IJAI 37 - Bibəl ta Sar̄

Ejekias aw̄ oō najə̄ kə́ ta Ijai nge koō ta tə́

¹ Dan ń mban̄g Ejekias oō najə̄ ní anī, rə́yā̰ kūbə̄ kə́ rɔ̄n tə́ ō, əla kūbə̄ kəhɔ ndoō rɔ̄n tə́ ō, ba aw̄ kem kújə yā Kɔ́ɔ̄ɓē tə́.

² Ni-əla Eliakim ń i ngār kə́ dɔ kújə ngol tə́ ní ō, Sebəna nge ndang makətūbə̄ ō, ngé tun̄ yá̰a̰ gə̄ kə́ nin̄ tɔgən̄ tɔȳn̄ madə̄də́ gə̄ ō, ɓē Ijai nge koō ta kə́ ngōn̄ Amots tə́. De gə̄ ngeé ń toō nin̄ o̰ō̰n̄ i kūbə̄ kəhɔ ndoō ō.

³ I kadə̄ nin̄ ədan̄ nge koō ta najə̄ yā Ejekias ń toō: Ɓōólaā i ndɔ̄ wur kɔl yājí, i ndɔ̄ ndéy ō, i ndɔ̄ rɔ̄sɔl̄ ō. De gə̄ ədan̄ na ngōn̄ əndā dɔ rɔ̄n danaá kɔ̄ɔ́ yā teē kem kó̰o̰n tə́, banī tɔ́gə́ kó̰o̰n kə́ yā kojənəń gətóo.

⁴ Mban̄g kə́ Asiri əla ngol áskar yān gə̄ kə́ dɔ madə̄ gə̄ tə́ adə̄ reē tájə̄ Nə́ɓā kə́ ndi kə kumneé. Nə́ngētə́ Kɔ́ɔ̄ɓē Nə́ɓā yāí asə i koō ndū ń ni tájə̄ ní ō, asə i kəndan tām̄ najə̄ kɔrə̄n tə́ ō anī! Ḭ̄ Ijai, ɔ̄r̄ najə̄ kə Kɔ́ɔ̄ɓēé tām̄ yā de gə̄ kə́ dan gír deē yān gə̄ tə́ ń ndin̄ kə kumdə́ ní.

⁵ De gə̄ ń mban̄g əladə́ ní aw̄ əngen̄ Ijai.

⁶ Anī Ijai ədadə́ na: Najə̄ ń Kɔ́ɔ̄ɓē əda toó āw̄ ə́daī kɔ́ɔ̄sí: Ḭ̄ ōō ndū gə̄ ń ngol áskar gə̄ yā mban̄g kə́ Asiri gə̄ tájə̄mə̄n̄ ní. Ī-lōō ɓōĺ yá̰a̰ gə̄ ń nin̄ ədan̄ ní.

⁷ Mban̄g yādə́ a oō najə̄ kógə̄ḿ. Anī m-ā m-ādə̄n gír̄ tél dɔ tə́ kaw̄ kem ɓē yān tə́ ō, nú ní, m-ā m̄-rāā kadə̄ ni a oy yo kaskar ō.

Senakerib əla ɓōĺ kem de gə̄ tə́ ɓáý

⁸ Ngol áskar kə́ dɔ madə̄ gə̄ tə́ ń ni i de kə́ Asiri ní, oō kadə̄ na mban̄g na əya̰ ɓē kə́ Lakis ba na aw̄ kɔ̄ɔ́. Ni-ra a rɔ̄ɔ̄ i ɓē kə́ Libəna. Anī ngol áskar gə̄ ní aw̄ əngen nú.

⁹ Banī mban̄g kə́ Asiri oō kadə̄ Tiraka mban̄g kə́ Kus na a reē na i kə̄ kənīn rɔ̄ɔ̄ tə́. Dan ń Senakerib oō najə̄ ń noō ní, ni-əla de gə̄ ɓáý to̰ rɔ̄ Ejekias,

¹⁰ mban̄g kə́ Juda tə́. Nin̄ ədanən̄ na: Ḭ̄ ə̄ndā kemií dɔ Nə́ɓā tə́ ō, ḭ̄ ī-gír̄ kadə̄ ni a ɔgə̄m̄ taā ɓē kə́ Jerusalem ō. Ī-lōō kəya̰ rɔ̄í kadə̄ ni gólī.

