IJAI 33 - Bibəl ta Sar̄

Yá̰á̰ kə́ to kum kaȳ aĺ a teē dɔ nge nujə loo tə́!

¹ Ḭ̄ ń ī-nujə yá̰a̰ malang banī nujiīn̄ aĺ ní, yá̰á̰ kə́ to kum kaȳ aĺ a teē dɔí tə́! Ḭ̄ ń ī-teē kə gír madí gēé dɔɔ́ banī teēn̄ kə gírí ḭ̄ḭ́ dɔɔ́ aĺ ní, yá̰á̰ kə́ to kum kaȳ aĺ a teē dɔí tə́! Dan ń ā ī-nujə loo oy anī, a nujən̄ seí kɔ̄ɔ́ ō. Dan ń ā ī-teē kə gír madí gēé dɔɔ́ oy anī, a teēn̄ kə gírí dɔɔ́ ō.

² Kɔ́ɔ̄ɓē, ādə̄ kumií o̰ō̰ī tām̄ yājí tə́! J-ənī kemjí mámák j-adī. Ādə̄ dəloí kə ndɔ̄ gə̄ ḭ̄ i tɔ́gə́jí ō, ḭ̄ i nge kajəjí kum mbang yā wur kɔl tə́ ō.

³ Dan ń gír de gə̄ oōn̄ ndūí anī, a̰ȳn̄ naā. Dan nəkɔ́ ń ḭ̄ ḭ́ḭ dɔɔ́ anī, nápar de gə̄ aw̄n̄ kə̄ loo gə̄ tə́.

⁴ Loo ń noō tə́ kɔy yá̰a̰ kənge dɔ gúú tə́ əla gír. De gə̄ ton̄ tītə̄ yim̄ gə̄ beé. De gə̄ urən̄ naā kə̄ dɔ yá̰a̰ kənge gə̄ tə́ tītə̄ yim̄ gə̄ kə́ ton̄ tītə̄ kil̄ man̄ beé.

⁵ Kɔ́ɔ̄ɓē bo tɔȳ yá̰a̰ malang, tɔdɔ̄ ni-ndi i loo kógə̄ḿ kə́ ḭḭ kə̄ dɔɔ́ tə́. Ɓōĺ gidə yá̰á̰ kə́ súmūú ō, yá̰a̰ rāā kə́ gōtə́ ō ní, ni-əndā ngəran i Jerusalem.

⁶ Ba sḭḭ̄ gír de gə̄ yā Kɔ́ɔ̄ɓē, ā ásiī ndi kanjə̄ sōl̄ yá̰á̰ kógə̄ḿ. Kum kedə̄ ō, yá̰a̰ ger̄ ō, rāān̄ rɔ̄də́ i yá̰a̰ kənge kə́ ajə deē tə́. Ɓōĺ ndíĺ Kɔ́ɔ̄ɓē i yá̰a̰ kənge yāí kə́ gātə̄n i ngá̰ý!

Kɔ́ɔ̄ɓē udə dan yá̰á̰ kə́ rāā yá̰á̰ tə́ yā tūr̄ yá̰a̰

⁷ Á̰a̰ī, de kə́ Ariel gə̄ əgan̄ kɔŕ kum róbə kɔsə gə̄ tə́. Ngé kaw̄ kəla kə́ tām̄ yā kem sɔl̄ lɔm tə́ gə̄ nōōn̄ kə wur katāá.

⁸ Deē gətóo róbó ō, deē un kə̄lá róbə aĺ ō. Ndūdə́ ń ənīn̄ adə̄n̄ naā ní ran̄ dɔ tə́ aĺ ō, mbātə́n̄ najə̄ kɔr̄ de kə́ kum tə́ gə̄ kɔ̄ɔ́ ō, kídə̄n̄ de gə̄ malang ō.

⁹ Ɓē əhɔ ndoō ō, tutə kɔ̄ɔ́ ō. Mbal̄ bo gə̄ kə́ Liban ń əlan̄ rɔ̄sɔl̄ dɔdə́ tə́ ngá̰ý ní, tutən̄ malang kɔ̄ɔ́. Ndágə mbō kə́ Saro̰ tə́ to i tītə̄ dəla loo beé. Kāgə̄ gə̄ gətóon̄ kɔ̄ɔ́ dɔ mbal̄ gə̄ kə́ Basan tə́ ō, dɔ mbal̄ gə̄ kə́ Karmel tə́ ō.

¹⁰ Kɔ́ɔ̄ɓē əda na: Ngɔlaā ní, m ā m̄-rāā yá̰a̰, ngɔlaā ní, m ā m-ḭ́ḭ dɔɔ́, m ā m-ɔ́jə bo yāḿ kadə̄ a̰a̰n̄.

¹¹ Yá̰a̰ gə̄ ń sḭḭ̄ ī-sāā-i rāā ní, i mu kə́ tutə gə̄ ngóy. Dan ń yá̰a̰ gə̄ ní reē udən̄ gíŕ kə́ rɔ̄ tə́ anī, yá̰a̰ gə̄ ní i mu karī. Koōsí sḭḭ̄ kɔ́ gə̄ a nujəsí tītə̄ hor beé.

¹² Gotə gír de kə́ rang gə̄ ní hor a o̰o̰də́ ō, nin̄ a télən̄ bū ō. A ɓōkə́n̄də́ horoó tītə̄ ta jī kōn̄ kə́ tə́gā kɔ̄ɔ́ beē.

¹³ Sḭḭ̄ ń ī-ndiī sa̰y ní, ōōī yá̰á̰ ń m̄-rāā ní. Ba sḭḭ̄ ń ndiī ngɔr̄ ní, á̰a̰ ī-gerī kadə̄ i tɔ́gə́ḿ.

