IJAI 23 - Bibəl ta Sar̄

Dɔ nang kə́ Penisi nujə sák sák kɔ̄ɔ́

¹ Najə̄ yā ɓē kə́ Tir. Sḭḭ̄ to bo gə̄ kə́ dan ɓūl̄ bā bo gə̄ tə́, úniī pā yo. Nujən̄ ta kā̰ kə́ Tir kɔ̄ɔ́, kújə gə̄ gətóon̄ kɔ̄ɔ́. I dan ń nin̄ reē ugə̄n̄ dor̄ kə́ Sipər tə́ ní n ōōn̄ gotə najə̄ ní.

² Sḭḭ̄ ń ī-ndiī kadə bā tə́ ní, ī-ndiī tasí mbóo. Sḭḭ̄ ngé rāā gātə̄ gə̄ kə́ Sidon ń ə́laī ngámbang kəla yāsí gə̄ dan bā boó ní, ī-ndiī tasí mbóo.

³ Yá̰á̰ ń de gə̄ dubə̄n̄ kə gō kadə bā Nil ní, yá̰á̰ ń de gə̄ əjan̄ kə gō kadə bā Nil ní, kété i yá̰a̰ kənge yā ɓē kə́ Sidon. Kété ní, ɓē ní tél i súkə̄ yā nápar de gə̄.

⁴ Ḭ̄ ɓē kə́ Sidon, ḭ̄ ń i loo ɓɔ̄ɔ̄ rɔ̄ yā bā bo ní, ādə̄ rɔ̄í sɔlī. Tām̄ bā bo ɔr̄ najə̄ i beé: m̄-ndigə kadə̄ rɔ̄ḿ gə̄ tōr̄mə̄n̄ aĺ ō, m̄-ndigə kojə ngán gə̄ aĺ ō. m̄-ndigə kətō ngáń kə́ dəngam gə̄ aĺ ō, m̄-ndigə ngɔ̄m̄ ngáń kə́ dəyá̰ gə̄ kadə̄ tɔgən̄ aĺ ō.

⁵ Dan ń ɓē kə́ Ejiptə a oō gotə najə̄ noō anī, a ndew tītə̄ ndew ń ni ndew dan ń ni oō gotə yá̰á̰ ń rāā ɓē kə́ Tir ní beē.

⁶ Ə́ndaī bā bo ī-gāngī, āwī bátə́ ūgī Tarsis. Sḭḭ̄ de gə̄ ń ī-ndiī kadə bā tə́ ní, úniī pā yo.

⁷ Ɓē yāsí ń kété rɔ̄nel̄ i ngá̰ý kemeé ní, i ni n toó a? Ɓē kə́ jóó ngá̰ý ń toō ń kété əla de gə̄ loo kə́ sa̰y gə̄ tə́ kadə̄ aw̄ rāān̄ kújə gātə̄ gə̄ ní, i ni n toó a?

⁸ Kété ní ɓē kə́ Tir i ɓē kə́ nge nə̄ɓō de gə̄ jākā mbang gə̄. Kété ní ngé kigə yá̰a̰ yān gə̄ i ngán ngār gə̄. Kété ní ngé rāā gātə̄ yān gə̄ i de kə́ bo gə̄ kə́ dɔ nang tə́ laā. I náā n un ndūn yā nujə ɓē ń toō ní?

⁹ I Kɔ́ɔ̄ɓē kə́ bo kə́ tɔ́gən i ngá̰ý, i yā nujəń kɔjə rɔ̄ yā de gə̄ ń de gə̄ rɔȳn̄də́ ní, i yā téləń kə de kə́ bo kə́ dɔ nang tə́ laā gə̄ kə̄ nang tə́.

¹⁰ Ḭ̄ ɓē kə́ Tir, ī-ndɔr̄ dɔ nang tītə̄ gō nang kə́ bā Nil i tū tə́ beē, tɔdɔ̄ ta kā̰ā̰ yāí gətóo kɔ̄ɔ́.

