IJAI 32 - Bibəl ta Sar̄

Mban̄g kógə̄ḿ kə́ nge rāā majə kə deé

¹ Mbang kógə̄ḿ kə́ a o̰o̰ ɓē i kə yá̰a̰ rāā kə́ gōtə́ a ndi. Ngār gə̄ a ɔrən̄ de gə̄ ta róbə i kə ɓōĺ gidə yá̰á̰ kə́ súmūú.

² Nin̄ kógə̄ḿ kógə̄ḿ a ton̄ i tītə̄ loo kə́ deē a ɓɔ̄ɔ̄ rɔ̄n tū tə́ tām̄ yā néĺ tə́ beē, a ton̄ i tītə̄ loo kə́ deē a ɓɔ̄ɔ̄ rɔ̄n tū tə́ tām̄ yā man̄ kə́ a edə tə́ beē, a ton̄ i tītə̄ man̄ kə́ a nūgə́ dəla loo tə́ beē, a ton̄ i tītə̄ ndíl mbal̄ kə́ bo kə́ kem ɓē kə́ loo təngā tū tə́ beē.

³ Ngé gə̄ ń majə kadə̄ a̰a̰n̄ loo ní, a utə̄n̄ kumdə́ to̰ alé, ngé gə̄ ń majə kadə̄ oon̄ loo ní, mbīdə́ a oō loo majə.

⁴ De kə́ ngé rāā yá̰a̰ kanjə̄ gíŕ yá̰a̰ gə̄ a gírə̄n̄ yá̰a̰ yā ger̄ kum yá̰a̰ ō, ngé gə̄ ń kɔr̄ najə̄ tōr̄ rɔ̄də́ ní, a ɔrə̄n̄ najə̄ kanjə̄ kadə̄ tōr̄ rɔ̄də́ ō, najə̄ ń ɔrə̄n̄ ní kumən a unjə̄ ō.

⁵ A ədan̄ de kə́ sapə gə̄ na majə kadə̄ deē ɓōĺ gidəsí to̰ alé. A ədan̄ ngé gól̄ madə̄də́ gə̄ na sḭḭ̄ i de kə́ ngáā gə̄ to̰ alé.

⁶ Tām̄ de kə́ sapə gə̄ a ɔrə̄n̄ i najə̄ kə́ kumən gətóo gə̄. Yá̰á̰ ń nin̄ a gírə̄n̄ ní, i rāā yá̰á̰ kə́ majaĺ ngóy ō, a rāān̄ i yá̰á̰ kə́ majə ka̰ā̰ aĺ ngá̰ý gə̄ ō, a tájə̄n̄ i Kɔ́ɔ̄ɓē ō. Deē ń ɓō rāān ní, nin̄ adə̄nən̄ yá̰a̰ kəsa aĺ ō, deē ń kəndā man̄ rāān ní, nin̄ adə̄nən̄ man̄ ka̰ȳ aĺ ō.

⁷ Ngé gól̄ madə̄də́ gə̄ rāān̄ i yá̰á̰ kə́ tōr̄ ngá̰ý. Nin̄ númə̄n̄ rāā yá̰á̰ kə́ majaĺ gə̄ yā nujəń ngé ndoō gə̄ kə ta kūl̄ najə̄ kə́ sor̄ gə̄. Tá ngé ndoō gə̄ ngeé ń toō ní, a dəjen̄ i yá̰a̰ yādə́ kə́ sɔɔ̄də́ ngóy.

⁸ Banī de kə́ majə ɓōĺ ndíĺdə́ gə̄ ní, i yá̰á̰ kə́ súmūú gə̄ ngóy n nin̄ sāān̄ rāā ní ō, nin̄ a rāān̄ i yá̰á̰ kə́ ngáā gə̄ ō.

Tāān̄ dəyá̰ kə́ Jerusalem gə̄

⁹ Sḭḭ̄ dəyá̰ gə̄ ń ɔ́jiīń na yá̰a̰ na a rāāsí aĺ ní, ḭ́ḭḭ̄ dɔɔ́ ba ōōī najə̄ yāḿ! Sḭḭ̄ ngáń kə́ dəyá̰ gə̄ ń ī-taāī kem rɔ̄sí mámák ní, ōōī najə̄ kɔrə̄ḿ gə̄!

