IJAI 27 - Bibəl ta Sar̄

Dā̰ kə́ majaĺ ngá̰ý kə́ kum bā bo gə̄ tə́ ní, tetənən̄ rɔ̄ɔ̄

¹ Ndɔ̄ ngeé ń noō tə́ ní, Kɔ́ɔ̄ɓē a un kaskar yān kə́ bo ō, to ɓōĺ ō, ngan̄g ō, yā rāań yá̰á̰ kə́ tōr̄ kə Lebiatan ń i lī kə́ nge ka̰ȳ ní, Lebiatan ń i lī kə́ kumən edə̄ ngá̰ý ní. Ba dā̰ kə́ majaĺ ngá̰ý kə́ kum bā bo tə́ ngeé ń toō ní a tɔ̄lən.

Kɔ́ɔ̄ɓē ō, kāgə̄ nduú yān ō

² Ndɔ̄ ngeé ń noō tə́ ní, ənī pā tām̄ yā kāgə̄ nduú kə́ kasən nel̄ ngá̰ý tə́.

³ Mā Kɔ́ɔ̄ɓē, mā i nge ngɔ̄m̄ kāgə̄ nduú ngeē ń toō. m̄-rāā man̄ gírí i kə kum mbangən gēé malang. m̄-ngɔ̄mən kadaá ō, ndɔ̄ɔ́ ō, yā kadə̄ deē kógə̄ḿ rāān yá̰á̰ kə́ majaĺ alé.

⁴ Wōn̄g rāām̄ seneé to̰ alé. Ba ré m-ə́ngé túpə kōn̄ gə̄ anī, m-ā m̄-rɔ̄ɔ̄də́ ō, m-ā m-ə́la hor dɔdə́ tə́ ō.

⁵ Ba ré de kógə̄ḿ əla dɔn gírə́ḿ tə́ kadə̄ m̄-ngɔ̄mən anī, ni a əndā najə̄ naā tə́ seḿ kadə̄ lɔm to dɔ dáńjí tə́, a̰á̰ā̰, ni a əndā najə̄ naā tə́ seḿ yā kadə̄ lɔm to.

Māȳ rɔ̄ yā Israel, ɓē kə́ de gə̄ əya̰n̄ kɔ̄ɔ́

⁶ Kum mbang gə̄ ń a reēn̄ noō ní, gír deē yā Jakob gə̄ a tə́lan̄ ngəradə́, Israel a sitə ō, a hútə̄ ō. Ni a rāā kadə̄ kanə̄n gə̄ a taān̄ loo dɔ nang tə́.

⁷ Kɔ́ɔ̄ɓē ənda de gə̄ kə́ dan gír deē yān gə̄ tə́ tītə̄ ń ni əndań ngé tə́ndādə́ gə̄ ní a? Ni-tɔ̄l̄də́ tītə̄ ń ni tɔ̄ləń ngé tɔ̄l̄də́ gə̄ ní a?

⁸ I beé alé, banī ni əndadə́ i mbée tām̄ majaĺ yādə́ tə́ kə ta kūl̄ tə̄ɓādə́ kɔ̄ɔ́, kə ta kūl̄ kəla sedə́ dɔ ɓē kə́ rang tə́ dɔ gúú tə́. Ni ɔydə́ kɔ̄ɔ́ kə ta kūl̄ koōn kə́ teē kə tɔ́gɔ́, tītə̄ kə́ i kə néĺ kə́ ngan̄g kə́ dūn̄ tə́ beē.

⁹ Loo kun ń a unən̄ yá̰a̰ rāā kə́ gōtə́ aĺ yā Jakob kɔ̄ɔ́ ní n toó, mā̰ȳ rɔ̄ kə́ dɔ yá̰a̰ rāān kə́ gōtə́ aĺ tə́ a ojə i yá̰á̰ ń toō: A tɔ̄ɔ̄n̄ mbal̄ gə̄ malang kə́ dɔ loo tun̄ yá̰a̰ gə̄ tə́ kɔ̄ɔ́, tītə̄ kə́ i yā rāā ndujə̄ tə́ beē. Kāgə̄ ɓesə̄ gə̄ kə́ yā ɓōĺ gidə gə̄ ō, loo róō ndujə̄ yá̰á̰ kə́ kotə majə gə̄ ō ní, a ran̄ dɔɔ́ to̰ alé.

¹⁰ Ɓē ń ngɔ̄mə̄n̄ majə ngá̰ý ní, deē i kemeé to̰ alé. Kemən i karī ō, əya̰nən̄ kɔ̄ɔ́ tītə̄ dəla loo beé ō. Ngán man̄g gə̄ a reēn̄ ko̰ó̰ i loo ń noō tə́ ō, a ɔrə̄n̄ koō i loo ń noō tə́ ō, əsan̄ mbī túpə́ kámbə gə̄ ō.

¹¹ Dan ń ta jī kāgə̄ gə̄ a tutən̄ anī, nin̄ tétə̄n̄ ō, dəyá̰ gə̄ reē əlan̄ hor dɔ tə́ kɔ̄ɔ́ ō. Gír de gə̄ ń toō gerə̄n̄ kum yá̰a̰ alé. I tām̄ najə̄ ń toō tə́ n kum nge kəndān o̰o̰n tām̄ yān tə́ aĺ ní, nge rāān mā̰ȳ rɔ̄n dɔn tə́ alé.

De gə̄ ń ɔyn̄də́ aw̄n̄ sedə́ dɔ ɓē kə́ rang tə́ dɔ gúú tə́ ní, tél reēn̄

¹² Ndɔ̄ ngeé ń noō tə́ ní, Kɔ́ɔ̄ɓē a ənda dɔ kōō gə̄, a əla gír i bā Opəratə tə́ bátə́ ngōn̄ man̄ dɔ mbal̄ kə́ Ejiptə tə́. Ba sḭḭ̄ Israel gə̄, ni a kə̄tósí kógə̄ḿ kógə̄ḿ tītə̄ loo kə̄tó dɔ kōō beé.

¹³ Ndɔ̄ ngeé ń noō tə́ ní, a kɔ̄rə́n̄ tōw̄ gajə batə̄ kə́ bo kadə̄ de gə̄ oōn̄. Loo ń noō tə́ ngé gə̄ ń tadə́ tḭ̄ḭ̄ kɔ̄ɔ́ dɔ nang kə́ Asiri tə́ ní, ngé gə̄ ń tə̄ɓān̄də́ kɔ̄ɔ́ adə̄ aw̄n̄ dɔ nang kə́ Ejiptə tə́ ní, a reēn̄ malang. Nin̄ a reēn̄ yā kɔsə kejədə́ nang tə́ no Kɔ́ɔ̄ɓē tə́, dɔ mbal̄ bo kə́ táĺ tə́, kem ɓē kə́ Jerusalem tə́.