IJAI 28 - Bibəl ta Sar̄

Nél man̄ kə́ a nujə loo kə́ əla kə tɔ́gɔ́ dɔ ɓē kə́ Samari tə́

¹ I yá̰á̰ kə́ to kum kaȳ aĺ kə́ ba̰ý beē tām̄ yā ɓē kə́ Samari tə́! Ɓē ń toō ń to tītə̄ jākā mbang beé ní, ngé kasə rāā gə̄ kə́ dɔ nang yā Epəraim tə́ əndan̄ gúúdə́ tāmən tə́ Ɓē ní ndi i dɔ ngōn̄ mbal̄ ń deē ra dɔ tə́ anī a̰a̰ wól loo kə́ teē kōō ngá̰ý ní. Súūn̄ ɓē ní adə̄ majə ngá̰ý. Banī ɓē ní to i tītə̄ hútə̄ yá̰á̰ kə́ tutə kə́ to dɔ de gə̄ kə́ kasə nduú rāādə́ kɔ̄ɔ́ tə́ beē.

² De kə́ tɔ́gən to ō ngan̄g ō n toó. I Kɔ́ɔ̄ɓē n əla seneé ní. Ni to i tītə̄ man̄ kə́ edə kə kɔ̄sɔ̄ɔ́ beē, to i tītə̄ nél man̄ kə́ nujə loo beé, to i tītə̄ man̄ kə́ edə ngá̰ý kə́ taā loo malang beé. Deē ngeé ń toō mbəre yá̰a̰ malang tə́nī kə tɔ́gɔ́.

³ Ɓē kə́ to tītə̄ jākā mbang beé, adə̄ i yá̰a̰ kənda gúu yā ngé kasə rāā gə̄ kə́ Epəraim ní, a rējə̄nən̄ kɔ̄ɔ́.

⁴ Hútə̄ yá̰á̰ kə́ tutə gə̄ ń súūnən̄neé dɔ ngōn̄ mbal̄ kə́ deē ra dɔ tə́ anī a̰a̰ wól loo kə́ teē yá̰á̰ ngá̰ý kə̄ gírí nang tə́ ní, a dubə̄n̄ hútə́ yá̰a̰ gə̄ ní kɔ̄ɔ́. Samari a to tītə̄ kan̄ kótə̄ kə́ ta kəga dɔ kə́ kərē no ndɔ̄ kəjan tə́ beē. Nəkɔ́ ń deē kógə̄ḿ əla kumən a̰a̰n lap toó, kɔ́ɔ̄ əjan ō, əsan kə̄ ta jī tə́ noō ō.

⁵ Ndɔ̄ kógə̄ḿ tə́ anī, Kɔ́ɔ̄ɓē kə́ bo kə́ tɔ́gən i ngá̰ý ní, nəkɔ́ a tél jākā mbang kə́ majə ngá̰ý, a téĺ yá̰á̰ súū rɔ̄ kə́ yā kənī míndə́ tə́, kə́ yá̰a̰ i ngá̰ý tū tə́, yā de gə̄ kə́ dan gír deē yān gə̄ ń teēn̄ ta yo tə́ ní.

⁶ Ni a adə̄ ngé gān̄g sarya gə̄ ndíĺ yá̰a̰ rāā kə́ gōtə́. Ngé mbəre madə̄ ba̰ā̰də́ gə̄ kə̄ gogə́ kɔ̄ɔ́ ta róbə́ kə́ yā kudəń kə̄ kem ɓēé tə́ ní, ni a adə̄də́ tɔ́gə́ ngá̰ý.

Ngé kasə rāā gə̄ mbóon̄ kə nge koō taá

⁷ Ngé tun̄ yá̰a̰ gə̄ ō, ngé koō ta gə̄ ō ní, nin̄ gə̄gē ɔrə̄n̄ najə̄ i kə̄ noó ngóy sɔɔ̄ń kasə nduú. Kasə rāādə́ adə̄ njə̄rān̄ a bḭ́ḭ̄n̄ i mbée. Nin̄ ɔrə̄n̄ najə̄ i kə̄ nuú ngóy sɔɔ̄ń kasə. Kasə nduú rāādə́ adə̄ kumdə́ a̰a̰ loo to̰ alé. Kasə rāādə́ adə̄ njə̄rān̄ a bḭ́ḭ̄n̄ i mbée. Dan ń nin̄ a̰a̰n̄ yá̰a̰ anī, ɔrə̄n̄ najə̄ i kə̄ nuú ngóy. Dan ń nin̄ a gāngə̄n̄ sarya anī, a̰a̰n̄ yá̰a̰ unjə̄ alé.

