IJAI 36 - Bibəl ta Sar̄

Mban̄g kə́ Asiri əla ɓōĺ kem ɓē kə́ Jerusalem tə́

¹ Kem ɓāl̄ ko̰o̰ ɓē kə́ nge ko̰ kutə gidə i sɔ́ yā Ejekias tə́ ní, Senakerib mban̄g kə́ Asiri reē ənī rɔ̄ɔ̄ ɓē kə́ ngan̄g ngan̄g gə̄ malang kə́ kem ɓē ko̰o̰ kə́ Juda tə́ ba táā.

² Dan ngeé ń noō tə́ ní mban̄g kə́ Asiri ndi i Lakis. Ni-əla ngol áskar yān gə̄ kə́ dɔ madə̄ gə̄ tə́ rɔ̄ Ejekias tə́ Jerusalem kə ɓūtə̄ ngé rɔ̄ɔ̄ gə̄ kə́ ngá̰ý. Ngol áskar gə̄ ní ra kadə bəlo ń ndērə̄n̄ kə ngālāá kadə̄ man̄ kə́ loo kə́ kḭḭ kə̄ dɔɔ́ tə́ mān̄ kemeé ní tə́, dɔ róbə́ kə́ kaw̄ kə̄ ndɔr̄ yā ngé rāā kəla kūbə̄ gə̄ tə́.

³ Anī, Eliakim ngōn̄ Hilkia ń i ngār kem ndogə̄ yā mban̄g ní ō, Sebəna nge ndang makətūbə̄ ō, Yoa kə́ ngōn̄ Asap ń i kɔdə̄ mbēr̄ ní ō n teē aw̄n̄ rɔ̄n tə́ ní.

⁴ Ngol ngé kadə̄ mban̄g yá̰a̰ ka̰ȳ ədadə́ na: Āw̄ ə́daī Ejekias na mban̄g kə́ bo ń i mban̄g kə́ Asiri ní, əda na: Yá̰á̰ ń ə̄ndā kemií dɔ tə́ á ī-ndiń ní i rí?

⁵ Ḭ̄ ə́da na i najə̄ kə́ taí tə́ ngóy n ā ə́ngeń kajə ō tɔ́gə ō loo rɔ̄ɔ̄ tə́! Ə̄ndā kemií i dɔ náā tə́ n ī-mbātə́nń koō najə̄ taḿ tə́ ní?

⁶ I dɔ ɓē kə́ Ejiptə tə́ a? Ə̄ndā kemií i dɔ tə̄ɓā kə́ tetə kɔ̄ɔ́ ń a sēr̄ jī náā nəkɔ́ ń a ndə̄nā rɔ̄n tū tə́ ní tə́ a? Parao̰ mban̄g kə́ Ejiptə i tītə̄ ń noō kə de gə̄ malang ń a əndān̄ kemdə́ dɔn tə́ ní.

⁷ Majanī ā ī-tūr̄ yā kədam̄ na: J-əndā tɔ́gə́jí i dɔ Kɔ́ɔ̄ɓē Nə́ɓā yājí tə́. Tá i ḭ̄ Ejekias n ī-rāā adə̄ loo ndɔ̄ȳ yān gə̄ ō, loo tun̄ yá̰a̰ yān gə̄ ō gətóon̄ kɔ̄ɔ́ ní. Ba ə́da de kə́ Juda gə̄ ō, kə́ Jerusalem gə̄ ō kadə̄ ndɔ̄ȳn̄ Kɔ́ɔ̄ɓē i ta loo tun̄ yá̰á̰ kə́ kem ɓē ń toō tə́ ngóy.

⁸ Beé ɓáa ī-tɔ́sī gātə̄ naā kə kɔ́ɔ̄ḿ mban̄g kə́ Asiri: Ré ḭ̄ Ejekias ásə kənge ngé kal̄ sə́nda gə̄ dūbú jōó anī, m-ā m-ādī sə́nda dūbú jōó kadə̄ alə̄n̄.

⁹ Ḭ̄ ń ə̄ndā kemií dɔ kənge púsə rɔ̄ɔ̄ gə̄ ō sə́nda gə̄ ō jī ɓē kə́ Ejiptə tə́ ní, ā ásə rāā kadə̄ kógə̄ḿ dan ngol áskar gə̄ yā kɔ́ɔ̄ḿ tə́ tél kə̄ gogə́ i ba̰ý? Ká i ngol áskar gə̄ kə́ dūú gə̄gē a tél kə̄ gogə́ i ba̰ý?

¹⁰ m̄-reē rɔ̄ɔ̄ ɓē ń toō tə́ yā nujəń kɔ̄ɔ́ i kanjə̄ kadə̄ Kɔ́ɔ̄ɓē ndigə gōḿ tə́ a? I Kɔ́ɔ̄ɓē n ədam̄ na kə m̄-reē kə m̄-rɔ̄ɔ̄ ɓē ń toō, ba kə m̄-nujəń sák sák kɔ̄ɔ́ ní!

