IJAI 30 - Bibəl ta Sar̄

Kum kedə̄ kəjō ɓē kə́ Nə́ɓā gān̄g sarya dɔ tə́

¹ Najə̄ ń Kɔ́ɔ̄ɓē əda ní n toó: Yá̰á̰ kə́ to kum̄ kaȳ aĺ a teē dɔsí tə́, sḭḭ̄ ngáń kə́ ngé mbātə́ najə̄ gə̄! Sḭḭ̄ ī-númī yá̰á̰ kə́ yā rāā gə̄ kə́ i mā n m-ɔ́jə rāā alé. Sḭḭ̄ ə̄nī ndūsí ādī naā, ba kənī ndū yāsí ní mbātə́ nge ń mā m̄-ndigə ní. Sḭḭ̄ ī-rāāī yá̰á̰ kə́ gōtə́ aĺ ba ī-reē ə̄nī dɔ madə̄ kə́ gōtə́ aĺ tə́.

² Sḭḭ̄ ə̄sōī róbó ta kaw̄ kə̄ Ejiptə, banī ī-dəjeī gír̄ yāḿ mā kə́ dɔ tə́ alé. Ī-sāāī kadə̄ mban̄g kə́ Ejiptə ngɔ̄m̄sí ō, ī-sāāī ɓɔ̄ɔ̄ rɔ̄sí ndíl ɓē yān tə́ ō!

³ Banī ngɔ̄m̄ ń mban̄g ngeé ń toō a ngɔ̄m̄sí ní, a əla rɔ̄sɔl̄ dɔsí tə́. Loo ɓɔ̄ɔ̄ rɔ̄ɔ̄ ń ā ī-sāāī dɔ nang kə́ Ejiptə tə́ ní, a rāā kadə̄ ā ī-tḭ̄ḭ̄ ta hɔ̄r̄mɔ̄ yāsí.

⁴ Ngār yāsí gə̄ nin̄ i Soan kɔ̄ɔ́ ɓá, de gə̄ ń ə́laīdə́ ní ugə̄n̄ Hanes.

⁵ Banī nin̄ malang ní rɔ̄də́ a sɔl̄də́ ngá̰ý, najə̄ yā gír de gə̄ kə́ a asən̄ rāā yá̰á̰ kógə̄ḿ tām̄ yādə́ tə́ aĺ tə́. De kə́ Ejiptə gə̄ a adə̄n̄sí yá̰á̰ kógə̄ḿ yā rāań sesí aĺ ō, a adə̄n̄sí yá̰á̰ kə́ a rāā majə sesí aĺ ō. Nin̄ a əlan̄ i rɔ̄sɔl̄ dɔsí tə́ ngóy ō, a rāān̄sí kadə̄ ā ī-tḭ̄ḭ̄ ta hɔ̄r̄mɔ̄ yāsí kɔ̄ɔ́ ō.

Ngé kaw̄ Ejiptə tə́ gə̄ kadə̄ de kə́ Ejiptə tə́ gə̄ dḭḭ̄n̄də́

⁶ Dā̰ gə̄ kə́ ətōn̄ yá̰a̰ ədan̄ dan dəla loo kə́ Negeb a mānə̄n̄. I gō nang yā wur kɔl kə́ nge rāā kadə̄ deē ndew ndew sōl̄ ō. Ɓɔl kə́ dəngam gə̄ ō, ɓɔl kə́ dəyá̰ gə̄ ō, lī kakə́m gə̄ ō, dā̰ kə́ majaĺ gə̄ kə́ a ḭḭn̄ bɔ̄gə̄ ō, ndin̄ tū tə́. Ngámbang kəla yāsí gə̄ ətōn̄ yá̰a̰ kənge yādə́ gə̄ ō, yá̰a̰ ɓɔ̄ɔ̄ yādə́ kə́ gātə̄də́ i ngá̰ý gə̄ ō, gidə kərō gə̄ tə́ ō, dɔ gɔ́sə́ jámbal gə̄ tə́ ō. I kadə̄ karī gə̄ kə́ tām̄ yā gír de gə̄ kə́ asən̄ rāā yá̰á̰ kógə̄ḿ tām̄ yādə́ tə́.

⁷ A̰á̰ā̰, rāā kə deé yā ɓē kə́ Ejiptə i nél karī, teē yá̰á̰ kógə̄ḿ aĺ bátə́. I tām̄ najə̄ ń toō tə́ n m-ə́da najə̄ kə́ dɔ ɓē ngeé ń toō tə́ na: Ni-a̰a̰ gajə gajə ngá̰ý, banī rāā yá̰á̰ kógə̄ḿ aĺ ní.

