IJAI 25 - Bibəl ta Sar̄

Kɔ́ɔ̄ɓē i loo ɓɔ̄ɔ̄ rɔ̄ yā ngé ra dɔ ndūdə́ tə́ gə̄ tə́

¹ Kɔ́ɔ̄ɓē, ḭ̄ i Nə́ɓā yāḿ. M-ā m-ə́ga kɔŕ yā kɔsəń gɔn rīí. A̰á̰ā̰, yá̰á̰ kə́ majə ngá̰ý gə̄ ń ḭ̄ ī-núm̄ ní, ḭ̄ ī-rāā yá̰a̰ gə̄ ní adə̄ reē udən̄ gíŕ kə́ rɔ̄ tə́. Yá̰a̰ gə̄ ní ran̄ ngan̄g i jóó ngá̰ý, nin̄ ngangə̄n̄ ō, ton̄ kum gotədə́ beē ō.

² Ḭ̄ ī-rāā ɓē ādə̄ tél i kɔkərɔ kə́ kán̄ dɔ naā tə́ bing. Ɓē ngeé ń toō ń ngɔ̄mə̄n̄ majə ní, i kə́ tétə̄ nang tə́ kɔ̄ɔ́. Ɓē kə́ ngan̄g ngá̰ý gə̄ yā tə̄rā gə̄ tél i ɓē to̰ alé, deē a tél yā rāān gogə́ to̰ aĺ i kə́ bátə́ gə̄ tə́.

³ I tām̄ najə̄ ń toō tə́ n gír de kə́ ngan̄g gə̄ ɔsən̄ gɔnií ní, ɓē gə̄ yā nápar de gə̄ kə́ ngé rāā yá̰a̰ kə dɔ́nɔ́ gə̄ ɓōlə́n̄ gidií ní.

⁴ Tām̄ ḭ̄ ī-rɔ̄ɔ̄ dɔ ngé tɔ́gə gətóo gə̄ tə́ kə ngangá, dan ń wur kɔl əsōń dɔ ngé ndoō gə̄ tə́ anī, ḭ̄ ī-ngɔ̄m̄də́. Ḭ̄ i loo kə́ yā kadə̄ deē ndi gírí najə̄ man̄ kə́ a edə tə́, ḭ̄ i ndíĺ kə́ deē ndi gírí najə̄ yā mban̄g tə́. A̰á̰ā̰, wōn̄g yā ngé rāā yá̰a̰ kə dɔ́nɔ́ gə̄ tə́ i tītə̄ man̄ kə́ edə dɔ ndogə̄ mbal̄ tə́ kə néĺ kə́ əla kə ngangá ngá̰ý beē.

⁵ To i tītə̄ kəngā mbang kə́ loo kə́ mángá tə́ beē. Ḭ̄ ī-rāā adə̄ kōō tə̄rā gə̄ ń ɓār̄ ní dəba. Tītə̄ ń ndíl kil̄ man̄ rāań adə̄ loo kə́ təngā tél sɔl̄ sḛ́ý ní, ḭ̄ ī-rāā adə̄ pā tetə rɔ̄ɔ̄ yā ngé rāā yá̰a̰ kə dɔ́nɔ́ gə̄ dəba.

Yá̰a̰ kəsa kə́ tām̄ yā gír de gə̄ tə́ malang

⁶ Kɔ́ɔ̄ɓē kə́ bo kə́ tɔ́gən i ngá̰ý a tə́ngā dā̰ kə́ yḛmbə tām̄ yā gír de gə̄ tə́ malang ō, a adə̄də́ kasə nduú kə́ majə dɔ tə́ ō, a əsan̄ i dā̰ kə́ ngəra aĺ ō, yḛmbə ō, a a̰ȳn̄ i kasə nduú kə́ kumən unjə̄ yáŕ yáŕ ō.

⁷ Kūbə̄ kəhɔ ndoō ń ɓír̄ gír de gə̄ malang ní, kūbə̄ yo ń ənīn̄ dɔ nápar de gə̄ tə́ malang ní, ni a ɔr̄ kɔ̄ɔ́ i dɔ mbal̄ ń toō tə́.

⁸ Ni a nujə yo kɔ̄ɔ́ i kə́ njɔ́ḿ gə̄ tə́. Kɔ́ɔ̄ɓē Nə́ɓā a ɔl̄ man̄ nōō kə́ kum de gə̄ tə́ malang kɔ̄ɔ́. Ni a un rɔ̄sɔl̄ kɔ̄ɔ́ dɔ gír deē yān gə̄ tə́ kem ɓēé malang. Yá̰á̰ ń Kɔ́ɔ̄ɓē ənī ndūn yā rāā ní n noó.

Rɔ̄nel̄ kə́ tām̄ yā Israel tə́ ō, loo kə́ nujə sák sák gidə kógə̄ḿ kə́ tām̄ yā Moab tə́ ō

⁹ Ba ndɔ̄ ngeé ń noō tə́ ní, a ədan̄ na: I ni n i Nə́ɓā yājí ní. Kété ní j-əndā kemjí i dɔn tə́ ō, ni ajəjí ō. A̰á̰ā̰, kété ní j-əndā kemjí i dɔ Kɔ́ɔ̄ɓē tə́. Ādə̄ jə-ndāmī ndām̄ rɔ̄nel̄, ādə̄ jə-rāāī rɔ̄nel̄: Ni ajəjí!

¹⁰ Jī Kɔ́ɔ̄ɓē ngɔ̄m̄ mbal̄ Siyo̰. Banī rējə̄n̄ Moab gotə loo kə́ kógə̄ḿ beē tə́ tītə̄ mu kə́ rējə̄n̄ kem bəlo ɓōkə́ yedə̄ dā̰ gə̄ tə́ beē.

¹¹ Loo ń noō tə́ ni sə́ra jīn kə̄ kété ō, téləń kə̄ rɔ̄n tə́ ō, tītə̄ nge kal man̄ beé. Ni-əhɔ rɔ̄n tɔgə ngá̰ý ɓá tā, banī Kɔ́ɔ̄ɓē tél kə kɔjə rɔ̄ yānneé kə̄ nang tə́.

¹² Ḭ̄ Moab, ndogə̄ mbal̄ yāí gə̄ ń ā ī-rɔ̄ɔń dɔ rɔ̄í tə́ ní, nin̄ ń ngɔ̄mīn̄ majə ngá̰ý ní, Kɔ́ɔ̄ɓē tetədə́ nang tə́, ni mbə́rē tə́nīdə́ kɔ̄ɔ́, tə́nīdə́ nang tə́ kum bumbə́rú tə́.