IJAI 3 - Bibəl ta Sar̄

Yá̰á̰ kə́ a̰a̰ gō naā aĺ gə̄ ton̄ dɔ nang kə́ Juda tə́

¹ Yá̰a̰ kəsa kə́ kəndā dɔ jī ō, man̄ ō, kə́ kem ɓē kə́ Jerusalem tə́ ō, kə́ kem ɓē ko̰o̰ kə́ Juda tə́ ō ní, Kɔ́ɔ̄ɓē kə́ bo kə́ tɔ́gən i ngá̰ý, ni ń i ngol ní, a ɔy malang kɔ̄ɔ́. Yá̰a̰ malang ń nin̄ əndān̄ tɔ́gə́də́ dɔ tə́ ní, ni a taā jīdə́ tə́ kɔ̄ɔ́:

² Áskar kə́ ger̄ rɔ̄ɔ̄ ngá̰ý gə̄ ō, ngé rɔ̄ɔ̄ kə́ karī gə̄ ō, ngé sarya gə̄ ō, ngé koō ta gə̄ ō, kɔdə̄ sāā gə̄ ō, kum kɔɔ̄ gə̄ ō,

³ ngol áskar gə̄ ō, de kə́ bo kə́ kem ɓēé gə̄ ō, ngé kadə̄ kɔjə̄ gə̄ ō, ngé rāā mbōlí gə̄ ō, ngé kəga gə̄ ō.

⁴ Kɔ́ɔ̄ɓē ə́da na: Ngār gə̄ ń m-ā m̄-tə́ndādə́ dɔdə́ tə́ ní, i ngáń kə́ dūú gə̄, kadə̄ yə̄ngān̄də́.

⁵ De gə̄ a rāān̄ yá̰a̰ i kə dɔ́nɔ́ kə naá, nin̄ kógə̄ḿ kógə̄ḿ ní, a rāān̄ yá̰a̰ i kə dɔ́nɔ́ kə madə̄də́ gēé, ngásáā gə̄ a rāān̄ de kə́ tɔgə gə̄ yá̰á̰ kə́ majaĺ ō, de kə́ ngáā aĺ gə̄, a rāān̄ de kə́ ngáā gə̄ yá̰á̰ kə́ majaĺ ō.

⁶ Deē a əhɔ ngōkó̰o̰n kə́ gír kojə yā bɔbə̄n tə́, ba a ədan na: Ḭ̄, kūbə̄ yāí i kə́ majə ɓáý ní, ī-ndi ngār dɔjí tə́, ba úń yá̰á̰ kə́ a̰a̰ gō naā aĺ kə́ bo ń toō kə̄ jīí tə́!

⁷ Ndɔ̄ ngeé ń noō tə́ ní, madə̄n a tél yā kədan na: M-ásə rāā yá̰á̰ kógə̄ḿ tām̄ yāsí tə́ alé. Yá̰a̰ kəsa gətóo ɓēé looḿ ō, kūbə̄ gətóo ɓēé looḿ ō. Ásiī kəndām̄ ngāraá alé.

⁸ Ɓē kə́ Jerusalem əsō, ɓē ko̰o̰ kə́ Juda teē əsō kərim. Nin̄ əsōn̄ wōn̄g ta tɔ́gə yā Kɔ́ɔ̄ɓē tə́. Rɔ̄ɔ̄n̄ Kɔ́ɔ̄ɓē kə najə̄ kɔr̄də́ ō, kə yá̰a̰ rāādə́ ō.

⁹ Nin̄ a sāān̄ i ger̄ ta kum deē tá yā rāań majə seneé aĺ. Yá̰á̰ ń noō ń nin̄ rāān̄ ní, reē kə nājāá dɔdə́ tə́. Nin̄ mundə̄n̄ majaĺ yādə́ alé, tītə̄ ń de kə́ Sodom gə̄ rāanəń ní ō, ədan̄ najə̄ majaĺ yādə́ ta kum de gə̄ tə́ malang ō. Yá̰á̰ ń to gō jī aĺ ní, nin̄ əndān̄ i dɔ yá̰á̰ kə́ to kum kaȳ aĺ danaá tām̄ yādə́ nin̄ kɔ́ gə̄ tə́!

¹⁰ Ngé gə̄ ń oōn̄ ta Nə́ɓā ní, ásiī kəda na nin̄ i ngé rɔ̄nel̄ gə̄. Yá̰á̰ ń nin̄ rāān̄ ní, a əngen̄ yá̰á̰ kə́ majə tām̄ yādə́ tə́ gírí.

¹¹ Banī i yá̰á̰ kə́ to kum kaȳ aĺ kə́ ba̰ý beē tām̄ yā ngé kem ndul gə̄ tə́! Yá̰a̰ malang a majaĺ tām̄ yādə́ tə́. I yá̰á̰ ń nin̄ rāān ní n a rāān̄ sedə́ ní.

¹² Kɔ́ɔ̄ɓē əda na: Gír deē yāḿ gə̄, ngé rējə̄sí gə̄ i ngáń kə́ dūú gə̄ ō, i dəyá̰ gə̄ n i ngé ko̰o̰ ɓē dɔsí tə́ gə̄ ō ní. Gír deē yāḿ gə̄, ngé kɔr nosí gə̄ gólə̄n̄sí, nin̄ tɔ̄ɔ̄ aw̄n̄ sesí i kum kə̄ loo kə́ majaĺ tə́.

