IJAI 21 - Bibəl ta Sar̄

Ɓē kə́ Babilon əsō

¹ Najə̄ yā dəla loo kə́ kadə bā bo tə́ ngɔr. Madə̄ ba̰ā̰ ḭḭ dəla loo tə́ reē, ḭḭ i kem ɓē kógə̄ḿ kə́ adə̄ de gə̄ ɓōĺ tə́ n reē, tītə̄ néĺ kə́ əla kə tɔ́gɔ́, kə́ ənda gō nang kə́ Negeb mān̄ beé.

² Kɔ́ɔ̄ɓē rāā adə̄ m-á̰á̰ yá̰á̰ kógə̄ḿ kə́ to ɓōĺ ngá̰ý: Nge ɓoo rɔ̄n tū yā madə̄n tə́ kə́ kété jóo, tél nge tél kɔ̄ɔ́ gō madə̄n tə́, nge nujə loo rāā kəla yān. Kɔ́ɔ̄ɓē əda na: Elam gə̄, ə̄nī rɔ̄ɔ̄! Sḭḭ̄ Medə gə̄, ī-gīrī gidə ɓē! M-ā m̄-rāā kadə̄ gír kɔjə rɔ̄ yān malang gān̄g.

³ I tām̄ najə̄ ń toō tə́ m̄-ndew kə̄ dūnə̄ḿ gə̄ tə́ ní. M-á̰á̰ tápə̄ tītə̄ dəyá̰ kə́ a rāā loo kojə beé. Kemḿ nujə ngá̰ý adə̄ mbīḿ oō loo alé, ndílə́ḿ a̰ȳ kɔ̄ɔ́ adə̄ kumḿ a̰a̰ loo alé.

⁴ Dɔḿ ndi kə gōó alé, ɓōĺ rāām̄ adə̄ m̄-ndew. m̄-ngóō loo kə́ loo tíbí yā kadə̄ loo sɔlə̄m̄ lɔm sḛ́ý, ba ń toō ɓáa loo kə́ ndɔ̄ɔ́ əla ɓōĺ kemḿ tə́.

⁵ De gə̄ a rāān̄ loo yá̰a̰ kəsa, selə́n̄ kūbə̄ tapīi gə̄ nang tə́, de gə̄ əsan̄ ō, a̰ȳn̄ ō. Anī kə̄ ta jī tə́ noō deē kógə̄ḿ əga kɔŕ: Go̰ rɔ̄ɔ̄ gə̄ ḭ́ḭḭ̄ dɔɔ́! Ə̄ndāī dɔ yá̰a̰ rɔ̄ɔ̄ yāsí gə̄ danaá!

⁶ Yá̰á̰ ń Kɔ́ɔ̄ɓē ədam̄ ní n toó: Āw̄ kə nge kum̄ looó ə̄ndān loo kógə̄ḿ tə́ ādə̄ um̄ loo. Ni a əda yá̰á̰ ń ni a a̰a̰ ní.

⁷ Ré ní a̰a̰ púsə rɔ̄ɔ̄ gə̄ kógə̄ḿ kə́ i sə́nda gə̄ jōó n a unən̄ aláa a̰a̰ de gə̄ dɔ kərō gə̄ tə́ aláa a̰a̰ de gə̄ dɔ jámbal gə̄ tə́ anī, majə kadə̄ əndā kumən gírí, a̰á̰ā̰ majə, kadə̄ əndā kumən gírí ngá̰ý.

⁸ Anī nge kum̄ loo əga kɔŕ əda na: Ngol, m̄-rā dɔ kújə ngɔ̄m̄ ɓē kə́ ngāl̄ ɓururu tə́ dəloí bátə́ loo tíbə dɔḿ tə́, m̄-rā loo ń m-ā m̄-ngɔ̄məń loo tə́ ní ndɔ̄ɔ́ bátə́ loo tīī dɔḿ tə́.

⁹ Á̰a̰ī, deē kógə̄ḿ a reē noó! Ndi i kem púsə rɔ̄ɔ̄ kə́ sə́nda gə̄ jōó unən̄ tə́. Ni əga kɔŕ, əda na: Ɓē kə́ Babilon əsō, ɓē kə́ Babilon əsō! Yá̰á̰ kə́ tɔ́sə̄ kum gotə nə́ɓā yān gə̄ ton̄ nang tə́ malang, tétə̄n̄ rárák kɔ̄ɔ́.

¹⁰ Gír deē yāḿ gə̄, sḭḭ̄ ń əndan̄sí tītə̄ loo kənda kōō gémē beé ndágə looó ní, yá̰á̰ ń m-ōō rɔ̄ Kɔ́ɔ̄ɓē kə́ bo kə́ tɔ́gən i ngá̰ý tə́ ní, ni ń i Nə́ɓā yā Israel ní, n noó. I najə̄ kə́ kijə ń m̄-reē kədaī tə́ ní.

Loo kə́ ndɔ̄ɔ́ i ba̰ý?

¹¹ Najə̄ yā Duma. De kógə̄ḿ ra Seir əga kɔŕ adə̄ m-ōō ndūn, ni ədam̄ na: Nge ngɔ̄m̄ loo, ə́da na i rí dɔ loo kə́ ndɔ̄ɔ́ tə́? Nge ngɔ̄m̄ loo, ə́da na i rí dɔ loo kə́ ndɔ̄ɔ́ tə́?

¹² Nge ngɔ̄m̄ loo tūr̄ əda na: Loo tīī, ba téĺ tíbə gogə́. Ré ī-gḛyiī dəje najə̄ ɓáý to̰ anī, ī-dəjeī, gō tə́ anī ī-tél ī-reēī gogə́ ndɔ̄ kə́ rang tə́ ɓáý!

Ngé ka̰ȳ naā gə̄ kə́ Dedan ō Kedar ō

¹³ Najə̄ yā dɔ nang kə́ Araba. Sḭḭ̄ ɓūtə̄ ngé njə̄rā mbā dəla loo tə́ gə̄ kə́ Dedan, āw̄ ī-toī ndɔ̄ɔ́ kem bembeé dɔ nang kə́ Araba tə́ ādə̄ loo tīī dɔsí tə́.

¹⁴ Sḭḭ̄ ń ī-ndiī Tema ní, āwī kə maná ādī ngé gə̄ ń kəndā rāādə́ ní, āwī kə yá̰a̰ kəsaá ādī ngé ka̰ȳ naā gə̄.

¹⁵ De gə̄ a̰ȳn̄ naā kɔ̄ɔ́ no rɔ̄ɔ̄ tə́, a̰ȳn̄ naā kɔ̄ɔ́ no kaskar kə́ əndān̄ dɔ danaá yā kɔsəń deē tə́ tə́, no ga̰ gərā kə́ ɔrən̄ gō yā kurəńdə́ tə́, no rɔ̄ɔ̄ kə́ təngā piling tə́.

¹⁶ Tɔdɔ̄ yá̰á̰ ń Kɔ́ɔ̄ɓē ədam̄ ní n toó: Ɓāl̄ kógə̄ḿ ta asə naā anī, yá̰a̰ malang kə́ to rī ɓār̄ yā Kedar a gətóo kɔ̄ɔ́.

¹⁷ Dan ngé rɔ̄ɔ̄ gə̄ kə́ Kedar tə́ ní, ngé kur gərā gə̄ a na̰yn̄ i sḛ́ý beē ngóy. Najə̄ ń Kɔ́ɔ̄ɓē, Nə́ɓā yā Israel, əda ní n noó.