Tāā kə́ tām̄ yā yá̰á̰ kə́ ndɔ̄ń tə́

⁸ Kɔ́ɔ̄ɓē əda Ijai na: Ngɔlaā ní, ī-ndang yá̰a̰ gə̄ ń toō dɔ bar mbal̄ tə́, ta kum de kə́ Jerusalem gə̄ tə́. Ndɔ̄ń tə́ anī, nge ń noō a tél i yá̰á̰ kə́ kum tə́ kə́ a to ngándáńg.

⁹ I gír de kə́ ngé dum̄ naā gə̄, nin̄ i ngé sor̄ gə̄, i de gə̄ kə́ ngé mbātə́ koō yá̰á̰ ndóō yā Kɔ́ɔ̄ɓē.

¹⁰ Nin̄ ədan̄ ngé koō ta gə̄ na: Ī-lōōī ka̰a̰ yá̰á̰ ɓáý to̰! Ī-lōōī kədají yá̰á̰ kə́ rɔ̄kum! Ə́daījí yá̰á̰ kə́ nel̄ gə̄, ə́daījí yá̰á̰ kə́ nel̄jí ādə̄ j-oō kété, ká ré i yá̰á̰ rɔ̄kum aĺ gə̄gē ní.

¹¹ Ə́ya̰ī róbə́ kə́ majə kɔ̄ɔ́ ba āwī sa̰y, ə́ya̰ī róbə́ kə́ majə ba ī-tɔ̄ɔ̄ī. Nə́ɓā kə́ táĺ yā Israel ní, ī-lōōī kɔr̄ najə̄ yān sejí to̰!

Nujə sák sák kə́ dum̄ kəndā naā tə́

¹² I tām̄ najə̄ ń toō tə́ n Nə́ɓā kə́ táĺ yā Israel əda najə̄ ń toō ní, əda na: Sḭḭ̄ ī-mbātíī najə̄ yāḿ gə̄. Sḭḭ̄ ə̄nī kemsí ādī ngé ngóĺsí gə̄ ō, ngé sor̄ gə̄ ō, sḭḭ̄ ī-ndə̄nāī rɔ̄sí rɔ̄də́ tə́ ō.

¹³ I beé ní, yá̰á̰ kə́ gōtə́ aĺ ń toō a to i tītə̄ loo kə́ njar tū ndogə̄ mbal̄ kə́ bo tə́ beé tām̄ yāsí tə́. Loo agə̄ gul tū ndogə̄ mbal̄ tə́ ō, kə̄ ta jī tə́ noō ndogə̄ mbal̄ teē əsō ō.

¹⁴ Ndogə̄ mbal̄ ní a əsō tétə̄ ká káḿ kadə̄ gajən gə̄ a dūún̄ tītə̄ bay kə́ laa yā kɔdə̄ jóo beé. Deē a əndā kemən dɔ tə́ to̰ alé, deē a ənge gájən kə́ tə́sō sḛ́ý yā kunəń hor aĺ ō, yā kɔdəń man̄ kə́ tə́gā aĺ ō.

Ī-raī jəke ō, ə̄nī kemsí ādə̄mī ō

¹⁵ Najə̄ ń Kɔ́ɔ̄ɓē, ni ń i Nə́ɓā kə́ táĺ yā Israel Najə̄ ń əda ní n toó: Ā ájiī i loo ń ī-tūrī rɔ̄sí kə̄ rɔ̄ḿ tə́ ō, ī-raī jəke ngóy ō ní. Tɔ́gə́sí kə́ kal kógə̄ḿ beē i kadə̄ ī-raī jəke ō, kadə̄ ə̄ndāī kemsí dɔḿ tə́ ō, i kadə̄ ə̄nī kemsí ādə̄mī ō. Banī sḭḭ̄ ɔ́diī alé.

¹⁶ Sḭḭ̄ ə́daī na: I beé alé, j-a j-un sə́nda yā ka̰ȳń. I beé ɓá ní, a̰á̰ā̰, sḭḭ̄ ā ā̰yī naā. Sḭḭ̄ ə́daī to̰ na: Sə́nda yājí gə̄ a ngɔ̄də̄n̄ ngá̰ý. I beé ní, ngé ngɔ̄də̄sí gə̄ a a̰ȳn̄ ngɔ̄də̄ ngá̰ý ō.