⁸ Dɔ tábəl gə̄ malang i tōmbə̄! Yá̰a̰ malang i kə́ yḛr!

⁹ Ngé ka̰ȳ yá̰a̰ gə̄ ń noō dəjen̄ najə̄ ədan̄ na: Ijai ndigə i ndóō i náā yá̰a̰? I náā n ni ɔjən kum najə̄ kɔrə̄n gə̄ ní? I ngáń kə́ kɔr̄də́ ta mba tə́ ngɔr ɓáý gə̄ a? I ngáń kásə̄ gə̄ kə́ ə́ya̰n̄ mba kó̰ó̰də́ i ngɔr ɓáý gə̄ a?

¹⁰ Ōōī najə̄ ń a ɔr̄ ní: Bababa, bababa, Dadada, dododo!

¹¹ I beé ní, ngɔlaā Kɔ́ɔ̄ɓē a ɔr̄ najə̄ kə gír de gə̄ ń toō i kə ta tə̄rāá, i kə najə̄ gə̄ kə́ nin̄ gerə̄n̄ kum alé.

¹² Tá i kə́ ni ədadə́ kété na: Loo ń toō i loo kə́ loo to lɔm tū tə́. Deē ń kɔr rāān ní, ə́ya̰in̄ ādī taā koō. Loo ń toō i loo kə́ loo to jəke tū tə́. Banī nin̄ ndigən̄ koō alé.

¹³ I tām̄ najə̄ ń toō tə́ n Kɔ́ɔ̄ɓē a ədadə́ tītə̄ ń toō beé ō ní: Bababa, bababa, dadada, dododo! Loo ń noō tə́ dan ń a njə̄rān̄ anī, a əsōn̄ gagəra ndaa ō, kə̄ngādə́ a tetə ō, a əsōn̄ kum gūmbə̄ tə́ ō, a əhɔn̄də́ dəngáy ō.

Mbal̄ kə́ kíĺ kújə́ tə́

¹⁴ I beé ní, sḭḭ̄ ngé mbóo kə de gēé gə̄, sḭḭ̄ ń i ngé kɔr no gír de kə́ Jerusalem gə̄ ń toō ní, ōōī najə̄ yā Kɔ́ɔ̄ɓē:

¹⁵ Sḭḭ̄ ə́daī na: J-ənī ndūjí j-adə̄ naā kə yoó. J-əndā jījí gír makətūbə̄ tə́ j-adə̄ naā kə de kə́ ɓádá gēé. Dan ń yá̰á̰ kə́ a nujə loo a rāā yā rāā yá̰a̰ anī, a reē loojí alé. Tām̄ sor̄ i yá̰á̰ kə́ j-a jə-ndi gírí, yá̰á̰ kə́ gōtə́ aĺ i loo ɓɔ̄ɔ̄ rɔ̄ yājí.

¹⁶ I tām̄ najə̄ ń toō tə́ n najə̄ yā Kɔ́ɔ̄ɓē Nə́ɓā n toó ní: M-ə̄ndā mbal̄ nja kújə́ kógə̄ḿ kə́ ngan̄g ngá̰ý Siyo̰ tə́, i mbal̄ kógə̄ḿ kə́ kəla rāān bo tɔȳ yā madə̄ gə̄ malang, əndān̄ mbal̄ ní adə̄ ndi ngan̄g. Deē ń a ndə̄nā rɔ̄n kadə tə́ ní, a əsō alé.

¹⁷ Yá̰á̰ kə́ súmūú i yá̰a̰ mbɔ̄jə́ yá̰a̰ yāḿ, yá̰á̰ kə́ gōtə́ i kəlā yāḿ kə́ gində̄ pəlɔm i ta tə́. Man̄ kə́ edə kə kɔ̄sɔ̄ɔ́ a un yá̰á̰ gól̄ loo ń ā ī-ndiī gírí ní yā kaw̄ń kɔ̄ɔ́, loo ń ā ī-ɓɔ̄ɔ̄ rɔ̄sí tū tə́ ní man̄ a taā kɔ̄ɔ́.

¹⁸ A gāngə̄n̄ madə̄ naā yāsí ń ə́hɔī kə yoó ní kɔ̄ɔ́, ndūsí ń ə̄nī ādī naā kə de kə́ ɓádá gēé ní a to gotoó alé. Dan ń yá̰á̰ kə́ tɔ̄r̄ a rāā yā rāā yá̰a̰ anī, a rējə̄n̄sí kɔ̄ɔ́.

