IJAI 26 - Bibəl ta Sar̄

Ɓē bo kə́ tɔ́gən to ō, ɓē kə́ deē asə kugə̄ tū tə́ aĺ ō

¹ Ndɔ̄ ngeé ń noō tə́ ní, de kə́ Juda a ənīn̄ pā: J-awī kə ɓē kə́ de gə̄ rɔ̄ɔ̄n̄ dɔ tə́ majə. Kɔ́ɔ̄ɓē ənī ndogə̄ mbal̄ gə̄ jōó dɔ tə́ adə̄ gīr̄ gidə əla ta naā tə́, yā ngɔ̄məńjí.

² Ī-teēī ta róbə gə̄, ə́ya̰ī nápar de gə̄ ń oōn̄ ta Nə́ɓā ní, nápar de gə̄ ń ran̄ dɔ ndūdə́ tə́ seneé ní, ādə̄ udən̄.

³ Ni əya̰ yá̰á̰ kógə̄ḿ adə̄ nujə kemən alé. Kɔ́ɔ̄ɓē, ḭ̄ ādə̄n lɔm, tām̄ ni ənī kemən adī.

⁴ Ə̄nī kemsí ādī Kɔ́ɔ̄ɓē kə́ njɔ́ḿ gə̄ tə́. A̰á̰ā̰, ādī Kɔ́ɔ̄ɓē, ni ń i mbal̄ kə́ ngan̄g kə́ to ngándáńg ní.

⁵ Ni-rāā ngé ndi ɓē loo kə́ kḭḭ kə̄ dɔɔ́ gə̄ tə́ adə̄ tə́sōn̄. Ni mbəre ɓē bo kə́ de gə̄ ngɔ̄mə̄n̄ majə ngá̰ý ənīn. Ni-tél seneé bátə́ ugə̄ seneé nang tə́, ənīn kum bumbə́rú tə́.

⁶ De kə́ nin̄ i yá̰á̰ kógə̄ḿ aĺ bátə́ gə̄ a rējə̄nən̄, ngé ndoō gə̄ a njə̄rān̄ dɔn tə́, a rējə̄nən̄.

Ndɔ̄ȳ kə́ kum mbang kə́ ta tɔ̄l̄ ta tə́

⁷ Kɔ́ɔ̄ɓē, róbə yā nge koō taí i róbə́ kə́ súmūú. Ḭ̄ ī-rāā róbə́ kə́ ra súmūú tām̄ yān tə́.

⁸ A̰á̰ā̰, Kɔ́ɔ̄ɓē, j-əndā tɔ́gə́jí i dɔí ḭ̄ tə́, dɔ róbə́ ń ī-mēr̄jí kun tə́ ní. Yá̰á̰ ń jə-gḛy ní i kógə̄ḿ beē, i ɓāríī kadə̄ ī-rāā sejí, i gír̄ dɔí tə́.

⁹ Ndɔ̄ɔ́ anī, mā m̄-sāāī kə ngarā̰ kemḿ ō. Dan ń ún sarya gāngīí gə̄ ī-rāań kəla dɔ nang tə́ anī, de kə́ dɔ nang tə́ gə̄ malang ndóōn̄ rāā yá̰á̰ kə́ nelī ō.

¹⁰ Ba ré deē o̰o̰n tām̄ yā de kə́ majaĺ gə̄ tə́ anī, nin̄ a ndóōn̄ rāā yá̰á̰ kə́ nelī alé. Kem ɓē ń deē rāā yá̰a̰ majə tū tə́ ní gə̄gē, nin̄ rāān̄ yá̰á̰ kə́ majaĺ, Kɔ́ɔ̄ɓē, nin̄ a̰a̰n̄ kadə̄ ḭ̄ i de kə́ bo alé.

¹¹ Kɔ́ɔ̄ɓē, ḭ̄ ún jīí kə̄ ɓir̄ dɔɔ́ yā kəndań ndéy, ba nin̄ a̰a̰n̄ jīí ní alé. Banī nin̄ a a̰a̰n̄ rɔ̄ɔ̄ ń ī-rɔ̄ɔ̄ dɔ gír deē yāí gə̄ tə́ kə táŕ kə́ o̰o̰ hor ngá̰ý ní. Loo ń noō tə́ rɔ̄də́ a sɔl̄də́ ngá̰ý. Hor ń ī-rāā tām̄ yā madə̄ ba̰ā̰í gə̄ tə́ ní a o̰o̰də́.

