IJAI 24 - Bibəl ta Sar̄

De gə̄ malang kə́ dɔ nang tə́ ní, a gāngə̄n̄ sarya dɔdə́ tə́ ō, a ajən̄ Israel ō ( 24—27 ) Nujən̄ dɔ nang kə taā malang

¹ Kɔ́ɔ̄ɓē nujə dɔ nang, ni ɔy yá̰a̰ kənge kə́ tū tə́ dɔ gúú tə́. ni bugə́jū loo dɔ nang tə́ kɔ̄ɔ́, tə̄ndā de kə́ dɔ nang tə́ gə̄ tḭ̄ḭ̄də́ kə̄ loo gə̄ tə́.

² I yá̰á̰ kə́ kógə̄ḿ beē n rāā nge tun̄ yá̰a̰ ō, nge tun̄ yá̰a̰ aĺ ō, kɔ́ɔ̄ ɓəlo ō, ɓəlo ō, kɔ́ɔ̄ kújə́ kə́ dəyá̰ ō, nge kəla kə́ dəyá̰ ō, nge kigə yá̰a̰ ō, nge mang yá̰a̰ ō, nge kadə̄ yá̰a̰ loo tə̄nā tə́ ō, nge tə̄nā yá̰a̰ ō, de kə́ kə̄rā i dɔn tə́ ō, de kə́ yá̰a̰ yān i dɔ deē tə́ ō ní.

³ Nujən̄ dɔ nang sák sák, ɔyn̄ yá̰á̰ kə́ tū tə́ malang dɔ gúú tə́, tām̄ i Kɔ́ɔ̄ɓē n gḛy kadə̄ i tītə̄ ń noō ní.

⁴ Dɔ nang əhɔ ndoō, ni-əsō ngísə kɔ̄ɔ́, yá̰a̰ malang kə́ dɔ nang tə́ nujə kɔ̄ɔ́, əsō ngísə kɔ̄ɔ́. I kum mbang ń nujənə̄ń dɔ nang ní n nujənə̄ń dɔ rā̰ ō ní.

⁵ A̰á̰ā̰, deē ndul gə̄ rāān̄ dɔ nang adə̄ tél kə́ yḛr, nin̄ mbātə́n̄ rāā yá̰á̰ ń Kɔ́ɔ̄ɓē ədadə́ kadə̄ rāān̄ ní, nin̄ kídə̄n̄ jī bēl̄ loo rāā yá̰a̰ yān gə̄, madə̄ naā ń ɓoodə́ naā tə́ kə Nə́ɓāá kə́ njɔ́ḿ gə̄ tə́ ní, nin̄ gāngə̄n̄ madə̄ naā ní kɔ̄ɔ́.

⁶ I tām̄ najə̄ ń toō n ndɔ̄ĺ yā Nə́ɓā əsa dɔ nang kɔ̄ɔ́ ō, de kə́ tū tə́ gə̄ əngen̄ ndéy ō ní. Nin̄ oyn̄ ō, gotədə́ na̰y i sḛ́ý beē ō.

⁷ Kasə nduú kə́ kijə əhɔ ndoō, tɔ́gə kāgə̄ nduú gətóo kɔ̄ɔ́, ngé gə̄ ń kété kemdə́ nel̄də́ ngá̰ý ní, a nōōn̄ i mbée.

⁸ Kōō kɔdə rɔ̄nel̄ dəba, loo rɔ̄nel̄ kə́ ká̰a̰ de gə̄ ɓār̄ tū tə́ gijə gijə gətóo kɔ̄ɔ́, kənde rɔ̄nel̄ ń ugən̄ ní, gírən gān̄g kɔ̄ɔ́.

⁹ De gə̄ ənīn̄ pā a̰ȳn̄neé kasə nduú to̰ alé, to tītə̄ kə́ kasə kə́ gan̄g gə̄ atə̄n̄ kɔ̄ɔ́ beé tām̄ yā ngé ka̰ȳn gə̄ tə́.

¹⁰ Ɓē bo ń de gə̄ i ngá̰ý tū tə́ aĺ ní əsō, ta kújə gə̄ malang ran̄ i kə kutú, deē asə kudə kemeé to̰ alé.

¹¹ De gə̄ nōōn̄ kasə kə́ kum róbə kɔsə gə̄ tə́, ədan̄ na kasə na gətóo, rɔ̄nel̄ gətóo kɔ̄ɔ́, tə̄ɓān̄ rɔ̄nel̄ kɔ̄ɔ́ kem ɓēé.

¹² I kɔkərɔ kə́ kán̄ dɔ naā tə́ gə̄ ngóy n ton̄ kem ɓēé ní. Tetən̄ ta róbə́ kə́ yā kudəń kə̄ kem ɓēé kɔ̄ɔ́, ta róbə́ ní nujə sák sák kɔ̄ɔ́.