¹⁷ Madə̄ ba̰ā̰sí kə́ a əla ɓōĺ kemsí tə́ i kógə̄ḿ beē ō, de kə́ dansí tə́ gə̄ dūbú ɓōĺ a rāādə́ adə̄ nin̄ a ndewn̄ ō. Madə̄ ba̰ā̰ gə̄ mí a əlan̄ ɓōĺ kemsí tə́ ō, sḭḭ̄ malang ā ā̰yī naā ō. Ta tɔ̄l̄ ta anī, gotəsí ń a na̰y ní, a to i tītə̄ yá̰a̰ kɔjə yá̰á̰ kə́ udən̄ dɔ mbalá dɔɔ́ beē, a to i tītə̄ dərapóo rɔ̄ɔ̄ kə́ udən̄ dɔ ngōn̄ mbal̄ tə́ beē.

Kum mbang kajə

¹⁸ Tá Kɔ́ɔ̄ɓē a ngóō i kum mbang kə́ yā kɔjəńsí kem majə yān kə́ tām̄ yāsí tə́. Ni a ḭḭ dɔɔ́ yā kɔjəsí táŕ kə́ kemən tə́. A̰á̰ā̰, Kɔ́ɔ̄ɓē i Nə́ɓā kə́ nge rāā yá̰á̰ kə́ gōtə́. Ngé gə̄ ń əndān̄ kemdə́ dɔn tə́ ō, ndi a ngóōnən̄ ō ní, rɔ̄də́ nel̄də́.

¹⁹ Sḭḭ̄ gír de gə̄ kə́ Siyo̰, sḭḭ̄ ń ī-ndiī Jerusalem ní, ā ī-nōōī to̰ alé. Kɔ́ɔ̄ɓē a ɔjəsí kem majə yān loo ń ā ə́gaī kɔŕ kə̄ dɔn tə́ ní. Ré kɔŕ yāsí əsō mbīn tə́ anī, ni a dalsí najə̄ i kə̄ ta jī tə́ noō.

²⁰ Dan ń wur kɔl a əsō dɔsí tə́ anī, Kɔ́ɔ̄ɓē a adə̄sí yá̰a̰ kəsa. Dan ń a rāān̄ kumsí ndoō tə́ anī, ni a adə̄sí man̄ kadə̄ ā̰yī. Nge ndóōí yá̰a̰ a ɓɔ̄ɔ̄ rɔ̄n to̰ alé, adə̄ ā ásə ka̰a̰n kə kumií karī.

²¹ Ā ōō najə̄ ń toō gidií tə́: Róbə n toó, majə kadə̄ ún āwń dām̄ kə́ ko̰ó̰ tə́, aláa dām̄ kə́ geleé tə́!

²² Yá̰á̰ kə́ rāā kum gotə nə́ɓā kə́ rɔ̄kum aĺ gə̄, adə̄ i kāgə̄ kə́ tɔ́sə̄, aláa i gində̄ kə́ nō horoó ba rāā gində̄ arjā̰a̰ ō lɔ́r ō gidə tə́ ní, ā ī-rāādə́ i yá̰á̰ kə́ yḛr tə́. Ā ī-tə́nādə́ kɔ̄ɔ́ tītə̄ yá̰á̰ kə́ yə̄ró i tū tə́ beē ō, ā ə́da najə̄ yādə́ na i yedə̄ yá̰a̰ ō.

²³ Loo ń noō tə́ Kɔ́ɔ̄ɓē a rāā kadə̄ man̄ edə dɔ kum yá̰a̰ gə̄ ń ī-dubə̄ tə́ ní ō, yá̰a̰ kəsa ń dɔ nang a adī ní a i ngá̰ý ō, a nel̄ ngá̰ý ō. Ndɔ̄ ngeé ń noō tə́ ní, ɓūtə̄ yá̰a̰ kul̄ yāí gə̄ a aw̄n̄ ko̰ó̰ loo kə́ bo tə́.

²⁴ Man̄g gə̄ kə kərō gə̄ ń a ndɔrə̄n̄ dɔ nang ní, a əsan̄ mu kə́ nel̄ tadə́. A selə́n̄ mu ní nang tə́ i kə pélé ō, kə yá̰a̰ rāā kəla kə́ laan gar gajə ō.