¹⁴ Kem ɓē kə́ Siyo̰ tə́ ní, de gə̄ ń najə̄ əhɔdə́ ní, ndíĺdə́ a̰ȳ ō, ɓōĺ rāā de kə́ majaĺ gə̄ adə̄ nin̄ ndewn̄ ō. Nin̄ dəjen̄ najə̄ ədan̄ na: I náā kə́ danjí tə́ n asə ra kadə hor kə́ a o̰o̰ ń toō tə́ ní? I náā kə́ danjí tə́ n asə ra kadə ta ndo̰ hor kə́ a oy aĺ ń toō tə́ ní?

¹⁵ I de kə́ nge rāā yá̰á̰ kə́ gōtə́ ō, kəda najə̄ kə́ rɔ̄kum ō. Hál deē ní n toó: Ni-mbātə́ yá̰á̰ kə́ kənge kə ta kūl̄ yá̰á̰ kə́ rāā kə dɔ́nɔ́ ō, ni mbəre ngé kadən yá̰a̰ karī yā mangnəń gə̄ kə̄ gogə́ ō. Dan ń a ɔrə̄n̄ najə̄ tɔ̄l̄ deē anī, ni utə̄ mbīn kɔ̄ɔ́. Ni utə̄ kumən kɔ̄ɔ́ yā ka̰a̰ń yá̰á̰ kə́ majaĺ alé.

¹⁶ Deē ngeé ń toō a ndi loo kə́ kḭḭ kə̄ dɔɔ́ tə́ kanjə̄ sōl̄ yá̰á̰ kógə̄ḿ. Mbo̰ō̰ mbal̄ kə́ njar i loo ɓɔ̄ɔ̄ rɔ̄ yān. Ngáńdáńg ni a ənge yá̰á̰ kə́ yā kəsa ō, ni a ənge man̄ kə́ yā ka̰ȳ ō.

Gāngə̄n̄ dɔ Jerusalem

¹⁷ Ā ásə ka̰a̰ majə mban̄g malang ō, ā á̰a̰ ɓē kə taá malang ō.

¹⁸ Yá̰á̰ ń kété a̰ȳ ndílí ní ā ī-gír̄ yá̰a̰ dɔ tə́ ō, ā ī-dəje rɔ̄í najə̄ ō, ā ə́da na: De gə̄ ń kété a əndān̄ ma̰ȳ lambóo a a̰a̰n̄ ké i gōtə́ wa ō, a tə́dan̄ lambóo gə̄ ō ní nin̄ i rá? Ngé gə̄ ń kété a əndān̄ kumdə́ gír ndogə̄ mbal̄ gə̄ kə́ yā rɔ̄ɔń dɔ ɓē tə́ ní nin̄ i rá?

¹⁹ Gír de kə́ ngé kɔjə rɔ̄də́ gə̄ ń toō ā á̰á̰də́ to̰ alé, de gə̄ ń noō ń i ngé kɔr̄ ta kə́ loo ger̄ kum ngan̄g ngá̰ý ní, ta tə̄rā kə́ de kə́ ger̄ kum gətóo.

²⁰ Á̰a̰ ɓē kə́ Jerusalem, á̰a̰ ɓē kə́ Siyo̰, ɓē rāā pétə yājí gə̄. Ni a to ta kumií tə́ i tītə̄ loo kə́ deē ndi tū tə́ anī a sōl̄ yá̰á̰ kógə̄ḿ alé beé, i tītə̄ kújə tandā kə́ deē a ndɔ́təń to̰ alé beé. Deē a ró̰ȳ kāgə̄ njan gə̄ kə́ kənda nang tə́ aĺ i kə́ bátə́ gə̄ tə́, deē a tútə kəlān gə̄ aĺ bátə́.

²¹ Kɔ́ɔ̄ɓē a ɔjə kadə̄ ni i de kə́ majə ngá̰ý i loo ń noō tə́. Ndɔ̄ń tə́ ɓáa loo ní i gō nang yā bā kə́ bo gə̄ ō, i loo kə́ ndērə̄n̄ bəlo kə́ laa kə́ ra kə ngālāá gə̄ tū tə́ kadə̄ man̄ mānəń. Too kə́ yā rɔ̄ɔń gə̄ a mānə̄n̄ tū tə́ alé. Too bo gə̄ a əndan̄ danən yā gān̄g alé.

²² Kɔ́ɔ̄ɓē i ngār yājí, i ni n i nge kɔrjí ta róbə́ ní. Kɔ́ɔ̄ɓē i mban̄g yājí, i ni n i nge kajəjí ní.

²³ Kəlā yā madə̄ ba̰ā̰ gə̄ i kə́ əhɔ naā ngan̄g alé, kəlā gə̄ ní əhɔn̄ kāgə̄ ngaadanən ń udən̄ kem to boó ní to̰ alé. Deē asə ndɔ́r̄ kūbə̄ nēl̄ to kadə̄ aw̄ dɔɔ́ to̰ alé. I tām̄ najə̄ ń toō tə́ n a kēgə̄n̄ naā yá̰a̰ kənge kə́ ngá̰ý ní. Ngé nja motə gə̄gē a ɔyn̄ yá̰a̰ kənge dɔ gúú tə́ ō.

²⁴ De kógə̄ḿ kə́ Jerusalem kə́ yā kəda na mā i mo̰y ní gətóo. Gír de kə́ kem ɓēé ń toō tə́ gə̄ a əngen̄ mā̰ȳ rɔ̄ tām̄ yá̰a̰ rāādə́ kə́ gōtə́ aĺ gə̄ tə́.