IJAI 18 - Bibəl ta Sar̄

Tāān̄ ngé kɔsə kum gotə ɓē kə́ Etiopi gə̄

¹ I yá̰á̰ kə́ to kum kaȳ aĺ kə́ ba̰ý beē tām̄ yā ɓē yā too bo gə̄ kə́ kūbə̄ yādə́ gə̄ i jōó jōó tə́, adə̄ i tām̄ yā ɓē ń to kə gō kadə bā gə̄ kə́ Etiopi ní!

² Ni-əla ngé njə̄rā mbā dɔ bā Nil tə́ kə too tə̄ɓāá gə̄! Sḭḭ̄ ngé kaw̄ kəla láẃ gə̄, ī-tél āwī gogə́ ɓēé loosí. Nápar de gə̄ yāsí gə̄ ń i de kə́ ngāl̄ gə̄ ō, ndāŕdə́ ndə́lē ō, əlan̄ ɓōĺ kem de gə̄ tə́ laā ō, kə̄ loo gə̄ tə́ malang ō ní, madə̄ ba̰ā̰də́ gə̄ ní, ī-tél āwī gogə́ kemeé.

³ Sḭḭ̄ de gə̄ malang ń ī-ndiī dɔ nang tə́ ní, sḭḭ̄ ń ī-taāī loo malang dɔ nang tə́ ní, dan ń a udən̄ yá̰á̰ kə́ ɔjə kadə̄ yá̰á̰ kógə̄ḿ a rāā yā rāā yá̰a̰ dɔ mbal̄ bo gə̄ tə́ anī, á̰a̰ī ō, dan ń a kɔ̄rə́n̄ tōw̄ gajə batə̄ anī, ōōī ō.

⁴ Tām̄ Kɔ́ɔ̄ɓē ədam̄ na: m̄-ndigə ndi loo ndiḿ tə́ ka̰a̰ń loo ō, ndi tū tə́ jəke ō, tītə̄ mbang kə́ ɔsə ngá̰ý kum loo kə́ unjə̄ kow tə́ beē ō, tītə̄ tal kə́ to tītə̄ kil̄ man̄ dan yā sāā kōō gə̄ tə́ beē.

⁵ Kété no kəja kan̄ nduú tə́, dan ń kāgə̄ nduú hútə̄ ní, dan ń hútən gə̄ télən̄ dɔ bəra nduú gə̄ kə́ a kərēn̄ i mbéé ní, tə́jān̄ ta jīn kə́ teē yá̰a̰ aĺ gə̄ kɔ̄ɔ́ ō, ta jīn gə̄ kə́ a sitə gə̄ kɔ̄ɔ́ ō, mbīn gə̄ kɔ̄ɔ́ ō, kə yá̰á̰ tə́jā yá̰á̰ kógə̄ḿ.

⁶ Yā Etiopi gə̄ i tītə̄ ń noó ō, a əya̰n̄də́ kɔ̄ɔ́ yā kadə̄ kə̄rō gə̄ kə́ dɔ mbal̄ bo gə̄ tə́ ō, dā̰ kə́ kem bembeé gə̄ ō. Kə̄rō gə̄ a əsan̄də́ dan kə́ majə tə́ ō, dā̰ kə́ bembeé gə̄ a əsan̄də́ dan kə́ majaĺ tə́ ō.

⁷ Loo ń noō tə́ a reēn̄ kə yá̰a̰ ndējə̄ gə̄ yā kadə̄ Kɔ́ɔ̄ɓē kə́ bo kə́ tɔ́gən i ngá̰ý. Yá̰a̰ ndējə̄ gə̄ ní, i yā nápar de gə̄ kə́ ngāl̄ gə̄ ń toō, ń i nápar de gə̄ kə́ ndāŕdə́ ndə́lē ō, de gə̄ ɓōlə́n̄də́ laā ō, kə̄ loo gə̄ tə́ ō, tɔ́gə́də́ i ngá̰ý adə̄ nin̄ rējə̄n̄ madə̄ ba̰ā̰də́ gə̄ ō, ndin̄ i kem ɓē kə́ bā gə̄ əndan̄ dan gāngə̄n̄ tə́ ō ní. A reēn̄ kə yá̰a̰ ndējə̄ gə̄ ní i dɔ mbal̄ bo kə́ Siyo̰ tə́, loo ń Kɔ́ɔ̄ɓē kə́ bo kə́ tɔ́gən i ngá̰ý ndi tū tə́ ní tə́.