²⁵ Ndɔ̄ ń a tɔ̄lə̄n̄ de gə̄ malang kɔ̄ɔ́ tə́ ní, dan ń kújə rɔ̄ɔ̄ dɔ ɓē tə́ kə́ ngāl̄ ɓururu gə̄ a tə́sōn̄ tə́ ní, ngán man̄ gə̄ a yḭ̄lə̄n̄ loo dɔ mbal̄ bo gə̄ tə́ ō, dɔ ngán mbal̄ gə̄ tə́ ō.

²⁶ Ndɔ̄ ń Kɔ́ɔ̄ɓē a ndem̄ ta do yā gír deē yān gə̄ anī, dan ń ni a rāā do yā gír deē yān gə̄ kadə̄ idə̄ ní, nāā a ndə́lē tītə̄ mbang ō, mbang kə́ ndɔ̄ kógə̄ḿ a ɔsə, loo kə́ unjə̄ kow yā mbang kə́ ɔsə ndɔ̄ kógə̄ḿ a asən̄ naā kə loo kə́ unjə̄ kow yā mbang kə́ ɔsə ndɔ̄ sīrí.

Kɔ́ɔ̄ɓē reē ənda de kə́ Asiri gə̄

²⁷ Kɔ́ɔ̄ɓē n toó, ni-ḭḭ i sa̰y n reē. Wōn̄g yān o̰o̰ hor, i wōn̄g kə́ a ɔr̄ tɔ́gə deē. Wōn̄g rosə kem tan. Najə̄ yān to tītə̄ hor kə́ a o̰o̰ loo beé.

²⁸ Koō kə́ tan tə́ to i tītə̄ man̄ dɔ mbal̄ kə́ rə̄ɓā kem kārə̄n tə́ kə̄ ndágá ō, ḭḭ bátə́ əhɔ deē míndən tə́ dɔɔ́ ō beé. Ni-reē yéȳ nápar de gə̄ kə yá̰a̰ rāān kə́ a nujə loo. Ni-əla sáā gində̄ kógə̄ḿ kem tadə́ tə́ yā kɔrəń nodə́ kaw̄ sedə́ loo kə́ nin̄ ndigən̄ aĺ tə́.

²⁹ Sḭḭ̄ de kə́ Jerusalem gə̄, ā ə̄nīī pā tītə̄ ndɔ̄ rāā nāā tə́ ndɔ̄ɔ́ beē. Kemsí a nel̄sí tītə̄ kem ngé njə̄rā kə gō ndū nalaá kum kə̄ rɔ̄ mbal̄ bo yā Kɔ́ɔ̄ɓē tə́ beē, kum kə̄ rɔ̄ Nə́ɓā ń i mbal̄ yā Israel ní tə́ beē.

³⁰ Kɔ́ɔ̄ɓē a rāā kadə̄ de gə̄ a oōn̄ ndūn kə́ to ɓōĺ ngá̰ý ō, ni a rāā kadə̄ de gə̄ a a̰a̰n̄ tɔ́gə jīn ō. Ni a ɔjə wōn̄g yān kə́ ngá̰ý kə̄ ndágá dan ndo̰ hor kə́ a o̰o̰ tə́ ō, a dān̄ gō kə nél man̄ kə́ əla kə ngangá ngá̰ý ō, kə man̄ kə́ edə kə kɔ̄sɔ̄ɔ́ ō.

³¹ Dan ń Asiri a oō ndū Kɔ́ɔ̄ɓē ō, Kɔ́ɔ̄ɓē a əndan kə ndéý sálang yānneé ō anī, ɓōĺ a rāān.

³² A dānə̄n̄ gō jī Kɔ́ɔ̄ɓē loo kəndan tə́ i kə kɔdə gə̄ ō, kənde gə̄ ō. Kɔ́ɔ̄ɓē a wél̄ jīn yā kəlań ɓōĺ kem Asiri tə́ ō, ni a rɔ̄ɔ̄n ō.

³³ Rāān̄ hor kógə̄ḿ jóó ngá̰ý kɔ̄ɔ́. Hor ní i tām̄ yā mban̄g tə́ ō. Ɓōkə́n̄ kīr̄ ngá̰ý kem bəlo kógə̄ḿ kə́ laa tə́ ō, ɗúú tə́ ō, adə̄ gōr̄ gong tām̄ yā hor tə́. Koō kə́ ta Kɔ́ɔ̄ɓē tə́ ń to tītə̄ bā bursu kə́ təngā ní, a əla hor tū kīr̄ ní tə́.