¹¹ Yá̰á̰ ń mban̄g kə́ Asiri gə̄ rāān̄ kə ɓē gə̄ malang ń nin̄ nujənə̄ń kɔ̄ɔ́ ní, ḭ̄ ī-ger̄ majə. Ba ḭ̄, ɔ́jəń na a gāngə̄n̄ dɔí!

¹² Dan ń mban̄g kə́ rang kə́ kété noḿ mā tə́ gə̄ nujən̄ ɓē gə̄ kə́ Gojan ō, Haran ō, Resep ō, Telasar ō, ɓē bo yā Edenitə gə̄ ō ní, nə́ɓā gə̄ yā nápar de gə̄ ń noō gə̄ gāngə̄n̄ dɔdə́ alé.

¹³ Mban̄g gə̄ kə́ Hamat ō, Arpad ō, Lair ō, Separbaim ō, Hena ō, Aba ō ní, nin̄ i rá?

Ndɔ̄ȳ yā Ejekias

¹⁴ Ngámbang kəla gə̄ ń nin̄ i de gə̄ kə́ Asiri ní, makətūbə̄ ń nin̄ reēn̄neé ní, Ejekias taā tə́da. Gō tə́ anī ni-aw̄ kem kújə yā Kɔ́ɔ̄ɓē tə́, ba teē kem makətūbə̄ ní ta kum Kɔ́ɔ̄ɓē tə́.

¹⁵ Kutə̄ gō anī ni-ɔr̄ najə̄ ń toō kə Nə́ɓāá əda na:

¹⁶ Kɔ́ɔ̄ɓē kə́ bo kə́ tɔ́gən i ngá̰ý, Nə́ɓā yā Israel, ḭ̄ ń ī-ndi dɔɔ́ dɔ Serubḛ gə̄ tə́ ní, i īkɔ́ kógə̄ḿ beē ngóy n i Nə́ɓā yā ɓē ko̰o̰ gə̄ malang kə́ dɔ nang tə́. I ḭ̄ n ī-rāā dɔ rā̰ ō dɔ nang ō ní.

¹⁷ Kɔ́ɔ̄ɓē, ī-nēl̄ mbīí ōoń, á̰a̰ā̰ majə. Ōō ndū ń ngámbang kəla yā Senakerib gə̄ tájīn̄ ḭ̄ Nə́ɓā kə́ ī-ndi kə kumií ní!

¹⁸ Kɔ́ɔ̄ɓē, i rɔ̄kum kadə̄ mban̄g gə̄ kə́ Asiri nujən̄ gotə nápar de gə̄ kə́ rang gə̄ ō, nujən̄ ɓē yādə́ gə̄ ō.

¹⁹ Nin̄ ɓōkə́n̄ nə́ɓā yādə́ gə̄ kum hor tə́. Tām̄ nin̄ i nə́ɓā gə̄ alé, banī nin̄ i kāgə̄ kə́ tɔ́sə̄ gə̄, aláa nin̄ i mbal̄ gə̄ kə́ i de gə̄ n rāān̄də́ kə jīdə́.

²⁰ Banī ḭ̄ Kɔ́ɔ̄ɓē Nə́ɓā yājí, ájə́jí ta ko̰o̰ ɓē yā Senakerib tə́! Loo ń noō tə́ ko̰o̰ ɓē gə̄ malang kə́ dɔ nang tə́ a gerə̄n̄, Kɔ́ɔ̄ɓē, kadə̄ i ḭ̄ kógə̄ḿ beē ngóy n i Nə́ɓā ní.

Ijai əda najə̄ ń Kɔ́ɔ̄ɓē tūr̄ əda ní

²¹ Loo ń noō tə́ Ijai kə́ ngōn̄ Amots əla əda Ejekias na: Najə̄ yā Senakerib mban̄g kə́ Asiri ń ɔ̄r̄ kə Kɔ́ɔ̄ɓē Nə́ɓā yā Israel ní, najə̄ ń ni əda ní n toó.

²² Najə̄ ń Kɔ́ɔ̄ɓē əda dɔn tə́ ní n toó: Jerusalem ń i dəyá̰ kə́ mandə ní kídī. Ni mbóo seí. A̰á̰ā̰, Siyo̰ ń i ɓē kə́ mandə ní, wél̄ dɔn kə kəgōó tan tə́ gidií tə́.

