IJAI 34 - Bibəl ta Sar̄

Kɔ́ɔ̄ɓē rāā sarya kə Edom gə̄

¹ Sḭḭ̄ nápar de gə̄, ī-ndɔ́tī kə̄ ngɔr ōōiń najə̄, sḭḭ̄ de kə́ kem ɓēé gə̄, ī-nēlī mbīsí! Ādə̄ dɔ nang kə yá̰a̰ malang kə́ tū tə́ oō najə̄! Ādə̄ dɔ rā̰ ō dɔ nang ō, yá̰a̰ malang kə́ teē tū tə́ ō oōn̄ najə̄!

² Wōn̄g rāā Kɔ́ɔ̄ɓē kə nápar de gə̄ malang, wōn̄g rāān kə ɓūtə̄ yādə́ malang. Ni gḛy nujə sedə́ kɔ̄ɔ́ malang. Ni-aw̄ sedə́ loo tɔ̄l̄də́ tə́.

³ Nīń de gə̄ yādə́ gə̄ taā loo dɔ nang tə́, rɔ̄ de gə̄ yādə́ gə̄ otə ndum, mósə́də́ a̰ȳ dɔ mbal̄ bo gə̄ tə́ tītə̄ man̄ dɔ mbal̄ beé.

⁴ Ɓūtə̄ tə́yō̰ gə̄ malang tə́sōn̄, gájə́də́ gə̄ i dūbú. Dɔ rā̰ ɓír̄ rɔ̄n gidə naā tə́ tītə̄ makətūbə̄ beé. Yá̰á̰ kə́ dɔ rā̰ tə́ gə̄ malang urə̄n̄ tītə̄ mbī kāgə̄ nduú aláa mbī kāgə̄ kótə̄ kə́ tutə beé.

⁵ Dɔ rā̰ tə́ ní mósə i gidə kaskar yā Kɔ́ɔ̄ɓē tə́ malang. Kaskar ní əsō dɔ Edom gə̄ tə́, əsō dɔ gír de gə̄ ń ni gḛy nujə sedə́ kɔ̄ɔ́ malang tə́ ní.

⁶ Kaskar yā Kɔ́ɔ̄ɓē i mósə malang, mból dā̰ i gidə tə́ malang. To i tītə̄ mósə́ ngán batə̄ gə̄ kə mósə bal bə̄yā̰ gə̄ beé. To i tītə̄ mból bal batə̄ gə̄ kə́ gidə mənjodə́ gə̄ tə́ beē. Kɔ́ɔ̄ɓē əndā dɔ yá̰a̰ tun̄ kógə̄ḿ kem ɓē kə́ Bosra tə́, ɓē kə́ Bosra ń i ɓē bo ní tə́. I nujə loo kə́ to ɓōĺ ngá̰ý kə́ dɔ nang kə́ Edom tə́.

⁷ Dɔgə gə̄, kə man̄g kə́ bəra gə̄ ō, kə man̄g gə̄ ō əsōn̄ ndɔ̄ naā tə́. Mósə taā loo dɔ nang tə́ ō, mból dā̰ taā loo dɔ nang tə́ ō.

⁸ I ndɔ̄ ń Kɔ́ɔ̄ɓē a daləń ba̰ā̰ dɔ dɔ Edom gə̄ tə́ ní, i ɓāl̄ ń nge rɔ̄ɔ̄ dɔ ɓē kə́ Siyo̰ tə́ a dəjeńdə́ gíŕ yá̰a̰ rāādə́ gə̄ ní.

⁹ Man̄ dɔ mbal̄ gə̄ kə́ dɔ nang kə́ Edom tə́ a télən̄ bā gudəro̰ gə̄, nang kə́ Edom a tél bursu kə́ təngā. Ɓē ngeé ń toō a to tītə̄ gudəro̰ kə́ o̰o̰ hor beé.

¹⁰ Hor ní a oy ndɔ̄ɔ́ aĺ ō, kadaá aĺ ō. Sa hor kə́ dan gān̄g aĺ a ḭḭ kum kə̄ dɔ rā̰ tə́. Ɓē ngeé ń toō a tél dəla loo i kə́ njɔ́ḿ gə̄ tə́, deē a mān̄ noó to̰ alé.

¹¹ Kɔȳ múu gə̄ ō, kɔȳ mbə́rām̄jóo ō a ndin̄ kemeé, kɔȳ kōrōrōý ō, ká̰ā̰ ō, a rāān̄ ɓē kemeé. Kɔ́ɔ̄ɓē a nujə ɓē, adə̄ a to i tītə̄ loo kə́ ndágə doy keē ndi tū tə́ alé.

¹² De kə́ bo gə̄ kə́ yā kadə̄ nin̄ gə̄rān̄ mban̄g a gətóon̄, ngār gə̄ a oyn̄ malang kɔ̄ɔ́.

¹³ Túpə̄ kōn̄ gə̄ a əɓan̄ kem kújə ngol gə̄ tə́, mu kə́ majaĺ gə̄ ō, ngar̄ gə̄ ō, a taān̄ loo dɔ ndogə̄ mbal̄ gə̄ kə́ yā rɔ̄ɔń dɔ ɓē tə́ kɔ̄ɔ́. Tal̄ gə̄ a rāān̄ ɓē loo ń noō tə́ ō, burum gə̄ a ndin̄ tū tə́ ō.

¹⁴ Məla bembə gə̄ a ndɔ̄də̄n̄ ɓon̄g gə̄, bal bə̄yā̰ gə̄ a əngen̄ naā loo ń nuū tə́. Lilitə ń i ndíĺ kə́ majaĺ kə́ ndɔ̄ɔ́ ní, a ndi i loo ń noō tə́ ō, a ɔr̄ koō i loo ń noō tə́ ō.

¹⁵ Lī a rāā ɓē yān i loo ń noō tə́, ni a ɓōkə́ kaan gə̄ ō, a ɔbə̄ kaan gə̄ ní bátə́ kadə̄ tɔ̄ɔ̄n̄ ngán gə̄ ō. Māl̄ gə̄ a kánə̄n̄ naā i loo ń noō tə́.

¹⁶ Ré ī-sāāī kem makətūbə̄ yā Kɔ́ɔ̄ɓē tə́ anī, ā ásiī tə́da najə̄ gə̄ ń toō: Dā̰ gə̄ ngeé ń toō ní, nge kógə̄ḿ kə́ na̰y kɔ̄ɔ́ gətóo. I Kɔ́ɔ̄ɓē n i nge kədadə́ yá̰á̰ kə́ kadə̄ rāān̄ ní, i Ndílən n ɔsə dɔdə́ naā tə́ ní.

¹⁷ Núsən gə̄ kə́ tām̄ yādə́ gə̄ tə́ kógə̄ḿ kógə̄ḿ ní, i wə̄lā ń ni túgə̄ ní n əhɔ adə̄də́ ní. Ni un kəlā yān yā mbɔ̄jə́nń núsə dɔ nang gə̄ kə́ tām̄ yādə́ gə̄ tə́ kem ɓēé. Nin̄ a əngen̄ núsə dɔ nang gə̄ ní tām̄ yādə́ tə́ i kə́ njɔ́ḿ gə̄ tə́. Nin̄ a ndin̄ loo ní tə́ i kə dɔ gír kojə yādə́ gēé.