¹¹ Eliakim ngōn̄ Hilkia ō Sebəna ō Yoa ō ədan̄ ngol nge kɔsə kíl Senakerib na: Ɔ̄r̄ najə̄ sejí jḭḭ ngé kəla yāí gēé kə ta Aram, tɔdɔ̄ jə-ger̄ ta Aram. Ba ī-lōō kɔr̄ najə̄ sejí kə ta Hebəroó ta mbī ngán Israel gə̄ ń ran̄ dɔ ndogə̄ mbal̄ yā ɓē tə́ ní.

¹² Ngol nge kɔsə kíl Senakerib tél ədadə́ na: Najə̄ ń kɔ́ɔ̄ḿ əlam̄ kɔrɔ́ ní i tām̄ yā kɔ́ɔ̄sí tə́ ō, tām̄ yāsí sḭḭ̄ tə́ ō ngóy a? I tām̄ yā de gə̄ malang ń ran̄ dɔ ndogə̄ mbal̄ tə́ noō ō, nin̄ ń a əsan̄ yedə̄də́ tītə̄ yāsí ō, a a̰ȳn̄ ngédə̄ māńdə́ tītə̄ yāsí ō ní!

¹³ Gō tə́ anī ngol ngé kadə̄ mban̄g yá̰a̰ ka̰ȳ ra dɔɔ́ ba əga kɔŕ əda kə ta Hebəroó na: Ōōī najə̄ ń mban̄g kə́ bo ń i mban̄g kə́ Asiri əda ní!

¹⁴ Mban̄g əda na kə ī-lōōī kadə̄ Ejekias gól̄sí. Ni a asə gān̄g dɔsí alé.

¹⁵ Ni ədasí na kə ə̄nī kemsí ādī Kɔ́ɔ̄ɓē na Kɔ́ɔ̄ɓē a gān̄g dɔsí rɔ̄kum. Ni-əda na, rɔ̄kum ɓē ń toō a əsō kem jī mban̄g kə́ Asiri tə́ alé.

¹⁶ Ī-lōōī koō najə̄ kɔr̄ Ejekias, banī ōōī najə̄ ń mban̄g kə́ Asiri ɔr̄ sesí ní, ni-əda na: Ī-téĺ ə̄ndāī najə̄ naā tə́ seḿ, ə́ya̰ī rɔ̄sí kem jīḿ tə́. Loo ń noō tə́ sḭḭ̄ kógə̄ḿ kógə̄ḿ ā ə́saī kan̄ kāgə̄ nduú yāsí gə̄ ō, ā ā̰yī man̄ kə́ kem bəlo taā man̄ ndī yāsí gə̄ tə́ ō.

¹⁷ Gō tə́ anī m-ā m̄-tél yā reē kɔysí kaw̄ sesí dɔ nang kə́ to tītə̄ yāsí tə́ beē, i dɔ nang kə́ gémē i tū tə́ ō, kāgə̄ nduú i tū tə́ ō, i dɔ nang kə́ adə̄ deē mápa ō, kasə kan̄ kāgə̄ nduú ō.

¹⁸ Ī-lōōī kadə̄ Ejekias gól̄sí dan ń ədasí na Kɔ́ɔ̄ɓē na a gān̄g dɔsí ní. Nə́ɓā gə̄ ń i ɓesə̄ yā nápar de kə́ rang gə̄ ní ɔgə̄mə̄n̄ taā ɓē yādə́ a?

¹⁹ Nə́ɓā gə̄ yā ɓē kə́ Hamat ō, yā ɓē kə́ Arpad ō, rāān̄ i rí? Tá nə́ɓā gə̄ yā ɓē kə́ Separbaim nin̄ rāān̄ i rí? Nin̄ ɔgə̄mə̄n̄ taā ɓē kə́ Samari a?

²⁰ Dan nə́ɓā gə̄ malang yā ɓē gə̄ ń noō tə́ ní, i nge kə́ rá kə́ dandə́ tə́ n taā ɓē yān jīḿ tə́ ní? Ní, Kɔ́ɔ̄ɓē asə kɔgə̄m̄ taā ɓē kə́ Jerusalem a?

²¹ De gə̄ malang ń ran̄ noó ní, ran̄ i kə tadə́ kə́ mbóó, deē ədadə́ yá̰á̰ kógə̄ḿ alé. Tām̄ mban̄g Ejekias ədadə́ na kə deē kə əda najə̄ alé.

²² Gō yá̰á̰ ń noō tə́ anī, Eliakim kə́ ngōn̄ Hilkia ń i ngār kə́ dɔ kújə ngol yā mban̄g tə́ ní ō, Sebəna nge ndang makətūbə̄ ō, Yoa kə́ ngōn̄ Asap ń i ngōmbang kəla yā mban̄g ní ō, rə́yā̰n̄ kūbə̄ yādə́ gə̄. Nin̄ tél reēn̄ rɔ̄ Ejekias tə́ ba ɔjənən̄ gotə najə̄ ń ngol áskar gə̄ kə́ dɔ madə̄ gə̄ tə́ ń i de kə́ Asiri ní əda ní.