IJAI 19 - Bibəl ta Sar̄

Kem de kə́ Ejiptə tə́ nujə sák sák kɔ̄ɔ́

¹ Najə̄ yā ɓē kə́ Ejiptə. Kɔ́ɔ̄ɓē n toó: Ni-reē dɔ nang kə́ Ejiptə tə́, al̄ i dɔ kil̄ man̄ kógə̄ḿ kə́ ngɔ̄də̄ ngá̰ý tə́. Nə́ɓā kə́ rɔ̄kum aĺ gə̄ kə́ dɔ nang kə́ Ejiptə tə́ ndewn̄ non tə́ ō, tɔ́gə de kə́ Ejiptə gə̄ ur̄ wak kɔ̄ɔ́ ō.

² Kɔ́ɔ̄ɓē əda na: M-ā m̄-tɔ́sə̄ ta kó̰n de kə́ Ejiptə gə̄ naā tə́, adə̄ nin̄ a rɔ̄ɔ̄n̄ naā ō, madə̄ naā gə̄ a rɔ̄ɔ̄n̄ naā ō, ɓē gə̄ a rɔ̄ɔ̄n̄ naā ō, ɓē ko̰o̰ gə̄ a rɔ̄ɔ̄n̄ naā ō.

³ Tɔ́gə de kə́ Ejiptə gə̄ a ur̄ wak ō, yá̰a̰ gə̄ ń nin̄ númə̄n̄ rāā ní m-ā m̄-rāā kadə̄ a a̰a̰ gō naā aĺ ō. Nin̄ a aw̄n̄ sāā tə́ rɔ̄ nə́ɓā gə̄ kə́ rɔ̄kum aĺ gə̄ tə́ ō, rɔ̄ ngé bógə̄rō de gə̄ tə́ ō, rɔ̄ ndíl de kə́ koy kɔ̄ɔ́ gə̄ tə́ ō, rɔ̄ kɔdə̄ sāā gə̄ tə́ ō.

⁴ M-ā m-ə́la dɔ ɓē kə́ Ejiptə gíŕ tɔ́gə yā ngol kógə̄ḿ kə́ kumən o̰o̰n aĺ tə́, mban̄g kógə̄ḿ kə́ nelə̄n rāā de gə̄ yá̰á̰ kə́ tōr̄ a ndi dɔn tə́. Najə̄ ń Kɔ́ɔ̄ɓē kə́ bo kə́ tɔ́gən i ngá̰ý, ni ń i ngol ō ní, əda ní n toó:

⁵ Man̄ gətóo kɔ̄ɔ́ kem kār̄ bā Nil tə́, ba ngeé ń toō iī kɔ̄ɔ́ malang.

⁶ Ngán man̄ yān gə̄ ndumən̄ kɔ̄ɔ́, man̄ kə́ kem bəlo kə́ ndēr̄ kə ngālāá gə̄ kə́ Ejiptə i ngá̰ý to̰ alé, man̄ kə́ kemdə́ gə̄ tə́ a gətóo i mbée. Mu tə̄ɓā gə̄ ō, jəngā gə̄ ō, a ndə́lēn̄ i mbée.

⁷ Mu gə̄ ń ran̄ kə gō kadə̄ bā Nil ō, ran̄ ngɔr kə̄ loo ń bā Nil a əsō kum bā bo tə́ tū tə́ ní ō, yá̰a̰ malang ń əɓa kadə bā Nil tə́ ō ní, tutə kɔ̄ɔ́. Nél ɔy aw̄ń kɔ̄ɔ́, gotə yá̰á̰ kógə̄ḿ kə́ na̰y gətóo.

⁸ Ngé ndo̰ kānjə̄ gə̄ nōōn̄ rɔ̄də́. Rɔ̄ ngé ndo̰ kum bā Nil tə́ gə̄ malang nel̄də́ alé. Tɔ́gə́ ngé kənī réng yādə́ kum man̄ tə́ gə̄ gətóo kɔ̄ɔ́.

⁹ Rɔ̄ ngé rāā kəla lḛ́ḛ gə̄ sɔl̄də́, dəyá̰ gə̄ kə́ ngé tútə kəlān gə̄ ō, dəngam gə̄ kə́ ngé kəjōn gə̄ ō ní, ton̄ tītə̄ kə́ mo̰y rāādə́ beé, tām̄ nin̄ sōlə̄n̄ ngá̰ý.

