ɔ́.

¹⁸ Deē ɔsə gɔnií ɓádá dan de kə́ koy gə̄ tə́ aĺ ō, de kə́ koy gə̄ ənīn̄ pā ɓōkíīn̄neé tɔ̄ȳ aĺ ō. Ra ń ī-ra dɔ ndūí tə́ ní, ngé kaw̄ ɓádá gə̄ əndān̄ kemdə́ dɔ tə́ to̰ alé.

¹⁹ I ngé gə̄ ń nin̄ ndin̄ kə kumdə́ ní ngóy n asən̄ kɔsə gɔnií ní, tītə̄ ń mā m-ɔ́səń gɔnií ɓōólaā ní. Ngé kojə ngán gə̄ a ɔjən̄ ngáńdə́ gə̄ kənda kə́ ī-ra dɔ ndūí tə́ kadə̄ gerə̄n̄.

²⁰ Kɔ́ɔ̄ɓē, ḭ̄ ájəm̄. Adə̄ Kɔ́ɔ̄ɓē, j-a j-ugə kənde yājí gə̄ kem kújə yāí tə́ kə dɔ ndɔ̄ gə̄ malang ń j-a jə-ndiń kə kumjí ní.