¹⁰ Na̰y i ɓāl̄ kógə̄ḿ kə ndɔ̄ gə̄ kóndóńg wań dɔ tə́, yā kadə̄ sḭḭ̄ ń ī-taāī kem rɔ̄sí mámák ní, ā ī-ndiī kə sōlōó. Kan̄ nduú kə́ yā kəja a gətóo, kōō kə́ yā sāā a gətóo.

¹¹ Sḭḭ̄ dəyá̰ gə̄ ń ɔ́jiīń na yá̰a̰ na a rāāsí aĺ ní, ī-ndewiī! Sḭḭ̄ ń ī-taāī kem rɔ̄sí mámák ní, ī-ndiī kə sōlōó! Ī-ró̰yī kūbə̄ gə̄ rɔ̄sí tə́ kɔ̄ɔ́, ɔ̄rī kūbə̄ yāsí gə̄ kɔ̄ɔ́ ba ə́lāī kūbə̄ kəhɔ ndoō rɔ̄sí tə́.

¹² Ɔ́jiī rɔ̄nel̄ aĺ yāsí kə̄ ndágá. Ī-nōōī tām̄ majə kə́ ndɔr̄ gə̄ majən̄ tə́ ō, tām̄ kāgə̄ nduú gə̄ kə́ anə̄n̄ ngá̰ý tə́ ō.

¹³ Ī-noōī tām̄ dɔ nang yā gír deē yāḿ gə̄ ń túpə kōn̄ gə̄ taān̄ loo malang tū tə́ ní tə́. Ī-nōōī tām̄ rɔ̄nel̄ kə́ kem kújə gə̄ tə́ malang ō, tām̄ yā nāā ń de gə̄ a rāān̄ kem ɓēé tə́ ní ō.

¹⁴ Əya̰n̄ kújə ndi mban̄g gə̄ kɔ̄ɔ́, ɓē ń ká̰a̰ de gə̄ ɓār̄ gijə gijə kemeé ní, deē kógə̄ḿ gē gətóo kemeé. Opel ō, kújə ngɔ̄m̄ ɓē kə́ ngāl̄ ɓururu ō ń i kem ɓē kə́ Jerusalem tə́ ní, télən̄ i dɔ nang gə̄ kə́ əya̰n̄də́ kɔ̄ɔ́ kə́ njɔ́ḿ gə̄ tə́. Kərō kə́ bembeé gə̄ əngen̄ rɔ̄nel̄ yādə́ i loo ń noō tə́ ō, ɓūtə̄ yá̰a̰ kul̄ gə̄ a əsan̄ mu i loo ń noō tə́ ō.

Gíŕ yá̰a̰ tūr̄ kem kār̄ kə́ rang tə́

¹⁵ Ndɔ̄ kógə̄ḿ tə́ anī, Kɔ́ɔ̄ɓē a ɓōkə́ ndílən dɔjí tə́. Loo ń noō tə́ dəla loo a tél ndɔr̄ kāgə̄ gə̄ kə́ a anə̄n̄ ō, ndɔr̄ ní a tél i ku kāgə̄ gə̄ kə́ rɔ̄kum ō.

¹⁶ Loo ń noō tə́ a ɓōlə́n̄ gidə yá̰á̰ kə́ súmūú dəla loo tə́ ō, yá̰á̰ kə́ gōtə́ a ndi kem ndɔr̄ kāgə̄ gə̄ kə́ a anə̄n̄ tə́ ō.

¹⁷ Yá̰á̰ kə́ gōtə́ a ojə kem sɔl̄ lɔm, ni a reē kə ndi lápə́yaá ō, kə ndi kanjə̄ sōl̄ yá̰á̰ kógə̄ḿ ō, kə́ njɔ́ḿ gə̄ tə́ ō.

¹⁸ Gír de gə̄ yā Kɔ́ɔ̄ɓē a ndin̄ i loo kógə̄ḿ kə́ loo to lɔm tū tə́ tə́, kem kújə gə̄ kə́ deē a taā kemdə́ mámák gə̄ tə́, kem loo gə̄ kə́ deē a ndi jəke tū tə́ tə́.

¹⁹ Kɔ̄sə̄ a tə́sō dɔ ku kāgə̄ gə̄ tə́ ō, ɓē a əsō ō.

²⁰ Banī yāsí a majə sesí, adə̄ ā ásiī dubə̄ yá̰a̰ kə̄ loo gə̄ tə́ ō, man̄ a to ngá̰ý ō, ā ásiī kəya̰ man̄g dɔɔ́ ō, kəya̰ kərō dɔɔ́ ō, kadə̄ njə̄rān̄ loo yādə́.