¹⁰ Tɔ́gə́ ngé kəjō kūbə̄ gə̄ gətóo, ngé kəla gə̄ malang ń nin̄ ndin̄ kə kumdə́ i kə ta kūl̄ kəla ngeé ń noō ní, əndān̄ kemdə́ dɔ yá̰á̰ kógə̄ḿ tə́ to̰ alé.

¹¹ Ngār gə̄ kə́ kem ɓē bo kə́ Soan tə́, i de kə́ kɔ̄r̄ rāādə́ gə̄. Ngé kum kedə̄ gə̄ ń adə̄n̄ mban̄g kə́ Ejiptə kɔjə̄ ní, rāān̄ rɔ̄də́ i ngé kadə̄ kɔjə̄ kə́ to mbóo gə̄ tə́. Nin̄ ədanən̄ na: Mā i ngōn̄ de kə́ ngé kum kedə̄ gə̄, ngōn̄ mban̄g gə̄ kə́ kété jóo. Nin̄ ədanən̄ najə̄ ń noō i tām̄ rí tə́?

¹² Mbang kə́ Ejiptə, ngé kum kedə̄ yāí gə̄ ní nin̄ i rá? Ādə̄ ədaīn̄ yá̰á̰ ń Kɔ́ɔ̄ɓē kə́ bo kə́ tɔ́gən i ngá̰ý gḛy rāā kə ɓē yāí ní!

¹³ Ngār gə̄ kə́ Soan télən̄ ngé kɔ̄r̄ gə̄, i ngār gə̄ kə́ kem ngán ɓē kə́ ndágá tə́ n ndɔ́rə̄n̄ ɓē kə́ Ejiptə aw̄n̄ seneé dɔ róbə́ kə́ majaĺ tə́ ní.

¹⁴ Kɔ́ɔ̄ɓē rāādə́ adə̄ dɔdə́ ndi kə gōó alé. A̰á̰ā̰, ngār gə̄ ń noō ndɔ́rə̄n̄ ɓē kə́ Ejiptə aw̄n̄ seneé dɔ róbə́ kə́ majaĺ tə́, tū yá̰a̰ rāān gə̄ tə́ malang. Ɓē kə́ Ejiptə to i tītə̄ nge kasə rāā kə́ njan əhɔ dɔ nang alé loo tōmbə̄ tə́.

¹⁵ De kə́ rāā yá̰á̰ kógə̄ḿ dɔ nang kə́ Ejiptə tə́ to̰ gətóo, dɔ aĺ ō, kə̄lá aĺ ō, ta jī kāgə̄ túmbur gə̄ aĺ ō, mu tə̄ɓā gə̄ aĺ ō.

Ta kə́ ndɔ̄ń tə́ yā ɓē kə́ Ejiptə

¹⁶ Ndɔ̄ kógə̄ḿ tə́ anī de kə́ Ejiptə gə̄ a ton̄ tītə̄ dəyá̰ gə̄ beé. Dan ń Kɔ́ɔ̄ɓē kə́ bo kə́ tɔ́gən i ngá̰ý a un jīn kə́ ɓir̄ yā kəlań ɓōĺ kemdə́ tə́ anī, ɓōĺ a rāādə́ kadə̄ a ndewn̄.

¹⁷ Ɓē kə́ Juda a tél i yá̰a̰ kəga kem dɔ yá̰á̰ tə́ kə́ to rɔ̄sɔl̄ tām̄ yādə́ tə́. Kə dɔ kɔr̄ ń a ɔr̄nəń najə̄ yā ɓē ń noō ta kumdə́ tə́ ní, ɓōĺ a rāādə́ najə̄ yā yá̰a̰ gə̄ ń Kɔ́ɔ̄ɓē kə́ bo kə́ tɔ́gən i ngá̰ý un ndūn yā rāā sedə́ tə́ ní.

