IJAI 17 - Bibəl ta Sar̄

Ɓē ko̰o̰ kə́ Damas ō, kə́ Israel ō a aw̄n̄ i kə̄ kəsōó

¹ Najə̄ yā ɓē kə́ Damas. Sḛ́ý to̰ anī Damas i ɓē bo to̰ alé, ni i kɔkərɔ kə́ kán̄ dɔ naā tə́ ngóy.

² Ɓē bo gə̄ ń ndin̄ i kə ta kūl̄neé ní, a əya̰n̄də́ kɔ̄ɔ́ i kə́ njɔ́ḿ gə̄ tə́. Nin̄ i tām̄ yā ɓūtə̄ yá̰a̰ kul̄ gə̄ tə́. Ɓūtə̄ yá̰a̰ kul̄ gə̄ a ndin̄ tū tə́ ō, de kə́ yā njə́ɓādə́ a gətóo ō.

³ Ndogə̄ mbal̄ kə́ yā rɔ̄ɔń dɔ ɓē tə́ a gətóo dɔ nang kə́ Epəraim tə́. Mban̄g a gətóo Damas. Gotə de kə́ Aram gə̄ ń a na̰yn̄ ní, a tɔyn̄ Israel gə̄ alé. Najə̄ ń Kɔ́ɔ̄ɓē kə́ bo kə́ tɔ́gən i ngá̰ý əda ní n noó.

⁴ Ndɔ̄ ngeé ń noō tə́ ní, bo yā Israel a tél kə̄ nang tə́, kɔȳn i ngá̰ý to̰ alé.

⁵ A to i tītə̄ dan ń gír sāā kōō gān̄g kɔ̄ɔ́ ní beé, dan ń nge ndɔr̄ ɔy kōō gémē yān kɔ̄ɔ́ ō, ɔsə nja dɔ do̰ō̰ kōō gémē kə̄ naā tə́ kɔ̄ɔ́ ō ní beē. A to i tītə̄ wól loo yā Repay gə̄ kə́ gō kəja kōō tə́ beē.

⁶ I yá̰á̰ kə́ ngá̰ý aĺ n a na̰y gotə Israel tə́ ní. Ɓē ngeé ń toō a to tītə̄ kāgə̄ olibə kə́ əjan̄ kanə̄n kɔ̄ɔ́ beē. Na̰y kanə̄n gə̄ i jōó aláa mətá jam kāgāá dɔɔ́ ō, na̰y i sɔ́ aláa mí tū ta jīn gə̄ tə́. Najə̄ ń Kɔ́ɔ̄ɓē Nə́ɓā yā Israel əda ní n noó.

⁷ Ndɔ̄ ngeé ń noō tə́ ní, deē ndul gə̄ a tūrə̄n̄ kumdə́ kə̄ rɔ̄ nge rāādə́ tə́, a unən̄ kumdə́ kə̄ dɔɔ́, kum kə̄ rɔ̄ Nə́ɓā kə́ táĺ yā Israel tə́.

⁸ Nin̄ a tūrə̄n̄ kumdə́ kə̄ loo tun̄ yá̰a̰ gə̄ ń nin̄ kɔ́ gə̄ rāān̄ tə́ ní alé. Kāgə̄ kə́ kudə kə́ yā ɓōĺ gidə gə̄ ō, loo róō ndujə̄ yá̰á̰ kə́ kotə majə gə̄ ō ń nin̄ kɔ́ gə̄ rāān̄ kə jīdə́ ní, nin̄ a̰a̰n̄ to̰ alé.

⁹ Ndɔ̄ ngeé ń noō tə́ ní, ɓē bo gə̄ ń ngɔ̄mə̄n̄də́ majə dɔ nang kə́ Israel tə́ ní, a télən̄ i loo kə́ nujə sák sák. Tām̄ a əya̰n̄də́ kɔ̄ɔ́ tītə̄ ń kété əya̰nə̄ń ɓē bo gə̄ yā Hibi gə̄ ō, yā Amor gə̄ ō kɔ̄ɔ́ ta rēē ngán Israel gə̄ tə́ ní.

¹⁰ Israel, dɔí ndígə̄nal Nə́ɓā kə́ nge kajiī. Mbal̄ ń ngɔ̄mī ní, əga kemií dɔn tə́ alé, i tām̄ najə̄ ń toō tə́ n ī-rāā adə̄ kāgə̄ kə́ nel̄ gə̄ əɓan̄ ō, ī-dubə̄ kum yá̰á̰ kə́ mbā gə̄ ō ní.

¹¹ Ḭ̄-á̰á̰də́ loo kəɓa tə́ ndɔ̄ ń ī-dubə̄ńdə́ tə́ ní. Yá̰á̰ ń ī-dubə̄ dəloí ní, hútə̄ kə ndɔ̄ nəkɔ́ ń noō tə́. Ba dan ń mo̰y reē anī, loo sāā kōō gətóo kɔ̄ɔ́ ō, i rɔ̄ tōr̄ kə́ dáwán gətóo ō.

Gír de gə̄ do̰o̰n̄ rɔ̄ɔ̄

¹² I yá̰á̰ kə́ to kum kaȳ aĺ kə́ ba̰ý beē! Nápar de kə́ ngá̰ý gə̄ ń toó, kōōdə́ ɓār̄ tītə̄ kōō bā bo gə̄ beé. Kōō do̰ rɔ̄ɔ̄ yādə́ ɓār̄ tītə̄ kōō bəngál bā bo kə́ ḭḭ kə tɔ́gɔ́ ngá̰ý beē.

¹³ Kōō do̰ rɔ̄ɔ̄ yā nápar de gə̄ ɓār̄ tītə̄ kōō bā bo gə̄ beé. Kɔ́ɔ̄ɓē əla ɓōĺ kemdə́ tə́, anī nin̄ a̰ȳ aw̄n̄ sa̰y. Tə̄ɓān̄də́ tītə̄ mu kə́ néĺ kə́ dɔ mbal̄ bo gə̄ tə́ tə̄ɓān aw̄ seneé beē, tītə̄ bumbə́rú kə́ əga nding kə́ nél mān̄ tə̄ɓān kɔ̄ɔ́ beē.

¹⁴ Loo tíbí anī, i ɓōĺ kógə̄ḿ kə́ to ɓōĺ ngá̰ý, kété pá tá kadə̄ loo tīī anī, nin̄ gətóon̄ kɔ̄ɔ́ malang. Yá̰á̰ ń a rāā ngé gə̄ ń ɔyn̄ yá̰a̰ yājí malang kɔ̄ɔ́ ní n noó, yá̰á̰ ń ngé kɔy yá̰a̰ yājí dɔ gúú tə́ gə̄ a əngen̄ ní n noó. pá tá kadə̄ loo tīī ní, yá̰á̰ kógə̄ḿ kə́ na gətóo ō.