¹³ A̰á̰ā̰, dɔ nang tə́, dan gír de gə̄ tə́ ní, i yá̰á̰ kə́ sḛ́ý beē ngóy n a na̰y ní. A to i tītə̄ gotə kan̄ kāgə̄ olibə gə̄ kə́ dɔ kāgə̄ olibə gə̄ tə́, gō kəja kan̄ kāgə̄ olibə gə̄ tə́ beē, aláa a to i tītə̄ dɔ bəra kan̄ nduú kə́ gō gogə́ gə̄ kə́ deē a sāā gō kəja kan̄ kāgə̄ nduú gə̄ tə́ beē.

Rɔ̄nel̄ kə́ to kété no ndɔ̄ rɔ̄nel̄ tə́

¹⁴ Ngé gə̄ ń teēn̄ ta yo tə́ ní, unən̄ ndūdə́ kə̄ dɔɔ́, nin̄ ənīn̄ pā bo yā Kɔ́ɔ̄ɓē. Nin̄ teēn̄ kə̄ kem ɓē gə̄ kə́ no ɓē tə́ a reēn̄ kə kɔŕ rɔ̄nelēé tadə́ tə́:

¹⁵ Ɔ́siī gɔn Kɔ́ɔ̄ɓē, gō nang kə́ gír ɓē tə́, ə̄nīī pā rīn dɔ dor̄ loo gə̄ kə́ kum bā bo tə́ tə́ ō, ə̄nīī pā rī Kɔ́ɔ̄ɓē, Nə́ɓā yā Israel!

¹⁶ J-oō pā ń toō ta ngóy dɔ nang tə́: Kɔsə gɔn i yā Nə́ɓā kə́ nge rāā yá̰á̰ kə́ gōtə́! Banī mā m-ə́da na: Taḿ tḭ̄ḭ̄ kɔ̄ɔ́, taḿ tḭ̄ḭ̄ kɔ̄ɔ́, i yá̰á̰ kə́ to kum kaȳ aĺ kə́ ba̰ý beē tām̄ yāḿ mā tə́! Ngé tél kɔ̄ɔ́ gō de gə̄ tə́ gə̄ teēn̄ kə gír madə̄də́ gēé dɔɔ́. Teē kə gír naá dɔɔ́!

¹⁷ Ɓōĺ ō, bəlo kə́ ɗúú ngá̰ý ō, gūmbə̄ gə̄ ō, yá̰a̰ malang ń noō ní i tām̄ yāsí tə́, sḭḭ̄ de kə́ dɔ nang tə́ gə̄.

¹⁸ Nge ka̰ȳ kɔŕ ɓōĺ a əsō gír bəloó. Ré ni asə teē bəloó kɔ̄ɔ́ anī, a əsō kum gūmbə̄ tə́. Ta ko̰rō̰ kújə gə̄ kə́ dɔ rā̰ tə́ i kə́ teē ngá̰ý, dɔ nang kə taá malang ndew dɔ ngəran tə́.

¹⁹ Dɔ nang njar, ni tá̰ā̰, ni-əsō.

²⁰ Dɔ nang bḭ́ḭ̄ tītə̄ de kə́ nge kasə rāā beé, ni mbo̰y tītə̄ kújə́ kámbə́ kə́ nél rāān beé. Yá̰a̰ rāān kə́ gōtə́ aĺ ɔyn adə̄ teē əsō, ni a asə kḭḭ dɔɔ́ gogə́ alé.

Ta tɔ̄l̄ ta ɓē ko̰o̰ gə̄ ō, ta kəla gír ko̰o̰ ɓē yā Nə́ɓā ō

²¹ Ndɔ̄ ngeé ń noō tə́ ní, Kɔ́ɔ̄ɓē a rāā yá̰á̰ kógə̄ḿ kə́ tə́yō̰ gə̄ malang kə́ dɔ rā̰ tə́ ō, dɔ nang tə́ laā ɓáa ni a rāā yá̰á̰ kógə̄ḿ kə mban̄g gə̄ kə́ dɔ nang tə́ ō.

²² A kánə̄n̄də́ tītə̄ dəngáy gə̄ beé kem bəlo kógə̄ḿ kə́ bo tə́. A utə̄n̄ tadə́ kem kújə dəngáý kógə̄ḿ tə́. Ndɔ̄ ngá̰ý gō tə́ anī, i gáŕ kadə̄ nin̄ a ɔjən̄ yá̰a̰ rāādə́ gə̄.

²³ Rɔ̄ nāā a sɔlə̄n ō, rɔ̄ mbang a sɔlə̄n ngá̰ý ō. Tɔdɔ̄ i Kɔ́ɔ̄ɓē kə́ bo kə́ tɔ́gən i ngá̰ý ní n a ndi mban̄g Jerusalem, dɔ mbal̄ bo kə́ Siyo̰ tə́ ní. Kɔsə gɔn yān a ndə́lē ta kum kum kɔɔ̄ gə̄ kə́ kem ɓēé tə́.