¹⁸ Ndɔ̄ kógə̄ḿ tə́ anī, ɓē gə̄ ní a ton̄ dɔ nang kə́ Ejiptə tə́, ba i ta Hebəro n a ɔrə̄n̄ kem ɓē gə̄ ní tə́. De gə̄ a túbə̄n̄ kem ɓē gə̄ ní tə́, a ədan̄ na nin̄ na i de gə̄ yā Kɔ́ɔ̄ɓē kə́ bo kə́ tɔ́gən i ngá̰ý. Ɓē gə̄ ngeé ń noō ní, rī nge kə́ kógə̄ḿ na i ɓē yā mbang.

¹⁹ Ndɔ̄ kógə̄ḿ tə́ anī, loo tun̄ yá̰á̰ kə́ tām̄ yā Kɔ́ɔ̄ɓē tə́ a to kem ɓē kə́ Ejiptə tə́ dan ɓēé ō, mbal̄ kógə̄ḿ kə́ kudə tām̄ yān tə́ a ra ngɔr kə̄ kadə tə́ dɔ nin̄ ɓē kə́ Ejiptə tə́ ō.

²⁰ Nge ń noō i yá̰á̰ kə́ ɔjə kadə̄ Kɔ́ɔ̄ɓē kə́ bo kə́ tɔ́gən i ngá̰ý i kem ɓē kə́ Ejiptə tə́. Dan ń de kə́ Ejiptə gə̄ a əgan̄ kɔŕ kə̄ dɔ Kɔ́ɔ̄ɓē tə́, najə̄ yā ngé rējə̄də́ kə yá̰a̰ rāā kə́ gōtə́ aĺ tə́ anī, ni a əla kə deē kógə̄ḿ kə́ nge kajədə́ yā kadə̄də́ adə̄ a rɔ̄ɔ̄ dɔdə́ tə́ ō, a gān̄g dɔdə́ ō.

²¹ Kɔ́ɔ̄ɓē a rāā kadə̄ de kə́ Ejiptə gə̄ ger̄nən̄ ō, ndɔ̄ ngeé ń noō tə́ ní, de kə́ Ejiptə gə̄ a gerə̄n̄ Kɔ́ɔ̄ɓē ō. Nin̄ a rāān̄ kəla yā kadə̄n tām̄ a tunə̄n̄ yá̰a̰ yā kadə̄n ō, a ndējə̄nən̄ yá̰a̰ ō. Nin̄ a ənīn̄ ndūdə́ yā kadə̄ Kɔ́ɔ̄ɓē ō, a rāān̄ kadə̄ yá̰a̰ gə̄ ní reē udən̄ gíŕ kə́ rɔ̄ tə́ ō.

²² Kɔ́ɔ̄ɓē a ənda de kə́ Ejiptə tə́ gə̄. Ni a əndadə́ ba a rāādə́ kadə̄ rɔ̄də́ a ngáā. Nin̄ a télən̄ kə̄ rɔ̄ Kɔ́ɔ̄ɓē tə́ ō, Kɔ́ɔ̄ɓē a oōdə́ najə̄ yá̰á̰ ń nin̄ dəjenən̄ tə́ ní ō, ni a rāādə́ kadə̄ rɔ̄də́ a ngáā ō.

²³ Ndɔ̄ kógə̄ḿ tə́ anī, róbə́ kógə̄ḿ a ḭḭ Ejiptə yā kaw̄ Asiri. Asiri gə̄ a aw̄n̄ Ejiptə ō, de kə́ Ejiptə gə̄ a aw̄n̄ Asiri ō. Nin̄ a rāān̄ kəla naā tə́ mbak yā kadə̄ Kɔ́ɔ̄ɓē.

²⁴ Ndɔ̄ kógə̄ḿ tə́ anī, Israel i de kə́ nge ko̰ mətá ń a ənge tɔ́r̄ ta ní, naā tə́ kə Ejiptə tə́ ō, Asiri ō.

²⁵ Kɔ́ɔ̄ɓē kə́ bo kə́ tɔ́gən i ngá̰ý a tɔ́r̄ tan dɔ de kə́ dɔ nang tə́ gə̄ tə́ a əda na: m̄-tɔ́r̄ taḿ dɔ ɓē kə́ Ejiptə ń i gír deē yāḿ gə̄ ní tə́ ō, dɔ ɓē kə́ Asiri ń mə̄kɔ́ m̄-rāā kə jīḿ ní tə́ ō, dɔ Israel ń i yá̰a̰ yāḿ mə̄kɔ́ ō.