²³ Deē ń ī-tájən ní i náā? ī-tájə̄ i náā? I náā n ī-nāā kɔr̄ najə̄ kə́ majaĺ seneé ní? Deē ń á̰a̰n ba ī-kídən ní i náā? I mā, Nə́ɓā kə́ táĺ yā Israel.

²⁴ Mā ń i Kɔ́ɔ̄ɓē ní, ī-tájə̄m̄ kə ta kūl̄ najə̄ kə́ ə̄ndā ta ngé kəla yāí gə̄ tə́. Ḭ̄ ə́da na: Mā Senakerib, m-āl̄ dɔ mbal̄ bo gə̄ tə́ dɔɔ́ kə púsə rɔ̄ɔ̄ yāḿ gə̄ kə́ ngá̰ý, m-āw̄ bátə́ m-ūgə̄ dɔ mbal̄ Liban tə́ dɔɔ́. Kāgə̄ sédər yān gə̄ kə́ majən̄ tɔȳ madə̄ gə̄ ní m̄-tə́gādə́ kɔ̄ɔ́ ō, kāgə̄ sipəres yān gə̄ kə́ majən̄ tɔȳ madə̄ gə̄ ní m̄-tə́gādə́ ō. Mbal̄ bo yān kə́ ngāl̄ tɔȳ madə̄ gə̄ ní, m-āw̄ m-ūgə̄ tū tə́ ō, ku kāgə̄ yān kə́ majə tɔȳ madə̄ gə̄ ní, m-āw̄ m-ūgə̄ tū tə́ ō.

²⁵ Mā m̄-ndēr̄ bəlo man̄ gə̄ ba m-ā̰ȳ man̄ kə́ kemdə́ gə̄ tə́. Man̄ bā gə̄ kə́ Ejiptə tə́ ní, m-ā m̄-rāādə́ kadə̄ a tutən̄, kə ta kūl̄ kəndā njaḿ kem ɓē ń toō tə́!

²⁶ Ní, ḭ̄ Senakerib ī-ger̄ yá̰á̰ ń toō aĺ i mbée a? Yá̰a̰ gə̄ ń a rāān̄ yá̰a̰ toó i mā n m-ə̄ndā dɔdə́ danaá kété jóó ní. m̄-núm̄ yá̰á̰ ń toō i kété, banī ngɔlaā m̄-rāādə́ adə̄ reē udən̄ gíŕ kə́ rɔ̄ tə́. m̄-gḛy kadə̄ ī-rāā ɓē gə̄ ń ngɔ̄mə̄n̄də́ majə ní kadə̄ télən̄ kɔkərɔ kə́ ra dɔ naā tə́ bing gə̄.

²⁷ De kə́ kemeé gə̄ asən̄ rāā yá̰á̰ kógə̄ḿ alé, ɓōĺ rāādə́ ō, rɔ̄də́ sɔl̄də́ ngá̰ý ō. Nin̄ ton̄ tītə̄ mu kə́ bembeé beē, ton̄ tītə̄ ngán mu gə̄ kə́ ton̄ mbōl̄ beé, ton̄ tītə̄ mbī kámbə́ kə́ dūú gə̄ kə́ əɓan̄ dɔ kújú dɔɔ́, banī néĺ kə́ dūn̄ ɓē tə́ rāādə́ adə̄ tutən̄ kɔ̄ɔ́ beē.

²⁸ m̄-ger̄ najə̄ yāí malang: Dan ń ā ḭ́ḭ kə̄ dɔɔ́, aláa dan ń ā ī-ndi kə̄ nang tə́ ní, dan ń ā ī-teē kə̄ ndágá aláa dan ń ā údə kə̄ kújú ní, dan ń wōn̄g a rāāī dɔḿ tə́ ní.

²⁹ A̰á̰ā̰ wōn̄g rāāī dɔḿ tə́, najə̄ kə́ ɔjə kadə̄ ī-kídə̄m̄ ń ɔ̄r̄ ní m-ōō. I tām̄ najə̄ ń toō tə́ n m-ā m-ə́la gində̄ kə́ ta rugə kóní tə́ ō, m-ā m-ə́lá sáā gində̄ kógə̄ḿ mbo̰ō̰ ngāngīí kə́ dɔɔ́ gə̄ tə́ kə ngāngīí kə́ nang tə́ gə̄ tə́ ō ní. M-ā m̄-tél yā kaw̄ sesí gogə́ ɓēé kə róbə́ ń úń á ī-reēń laā ní.