¹⁹ Ni a mān̄ dəloí kə ndɔ̄ gə̄ malang, a mān̄ kadaá ō ndɔ̄ɔ́ ō. Kə dɔ mānən gə̄ malang ń noō ní, ni a ɔysí yā kaw̄ sesí. Dan ń de gə̄ a gerə̄n̄ kum najə̄ yān anī, ɓōĺ a tɔ̄l̄də́ kɔ̄ɔ́.

²⁰ A̰á̰ā̰, tītə̄ ń gōsə̄ najə̄ ədań ní, tə̄rá a dūú ngá̰ý adə̄ a asə kəto deē alé, bájo a dūú ngá̰ý adə̄ a asə kadə̄ deē ənī dɔn tə́ alé.

²¹ Kɔ́ɔ̄ɓē a rāā yá̰á̰ kógə̄ḿ tītə̄ ń rāań dɔ mbal̄ Perasim tə́ ní. Wōn̄g a rāān adə̄ ni a ndew tītə̄ ń ndewń wól loo kə́ Gabaon tə́ ní, yā rāań yá̰á̰ kógə̄ḿ ō, yā rāań kəla yān ō. Banī yá̰á̰ ń ni-rāā ní ɔr kum ngá̰ý, kəla ń ni-rāā ní i kəla kə́ rāā jóo alé!

²² I beé ní, ī-dəbaī ta mbóo kə deē yāsí. Ré i beé aĺ anī, súĺ yāsí gə̄ a ndɔ́tə̄n̄ kum kə̄ rɔ̄ naā tə́ kadə̄ gō a ngan̄g tɔȳ kə́ kété ɓáý. A̰á̰ā̰, Kɔ́ɔ̄ɓē Nə́ɓā kə́ bo kə́ tɔ́gən i ngá̰ý ədam̄. Ni un ndūn yā nujə ɓē kə taá malang kɔ̄ɔ́.

Kum kedə̄ yā ngé ndɔr̄ gə̄ ō, yā Nə́ɓā ō

²³ Ī-teēī mbīsí ōōīń najə̄ yāḿ! Ə̄ndāī kumsí gír najə̄ kɔrə̄ḿ gə̄ tə́ majə!

²⁴ Nge ndɔr̄ ń gḛy dubə̄ kōō ní, a un kum mbang yān malang yā ndɔrə̄ń alé, yā kɔrə̄ń ɓaȳ aĺ ō, yā tɔ̄ɔń nán̄g ta kɔsə aĺ ō.

²⁵ Ba ta kəga dɔ ní, ni a jɔ̄r̄yɔ̄ nán̄g kadə̄ gidə asə naā. Gō tə́ anī, a dubə̄ yá̰a̰ kum tá̰a̰ gə̄ kə́ tītə̄ nigel ō, kumḛ̄ḛ ō, kutə̄ gō anī a dubə̄ kōō gémē ō, tḛ̄ȳ ō, kōō ɔ́rjə ō, ta tɔ̄l̄ ta anī i kōō kə́ rang n a dubə̄ kə gō kadə ndɔrɔ́ ní.

²⁶ I Nə́ɓā yān n ndóōn loo rāā yá̰a̰ tītə̄ ń noō ō, ɔjən yá̰a̰ adə̄ ger̄ ní ō.

²⁷ Deē a səɓā yá̰a̰ kum tá̰á̰ ń rīn na i nigel ní kə yá̰a̰ səɓā kōō ń a ndɔ́rə̄n̄ dɔ kōō tə́ ní alé. Deē a rāā nja púsə kadə̄ agə dɔ yá̰a̰ kum tá̰á̰ ń rīn na i kumḛ̄ḛ ní tə́ alé. Banī a əndan̄ kádə kōō kə́ dūú gə̄ ń noō i kə kāgāá.

²⁸ Dan ń nge ndɔr̄ a səɓā kōō gémē yā kɔr̄ kumən tayā ní, ni a ənda dɔ kōō gémē kanjə̄ dəba alé. Ni-adə̄ nja púsə gə̄gē, dā̰ gə̄ gə̄gē njə̄rān̄ dɔ tə́, banī rējə̄n̄ kum gémē gə̄ alé.

²⁹ Kɔ́ɔ̄ɓē kə́ bo kə́ tɔ́gən i ngá̰ý ní, loo rāā kəla kə́ tītə̄ ń noō ḭḭ i rɔ̄n tə́ ō. Ni i nge kadə̄ kɔjə̄ kə́ majə ngá̰ý. Ni ger̄ rāā yá̰á̰ ngá̰ý.