¹² Kɔ́ɔ̄ɓē, ḭ̄ ādə̄jí lɔm, yá̰a̰ malang ń j-əla gír rāā ní, i ḭ̄ n i nge rāā kadə̄ reē udə gíŕ kə́ rɔ̄ tə́ ādə̄jí ní.

¹³ Kɔ́ɔ̄ɓē Nə́ɓā yājí, ngol kə́ rang gə̄ o̰ō̰n̄ ɓē dɔjí tə́ ba i ḭ̄ alé. Banī deē ń jə-rɔȳn ní i ḭ̄ ngóy.

¹⁴ Ngol gə̄ ngeé ń toō oyn̄ kɔ̄ɔ́, nin̄ a télən̄ yā reē to̰ alé. Nin̄ i ndíl de gə̄ kɔ̄ɔ́, a télən̄ yā kḭḭ dɔɔ́ gogə́ to̰ alé. Ḭ̄ ī-rāā yá̰a̰ yā nujəńdə́, yá̰a̰ gə̄ ń ton̄ kadə̄ əgań kem deē gə̄ dɔdə́ tə́ ní, ḭ̄ ī-rāā adə̄ yá̰a̰ gə̄ ní gətóon̄ kɔ̄ɔ́ malang.

¹⁵ Kɔ́ɔ̄ɓē, ī-rāā adə̄ kutə nápar deē yāí gə̄ i ngá̰ý, ḭ̄ ɔ́jə kɔsə gɔn yāí, ḭ̄ ī-rāā adə̄ nápar deē yāí gə̄ tɔgən̄, ḭ̄ ɔ́jə kɔsə gɔn yāí, ḭ̄ ī-tél kə dɔ nin̄ loo gə̄ yā ɓēé kə̄ gogə́ malang.

¹⁶ Kɔ́ɔ̄ɓē, dan ń wur kɔl əsō dɔjí tə́ anī, jə-tūr̄ rɔ̄jí kum kə̄ rɔ̄í tə́. Dan ń ḭ̄ ə́ndá ndéy anī, j-əda ndɔ̄ȳ gə̄ kə̄ nja naā tə́ kə ndūjí kə́ tél kə̄ nang tə́.

¹⁷ Kɔ́ɔ̄ɓē, kété ní jə-ra noí tə́ i tītə̄ dəyá̰ kə́ a rāā yā kojə ngōn̄ beé. Dəyá̰ ní a̰a̰ tápə̄ ō, əga kɔŕ tɔdɔ̄ rɔ̄n tōrə̄n ō.

¹⁸ Majə kadə̄ jḭḭ̄ j-ojiī de kə́ ndi kə kumneé ō, banī j-ojiī i nél. Jḭḭ̄ jə-reēī kə kajaá j-adī dɔ nang alé, j-adīin̄ de kə́ kijə gə̄ kadə̄ ndin̄ tū tə́ alé.

De kə́ koy gə̄ ndólə̄n̄ ō, əndan̄ ngé tɔ̄l̄ de gə̄ ō

¹⁹ Gír deē yāḿ gə̄, de kə́ koy yāsí gə̄ a télən̄ yā ndi kə kumdə́ gogə́, a ḭḭn̄ yā ra dɔɔ́ gogə́. Ngé to kum bumbə́rú tə́ gə̄ a ndólə̄n̄ ō, a əgan̄ kɔŕ rɔ̄nel̄ ō. Kɔ́ɔ̄ɓē a əla kə tal kógə̄ḿ kə́ i loo kə́ unjə̄ kow yā kadī, ba kə ta kūl̄ tal ngeé ń toō ní, dɔ nang a rāā kadə̄ de kə́ koy gə̄ tél ndin̄ kə kumdə́ gogə́.

²⁰ Gír deē yāḿ gə̄, údiī kújú ɓēé loosí ba ūtī ta róbə ī-gāngīneé gíŕsí kɔ̄ɔ́. Ī-ɓɔ̄ɔ̄ rɔ̄í kum ngán mbang gə̄ sḛý ādə̄ wōn̄g yā Kɔ́ɔ̄ɓē mānəń.

²¹ Kɔ́ɔ̄ɓē a teē i mbée kɔ̄ɔ́ kem kújə yān tə́ kə̄ ndágá. Ni a ənda de kə́ dɔ nang tə́ gə̄ tām̄ yá̰a̰ rāādə́ kə́ gōtə́ aĺ gə̄ tə́. Dɔ nang a əya̰ mósə́ kə́ a̰ȳ nang tə́ yā kadə̄ de gə̄ a̰a̰n̄, de gə̄ ń tɔ̄lə̄n̄də́ ní, ni a ɓɔ̄ɔ̄də́ to̰ alé.