³⁰ Ba ḭ̄ Ejekias, m-ā m-ādī yá̰a̰ kɔjə yá̰á̰ kógə̄ḿ: Kōnīí laā á ə́saī gémē kə́ əɓa dɔ rɔ̄n. Kem ɓāl̄ ń a reē tə́ noō, i tītə̄ ń noō ɓáý. Banī kem ɓāl̄ kə́ gidə nge ń a reē tə́ noō ní, ā ásiī dubə̄ gémē yāsí ō, kəja gémē yāsí ō, ā ásiī kəndā kāgə̄ nduú gə̄ ō, kəsa kan̄də́ gə̄ ō.

³¹ Ngé kə́ kem ɓē ko̰o̰ yā Juda tə́ gə̄ ń a ndin̄ kə kumdə́ ní, a ton̄ tītə̄ ngōn̄ kāgə̄ beé. Nin̄ a télən̄ ngəradə́ kə́ kijə gə̄ gíŕ nángāá, ta jī gə̄ a anə̄n̄.

³² A̰á̰ā̰, gotə de gə̄ ń na̰yn̄ ní a teēn̄ Jerusalem. Ngé gə̄ ń ndin̄ kə kumdə́ ɓáý ní, a ran̄ kə njadə́ dɔɔ́ dɔ mbal̄ Siyo̰ tə́. Yá̰á̰ ń Kɔ́ɔ̄ɓē kə́ bo kə́ tɔ́gən i ngá̰ý a rāā tām̄ tár yān kə́ təngā tə́ ní n noó.

³³ Ijai əda ɓáý to̰ na: Ba ń toō ɓáa, najə̄ ń ni-əda dɔ mban̄g kə́ Asiri tə́ ní n toó: Ni a udə kem ɓē ń toō tə́ alé, kum gərā kógə̄ḿ gə̄gē ni a ur kemeé alé. Ni a rāā rɔ̄n alé. Ni a déw gidə der yān gə̄ tə́ yā kənīnəń rɔ̄ɔ̄ alé.

³⁴ Ni a tél yā kaw̄ gogə́ i kə róbə́ ń ni un á reēń laā ní. Ni a udə kem ɓē kə́ Jerusalem tə́ alé. I najə̄ ń mā Kɔ́ɔ̄ɓē m-ə́dá ní n noó.

³⁵ M-ā m̄-ngɔ̄m̄ ɓē ń toō ō, m-ā m-ájən ō. M-ā -m̄-rāā yá̰á̰ ń noō i tɔdɔ̄ mā i Nə́ɓā ō, m̄-rā dɔ ndūḿ tə́ kə nge kəla yāḿ Dabid ō.

Asiri gə̄ aw̄n̄, Senakerib oy

³⁶ De kə́ dɔ rā̰ tə́ yā Kɔ́ɔ̄ɓē ugə̄ gérger yā Asiri gə̄ tə́, ba rāā adə̄ de gə̄ dūbú kə kutə sɔ́sɔ́ kə kalən kə́ mí oyn̄. Teē dəloí kə ndɔ̄ kə́ noō anī, áskar gə̄ teēn̄ dɔ de kə́ koy gə̄ ń noō tə́ malang.

³⁷ Anī Senakerib mban̄g kə́ Asiri adə̄ de gə̄ tútən̄ kújə tandā gə̄ kɔ̄ɔ́. Ni-tél aw̄ gogə́ Ninibə ō, ndi kem ɓē ngeé ń noō tə́ ō.

³⁸ Ndɔ̄ kógə̄ḿ tə́ ni-ra a ndɔ̄ȳ kem kújə yā Nisrok ń i nə́ɓā yān ní tə́, anī ngánən kə́ dəngam gə̄ jōó, Adəramelek nin̄ kə Sareser, tɔ̄l̄nən̄ ba a̰ȳ aw̄n̄ dɔ nang kə́ Ararat tə́. Ngōnən kə́ dəngam kə́ rang ń rīn na i Asaradon ní, ndi mban̄g gotən tə́.