IJAI 29 - Bibəl ta Sar̄

Na̰y i sḛ́ý a ta Jerusalem tḭ̄ḭ̄ ō, gāngə̄n̄ dɔn kə̄ ta jī tə́ noō ō

¹ Kɔ́ɔ̄ɓē əda na: Yá̰á̰ kə́ to kum kaȳ aĺ! Ariel, Ariel! Ɓē kə́ Jerusalem ń mban̄g Dabid reē ənīn rɔ̄ɔ̄ ní! Ásə ɓōĺ gidə ndɔ̄ rāā nāā gə̄ malang, kə dɔ ɓāl̄ gə̄.

² Banī m-ā m̄-rējī, Ariel. Ā ī-nōō ngá̰ý ō, man̄ kumií a reē ngá̰ý ō, tām̄ yāḿ tə́ ɓáa ā ī-to tītə̄ Ariel yā loo tun̄ yá̰á̰ ń a róōn̄ yá̰á̰ kə́ tun̄ gə̄ tū tə́ ní.

³ M-ā m-ə̄ndā gérger yāḿ kadə̄ gīr̄ gidií. M-ā m̄-rɔ̄ɔ̄ī kə loo kə́ yā kadə̄ deē ndi gírí rɔ̄ɔń. M-ā m̄-ə̄ndā ndogə̄ mbal̄ gə̄ kə́ yā kənīń rɔ̄ɔ̄ yā rɔ̄ɔiń.

⁴ Ā ə̄sō gírí nang tə́ ngá̰ý, adə̄ ndūí a ɓār̄ tītə̄ kə́ teē i gíŕ nángāá beē. Ndūí ní a teē dan bumbə́rú tə́ i sḛ́ý beē adə̄ loo koōn ngan̄g ngá̰ý. To tītə̄ kə́ teē i gíŕ nángāá tītə̄ ndū ndíl de kə́ tɔ́gən gətóo kə́ a ɔr̄ najə̄ kum bumbə́rú tə́ beē.

⁵ Kósə madə̄ ba̰ā̰í gə̄ ton̄ tītə̄ bumbə́rú kə́ ḭḭ tuy beé. Ɓūtə̄ ngé rējīí gə̄ ton̄ tītə̄ mu kə́ nél ɔy aw̄ń beē. Anī kə̄ ta jī tə́ noō,

⁶ Kɔ́ɔ̄ɓē kə́ bo kə́ tɔ́gən i ngá̰ý ní, rāā yá̰á̰ kógə̄ḿ kə ta kūl̄ man̄ kə́ ndang, kə kōō yá̰á̰ kógə̄ḿ kə́ ɓār̄ to ɓōĺ ngá̰ý, kum nél man̄ kə́ əla kə ngangá ngá̰ý tə́ ō, kə ta ndo̰ hor kə́ a nujə looó ō.

⁷ Ariel, kósə de gə̄ kə́ kem ɓēé gə̄ ń a rɔ̄ɔ̄īn̄ ní, a gətóon̄ kɔ̄ɔ́ tītə̄ nī beé. De gə̄ malang ń əndān̄ ndogə̄ mbal̄ gə̄ gīrə̄n̄neé gidií yā kənīīneé rɔ̄ɔ̄ ō, njadə́ ra kɔŕ kɔtə́yɔ gōí tə́ ō ní, nin̄ hində̄n̄ lim tītə̄ yá̰á̰ kə́ deē a̰a̰ ndɔ̄ɔ́ beē.

⁸ Deē ń ɓō rāān ní, nī rāān adə̄ ndi a əsa yá̰a̰, ba dan ń ni ndól̄ anī, ɓō rāān ɓáý. Deē ń kəndā rāān ní, nī rāān adə̄ ni-ndi a a̰ȳ i man̄, ba dan ń ni ndól̄ anī, kɔr rāān ō, no míndən tutə ká káḿ ɓáý ō. Kósə de gə̄ yā ɓē gə̄ ń a rɔ̄ɔ̄n̄ mbal̄ Siyo̰ ní, yādə́ a to i tītə̄ ń noō ō.

