IJAI 22 - Bibəl ta Sar̄

Tāān̄ ɓē kə́ Jerusalem

¹ Najə̄ yā wól loo kə́ deē a̰a̰ yá̰a̰ tū tə́. Sḭḭ̄ de kə́ Jerusalem gə̄, i tām̄ rí tə́ á sḭḭ̄ malang ālī dɔ kújə gə̄ tə́ dɔɔ́ ní?

² Jerusalem, i tām̄ rí tə́ á ḭ̄ i ɓē bo kə́ kōō de gə̄ kə́ kemií tə́ ɓār̄ ngá̰ý beē ō, de kə́ kemií tə́ gə̄ a̰a̰n̄ woy woy beé ō ní? De kə́ koy yāí gə̄ oyn̄ i ta rɔ̄ɔ̄ tə́ alé, i rɔ̄ɔ̄ n tɔ̄l̄də́ alé.

³ Ngol áskar yāí gə̄ malang a̰ȳn̄ naā malang ndɔ̄ naā tə́, ngé kur gərā gə̄ əhɔn̄də́ ɓəlo tə́. De gə̄ malang ń madə̄ ba̰ā̰ gə̄ əngen̄də́ ní, əhɔn̄də́ ɓəlo tə́ i naā tə́ malang, dan ń nin̄ a a̰ȳn̄ naā ní.

⁴ I tām̄ najə̄ ń toō tə́ n m-ə́dásí najə̄ ń toō ní: Ə̄ndāī kumsí gōḿ tə́ to̰ alé, ə́ya̰mī ādə̄ m̄-nōō kə wur katāá. Nujən̄ gír deē yāḿ gə̄ kɔ̄ɔ́, ba ī-lōōī nāā sɔl̄ kemḿ.

⁵ Tɔdɔ̄ Kɔ́ɔ̄ɓē, Nə́ɓā kə́ bo kə́ tɔ́gən i ngá̰ý ní, ɓōólaā əla kə yá̰á̰ kə́ a̰a̰ gō naā aĺ ō, kə rɔ̄ɔ̄ kə́ tetəjí ō, kə ɓōló ō, adə̄jí. Ndogə̄ mbal̄ kə́ bo əsō nang tə́ wól loo kə́ deē a̰a̰ yá̰a̰ tū tə́ tə́ ō, de gə̄ ɓārə́n̄ yá̰a̰ wól loo ní tə́ kadə̄ kə rāān̄ sedə́, adə̄ ndūdə́ ḭḭ kə̄ dɔɔ́ kum kə̄ rɔ̄ mbal̄ bo gə̄ tə́ ō.

⁶ Ɓūtə̄ ngé rɔ̄ɔ̄ gə̄ kə́ Elam ətōn̄ ga̰ gərā gə̄ ō, gərā gə̄ ō. Púsə rɔ̄ɔ̄ gə̄ kə́ kə ngé rɔ̄ɔ̄ gēé ton̄ ō, ngé kal̄ sə́nda gə̄ ton̄ ō. Ngé rɔ̄ɔ̄ kə́ Kir gə̄ əndān̄ dɔ der yādə́ gə̄ danaá.

⁷ Jerusalem, púsə rɔ̄ɔ̄ gə̄ taān̄ loo kem wól loo yāí kə́ majə ngá̰ý gə̄ tə́ ō, ngé kal̄ sə́nda gə̄ ndin̄ dɔ rɔ̄də́ tə́ kɔ̄ɔ́ yā kənī rɔ̄ɔ̄ ta róbə ndogə̄ yāí gə̄ tə́ ō.

⁸ Deē ngɔ̄m̄ ɓē ko̰o̰ kə́ Juda to̰ alé. Ndɔ̄ ngeé ń noō tə́ ní, sḭḭ̄ ī-tūrī kumsí kə̄ rɔ̄ yá̰a̰ rɔ̄ɔ̄ gə̄ kə́ kem kújə́ ń a ɓārə́n̄ na i ku kāgə̄ ní tə́.

⁹ Ndogə̄ mbal̄ kə́ gidə ɓē yā Dabid tə́ ń a rɔ̄ɔ̄nəń dɔ ɓē tə́ ní, loon kə́ njár̄ gə̄ ní sḭḭ̄ á̰a̰ī malang. Jóo man̄ kə́ bo kə́ gírí nang tə́ ní, sḭḭ̄ ī-ngɔ̄mī man̄ kemeé.

¹⁰ Sḭḭ̄ ī-tə́daī kutə kújə gə̄ kə́ Jerusalem, ba ndogə̄ mbal̄ kə́ yā rɔ̄ɔń dɔ ɓē tə́ ní, sḭḭ̄ ī-nujiī kújə́ kə́rēý gə̄ yā rāań kadə̄ ngan̄g.

¹¹ Sḭḭ̄ ī-rāāī bəlo kə́ yā kadə̄ man̄ aw̄ kemeé dɔ dán ndogə̄ mbal̄ kə́ jōó gə̄ tə́, tām̄ yā man̄ kə́ kem jóo man̄ kə́ bo kə́ jóó tə́ tə́. Banī deē ń rāā yá̰á̰ á yá̰a̰ gə̄ ń noō malang rāānəń yá̰á̰ ní, sḭḭ̄ ī-tūrī kumsí kə̄ rɔ̄n tə́ alé. Ni-əndā dɔ yá̰a̰ gə̄ ní danaá i jóó ngá̰ý, banī sḭḭ̄ á̰a̰ī alé.

¹² Ndɔ̄ ngeé ń noō tə́ ní, Kɔ́ɔ̄ɓē Nə́ɓā kə́ bo kə́ tɔ́gən i ngá̰ý dəjesí kadə̄ ī-nōōī ō, ə́gaī kɔŕ ō, ī-dəsāī dɔsí ō, ō̰ō̰ī kūbə̄ kəhɔ ndoō ō.