Rāān̄ sarya kə ngé kɔr no de gēé

¹³ Kɔ́ɔ̄ɓē əndā dɔ rɔ̄n danaá kɔ̄ɔ́ yā rāā sarya, ni-ḭḭ ra kə njan kə́ dɔɔ́ yā gān̄g sarya dɔ gír deē yān gə̄ tə́.

¹⁴ Ni-aw̄ kə kum kɔɔ̄ gə̄ yā gír deē yān gə̄ ō, ngār gə̄ yā gír deē yān gə̄ ō, loo sarya tə́. Ni ədadə́ na: I sḭḭ̄ n ī-nujiī ndɔr̄ kāgə̄ nduū yāḿ kɔ̄ɔ́ ní. Yá̰a̰ kənge yā ngé ndoō gə̄ ń ī-ɓogiī ní, rosə kem kújə yāsí gə̄.

¹⁵ Sḭḭ̄ ī-rējī gír deē yāḿ gə̄. I tām̄ rí tə́? Sḭḭ̄ ḭ́ḭḭ̄ gúu dɔ ngé ndoō gə̄ tə́. Ní, i tām̄ rí tə́? Yá̰á̰ ń Kɔ́ɔ̄ɓē kə́ bo kə́ tɔ́gən i ngá̰ý əda ní n noó.

Dəyá̰ kə́ mandə gə̄ kə́ Jerusalem

¹⁶ Kɔ́ɔ̄ɓē əda na: Dəyá̰ kə́ mandə gə̄ kə́ Siyo̰ əndan̄ gúúdə́. Nin̄ njə̄rān̄ ɓáa ə́lan̄ míndə́də́ kə̄ kété, sāān̄ kadə̄ de gə̄ reēn̄ rɔ̄də́ kə ta kūl̄ ka̰a̰ loo yādə́. Nin̄ njə̄rān̄ ɓáa unən̄ njadə́ sḛ́ý beē ba rāān̄ adə̄ kōō nə̄ngá gə̄ kə́ dɔ kúkə̄lú njadə́ gə̄ tə́ ɓār̄.

¹⁷ I beé ní, Kɔ́ɔ̄ɓē a rāā kadə̄ kur əsa dɔdə́ malang, adə̄ nənga a gətóo notə nodə́ tə́.

¹⁸ Ndɔ̄ ngeé ń noō tə́ ní, Kɔ́ɔ̄ɓē a ɔr̄ yá̰á̰ ń rāā adə̄ nin̄ mandən̄ ngá̰ý ní rɔ̄də́ tə́ kɔ̄ɔ́, adə̄ i nə̄ngá gə̄ kə́ dɔ kúkə̄lú njadə́ gə̄ tə́ ō, məde gə̄ ō, yá̰á̰ súū rɔ̄ kə́ to tītə̄ gájə nāā beé ō,

¹⁹ yá̰a̰ ta mbī gə̄ ō, nə̄ngá kə́ jī tə́ gə̄ ō, kūbə̄ kə́ yā seĺ ta kum tə́ gə̄ ō,

²⁰ mandíl gə̄ ō, ngáń sḛ́ń kə́ dūú ngá̰ý gə̄ ō, ndāŕ kəhɔ ɓōdə̄ kə́ sétə̄ gidə naā tə́ gə̄ ō, láyā̰ gə̄ ō, yá̰á̰ kə́ a rāā majə kə deé gə̄ ō,

²¹ kulūm̄ ta jī gə̄ ō, nə̄ngá kə́ kɔ́ń tə́ gə̄ ō,

²² kūbə̄ rāā nāā gə̄ ō, kūbə̄ kə́ laa kə́ gír madāá gə̄ ō, kūbə̄ kə́ dɔ madə̄ gə̄ tə́ ō, ngong gə̄ kə́ yā kəhɔ jī tə́ gə̄ ō,

²³ kútəram gə̄ ō, kūbə̄ lḛ́ḛ́ kə́ hɔɔ́lɔ̄ kə́ yā kəla rɔ̄ tə́ pá tá kəla kūbə̄ madə̄ gə̄ dɔ tə́ gə̄ ō, ta kūbə̄ kə́ yā ɓír̄ míndə́ tə́ gə̄ ō, ta kūbə̄ kə́ bo kə́ yā kənī dɔ bɔ̄gə̄ tə́ gə̄ ō.

²⁴ Sēē yá̰á̰ kə́ ndum a otə kum gotə ítər gə̄ ō, kəlā kə́ karī a un gotə ndāŕ kəhɔ ɓōdə̄ ō. Dɔ kə́ dəsā a un gotə dɔ kə́ tūmə̄n tə́la naā ngá̰ý ō, kūbə̄ kəhɔ ndoō kə́ rāā kə sákə̄ kə́ ndo̰ō̰ huyuyu a un gotə kūbə̄ kə́ majə ngá̰ý kə́ gātə̄n i ngá̰ý ō. Tə́re rɔ̄sɔl̄ a un gotə majə kə́ rɔ̄ deē majə ō.

Dəyá̰ kə́ ngáā gə̄ kə́ Jerusalem

²⁵ Jerusalem, de kə́ dəngam yāí gə̄ a tə́sōn̄, tɔdɔ̄ tɔ́sə̄n̄də́ kə kaskaraá ō, áskar yāí gə̄ a oyn̄ ta rɔ̄ɔ̄ tə́ ō.

²⁶ Loo ń nōō tə́ ɓē kə taá malang a nōō rɔ̄n ō, a əhɔ ndoō ō. Ni a ndi nang tə́ tītə̄ dəyá̰ kə́ tḭ̄ḭ̄ ta yá̰a̰ malang kɔ̄ɔ́ beē.