Kum ka̰a̰ loo aĺ ō, kasə rāā ō

⁹ Ādə̄ ɔr kumsí ō, ī-ndiī kanjə̄ kəda yá̰a̰ ō. Ī-téliī ngé kum tɔ̄ɔ̄ gə̄ ō, ī-ndiī kanjə̄ ka̰a̰ loo ō. Ādī kasə rāāsí, ba i kanjə̄ ka̰ȳ kasə nduú. ī-bḭ́ḭ̄ḭ̄ sitə sitə, ba i kanjə̄ ka̰ȳ kasə.

¹⁰ Tām̄ Kɔ́ɔ̄ɓē rāā adə̄ kur̄ dɔsí oy kɔ̄ɔ́. Ngé koō ta yāsí gə̄ ń nin̄ i kumsí gə̄ ní, ni ɔgə̄də́ ka̰a̰ loo ō, ngé ka̰a̰ yá̰a̰ yāsí gə̄ ń nin̄ i dɔsí gə̄ ní, ni seĺ kūbə̄ kógə̄ḿ dɔm dɔdə́ tə́ kɔ̄ɔ́ ō.

¹¹ Yá̰a̰ gə̄ ń toō malang ń i kə́ kəda ní, tām̄ yāsí tə́ ɓáa ton̄ i tītə̄ najə̄ gə̄ kə́ ton̄ kem makətūbə̄ kə́ kutə̄ ta kə tīw̄ tejeé tə́ beē. Makətūbə̄ ní adə̄n̄ deē kógə̄ḿ kə́ ger̄ tə́da makətūbə̄ ba ədanən̄ dɔ tə́ na: Ī-tə́da makətūbə̄ ń toō tā! Banī ni tūr̄ əda na: M-ásə́ tə́da alé, makətūbə̄ ní i kə́ kutə̄ ta kɔ̄ɔ́.

¹² Aĺ anī makətūbə̄ ní adə̄n̄ deē kógə̄ḿ kə́ ger̄ tə́da makətūbə̄ alé, ba ədanən̄ dɔ tə́ na: Ī-tə́da makətūbə̄ ń toō tā! Banī ni tūr̄ ədadə́ na: m̄-ger̄ tə́da makətūbə̄ alé.

Gíŕ yá̰á̰ kə́ to kɔr kum gə̄ gān̄g alé

¹³ Kɔ́ɔ̄ɓē ɔr̄ najə̄ yā gír de gə̄ ń toō əda na: Gír de gə̄ ń toō ní, nin̄ i ngɔr rɔ̄ḿ tə́ i kə najə̄ kə́ tadə́ tə́. Nin̄ rɔȳmə̄n̄ i kə tadə́, banī kemdə́ əya̰m̄ sa̰y ngá̰ý. Ɓōĺ ń nin̄ a ɓōlə́n̄ gidəḿ ní, i yá̰á̰ kə́ kəda kadə̄ yā rāā kə́ i de gə̄ n ndóōn̄də́ kadə̄ rāān̄.

¹⁴ I tām̄ ń najə̄ ń toō tə́ n m-ā m̄-na̰y kə̄ loo rāā yá̰a̰ gə̄ kə́ kadə̄ ɔr kum gír de gə̄ ń toō tə́ ní. Kumdə́ edə̄ ɓá tā, banī ngé kum kedə̄ gə̄ a gerə̄n̄ yá̰á̰ kógə̄ḿ tū tə́ alé. Kur̄ dɔdə́ i nuú ɓá tā, banī ngé ger̄ yá̰á̰ ngá̰ý yādə́ gə̄ a asən̄ kɔjə kum yá̰á̰ kógə̄ḿ alé.

Kɔ́ɔ̄ɓē i náā ta kumsí tə́?

¹⁵ I yá̰á̰ kə́ to kum kaȳ aĺ ngá̰ý tām̄ yā de gə̄ ń noō ń nin̄ a rāān̄ yá̰a̰ i loo mundə̄ tə́ ní! Nin̄ ɓɔ̄ɔ̄n̄ dɔ yá̰a̰ gə̄ ń nin̄ sāān̄ rāā ní kadə̄ Kɔ́ɔ̄ɓē a̰a̰ alé. Nin̄ əndān̄ dɔ yá̰a̰ yādə́ gə̄ danaá i kum loo kə́ risə til tə́. Nin̄ ədan̄ na: I náā n asə ka̰a̰jí ní? I náā n ger̄ yá̰a̰ rāājí ní?