¹³ Tá loo i rɔ̄nel̄ ō, i yá̰á̰ kə́ to rɔ̄nel̄ gə̄ ō: De gə̄ tɔ̄lə̄n̄ man̄g gə̄ ō, batə̄ gə̄ ō, əsan̄ dā̰ ō, a̰ȳn̄ kasə nduú ō. Sḭḭ̄ ə́daī na: Ādə̄ j-əsaī ō, j-a̰yī ō, tām̄ j-a j-oyiī bírí!

¹⁴ Banī Kɔ́ɔ̄ɓē kə́ bo kə́ tɔ́gən i ngá̰ý ədam̄ najə̄ ń toō adə̄ m-ōō, ni-əda na: m̄-túbə, yá̰á̰ kə́ gōtə́ aĺ ń ī-rāāī toó, a mā̰ȳn̄ rɔ̄də́ dɔ tə́ yā kadə̄sí alé i bátə́ kadə̄ óyiīń. Najə̄ ń Kɔ́ɔ̄ɓē Nə́ɓā kə́ bo kə́ tɔ́gən i ngá̰ý əda ní n noó.

I gáŕ kadə̄ Sebəna nge ko̰o̰ ɓē tḭ̄ḭ̄ ta loo kəla yān

¹⁵ Kɔ́ɔ̄ɓē Nə́ɓā kə́ bo kə́ tɔ́gən i ngá̰ý ədam̄ na kə m-āw̄ kə m-ə́nge Sebəna ń i nge ngɔ̄m̄ yá̰a̰ kənge yā mban̄g ō, i kɔ́ɔ̄ kújə yā mban̄g ō ní, ba kə m-ə́dan na:

¹⁶ Ādə̄ ndērə̄n̄ bəlo dubīí loo ń toō tə́ laā, ādə̄ tə́gān̄ bəlo ní kum kə̄ dɔɔ́, ī-ndēr̄ loo kɔr̄ koō kə́ tām̄ yāí tə́ kem mbal̄ tə́. Ba yá̰a̰ yāí kə́ laā i rí? Ngééí gə̄ i laā a?

¹⁷ Ɔ́jəń na ḭ̄ i de kə́ ngan̄g. I beé ní Kɔ́ɔ̄ɓē a ənda yā kənī ta kaw̄ sa̰y. Ni a ɓírī kə kə̄lá,

¹⁸ ba a əla seí kem ɓē kógə̄ḿ kə́ bo ngá̰ý tə́ kadə̄ ā ī-ndūbə̄rū nang tə́ tītə̄ yá̰á̰ kə́ gōr̄ gong beé. Ḭ̄ ń i nge kəla rɔ̄sɔl̄ dɔ kújə yā kɔ́ɔ̄í tə́ ní, ā óy i nú, naā tə́ kə púsə rɔ̄ɔ̄ yāí kə́ majə ngá̰ý gə̄!

¹⁹ Kɔ́ɔ̄ɓē əda na: M-ā m̄-tə̄ɓāī kɔ̄ɔ́ loo kəla yāí tə́. M-ā m-ɔ̄rī kɔ̄ɔ́ loo ń ī-ra tū tə́ ní tə́.

²⁰ Ndɔ̄ ngeé ń noō tə́ ní, m-ā m̄-ɓāŕ nge kəla yāḿ Eliakim kə́ ngōn̄ Hilkia.

²¹ M-ā m-ə́la kūbə̄ yāí rɔ̄n tə́ ō, m-ā m-ə́hɔ ɓōdə̄n kə ndāŕ kəhɔ ɓōdə̄ yāí ō, m-ā m-ādə̄n tɔ́gə yāí ō. Ni a tél bɔbə̄ de kə́ Jerusalem gə̄ ō, de kə́ kem ɓē ko̰o̰ yā Juda tə́ malang ō.

²² M-ā m-ādə̄n lakélé ta kújə yā Dabid. Ré ni teē ta anī, de kə́ yā kutə̄ a gətóo. Ré ni utə̄ ta anī, de kə́ yā teē a gətóo.

²³ M-ā m-ə́lan nang tə́ tītə̄ kāgə̄ kə́ kəla nang tə́ loo kə́ ngan̄g tə́ beē ō, de gə̄ a ɔsən̄ gɔn kojə yā bɔbə̄n i kə ta kūl̄neé ō.

²⁴ De gə̄ malang kə́ kem kújə yān tə́, kə́ ngɔr ngá̰ý gə̄ aké kə́ sa̰y gə̄ ní, a naān̄ rɔ̄də́ tū yān tə́ tītə̄ ngán gájə́ yá̰a̰ rāā kəla gə̄ kə́ deē naā tū gində̄ kə́ dɔ rugə kə́ kəla kadə bɔr tə́ beé, ḭḭ dɔ bay gə̄ tə́ bátə́ ugə̄ dɔ səmbē kə́ laa gə̄ tə́. I yá̰a̰ kətō kə́ ba̰ý beé!

²⁵ Najə̄ ń Kɔ́ɔ̄ɓē kə́ bo kə́ tɔ́gən i ngá̰ý əda ní n toó: Ndɔ̄ kógə̄ḿ tə́ anī, gində̄ kə́ dɔ rugə kə́ kəla kadə bɔr tə́ ní a tetə. Tá əlan̄ gində̄ ní i loo kə́ ngan̄g tə́. Gində̄ ní a tetə ō, a əsō ō. Loo ń noō tə́ a nujən̄ yá̰á̰ ń kété ni ətō ní kɔ̄ɔ́. Tɔdɔ̄ i Kɔ́ɔ̄ɓē n ɔr̄ najə̄.