¹¹ Kɔ́ɔ̄ɓē əla əla ɓōĺ kem bā bo tə́, ni-rāā adə̄ ɓē ko̰o̰ gə̄ ndewn̄. Loo kə́ ngan̄g ngá̰ý yā Kanaan gə̄ ń ngɔ̄mə̄n̄ majə ngá̰ý ní, ni-adə̄ ndūn kadə̄ nujənə̄ń kɔ̄ɔ́.

¹² Ni-əda na: Sḭḭ̄ de kə́ Sidon gə̄, ā ásiī rāā nāā to̰ alé, ī-toī tītə̄ ngōmandə kə́ deē sāān dɔ gúu tə́ beē. Ká ré sḭḭ̄ āwī ō, ī-gāngī bā bo āwī bátə́ ūgī dor̄ kə́ Sipər tə́ ō gə̄gē anī, nú gə̄gē ní, ā ásiī kɔr̄ koō alé.

¹³ Ādə̄ əga kemsí dɔ ɓē yā Babilon gə̄ tə́: Gír de gə̄ ń noō gətóon̄ kɔ̄ɔ́. Dɔ nang kə́ Asiri rāā ɓē ní adə̄ tél i ɓē yā dā̰ kə́ bembeé gə̄. De kə́ Asiri gə̄ rāān̄ kújə́ kə́ ngāl̄ ɓururu kə̄ dɔɔ́ gə̄ yā kənīnneé rɔ̄ɔ̄. Nin̄ tétə̄n̄ kújə ngol yān gə̄ nang tə́ kɔ̄ɔ́ ō, nin̄ rāān̄ adə̄ ni-tél i kɔkərɔ kə́ kán̄ dɔ naā tə́ bing ō.

¹⁴ Sḭḭ̄ to bo gə̄ kə́ dan ɓūl̄ bā bo tə́ gə̄, úniī pā yo, tām̄ loo kə́ ngan̄g ngá̰ý yāsí i kə́ nujəń kɔ̄ɔ́.

¹⁵ Loo ń noō tə́ dɔ de gə̄ a ndígə̄nal ɓē kə́ Tir bátə́ ɓāl̄ kutə sīrí, adə̄ i ɓāl̄ ń mban̄g a ndiń kə kumneé ní. Ré gír ɓāl̄ kə́ kutə sīrí gə̄ ń noō gān̄g anī, yá̰á̰ ń a rāā ɓē kə́ Tir ní, i yá̰á̰ ń rāā dəyá̰ ájə́ba kə́ kem pā ń toō tə́ ní:

¹⁶ Ḭ̄ dəyá̰ ájə́ba ń dɔ de gə̄ malang ndígə̄nal dɔí tə́ ní, ún kənde kógə̄ḿ jīí tə́ ba ī-gīr̄ gidə ɓē! Úgə kənde ādə̄ majə kə gō ń tɔ́gí asəń ní, ə̄nī pā ngá̰ý ādə̄ əgań kem de gə̄ dɔí tə́!

¹⁷ Dan ń gír ɓāl̄ kə́ kutə sīrí gə̄ gān̄g anī, Kɔ́ɔ̄ɓē a rāā yá̰á̰ kógə̄ḿ dɔ nang kə́ Tir tə́. Ɓē a tél yā kənge nar gogə́. Ni a rāā ájə́ba kə ɓē ko̰o̰ gə̄ malang kə́ dɔ nang tə́.

¹⁸ Banī manə̄n yān gə̄ ń ni a ənge ní, yá̰á̰ ń ni a ənge gírí ní, a ɔrə̄n̄ kam̄ tām̄ yā Kɔ́ɔ̄ɓē tə́. A kánə̄n̄ kə̄ dɔ naā tə́ alé, deē a ngɔ̄m̄ alé. Yá̰á̰ ń ni a ənge gírí ní, a ul̄nəń ngé ndi ta kum Kɔ́ɔ̄ɓē tə́ gə̄, a adə̄n̄neédə́ kūbə̄ kə́ majə ngá̰ý gə̄ ō.