¹⁶ Tá yá̰á̰ sḭ́ndə̄sí ngá̰ý! Deē a a̰a̰ kɔdə̄ jóo ɔjəń nánjə̄? Yá̰a̰ asə kəda nge rāān na: I ni n rāām̄ alé a? Jóo a əda kɔdə̄ jóo na: Ni ger̄ rāā kəla alé a?

Yá̰a̰ tūr̄ rɔ̄n tūr̄ kə́ bo kem kār̄ kə́ rang tə́

¹⁷ Na̰y kum mbang i ngá̰ý aĺ yā kadə̄ ku kāgə̄ gə̄ kə́ Liban a tél i ndɔr̄ kāgə̄ gə̄ kə́ a anə̄n̄ gə̄ ō, ndɔr̄ ní a tél i ku kāgə̄ gə̄ ō.

¹⁸ Ndɔ̄ ngeé ń noō tə́ ní, ngé mbíkī gə̄ a oōn̄ yá̰á̰ ń ə́dan̄ kem makətūbə̄ tə́ ní. Ngé kum tɔ̄ɔ̄ gə̄ a teēn̄ kɔ̄ɔ́ kum loo kə́ ndɔ̄ɔ́ kə́ ndul tə́ ō, nin̄ a a̰a̰n̄ loo unjə̄ ō.

¹⁹ De gə̄ kə́ nin̄ i yá̰á̰ kógə̄ḿ aĺ gə̄ a əngen̄ rɔ̄nel̄ kə́ a bo i kum kə̄ kété kété kem Kɔ́ɔ̄ɓē tə́, de gə̄ kə́ nin̄ ndoōn̄ tɔȳ madə̄də́ gə̄ a ndāmə̄n̄ ndām̄ rɔ̄nel̄ najə̄ yā Nə́ɓā kə́ táĺ yā Israel tə́.

^20-21 Tām̄ i ta tɔ̄l̄ ta ngé gə̄ ń ko̰o̰ ɓē malang i gír jīdə́ nin̄ kɔ́ gə̄ tə́ ní ō, ngé lur loo gə̄ a gətóon̄ kɔ̄ɔ́ ō. Ngé sāā rāā yá̰á̰ kə́ majaĺ kə madə̄də́ gēé ō, ngé tetə najə̄ dɔ de gə̄ tə́ ō, ngé kəyā gūmbə̄ no ngé sarya gə̄ tə́ ō, ngé gān̄g sarya dɔ de kə́ najə̄ gətóo dɔn tə́ ō ní, a rāān̄də́ kadə̄ nin̄ a gətóon̄ kɔ̄ɔ́.

²² I tām̄ najə̄ ń toō tə́ ń, Kɔ́ɔ̄ɓē ń ajə Abəraham ní ɔr̄ najə̄ kə kojə yā Jakob gēé i beé ní: Ngɔlaā ní gír deē yā Jakob gə̄ a nalə̄n̄ yá̰á̰ ń nin̄ əndan̄ kemdə́ dɔ tə́ ní to̰ alé, rɔ̄də́ a sɔl̄də́ ngá̰ý to̰ alé.

²³ Tām̄ nin̄ ō ngáńdə́ gə̄ ō a a̰a̰n̄ yá̰á̰ m-ā m̄-rāā dɔ dáńdə́ tə́ ní. Loo ń noō tə́ nin̄ a ger̄mə̄n̄, mā Nə́ɓā kə́ táĺ yā Jakob. Nin̄ a ɓōlə́n̄ rāā yá̰á̰ kə́ kadə̄ nelə̄m̄ alé, mā ń i Nə́ɓā yā Israel ní.

²⁴ Ngé gə̄ ń kété gerə̄n̄ kəndā ma̰ȳ yá̰a̰ aĺ ní, a əlan̄ gír ger̄ kəndā ma̰ȳ yá̰a̰. Ngé gē ń kété a tə́dan̄ i tām̄ dɔ yá̰a̰ gə̄ tə́ malang ní, a ndigən̄ kadə̄ ndóōn̄də́ yá̰a̰.